《疼你e5厝邊》

 | | | 轉寄

玻璃屋

作者 彭淑青 2005.10.16

夢見一個玻璃屋，已經兩年。

玻璃屋是一個比賽場地，參賽者tio̍h tòa tī玻璃屋中，並且kā伊裝潢。玻璃屋共有兩層樓，所有ê材料物質lóng是玻璃，意思是透明ê。你tòa tī裡面，外面ê人看能tio̍h你，你也同步欣賞外面ê風景。

比賽開始，我tòa tī裡面，坐tī轉向二樓ê樓梯口，我該用什麼去kā伊裝潢neh？我去便所需要點á隱私、我換衫褲ê時chūn無想beh hō͘別人看tio̍h。我....我ē-tàng怎樣作？如果kā牆壁貼滿磁磚、壁紙...án-ne就bē-tàng叫做玻璃屋loh。主辦單位hō͘我ê材料是萬國旗、一群人....此外無他。

昨hng，我進入Rabih ê辦公室，伊講Shu，你知影我開始畫圖mah？我講我m̄知，但是看見伊ê辦公室壁頂加了真chē......畫作。Hiah-ê畫作是真特別ê，圓圓ê玻璃框中，鑲tī壁頂，十分類似船艙中ê圓形小窗，你只ē-tàng透過圓形小窗窺探外界仝款。伊講伊畫chiah-ê圖十分辛苦，伊必須有kóa想法，同時iáu-beh ē-tàng表現。伊ê主題只有一個，叫做盲。

伊選用玻璃作為材質是有原因ê，玻璃是易碎ê物質，必須小心照顧；玻璃是透明ê，khiā-tī玻璃ê兩面，每個人帶有無仝ê思維；當你塗滿一面時，你iáu有另一個視野ē-tàng運用；Rabih塗滿ê兩面空間，分別teh代表明眼人ê觀感kap盲人ê想法。伊講：Shu，你看tio̍h小小ê一個圓形ê空間，是m̄是真像盲人探測世界，每pái只ē-tàng看見一小角天地ê款？á盲人正是用伊ê局部ê、破碎ê區塊去組成世界ê。

你看tio̍h我ê畫，就kah-ná用我ê視野去看世界。伊講。

Tī一入門ê壁邊，掛teh ê是一幅叫做「盲人」ê畫作，tī圓形ê玻璃小窗中，兩pêng是真chē大蕊peh開ê目睭，中間ê一條路頂，一段腳跡。遠方則是一支盲人用ê白手杖，我看見真chē盲人ê款，就是án-ne，心艱苦kah目屎流落來，也bē記得將伊hip像tńg來。我想起家己兩年前tī夢裡tòa ê玻璃屋，我m̄知如何裝扮家己ê厝，但是厝外ê人lóng看tio̍h我。我ê世界看起來真大，但是我所摸能tio̍h ê，卻kan-ta眼前一方、手上一片。

Tùi án-ne，我帶tio̍h chit幅叫做「海」ê，就是伊ê第一幅創作，就beh啟程回家loh。