《疼你e5厝邊》

 | | | 轉寄

盲人興學

作者 Chuniok 2005.10.23

由波士頓「佳樂盲人重建中心」主辦ê「國際盲人事工訓練計畫」（ITP, International Training Program），今年(1999)第十一屆ê八位學員中有位tùi中國來ê盲人夏榮強，伊擔任「福建省殘疾人聯合會」副主席、「福建省盲人協會」主席kap「海德里盲人學校中國福州分校」校長。

伊ê「校長」頭銜引起我ê興趣，因今年七月初成立ê「拍得麗文教基金會」董事會聘我擔任執行長並同意我將1996年創立ê「關懷視障研究發展中心」業務轉入基金會，我有責任落實視障者ê文化kap教育工作，尤其是海德里盲校ê英語函授koh-khah吸引我，因目前教育部盲生留學獎學金錄取者lóng teh等待通過「托福考試」，有ê因tī錄取兩年內無法度通過托福而喪失留學資格，這是jōa-nih-á遺憾ê事ah！

我盡量chhōe時間向夏校長請教：以福州分校ê模式tī台灣設立「海德里盲人學校台灣分校」ê可行性kap各項事宜，夏校長文質彬彬、厚道又實際，一嘴答應beh盡力促成chit項對台灣盲人英文教育有實質意義ê創校工作。

我請示基金會劉董事長對chit項業務ê看法，伊回答講thang研究看bāi，我隨時向夏校長取得海德里盲人學校（The Hadley School For The Blind）ê地址（700 Elm Street, Winnetka, Illinois 60093）kap校長ê名字( Dr. Robert J. Winn)，馬上寫phoe去徵詢該校校長ê意見。無久劉董事長又koh催我提出計畫hō͘董事會研討，看起來大家lóng認同chit-ê異象，我認為夏校長行過ê路thang做為咱tī台灣創校ê參考。

夏校長十年前tī「中國殘疾人月刊」頂讀tio̍h「黃加尼就讀海德里盲校英語函授課程ê經驗分享」，伊即刻寫phoe報名參加函授課程，兩年後去函徵詢tī中國設立分校ê意願，lóng為tio̍h省錢而用海運郵寄，來回開了六個月，但chit封回phoe是夏校長興學創辦中國第一間盲人英語函授學校ê第一步。

英語函授教材由海德里母校免費提供，中國國內ê函授行政事務費（目前教職員共十三人，每年預算約美金二萬五千元）也由母校負責。夏校長二十一歲chiah失明，bó͘是明眼人，是伊創校ê得力助手，黃加尼也被延聘來擔任指導教師，黃老師今年已經七十gōa歲。中國到目前修完函授課程ê學員已經超過八百多人，根據夏校長講，台灣有一位台中啟明學校老師也修過一段課程，但目前已經中斷，m̄知何故？希望ē-tàng查出原因，thang做為台灣分校ê參考。

夏校長有感未學過英語ê盲人beh開始修函授課程有真chē困難，tùi án-ne獨力編一套盲人英語基礎教材，幫助koh-khah chē有心學習英語ê盲人，有機會被接受成做海德里英語函授課程ê學員。夏校長答應寄一套該基礎教材hō͘基金會使用，伊也希望台灣分校成立後，thang kap中國分校分享教學經驗kap互通教材，hō͘海峽兩岸ê盲人得tio̍h koh-khah chē ê受益。

盲人接受英語函授教育，不但thang提昇in ê學習kap知識領域，koh-khah thang擴大盲人ê就業機會。延聘盲人做校長kap教職員，koh-khah有[立竿見影]ê功效。希望基金會tī劉董事長ê領導之下，ē-tàng早日tùi英語函授開始，進一步koh推展其他ê函授課程，譬如寫作mā應該thang採取函授方式，減少盲人到學校上課ê無方便。