《綠色短評》

 | | | 轉寄

中國官場ê貪污淫亂無藥醫！

作者 李南衡, ChoânTâijī/全台字 by Chng Hūiphêng 2021.04.11

Choânbîn Tâioânjī pán/全民台灣字版簡稱ChoânTâiJī

Tiongkok koaⁿtiûⁿ ê thamu îmloān bô io̍h i!

　　2017 nî cha̍pgoe̍h chhe “ New York Sîpò”kah “New York Kheh” pòtō sò͘ cha̍p miâ lúsèng kóng in chosiū kòe Bíkok tiāniáⁿ kongsi tōathâuke, chèchokjîn Harvey Weinstein ê bíkosiûⁿ, sèng chhimhoān sūkiāⁿ. Iáⁿsiâⁿ ê kîtha lúsèng mā piáusī kah Harvey Weinstein ū kòe lūisū ê kengle̍k, i chū ánne hông khiánchek khìsak tûmiâ. Cha̍pgoe̍h cha̍pgō͘, Bíkok lúiánoân Alyssa Milano tī “Twitter” téngbīn hoatkhí, kó͘lē ū kāngkhoán chogū ê lâng hótáⁿ kóngchhut kakī ê chogū, ēng chi̍tê kìhō “#Me Too” ( góa mā sī bíkosiûⁿ, sèng chhimhoān ê siūhāichiá ). Nn̄g kang chhiaukòe 50 bān lâng pái ê hôeèng, tī “bīnchheh” téngbīn jīsì tiámcheng lāi tio̍h ū 470 bān lâng chāi 1,200 bān tiâu chōngthāi tiong thêkhí “#Me Too” chitê pioá.

“#Me Too” chin kín tio̍h thoân kàu sèkài kok só͘chāi, suijiân thoân kàu Tiongkok, mā ū kúi chióng Tiongkok e̍k miâ, ēng khathâuu siūⁿ mā chaiiáⁿ, tī chi̍tê bô chuntiōng jînkoân ê kokka, ná ū khólêng chùtiōng lúkoân leh?

　　 Chi̍t ūi " Xǔ Yàn " lúsū tī Tiongkok kongan kikoan choh " Fǔ jǐng " , ūikai chin kē, sī ēkaichàn, sànchhiah lâng chò ê khangkhòe. Kò͘sū hoatseng tī i ê kò͘hiong Kangso͘ séng pakpō͘ ê Koànhûn koān, sī sànhiong ê chngkha, kūnî in tìnkubîn ê nîsiuji̍p jînbînpè saⁿbān kho͘, sī choânkok pêngkin chúichún ê saⁿ hun chi nn̄g. Xǔ Yàn lúsū 2014 nî cha̍pkáu hòe hit nî hō͘ chi̍tê phàichhutsó͘ só͘tiúⁿ khùn·khì, pēng bô kóng ū the̍hchîⁿ iah bô. Hoattêng ê bûnkiāⁿ hiánsī, tī tongkio̍k í "chàkhi chōe" kā lia̍h i khísò͘ chìnchêng, Xǔ Yàn ū ùi káuê lâng the̍h tio̍h jînbînpè saⁿpah chhitcha̍pjī bān la̍kchheng kho͘, kîtiong ū pehê lâng sī koaⁿoân. Kūnî cha̍pjīgoe̍h tēhng hoatīⁿ phòaⁿ i iúkî tô͘hêng cha̍psaⁿ nî, le̍klēng thè hôe hiahê chîⁿ ígōa, tio̍h koh kau hoa̍tkhoán jînbînpè gō͘pah bān kho͘. Xǔ Yàn lúsū ê àn chiah tōatōa tī bānglō͘ téngbīn chhutmiâ, inūi hoattêng ê bûnkiāⁿ kā i biâusiá kah náchhiūⁿ sī chi̍t miâ ê iauki ē uihia̍p chhâpo͘lâng. Hoattêng ê bûnkiāⁿ tiong ū lia̍tchhut chiahê châpo͘lâng ê sèⁿmiâ, lia̍tchhut chi̍t miâ Koànhûn koān kongankiok hù kioktiúⁿ, saⁿ miâ phàichhutsó͘ só͘tiúⁿ, nn̄g miâ pēⁿīⁿ koaⁿoân kah chi̍t miâ siáuha̍k hāutiúⁿ.

Bānglō͘ thólūn ê lâng jú lâi jú chē, kipún siōng kah Bíkok “#Me Too”ê siūⁿhoat bô kâng, thólūn ê lâng tōatosò͘ sī khiā tī kaikip ê li̍ptiûⁿ kóngōe, mn̄g kóng sī ánchóaⁿ tùi chi̍tê sànchhiah châbó͘lâng tio̍h phòaⁿ chiah tāngchōe, i ê hêngûi ná ēsái sǹg sī "chàkhi" leh? Ngē kā jīcha̍p gōa hòe châbó͘lâng khùn·khì hiahê chìchió káuê " Bàwáng " sī ánchóaⁿ lóng bô chōe? Íkeng chai ê " Bàwáng " ū pehê sī koaⁿoân, in ná ē ū hiah chē chîⁿ thang hō͘ Xǔ Yàn lúsū leh? Sī ánchóaⁿ hoatīⁿ phòaⁿ i tio̍h thè hôe chiahê chîⁿ ? Káⁿ kóng koaⁿoân khùn sànchhiah châbó͘lâng ēsái bián chîⁿ? Hông khùn·khì ê châbó͘lâng ū chōe? Che sī Tiongkok kichân ê thamu.

Kiⁿî itgoe̍h chhegō͘, Thiantin tējī tiongkip jînbîn hoatīⁿ soanphòaⁿ chêng Tiongkok Hôaiông chunsán koánlí kongsi tángsūtiúⁿ Lōa Sióbîn síhêng, itgoe̍h jīchhit chiphêng. Tī i chhù·ni̍h ê hiānkim kūiá lāi, so͘cha tio̍h nn̄g ek gōa ê jînbînpè, chitê sò͘gia̍h tī Tiongkok thamkoaⁿ lāité pâi bô tīn. Tānsī, i ū chi̍tpahê chêngjîn, tī Tiongkok thamkoaⁿ lāité bô tēit miâ khólêng mā pâi tī thâuchêng. Che sī Tiongkok kochàn ê thamu.

　　 Tiongkok ê koaⁿtiûⁿ ùi kichân nōa kàu kochàn, thamu îmloān ê phó͘phiàn si̍tchāi sī bô io̍h i! 　(210402)


Pe̍h-ōe-jī-pán/白話字版

Tiong-kok koaⁿ-tiûⁿ ê tham-u îm-loān bô io̍h i!

　　2017 nî cha̍p-goe̍h chhe “ New York Sî-pò”kah “New York Kheh” pò-tō sò͘ cha̍p miâ lú-sèng kóng in cho-siū kòe Bí-kok tiān-iáⁿ kong-si tōa-thâu-ke, chè-chok-jîn Harvey Weinstein ê bí-ko-siûⁿ, sèng chhim-hoān sū-kiāⁿ. Iáⁿ-siâⁿ ê kî-tha lú-sèng mā piáu-sī kah Harvey Weinstein ū kòe lūi-sū ê keng-le̍k, i chū án-ne hông khián-chek khì-sak tû-miâ. Cha̍p-goe̍h cha̍p-gō͘, Bí-kok lú-ián-oân Alyssa Milano tī “Twitter” téng-bīn hoat-khí, kó͘-lē ū kāng-khoán cho-gū ê lâng hó-táⁿ kóng-chhut ka-kī ê cho-gū, ēng chi̍t-ê kì-hō “#Me Too” ( góa mā sī bí-ko-siûⁿ, sèng chhim-hoān ê siū-hāi-chiá ). Nn̄g kang chhiau-kòe 50 bān lâng pái ê hôe-èng, tī “bīn-chheh” téng-bīn jī-sì tiám-cheng lāi tio̍h ū 470 bān lâng chāi 1,200 bān tiâu chōng-thāi tiong thê-khí “#Me Too” chit-ê pio-á.

“#Me Too” chin kín tio̍h thoân kàu sè-kài kok só͘-chāi, sui-jiân thoân kàu Tiong-kok, mā ū kúi chióng Tiong-kok e̍k miâ, ēng kha-thâu-u siūⁿ mā chai-iáⁿ, tī chi̍t-ê bô chun-tiōng jîn-koân ê kok-ka, ná ū khó-lêng chù-tiōng lú-koân leh?

　　 Chi̍t ūi " Xǔ Yàn " lú-sū tī Tiong-kok kong-an ki-koan choh " Fǔ jǐng " , ūi-kai chin kē, sī ē-kai-chàn, sàn-chhiah lâng chò ê khang-khòe. Kò͘-sū hoat-seng tī i ê kò͘-hiong Kang-so͘ séng pak-pō͘ ê Koàn-hûn koān, sī sàn-hiong ê chng-kha, kū-nî in tìn-ku-bîn ê nî-siu-ji̍p jîn-bîn-pè saⁿ-bān kho͘, sī choân-kok pêng-kin chúi-chún ê saⁿ hun chi nn̄g. Xǔ Yàn lú-sū 2014 nî cha̍p-káu hòe hit nî hō͘ chi̍t-ê phài-chhut-só͘ só͘-tiúⁿ khùn-·khì, pēng bô kóng ū the̍h-chîⁿ iah bô. Hoat-têng ê bûn-kiāⁿ hián-sī, tī tong-kio̍k í "chà-khi chōe" kā lia̍h i khí-sò͘ chìn-chêng, Xǔ Yàn ū ùi káu-ê lâng the̍h tio̍h jîn-bîn-pè saⁿ-pah chhit-cha̍p-jī bān la̍k-chheng kho͘, kî-tiong ū peh-ê lâng sī koaⁿ-oân. Kū-nî cha̍p-jī-goe̍h tē-hng hoat-īⁿ phòaⁿ i iú-kî tô͘-hêng cha̍p-saⁿ nî, le̍k-lēng thè hôe hiah-ê chîⁿ í-gōa, tio̍h koh kau hoa̍t-khoán jîn-bîn-pè gō͘-pah bān kho͘. Xǔ Yàn lú-sū ê àn chiah tōa-tōa tī bāng-lō͘ téng-bīn chhut-miâ, in-ūi hoat-têng ê bûn-kiāⁿ kā i biâu-siá kah ná-chhiūⁿ sī chi̍t miâ ê iau-ki ē ui-hia̍p chhâ-po͘-lâng. Hoat-têng ê bûn-kiāⁿ tiong ū lia̍t-chhut chiah-ê châ-po͘-lâng ê sèⁿ-miâ, lia̍t-chhut chi̍t miâ Koàn-hûn koān kong-an-kiok hù kiok-tiúⁿ, saⁿ miâ phài-chhut-só͘ só͘-tiúⁿ, nn̄g miâ pēⁿ-īⁿ koaⁿ-oân kah chi̍t miâ siáu-ha̍k hāu-tiúⁿ.

Bāng-lō͘ thó-lūn ê lâng jú lâi jú chē, ki-pún siōng kah Bí-kok “#Me Too”ê siūⁿ-hoat bô kâng, thó-lūn ê lâng tōa-to-sò͘ sī khiā tī kai-kip ê li̍p-tiûⁿ kóng-ōe, mn̄g kóng sī án-chóaⁿ tùi chi̍t-ê sàn-chhiah châ-bó͘-lâng tio̍h phòaⁿ chiah tāng-chōe, i ê hêng-ûi ná ē-sái sǹg sī "chà-khi" leh? Ngē kā jī-cha̍p gōa hòe châ-bó͘-lâng khùn-·khì hiah-ê chì-chió káu-ê " Bàwáng " sī án-chóaⁿ lóng bô chōe? Í-keng chai ê " Bàwáng " ū peh-ê sī koaⁿ-oân, in ná ē ū hiah chē chîⁿ thang hō͘ Xǔ Yàn lú-sū leh? Sī án-chóaⁿ hoat-īⁿ phòaⁿ i tio̍h thè hôe chiah-ê chîⁿ ? Káⁿ kóng koaⁿ-oân khùn sàn-chhiah châ-bó͘-lâng ē-sái bián chîⁿ? Hông khùn-·khì ê châ-bó͘-lâng ū chōe? Che sī Tiong-kok ki-chân ê tham-u.

Kin-nî it-goe̍h chhe-gō͘, Thian-tin tē-jī tiong-kip jîn-bîn hoat-īⁿ soan-phòaⁿ chêng Tiong-kok Hôa-iông chun-sán koán-lí kong-si táng-sū-tiúⁿ Lōa Sió-bîn sí-hêng, it-goe̍h jī-chhit chip-hêng. Tī i chhù-·ni̍h ê hiān-kim kūi-á lāi, so͘-cha tio̍h nn̄g ek gōa ê jîn-bîn-pè, chit-ê sò͘-gia̍h tī Tiong-kok tham-koaⁿ lāi-té pâi bô tīn. Tān-sī, i ū chi̍t-pah-ê chêng-jîn, tī Tiong-kok tham-koaⁿ lāi-té bô tē-it miâ khó-lêng mā pâi tī thâu-chêng. Che sī Tiong-kok ko-chàn ê tham-u.

　　 Tiong-kok ê koaⁿ-tiûⁿ ùi ki-chân nōa kàu ko-chàn, tham-u îm-loān ê phó͘-phiàn si̍t-chāi sī bô io̍h i! 　(210402)

中國官場ê貪污淫亂無藥醫！
　　2017年十月初《紐約時報》kah《紐約客》報導數十名女性講in遭受過美國電影公司大頭家、製作人溫斯坦（Harvey Weinstein）ê米糕siûⁿ、性侵犯事件。影城ê其他女性mā表示kah溫斯坦有過類似ê經歷，伊自按呢hông譴責棄sak除名。十月十五，美國女演員彌蘭努（Alyssa Milano）tī“Twitter”頂面發起，鼓勵有仝款遭遇ê人好膽講出家己ê遭遇，用一個記號“#Me Too”（我mā是米糕siûⁿ、性侵犯ê受害者）。兩工超過50萬人次ê回應，tī「面冊」頂面二四點鐘內tio̍h有470萬人在1,200萬條狀態中提起“#Me Too”chit-ê標仔。

“#Me Too”真緊tio̍h傳到世界各所在，雖然傳到中國，mā有幾種中國譯名，用腳頭u想mā知影：tī一個無尊重人權ê國家，那有可能注重女權咧？　　一位「許艷」女士tī中國公安機關作「輔警」，位階真低，是下階層、散赤人做ê工課。故事發生tī伊ê故鄉江蘇省北部ê灌雲縣，是散鄉ê庄腳，舊年in鎮居民ê年收入人民幣三萬元，是全國平均水準ê三分之二。許艷女士2014年十九歲hit年hō͘一個派出所所長睏去，並無講有the̍h錢抑無。法庭ê文件顯示，tī當局以「詐欺罪」kā掠伊起訴進前，許艷有ùi九個人the̍h tio̍h人民幣三百七十二萬六千元，其中有八個人是官員。舊年十二月地方法院判伊有期徒刑十三年、勒令退回hiah-ê錢以外，tio̍h koh交罰款人民幣五百萬元。許艷女士ê案才大大tī網路頂面出名，因為法庭ê文件kā伊描寫kah那像是一名ê妖姬會威脅查埔人。法庭ê文件中有列出chiah-ê查埔人ê姓名，列出一名灌雲縣公安局副局長、三名派出所所長、兩名病院官员kah一名小學校長。

網路討論ê人愈來愈chē，基本上kah美國“#Me Too”ê想法無仝，討論ê人大多數是徛tī階級ê立場講話，問講是按怎對一個散赤查某人tio̍h判chiah重罪，伊ê行為那會使算是「詐欺」咧？硬kā二十外歲查某人睏去hiah-ê至少九個「霸王」是按怎lóng無罪？已經知ê「霸王」有八个是官員，in那會有hiahchē錢thang hō͘許艷女士咧？是按怎法院判伊tio̍h退回chiah-ê錢？敢講官員睏散赤查某人會使免錢？Hông睏去ê查某人有罪？Che是中國基層ê貪污。

今年一月初五，天津第二中級人民法院宣判前中國華融資產管理公司董事長賴小民死刑，一月二七執刑。tī伊厝裡ê現金櫃仔內，搜查tio̍h兩億外ê人民幣，chit-ê數額tī中國貪官內底排無陣。但是，伊有一百個情人，tī中國貪官內底無第一名可能mā排tī頭前。Che是中國高層ê貪污。

　　中國ê官場ùi基層爛到高層，貪污淫亂ê普遍實在是無藥醫！ 　(210402)