《母語e5心靈雞湯》

 | | | 轉寄

街車

作者 Li KhinhoaN 2006.10.29

listen
Ùi 劍橋 ê上空看落來
Ùi Kiàm-kiô ê siōng-khong khòaⁿ--lo̍h-khì
阮那像傀儡尪仔
goán ná chhiūⁿ ka-lé-ang-á
頂高牽二條線
Téng-koân khan nn̄g-tiâu sòaⁿ
慢慢仔giú 過來giú 過去
bān-bān-á giú kè-lâi giú kè-khì
tī 速度真緊ê 都市
tī sok-tō͘ chin kín ê to͘-chhī
載心情輕鬆ê 人客
chài sim-chêng khin-sang ê lâng-kheh

Ùi 地面看過去
Ùi tē-bīn khòaⁿ--kè-khì
阮是後壁有二支長腳ê 老蜘蛛
goán sī āu-piah ū nn̄g-ki tn̂g-kha ê lāu-ti-tu
阮tī 劍橋市中心面頂
goán tī Kiàm-kiô chhī-tiong-sim bīn-téng
牽滿蜘蛛絲
khan móa ti-tu-si
阮吞吐甘願落網ê 現代人
Goán thun-thò͘ kam-goān ê hiān-tāi-lâng
二十一世紀ê 都市人
jī-cha̍p-it sè-kí ê to͘-chhi-lâng
逐日轉去十九世紀
Ta̍k-ji̍t tńg-khì cha̍p-káu sè-kí
hō͘老蜘蛛載來載去
hō͘ lāu-ti-tu chài-lâi chài-khì

時空相疊ê 街市
Sî-khong sio-tha̍h ê ke-chhī
有雄雄狂狂歹死死ê 計程車
ū hiông-hiông kông-kông ê kè-thêng-chhia
有現代化新tiám-tiám ê 公車
ū hiān-tāi-hòa sin-tiám-tiám ê kong-chhia
有藏tī 土腳身手mé-lia̍h ê 地下鐵
ū chhàng tī tho͘-kha sin-chhiú mé-lia̍h ê tē-hā-thih
猶原保留khah 省能源
Iû-goân pó-liû khah séng-lêng-goân
古早用電線teh 駛ê 街車
Kó͘-chá ēng tiān-sòaⁿ teh sái ê ke-chhia
kā 劍橋保留一屑仔
kā Kiàm-kiô pó-liû chi̍t-sut-á
紳士風度
sin-sū hong-tō͘

雖然時空會錯亂
Sui-jiân sî-khong ē chhò-loān
蜘蛛絲有時會相-phoa̍h
ti-tu-si ū-sû ē sio-phoa̍h
你若無teh 趕
Lí nā bô teh kóaⁿ
等司機落來用竹篙póe hō͘ 開
tán su-ki lo̍h-lâi ēng tek-ko pòe hō͘ khui
才koh 載你入來二十一世紀
chiah koh chài lí ji̍p-lâi jī-cha̍p-it sè-kí
身影相-kheh ê 都市
Sin-iáⁿ sio-kheh ê to͘-chhī.
--2003/5/8 Harvard