《綠色短評》

 | | | 轉寄

中國「武統台灣」ná ē lú hoah lú細聲？

作者 李南衡, ChoânTâijī/全台字 by Chng Hūiphêng 2023.06.04

Choânbîn Tâioânjī pán/全民台灣字版簡稱ChoânTâiJī


《 Le̍ksek toánphêng 》　　 Lí Lâmhêng

　　 Tiongkok "búthóng Tâioân" ná ē lú hoah lú sèsiaⁿ?

　　 Gō͘goe̍h jīsì, Tiongkok Kokbîntóng tiàukhui kìchiáhōe, kóng mênî tōasoán sī chiàncheng kah hôpêng soánkí, phoephêng Chhòa Engbûn chóngthóng kah Lōa Chhengtek hù chóngthóng sī "chiàncheng hoàná" ê kiōng hoān kiatkò͘. Chhiò sílâng! "chiàncheng hoàná" sī Tiongkok, chi̍t ji̍t kàu àm kah "chiàncheng hoàná" sái ba̍kbóe·ê chiàⁿ sī Tiongkok Kokbîntóng. Tiongkok chitê "chiàncheng hoàná" itti̍t hoah kóng beh ēng búle̍k thóngit Tâioân ("búthóng Tâioân"), kiaⁿ lán Tâioânlâng bô ài siongsìn, Tiongkok kunki kunlām làng sî bô làng ji̍t lâi lán Tâioân Hângkhong Sekpia̍t Hhu kah Háikiap Tiongsòaⁿ hūkīn jiáuloān. Chòekīn "búthóng Tâioân" ê siaⁿim ná ē lú lâi lú sèsiaⁿ?

　　 Tiongkok ê khongkhì ná ē piàn hiah kín? Tiongkok thâulâng kúi nî lâi káⁿ m̄ sī itti̍t kiôngtiāu, Tiongkok bô beh hòngkhì ēng búle̍k phah Tâioân. Nn̄g kò͘ goe̍h chêng, Tiongkok Káihòngkun siōngchiong Lâu Achiu hoatpiáu chi̍t phiⁿ 《Κimmn̂g chiànek kiámthó 》, Κimmn̂g Ēmn̂g hiahni̍h kīn, Tiongkok to̍h phah bē iâⁿ, keh chi̍tê Tâioân háikiap pêngkin ū 180 konglí khoah, siōng e̍h ê ūi mā iáu ū 128 konglí khoah, Tiongkok Káihòngkun sī beh ánchóaⁿ phah Tâioân leh? ánne sé bīn oânchoân sī gāi tio̍h 習近平 ê phīⁿ! lia̍h·khílâi, náchhiūⁿ iáu bōe phòaⁿ hêng. Chiah kòe nn̄g kò͘ goe̍h, Tiongkok tio̍h ēsái mē kóng beh "búthóng Tâioân" ê lâng sī gōnglâng ásī siáⁿmi̍h pháiⁿ sim.

　　Chit saⁿ nî Búhàn hìiām, hāi Tiongkok kengchè hoattián thêngtùn, gōakok chhiúⁿsiong tōa thiatthè, cháu liáuliáu. Tùi Tiongkok kengchè hoattián tongjiân tōa siong. Tēhng chènghú hū chè lúilúi, tēhng gînhâng khiàm jînbîn chîⁿ bôchâitiāu hêng, jînbîn oànsiaⁿ sù khí. Chòekīn Búhàn hìiām koh hoatsio·khílâi, chiàu Tiongkok choanka Chiong Lâmsan kóng, kàu gō͘goe̍h té, pêngkin múi lépài ē ū 4,000 bān lâng khakchín, kàu la̍kgoe̍h té, pêngkin múi lépài ē ū 6,500 bān lâng khakchín. Chit nn̄g nî, Bíkok kakiông kasok búchong Tâioân. Hiānhiān khòaⁿ sèkài tējī tōa kunsū kiôngkok Gôlô, phah chi̍tê siósió ê 烏克蘭, goânpún siūⁿ kóng chiàmniá 烏克蘭náchhiūⁿ tohténg ni kam, bô siūⁿ tioh chiahni̍h khùnlân, ni kam ê chhiú hiámhiámá hông tok·khì. Tiongkok tongjiân ū tehkhòaⁿ, Gôlô khì 烏克蘭ê lō͘ pêⁿ tháⁿtháⁿ, to̍h phah kah chiah kankhó͘, hôhòng Tiongkok Tâioân keh chi̍tê Tâioân háikiap?

　　 Choân sèkài bînchú kokka ê hōegī lóng ē thêkhí, Tâioân háikiap ū tāichì, tio̍h sī sèkài ê tāichì. Náchhiūⁿ lóng sī kóng chin ê. Tiongkok bēsái tèⁿ m̄chai.

　　 Tiongkok chit kúi nî itti̍t soanthoân, hō͘ Tiongkok jînbîn siongsìn búthóng Tâioân ê chiàncheng ittēng ē hoatseng. Búthóng Tâioân chhá liáu siuⁿkòe thâu, gō͘goe̍h chhe, Tiongkok thiaukang hō͘ Tiongkok khólêng ē hāmji̍p"sì bīn chokchiàn" ê bûnchiuⁿ tī bānglō͘ téngbīn ti̍tti̍t thôaⁿ. Bûnchiuⁿ kóng Tiongkok nā "búthóng Tâioân", Tiongkok sûisî tio̍h bīntùi sì tiâu chiànsòaⁿ, tē 1 tiâu chiànsòaⁿ tī Tâioân háikiap, kah Bíkok, Tâioân, Ji̍tpún ê búchong le̍kliōng chiàntàu. Tē 2 tiâu chiànsòaⁿ tī tangpakhong, Bíkok khólêng liânha̍p Hânkok hiòng Tiongkok tangpak kongkek. Tē 3 tiâu chiànsòaⁿ tī Lâmhái, Bíkok khólêng liânha̍p Huilu̍tpin, sīmchì Òchiu kah Tanglâma kokka tùi Τiongkiōng kongkek. Tē 4 tiâu chiànsòaⁿ tī sailâmhong, Ìntō͘ khólêng ē thàn Tiongkok hāmji̍p chiànkio̍k lâi chìnkong TiongÌn piankéng.

　　 Lán bô kiaⁿ Tiongkok phah Tâioân. Siōng kiaⁿ Tâioân lâng bô kângsim. Chinchiàⁿ thoânkiat khílâi, siáⁿmi̍h mā m̄ kiaⁿ! (230526)

Chù, 習近平 烏克蘭 chhiáⁿ liām Hôagí


Pe̍h-ōe-jī-pán/白話字版

《 Le̍k-sek toán-phêng 》　　 Lí Lâm-hêng

　　 Tiong-kok "bú-thóng Tâi-oân" ná ē lú hoah lú sè-siaⁿ?

　　 Gō͘-goe̍h jī-sì, Tiong-kok Kok-bîn-tóng tiàu-khui kì-chiá-hōe, kóng mê-nî tōa-soán sī chiàn-cheng kah hô-pêng soán-kí, phoe-phêng Chhòa Eng-bûn chóng-thóng kah Lōa Chheng-tek hù chóng-thóng sī "chiàn-cheng hoàn-á" ê kiōng hoān kiat-kò͘. Chhiò sí-lâng! "chiàn-cheng hoàn-á" sī Tiong-kok, chi̍t ji̍t kàu àm kah "chiàn-cheng hoàn-á" sái ba̍k-bóe-·ê chiàⁿ sī Tiong-kok Kok-bîn-tóng. Tiong-kok chit-ê "chiàn-cheng hoàn-á" it-ti̍t hoah kóng beh ēng bú-le̍k thóng-it Tâi-oân ("bú-thóng Tâi-oân"), kiaⁿ lán Tâi-oân-lâng bô ài siong-sìn, Tiong-kok kun-ki kun-lām làng sî bô làng ji̍t lâi lán Tâi-oân Hâng-khong Sek-pia̍t Hhu kah Hái-kiap Tiong-sòaⁿ hū-kīn jiáu-loān. Chòe-kīn "bú-thóng Tâi-oân" ê siaⁿ-im ná ē lú lâi lú sè-siaⁿ?

　　 Tiong-kok ê khong-khì ná ē piàn hiah kín? Tiong-kok thâu-lâng kúi nî lâi káⁿ m̄ sī it-ti̍t kiông-tiāu, Tiong-kok bô beh hòng-khì ēng bú-le̍k phah Tâi-oân. Nn̄g kò͘ goe̍h chêng, Tiong-kok Kái-hòng-kun siōng-chiong Lâu A-chiu hoat-piáu chi̍t phiⁿ 《Κim-mn̂g chiàn-ek kiám-thó 》, Κim-mn̂g Ē-mn̂g hiah-ni̍h kīn, Tiong-kok to̍h phah bē iâⁿ, keh chi̍t-ê Tâi-oân hái-kiap pêng-kin ū 180 kong-lí khoah, siōng e̍h ê ūi mā iáu ū 128 kong-lí khoah, Tiong-kok Kái-hòng-kun sī beh án-chóaⁿ phah Tâi-oân leh? án-ne sé bīn oân-choân sī gāi tio̍h 習近平 ê phīⁿ! lia̍h-·khí-lâi, ná-chhiūⁿ iáu bōe phòaⁿ hêng. Chiah kòe nn̄g kò͘ goe̍h, Tiong-kok tio̍h ē-sái mē kóng beh "bú-thóng Tâi-oân" ê lâng sī gōng-lâng á-sī siáⁿ-mi̍h pháiⁿ sim.

　　Chit saⁿ nî Bú-hàn hì-iām, hāi Tiong-kok keng-chè hoat-tián thêng-tùn, gōa-kok chhiúⁿ-siong tōa thiat-thè, cháu liáu-liáu. Tùi Tiong-kok keng-chè hoat-tián tong-jiân tōa siong. Tē-hng chèng-hú hū chè lúi-lúi, tē-hng gîn-hâng khiàm jîn-bîn chîⁿ bô-châi-tiāu hêng, jîn-bîn oàn-siaⁿ sù khí. Chòe-kīn Bú-hàn hì-iām koh hoat-sio-·khí-lâi, chiàu Tiong-kok choan-ka Chiong Lâm-san kóng, kàu gō͘-goe̍h té, pêng-kin múi lé-pài ē ū 4,000 bān lâng khak-chín, kàu la̍k-goe̍h té, pêng-kin múi lé-pài ē ū 6,500 bān lâng khak-chín. Chit nn̄g nî, Bí-kok ka-kiông ka-sok bú-chong Tâi-oân. Hiān-hiān khòaⁿ sè-kài tē-jī tōa kun-sū kiông-kok Gô-lô, phah chi̍t-ê sió-sió ê 烏克蘭, goân-pún siūⁿ kóng chiàm-niá 烏克蘭ná-chhiūⁿ toh-téng ni kam, bô siūⁿ tioh chiah-ni̍h khùn-lân, ni kam ê chhiú hiám-hiám-á hông tok-·khì. Tiong-kok tong-jiân ū teh-khòaⁿ, Gô-lô khì 烏克蘭ê lō͘ pêⁿ tháⁿ-tháⁿ, to̍h phah kah chiah kan-khó͘, hô-hòng Tiong-kok Tâi-oân keh chi̍t-ê Tâi-oân hái-kiap?

　　 Choân sè-kài bîn-chú kok-ka ê hōe-gī lóng ē thê-khí, Tâi-oân hái-kiap ū tāi-chì, tio̍h sī sè-kài ê tāi-chì. Ná-chhiūⁿ lóng sī kóng chin ê. Tiong-kok bē-sái tèⁿ m̄-chai.

　　 Tiong-kok chit kúi nî it-ti̍t soan-thoân, hō͘ Tiong-kok jîn-bîn siong-sìn bú-thóng Tâi-oân ê chiàn-cheng it-tēng ē hoat-seng. Bú-thóng Tâi-oân chhá liáu siuⁿ-kòe thâu, gō͘-goe̍h chhe, Tiong-kok thiau-kang hō͘ Tiong-kok khó-lêng ē hām-ji̍p"sì bīn chok-chiàn" ê bûn-chiuⁿ tī bāng-lō͘ téng-bīn ti̍t-ti̍t thôaⁿ. Bûn-chiuⁿ kóng Tiong-kok nā "bú-thóng Tâi-oân", Tiong-kok sûi-sî tio̍h bīn-tùi sì tiâu chiàn-sòaⁿ, tē 1 tiâu chiàn-sòaⁿ tī Tâi-oân hái-kiap, kah Bí-kok, Tâi-oân, Ji̍t-pún ê bú-chong le̍k-liōng chiàn-tàu. Tē 2 tiâu chiàn-sòaⁿ tī tang-pak-hong, Bí-kok khó-lêng liân-ha̍p Hân-kok hiòng Tiong-kok tang-pak kong-kek. Tē 3 tiâu chiàn-sòaⁿ tī Lâm-hái, Bí-kok khó-lêng liân-ha̍p Hui-lu̍t-pin, sīm-chì Ò-chiu kah Tang-lâm-a kok-ka tùi Τiong-kiōng kong-kek. Tē 4 tiâu chiàn-sòaⁿ tī sai-lâm-hong, Ìn-tō͘ khó-lêng ē thàn Tiong-kok hām-ji̍p chiàn-kio̍k lâi chìn-kong Tiong-Ìn pian-kéng.

　　 Lán bô kiaⁿ Tiong-kok phah Tâi-oân. Siōng kiaⁿ Tâi-oân lâng bô kâng-sim. Chin-chiàⁿ thoân-kiat khí-lâi, siáⁿ-mi̍h mā m̄ kiaⁿ! (230526)

Chù, 習近平 烏克蘭 chhiáⁿ liām Hôa-gí




　　五月二四，中國國民黨召開記者會，講明年大選是戰爭kah和平選舉，批評蔡英文總統kah賴清德副總統是「戰爭販á」ê共犯結構。笑死人！「戰爭販á」是中國，一日到暗kah「戰爭販á」sái目尾ê正是中國國民黨。中國chit-ê「戰爭販á」一直hoah講beh用武力統一台灣（「武統台灣」），驚咱台灣人無ài相信，中國軍機軍艦làng時無làng日來咱台灣航空識別區kah海峽中線附近擾亂。最近「武統台灣」ê聲音ná ē lú來lú細聲？

　　中國ê空氣ná ē變hiah緊？中國頭人幾年來敢m̄是一直強調，中國無beh放棄用武力拍台灣。兩個月前，中國解放軍上將劉亞洲發表一篇《金門戰役檢討》，金門廈門hiah-ni̍h近，中國to̍h拍bē贏，隔一個台灣海峽平均有180公里闊，上狹ê位mā猶有128公里闊，中國解放軍是beh按怎拍台灣leh？按呢洗面完全是礙tio̍h習近平ê鼻！掠起來，ná-chhiūⁿ猶未判刑。才過兩個月，中國tio̍hē-sái罵講beh「武統台灣」ê人是戇人抑是啥物pháiⁿ心。

　　Chit三年武漢肺炎，害中國經濟發展停頓，外國廠商大撤退、走了了。對中國經濟發展當然大傷。地方政府負債累累，地方銀行欠人民錢無才調還，人民怨聲四起。最近武漢肺炎koh發燒起來，照中國專家鍾南山講：到五月底，平均每禮拜ē有4,000萬人確診、到六月底，平均每禮拜ē有6,500萬人確診。Chit兩年，美國加強加速武裝台灣。現現看世界第二大軍事強國俄羅，拍一個小小ê烏克蘭，原本想講佔領烏克蘭ná-chhiūⁿ桌頂ni柑，無想tioh chiah-ni̍h困難、ni柑ê手險險á hông剁去。中國當然有teh看，俄羅去烏克蘭ê路平坦坦，to̍h拍kah chiah艱苦，何況中國台灣隔一个台灣海峽？

　　全世界民主國家ê會議lóng -ē提起，台灣海峽有代誌，tio̍h是世界ê代誌。Ná-chhiūⁿ lóng是講真ê。中國bē-sái tèⁿ m̄知。

　　中國chit幾年一直宣傳，hō͘中國人民相信武統台灣ê戰爭一定-ē發生。武統台灣炒了siuⁿ過頭，五月初，中國thiau工hō͘中國可能ē陷入「四面作戰」ê文章tī網路頂面直直傳。文章講中國若「武統台灣」，中國隨時tio̍h面對四條戰線：第1條戰線tī台灣海峽，kah美國、台灣、日本ê武裝力量戰鬥。第2條戰線tī東北方，美國可能聯合韓國向中國東北攻擊。第3條戰線tī南海，美國可能聯合菲律賓，甚至澳洲kah東南亞國家對中共攻擊。第4條戰線tī西南方，印度可能ē趁中國陷入戰局來進攻中印邊境。

　　咱無驚中國拍台灣。上驚台灣人無仝心。真正團結起來，啥物mā m̄驚！ (230526)

註：習近平　　烏克蘭　　　請唸華語