《綠色短評》

 | | | 轉寄

Tang時á郭台銘chiah ē轉大人？

作者 李南衡, ChoânTâijī/全台字 by Chng Hūiphêng 2023.05.28




Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》 Lí Lâmhêng

Tangsîá Koeh Tâibêng chiah ē tńgtōalâng?

　　 jīgoe̍h cha̍psì ēpo͘, Hónghái chhòngpānjîn Koeh Tâibêng kah li̍phoatīⁿ chêng īⁿtiúⁿ Ông Kimpêng hōebiān liáuāu, chiapsiū mûithé hóngbūn ê sî piáusī, khólêng 4 nî chêng i 年輕氣盛, chi̍tsî ê chhiongtōng, chiah ē khì thèchhut Tiongkok Kokbîntóng. 年輕氣盛, sī kóng lâng ū khah siàuliân, hia̍tkhì khah ōng. Chò tāichì khah chhongpōng. Kîkoài, ná ē kà bē ē, 4 nî āu Koeh táng kāngkhoán hiahni̍h 年輕氣盛.

　　 Lán m̄ káⁿ sûipiān kóng Bînchiòngtóng chúse̍k Koa Bûntiat sī lāu hô͘lî, tānsī sió hô͘lî i choa̍ttùi tamtng ē khí. Koeh táng choân Tâioân cháu thàuthàu, pān kòe kúi tiûⁿ tōa hêng àmhōe, gō͘goe̍h chhecha̍p, tī phêⁿô͘ chōsè liáuāu, àmsî cha̍p tiám kóaⁿ tńglâi Tāipak kiû kìⁿ Koa Bûntiat chúse̍k, lâikàu chhù·ni̍h, Koa chúse̍k tēit kù ōe tio̍hkóng,"lí liân Kokbîntóng ê iûhì kuichek to m̄chai, tio̍h khì chhamka písài! "tējī kang,Koa chúse̍k thàulō͘, Koeh táng kā i kóng, Tiongkok Kokbîntóng chengtiàu i ê khólêngsèng ū 80%. Koeh táng iûgoân 年輕氣盛!

Gō͘goe̍h chheit, Koeh Tâibêng tī Kohiông kóng ētàng tī "Pòaⁿpînsoaⁿ siat hu̍ttiān chām, anchoân hoattiān póchèng thàn chîⁿ", hông mē kah chhàuthâu, tējī kang kín hōe sitlé, iáu m̄ goān soah·khì, i kóng,"siatsú sióhêng lênggoân théchek kantaⁿ ū cha̍phun chi it, iūkoh chin anchoân, sī m̄ sī múi chi̍tê koānchhī lóng tio̍h khì chhōe anchoân ê hu̍t iôngha̍p ê tiānchhiúⁿ?" i chinchiàⁿ m̄ kiaⁿ Sinpak chhītiúⁿ Hâu Iúgî mn̄g i, hu̍t hùiliāu beh khǹg tó khì?

　　 Gō͘goe̍h chheit, Koeh táng tī Kohiông iánkáng ê sî kóng, beh tī saⁿ nî lāi kā kikhìlâng sángia̍p chò·khílâi, phài 8 bān kikhìlâng tíkhòng Kiōngkun ê ji̍p chhim. Koeh táng ê kikhìlâng sánphín, bo̍kchêng sī Siōnghái A kó͘ chiūⁿchhī ê "Kanggia̍p Pùliân"chèchō·ê. Lán seng mài kóng Hônghái kikhìlâng sī m̄ sī ū chiàntàula̍t, lán seng mn̄g Koeh táng, Tiongkok ná ē ínchún lí kā Siōnghái chèchō ê kikhìlâng ūn lâi Tâioân, kah Tiongkok Káihòngkun sio chiàn? siatsú Tiongkok ínchún lí ūn 8 bān kikhìlâng lâi Tâioân, tī Tâioân ê kikhìlâng káⁿ m̄ sī lóng ē siūtio̍h Tiongkok khòngchè? Beh ánchóaⁿ sio chiàn? Koeh támg íkeng m̄ sī 年輕氣盛 ê būntê, sī káⁿ ū hoatsio?

　　Sìgoe̍h jījī, Koeh táng piáusī, tùihōaⁿ ū chin chē kunki jiáuloān Tâioân, sī chiamtùi Bînchìntóng "būsi̍t Tâito̍k kangchokchiá". Lán ài hôpêng, siongsìn tùihōaⁿ mā sī ài hôpêng, in ê kuntūi mā bô goānì sio chiàn, jînbîn mā bô goānì sio chiàn. Só͘í chíiàu Kokbîntóng, sīmchì i Koeh Tâibêng tòngsoán, kunki tio̍h bē koh lâi,"inūi góa put to̍k, lí put bú, goán tio̍h sī Tionghôa Bînkok", chíiàu Tionghôa Bînkok kokkî giâ koânkoân, chhiùⁿ Tionghôa Bînkok kokkoa,"góa kámkak in tio̍h bē lâi". Sió thêng leh! lán chaiiáⁿ 1958 nî pehgoe̍h jīsaⁿ ēpo͘ 6 tiám 30 pun, Tiongkok jînbîn Káihòngkun khaisí phàu phah Κimmn̂g,"Patjīsan Phàuchiàn" khaisí, itti̍t phah kàu 1979 nî chiah chèngsek thêng chiàn. Lán kok siongbông koaⁿpeng ū 2,661 lâng. Τiongkiōng phàu phah Κimmn̂g hit tongsî ê chipchèngchiá sī Tiongkok Kokbîntóng ê Chiúⁿ Κàichio̍h chóngthóng, siōng kài hoántùi Tâioân to̍kli̍p. Sī ánchóaⁿ nā ōaⁿ Tiongkok Kokbîntóng chipchèng á·sī Koeh táng choh chóngthóng, Tiongkok káihòng kun tio̍h bē phah Tâioân? Koeh táng kóng chiahê ōe íkeng pí 年輕氣盛 koh khah siàuliân, chhaputto sī gō͘ hòe gíná kóng ê ōe.

Koeh 董hông phiàn nn̄g piàn, lú phiàn lú nîkhin. M̄ chai tang sîá Koeh Tâibêng chiah ē tńgtōalâng? 　(230519)

Chù, 年輕氣盛 chhiáⁿ liām Hôagí


Pe̍h-ōe-jī-pán/白話字版


《 Le̍k-sek toán-phêng 》 Lí Lâm-hêng

Tang-sî-á Koeh Tâi-bêng chiah ē tńg-tōa-lâng?

　　 jī-goe̍h cha̍p-sì ē-po͘, Hóng-hái chhòng-pān-jîn Koeh Tâi-bêng kah li̍p-hoat-īⁿ chêng īⁿ-tiúⁿ Ông Kim-pêng hōe-biān liáu-āu, chiap-siū mûi-thé hóng-būn ê sî piáu-sī, khó-lêng 4 nî chêng i 年輕氣盛, chi̍t-sî ê chhiong-tōng, chiah ē khì thè-chhut Tiong-kok Kok-bîn-tóng. 年輕氣盛, sī kóng lâng ū khah siàu-liân, hia̍t-khì khah ōng. Chò tāi-chì khah chhong-pōng. Kî-koài, ná ē kà bē ē, 4 nî āu Koeh táng kāng-khoán hiah-ni̍h 年輕氣盛.

　　 Lán m̄ káⁿ sûi-piān kóng Bîn-chiòng-tóng chú-se̍k Koa Bûn-tiat sī lāu hô͘-lî, tān-sī sió hô͘-lî i choa̍t-tùi tam-tng ē khí. Koeh táng choân Tâi-oân cháu thàu-thàu, pān kòe kúi tiûⁿ tōa hêng àm-hōe, gō͘-goe̍h chhe-cha̍p, tī phêⁿ-ô͘ chō-sè liáu-āu, àm-sî cha̍p tiám kóaⁿ tńg-lâi Tāi-pak kiû kìⁿ Koa Bûn-tiat chú-se̍k, lâi-kàu chhù-·ni̍h, Koa chú-se̍k tē-it kù ōe tio̍h-kóng,"lí liân Kok-bîn-tóng ê iû-hì kui-chek to m̄-chai, tio̍h khì chham-ka pí-sài! "tē-jī kang,Koa chú-se̍k thàu-lō͘, Koeh táng kā i kóng, Tiong-kok Kok-bîn-tóng cheng-tiàu i ê khó-lêng-sèng ū 80%. Koeh táng iû-goân 年輕氣盛!

Gō͘-goe̍h chhe-it, Koeh Tâi-bêng tī Ko-hiông kóng ē-tàng tī "Pòaⁿ-pîn-soaⁿ siat hu̍t-tiān chām, an-choân hoat-tiān pó-chèng thàn chîⁿ", hông mē kah chhàu-thâu, tē-jī kang kín hōe sit-lé, iáu m̄ goān soah-·khì, i kóng,"siat-sú sió-hêng lêng-goân thé-chek kan-taⁿ ū cha̍p-hun chi it, iū-koh chin an-choân, sī m̄ sī múi chi̍t-ê koān-chhī lóng tio̍h khì chhōe an-choân ê hu̍t iông-ha̍p ê tiān-chhiúⁿ?" i chin-chiàⁿ m̄ kiaⁿ Sin-pak chhī-tiúⁿ Hâu Iú-gî mn̄g i, hu̍t hùi-liāu beh khǹg tó khì?

　　 Gō͘-goe̍h chhe-it, Koeh táng tī Ko-hiông ián-káng ê sî kóng, beh tī saⁿ nî lāi kā ki-khì-lâng sán-gia̍p chò-·khí-lâi, phài 8 bān ki-khì-lâng tí-khòng Kiōng-kun ê ji̍p chhim. Koeh táng ê ki-khì-lâng sán-phín, bo̍k-chêng sī Siōng-hái A kó͘ chiūⁿ-chhī ê "Kang-gia̍p Pù-liân"chè-chō-·ê. Lán seng mài kóng Hông-hái ki-khì-lâng sī m̄ sī ū chiàn-tàu-la̍t, lán seng mn̄g Koeh táng, Tiong-kok ná ē ín-chún lí kā Siōng-hái chè-chō ê ki-khì-lâng ūn lâi Tâi-oân, kah Tiong-kok Kái-hòng-kun sio chiàn? siat-sú Tiong-kok ín-chún lí ūn 8 bān ki-khì-lâng lâi Tâi-oân, tī Tâi-oân ê ki-khì-lâng káⁿ m̄ sī lóng ē siū-tio̍h Tiong-kok khòng-chè? Beh án-chóaⁿ sio chiàn? Koeh támg í-keng m̄ sī 年輕氣盛 ê būn-tê, sī káⁿ ū hoat-sio?

　　Sì-goe̍h jī-jī, Koeh táng piáu-sī, tùi-hōaⁿ ū chin chē kun-ki jiáu-loān Tâi-oân, sī chiam-tùi Bîn-chìn-tóng "bū-si̍t Tâi-to̍k kang-chok-chiá". Lán ài hô-pêng, siong-sìn tùi-hōaⁿ mā sī ài hô-pêng, in ê kun-tūi mā bô goān-ì sio chiàn, jîn-bîn mā bô goān-ì sio chiàn. Só͘-í chí-iàu Kok-bîn-tóng, sīm-chì i Koeh Tâi-bêng tòng-soán, kun-ki tio̍h bē koh lâi,"in-ūi góa put to̍k, lí put bú, goán tio̍h sī Tiong-hôa Bîn-kok", chí-iàu Tiong-hôa Bîn-kok kok kî giâ koân-koân, chhiùⁿ Tiong-hôa Bîn-kok kok-koa,"góa kám-kak in tio̍h bē lâi". Sió thêng leh! lán chai-iáⁿ 1958 nî peh-goe̍h jī-saⁿ ē-po͘ 6 tiám 30 pun, Tiong-kok jîn-bîn Kái-hòng-kun khai-sí phàu phah Κim-mn̂g,"Pat-jī-san Phàu-chiàn" khai-sí, it-ti̍t phah kàu 1979 nî chiah chèng-sek thêng chiàn. Lán kok siong-bông koaⁿ-peng ū 2,661 lâng. Τiong-kiōng phàu phah Κim-mn̂g hit tong-sî ê chip-chèng-chiá sī Tiong-kok Kok-bîn-tóng ê Chiúⁿ Κài-chio̍h chóng-thóng, siōng kài hoán-tùi Tâi-oân to̍k-li̍p. Sī án-chóaⁿ nā ōaⁿ Tiong-kok Kok-bîn-tóng chip-chèng á-·sī Koeh táng choh chóng-thóng, Tiong-kok kái-hòng -kun tio̍h bē phah Tâi-oân? Koeh táng kóng chiah-ê ōe í-keng pí 年輕氣盛 koh khah siàu-liân, chha-put-to sī gō͘ hòe gín-á kóng ê ōe.

Koeh 董hông phiàn nn̄g piàn, lú phiàn lú nî-khin. M̄ chai tang sî-á Koeh Tâi-bêng chiah ē tńg-tōa-lâng? 　(230519)

Chù, 年輕氣盛 chhiáⁿ liām Hôa-gí




　　二月十四下晡，鴻海創辦人郭台銘kah立法院前院長王金平會面了後，接受媒體訪問ê時表示，可能四年前伊年輕氣盛，一時ê衝動，chiah ē去退出中國國民黨。年輕氣盛，是講人有khah少年，血氣khah旺。做代誌khah倉皇（chhong-pōng）。奇怪，ná ē教bēē，四年後郭董仝款hiah-ni̍h年輕氣盛。

　　咱m̄敢隨便講民眾黨主席柯文哲是老狐狸，但是小狐狸伊絕對擔當ē起。郭董全台灣走透透，辦過幾場大型暗會，五月初十，tī澎湖造勢了後，暗時十點趕轉來台北求見柯文哲主席，來到厝裡，柯主席第一句話tio̍h講：「你連國民黨ê遊戲規則都m̄知，tio̍h去參加比賽！」第二工，柯主席透露，郭董kā伊講，中國國民黨徵召伊ê可能性有80%。郭董猶原年輕氣盛！

五月初一，郭台銘tī高雄講ētàngtī「半屏山設核電站，安全發電保證賺錢」，hông罵kah臭頭，第二工緊會失禮，猶m̄願煞去，伊講：「設使小型能源體積kan-taⁿ有十分之一，又koh真安全，是m̄是每一個縣市lóng tio̍h去chhōe安全ê核融合ê電廠？」伊真正m̄驚新北市長侯友宜問伊：核廢料beh khǹg tó去？

　　五月初一，郭董tī高雄演講ê時講，beh tī 三年內kā機器人產業做起來，派8萬機器人抵抗共軍ê入侵。郭董ê機器人產品，目前是上海A股上市ê「工業富聯」製造ê。咱先mài講鴻海機器人是m̄是有戰鬥力，咱先問郭董，中國ná ē允准你kā上海製造ê機器人運來台灣，kah中國解放軍sio戰？設使中國允准你運8萬機器人來台灣，tī台灣ê機器人敢m̄是lóngē受tio̍h中國控制？Beh按怎sio戰？郭董已經m̄是年輕氣盛ê問題，是káⁿ有發燒？

　　四月二二，郭董表示，對岸有真chē軍機擾亂台灣，是針對民進黨「務實台獨工作者」。咱愛和平，相信對岸mā是愛和平，inê軍隊mā無願意sio戰，人民mā無願意sio戰。所以只要國民黨、甚至伊郭台銘當選，軍機tio̍h bē koh來，「因為我不獨、你不武，阮tio̍h是中華民國」，只要中華民國國旗夯koân-koân，唱中華民國國歌，「我感覺in tio̍h bē來」。小停leh！咱知影1958年八月二三下晡6點30分，中國人民解放軍開始砲拍金門，「八二三砲戰」開始，一直拍到1979年才正式停戰。咱國傷亡官兵有2,661人。中共砲拍金門hit當時ê執政者是中國國民黨ê蔣介石總統，上kài反對台灣獨立。是按怎若換中國國民黨執政抑是郭董作總統，中國解放軍tio̍h bē 拍台灣？郭董講chiah-ê話已經比年輕氣盛koh khah少年，差不多是五歲gín-á講ê話。

郭董hông騙兩遍，lú騙lú年輕。M̄知tang時á郭台銘chiahē轉大人？　(230519)

註：年輕氣盛　　請唸華語