《疼你e5厝邊》

 | | | 轉寄

有職業ê失業人口

作者 彭淑青 2005.10.09

伊流動tī各種社會福利機構，「職業學生」ê「美名」早就[不脛而行]，伊tī各種福利機構上課，參與過ê課程活動不計其數：心理成長、電腦進修、定向行動、成果演出、企畫撰寫、廣播、錄音…..chit-ê福利制度下所有能上ê課程伊lóng盡可能無放過，伊講：「我是充實ê。」但是福利單位講：「咱tī伊身上浪費社會資源！」

以前家己也對chit-ê狀況並無掠做當然，一位無業ê視障者tī真chē單位間遊走，並且無驚半項來得tio̍h免費學習資源。兩年後，chirt位「無業遊民」猶原無法度就業，á伊ê生活tī社會福利金kap家庭ê支持下，猶原過得真充實。Chit種以「學習」為業ê身心障礙人士到底有jōa-chē，我從來m̄-bat統計過，但是tī表面充實ê學習下，伊真正ê聲音kap渴望並無透過「口語表達」課程所學tio̍h ê成果做有效溝通，來hō͘福利機構發現。

Tùi án-ne，我sió-khóa回頭，彷彿看tio̍h一位叫做阿輝ê中途失明者。意外發生了後，伊希望ē-tàng得tio̍h完整ê醫療、心理、就學、職業等重建工作，首先到盲人重建中心得tio̍h基本ê生活重建服務：伊學會曉如何獨立行行、如何溝通、如何建立第一保障性工作─按摩，伊也認識資訊工具─電腦。

然後伊講，我以前是一名維修汽車ê烏手，現在想beh tńg來到原單位上班，伊去勞工局爭取伊ê工作權，申請職業重建。申辦人員為伊申請做職評，本來勸伊鳴鼓退兵，換別ê工作，但因為伊ê堅持，in共同tī原領域力爭工作權力，以職務再設計模式得tio̍h諮詢管理ê職位，重新拾回工作。但無久，伊發現伊ê同事m̄知，同時也無時間瞭解盲人ê需要，伊chhōe bē-tio̍h工具ê位á、新客戶ê資料，公司ê電腦系統伊無法度使用…tú開始，伊有一名助理，後來新車種ê更新kap舊車型ê汰換hō͘伊tú-tio̍h重新學習ê瓶頸，有一工，老闆kā伊講景氣實在太差，有一個充滿幹勁、學習力強ê年輕人將取代伊ê工作，同時「仝款ê薪水，新進人員ē-tàng做koh-khah chē事」！

伊算幸運，領了一筆iáu ē-tàng溫飽ê「提早退休金」。Tī寒風中，阿輝the̍h-tio̍h這最後一筆收入踏入銀行準備小投資，結果行員kā伊講，因為bē-tàng家己簽名，為tio̍h保護客戶，伊bē-sái獨立開戶；阿輝chhōe來伊過去ê保險業務員，但是伊因為失明領了全殘金，保險合約停了，伊想beh重新購買，發現家己ê處境形同「死去ê人」，有多項是無資格受保ê……阿輝猶原真勇敢，chhōe一間公司準備重新來過，面試主管the̍h一部電腦請伊操作，伊自動棄權。

三年前伊tú失明，開了兩年ê時間chiah承認家己ê盲，繼離開重建院後，新ê一年又過去，四十歲ê伊開始懷疑kám有重回原有社會ê可能？最後阿輝繼續抱tio̍h堅定ê信念，進入一間電腦訓練單位，學習盲用電腦，伊真努力，但是資質有限，tī夏天來臨ê時chūn，伊chiah學會曉如何上網掠tio̍h正確ê資料，á當伊希望為家己ê處境爭取一點法律ê資源時，有一個真好用ê法規網站，伊卻無法度使用，因為系統bē合；同時伊也真鬱卒，即使家己學得iáu算bē-bái，卻無法度tī市面上買tio̍h盲用電腦。樂觀ê阿輝真慶幸家己iáu是一個單身漢，伊想伊若有bó͘-kiáⁿ，可能會離開伊或者無法度hō͘ in溫飽。今年ê冬天，伊ê積蓄少了一位數。

有人建議伊去上一kóa專為盲人開設ê課程，兩個月過去，伊發現成長課程只教導盲人如何成長，卻無教導chit-ê社會如何kap盲人同齊成長；第六個月，伊ê心理課程結業，伊發現伊ê「自我」tī chit-ê大社會中漸漸消失無看tio̍h，chit-ê階段伊也放棄了繼續ê醫療，因為醫生只ē-tàng醫治伊he「無可救藥只chhun信心支持」ê目睭，卻無法度hō͘ chit-ê社會ê其他目睭看tio̍h伊ê努力。伊是一個工作狂，需要一份工作，tī失明ê五年後，伊終於chhōe-tio̍h一份約聘工作，是一項政府德政ê產物─永續就業，ē-tàng「永續」保有10個月ê工作權。伊無siuⁿ-chē專長，tùi細漢書讀得真無好ê伊，也無力koh升學。

上帝真眷顧特殊境遇ê人，伊ê想法改變，同時kap一位溫柔ê女子結婚，伊瞭解伊，而且關心伊，帶領伊舒緩chit-ê社會hō͘伊ê衝擊。伊ê bó͘從事按摩已經15年，先天盲。雖然in tú生ê寶寶已經診斷有遺傳性ê視覺障礙，但是in相信，tī chiah-nih多年kap社會福利機構ê來往下，in已經知影如何chhōe-tio̍h資源，如果政策暫時bē改變ê話。

真慶幸，以上chit-ê小小ê個人故事並非真實，但殘忍ê事實是，chiah-ê無仝ê境遇確實是無仝階段ê視障朋友所tú過ê處境。身心障礙者tī重建ê過程中，有一部份ê時間看起來是停頓ê，如果以社會ê眼光批判伊ê能力，對一般社會真公平，對伊個人卻是真殘忍。社福機構裡充滿真chē自認為瞭解身心障礙者ê社工人員，in用koh-khah嚴厲ê眼光去檢視in，「in有真chē劣根性」，有一個社工人員談起；tī政府部門負責推動就業、關懷ê第一線工作者，「視障者小小一群聚集作伙，真pháiⁿ-pháng」，有一個意氣風發ê公務員談起。Tī chit種ê社福環節中，社福單位恐驚難以發現家己真正ê定位，ná親像視障者tī社會中想beh chhōe-tio̍h舒適ê落腳點。用什麼款ê方式chiah ē-tàng kā零散ê資源先做適當ê整合？m̄是hō͘身心障礙者tī四界碰壁、四界學習ê管道中，先努力學會曉使用社會資源，結果tī善用ê同時iáu被批評講是「職業學生」？我拆開moa-tī家己身上ê hit一道掩蓋，以前家己並m̄知。

Tī希望家己瞭解kap做到koh-khah chē ê同時，我突然發現家己是失了聲，啞然ê。Chit-ê日誌一定有續集，或緊或慢，to̍h無法度計算。(2001年12月寫)