《Kah陳小小做伙讀台語》

 | | | 轉寄

帶「土地」意識ê聖經閱讀法

作者 陳小小，台譯：Lîm ChùnIo̍k 2024.10.13

帶「土地」意識ê聖經閱讀法

陳鳳翔

我講完亞伯拉罕tī主要四个khiā起ê地—吾珥、哈蘭、迦南、埃及kah上主同行ê一生，續接pun一份作業hō͘同學。請in回顧kakī tùi出世開始，到目前tòa過tó一kóa所在á是都市，tī tó位tú tio̍h耶穌，就ánne開啟in kah上主同行ê一生。我lóng直直強調，kah上主同行，m̄是空空ê口號。基督信仰m̄是抽象ê神學，卻是生活中thang實際經歷。聖經地理課程，ài kah「空間」（土地）連繫tiâutiâu ê意識，用tī聖經ê閱讀。

帶「空間」意識，是chiok新ê聖經神學研究方法。兩千年來，聖經神學研究是用「上主tī歷史中ê大能作為」為主，講道教導大部分是出tī chit種觀點。到十九世紀，加上「存在主義」（Existentialism）觀點，齊克果（Søren Kierkegaard）ê神學是chit類ê代表作。因為kah偤太人交流增加，聖經神學研究mā注意tio̍h對「時間」（歷史）ê思考，這是希伯來思想ê特色。Á錫安運動，1948年以色列人tńg來巴勒斯坦地區建國，「空間」（土地）成做以色列人、阿拉伯人以及所有相關歐美國家共同ê關心注意，影響聖經神學研究。

校園出版ê布魯格曼（Walter Brueggemann）《土地神學》是chit種「空間」（土地）意識ê神學代表作之一。華人基督徒學者ê中間，呂榮輝博士真可能是chit種聖經神學研究方法ê頭一位。伊是美國北愛荷華大學（University of Northern Iowa）ê地理教授，tī 1980年「全美地理學家協會」創立「聖經地理專業小組」（Geography of the Bible Specialty Group，GBSG），而且hō͘北愛荷華大學成做全美國tāi先開設聖經地理課程ê大學。退休了，呂榮輝博士tī幾若間神學院任教，繼續開設、推廣聖經地理課程。

帶「空間」（土地）意識來閱讀創世記，ē注意tio̍h創世記1:1：「源起頭，上帝創造天kah地。」ê「天kah地」是khah無適合ê翻譯。希伯來文是אֵת הַשָּׁמַיִם וְאֵת הָאָרֶץ׃，應該tio̍h翻譯做「hiahê天kah hitê地」。也to̍h是上主創造兩个世界，一个是人ê肉眼看bē tio̍h ê超自然世界（俗稱屬靈世界）—「hiahê天」，一个是人肉眼看ē tio̍h ê世界—「chitê地」。保羅bat提起kakī去hông提升到第三層天頂（哥林多後書 12:2），也to̍h是hitê人ê肉眼看bē tio̍h ê超自然世界—「hiahê天」分做幾nā層。Á創世記1:2以後，描述人ê肉眼看ē tio̍h ê世界—「chitê地」án怎去hông創造。

創世記ê重點，無teh描述人ê肉眼看bē tio̍h ê超自然世界（俗稱屬靈世界）—「hiahê天」，hitê世界有tòa kilō͘pek、天使、活物……。Kui本聖經真少關係hitê世界ê描述，真可能是描述，咱mā m̄ bat、無法度理解，因為咱m̄是hitê世界ê受造。Chia kah華人宗教觀大大無仝，信徒做善事期待ē飛天成仙成佛，追求成做比人高一級ê存在。M̄ koh聖經記載上主ê創造是物各照它ê類，受造之間彼此bē混沌，人to̍h是人，人無法度變成天使，mā免變做天使。

創世記ê重點，khǹg tī描述人ê肉眼看ē tio̍h ê世界—「chitê地」。宇宙萬物一个一个hō͘上帝創造出來，siōng尾人去hông創造。人類是肉眼看ē tio̍h ê世界—「chitê地」siōng尊貴榮光ê受造，因為是照上主ê形像kah樣式造ê，人類代表上主管理「chitê地」。人類ê各種作為在在teh反映、說明上主ê榮光。

繼續帶「空間」（土地）意識ê閱讀，ē注意tio̍h創世記2:8：「上主tī東方ê伊甸設立一个田園，kā所造ê人安置tī hia。」有出現一个特殊ê地區—伊甸（עֵדֶן），意思是hō͘人歡喜kah喜樂ê事物，to̍h是súi衫、好料、老年得子。動詞עָדַן，意思是盡情享受。尼希米記9:25：「In征服堅固ê城，肥ê土地，得tio̍h充滿ta̍k種好物ê厝宅，開便便ê水井，葡萄園kah橄欖園ê果子樹真chē。In to̍h食kah飽，身軀肥chutchut，因為祢ê大恩，心內快樂。」以色列人聚集追述約書亞時代，祖先進入應允ê迦南地，上主對in ê恩典hiahni̍h'á大。尼希米記ê作者用עָדַן「盡情享受」chitê動詞，hō͘讀者聯想起創世記2:8 ê伊甸（עֵדֶן）。

和合本修訂版ê翻譯原則是盡量mài去修改和合本，m̄ koh翻譯做「因為祢ê大恩，心內快樂」無充分反映「盡情享受」，就ánne改做「因為你ê大恩活kah快樂」。因為「食kah飽，身軀肥chutchut」，可見ta̍k頓lóng食過量，chiah ē累積siuⁿ過chē脂肪致使身軀hàng奶。絕對m̄是唯一ê心內快樂，mā盡情享受tio̍h口腹ê慾望。

「應允ê迦南地」teh對應「伊甸」，歷史重演。亞當kah夏娃犯罪、選擇聽蛇來棄sak上主，去hông趕出伊甸園，分散到各地。亞伯拉罕ê kiáⁿ孫犯罪，選擇假神，棄sak上主，去hông趕出應允ê迦南地，散到列邦中。（利26:33；申32:26；耶18:17、25:16；結12:14-15、17:21、22:15、29:12、30:23、26）

去hông趕出chitê地ê事件發生，總是kah人ê罪惡有關。亞當、夏娃ê第一个kiáⁿ該隱thâi死親小弟亞伯，mā是去hông趕離開亞當、夏娃ê地，siōng嚴重ê處罰是離開上主ê面，koh khah án怎都無上主。「你chitmá趕我離開chitê地，soah致使無看tio̍h祢ê面；我一定流離飄蕩tī地上……」（創4:14）「就ánne該隱離開上主ê面，去tòa tī伊甸東pêng挪得ê地。」（創4:16）我回溯kakī ê一生，原本無上主；有何等ê幸運，因為信耶穌，人生ê路開始kah上主同行。

本文紹介帶「空間」（土地）意識ê聖經神學研究方法，ē tàng得tio̍h ê閱讀收成。「Kah上主同行」，絕對m̄是kantaⁿ是空空ê口號，á是抽象ê理性活動。建議你mā the̍h起筆來，回顧kakī tùi出世到目前，tòa過tó一kóa所在á是都市，tī tó位tú tio̍h耶穌，開啟kah上主同行ê人生路，你一定ē感覺真奇怪，chitê路裡滿滿是上主ê恩典。