《Kah陳小小做伙讀台語》

 | | | 轉寄

上主賞賜ê福氣超過你ê想像

作者 陳小小，台譯：Lîm ChùnIo̍k 2024.10.06




上主賞賜ê福氣超過你ê想像

陳鳳翔


人人lóng kah意福氣，m̄ koh大多數kantaⁿ知影聰明智慧、富足、尊榮、長歲壽chit四種福氣，m̄知慷慨ê上帝beh賜hō͘祂ê子民ê福氣超過咱ê想像。新約聖經中ê以弗所書，thang講是新約ê「福氣」冊卷。保羅熟悉天父ê心意，伊擔心兄弟姊妹無清楚耶和華早to̍h賞賜一堆「福氣」，因為ánne特別寫chit張phoe，第一段to̍h興奮說明，tio̍h ē頌讚咱ê主耶穌基督ê父上帝，因為祂tī基督裡賜hō͘咱天頂各種屬靈ê福氣！

保羅ê以弗所書khah強調「tī天頂」ê屬靈福氣，對比「tī地chiūⁿ」ê福氣。這是創世記1:1帶來ê概念，希伯來原文ê意思是「起初，上主創造『hiahê天』kah『chitê地』ê時，『chitê地』是空虛混擾，深淵頂面一片烏暗；……」，上主創造兩个世界，「hiahê天」—人ê肉眼看bē tio̍h ê超自然世界（俗稱屬靈世界），以及「chitê地」—人ê肉眼看ē tio̍h ê人所khiā ê世界。

原本人類kantaⁿ有「tī地chiūⁿ」ê福氣」，m̄ koh耶穌基督來了後，kā「tī天頂ê屬靈福氣」mā豐豐富富賞賜hō͘人類。希臘文ê「天」τοῖς ἐπουρανίοις teh對應創世記1:1 ê「天」，是複數，也to̍h是原本tī chiahê天ê屬靈福氣。Tī日期滿ê時，hō͘天頂、地chiūⁿ kah一切所有ê lóng tī基督內面同歸做一个。

簡單講，上主賞賜ê福氣分做兩大類，「hiahê天ê福氣」kah「chitê地ê福氣」。聰明智慧、富足、尊榮、長歲壽chiahê福氣，是「tī地chiūⁿ ê福氣」，非基督徒mā ē tàng持有，親像世間ê好額人、名人。M̄ koh耶穌ê人民chiah持有hiahê天ê屬靈福氣。

「Hiahê天ê福氣」kah「chitê地ê福氣」án怎得tio̍h？申命記記載，聽從耶和華、尊守伊ê誡命、遵行祂ê道to̍h得ē tio̍h「chitê地ê福氣」。「你若聽從耶和華—你ê上主ê話，這以下ê福一定ē跟tòe你，臨到你ê身chiūⁿ：你tī城內一定受賜福，tī田裡mā一定受賜福。你身所生ê，地所產ê，chengseⁿ所生ê，以及牛、羊羔，lóng一定ē受賜福。你ê 籠ákah你ê phah麵盆lóng一定ē受賜福。你出mā受賜福，入mā受賜福。……」（申 28:2-13）

人是上主創造ê，遵行創造法則—祂ê道，福氣to̍h ē tòe leh來。有孝父母、無貪心、 無姦淫、無偷盜、無講白賊，活出忠信、良善、正直ê性命，福氣to̍h ē ee khehkheh tòe leh來。Kah世俗ê教導tú好顛倒，一般人是福氣tī東pêng，to̍h追去東pêng，福氣tī西pêng，to̍h追去西pêng。聖經kā咱講，免致意福氣tī tó位，kantaⁿ需要注意kakī是m̄是有遵行上主ê道，福氣ē主動來jiok你。

M̄ koh，比起聰明智慧、富足、尊榮、長歲壽，人生在世koh khah需要ê是「親密關係ê福氣」，也to̍h是「疼ê福氣」。親密關係ê價值，koh khah贏過一切，有實驗證明。Harvard大學成人發展中心研究員Robert Waldinger博士tī TED專講《幸福tùi tó位來？》提起chitê hoa̍h世紀ê研究。In追蹤724人tùi青少年到老人（1984年到1995年）ê生活，了解in人生siōng重要ê目標應該是啥物？án怎chiah ē tàng得tio̍h幸福？In選Harvard大學二年á ê學生當做受試者。超過八成ê人認為，人生siōng重要ê目標to̍h是beh變好額，有錢to̍h ē tàng得tio̍h幸福；有五成ê相信，tio̍h出名世界，有名ê人生chiah有幸福。

M̄ koh實驗結果卻發見，幸福ê關鍵無tī名利，是在tī疼ê關係！Kah厝裡ê人連結親密、kah朋友社區厝邊往來ê人，ē比無kah人互動、孤ta̍k khiā起ê人koh khah快樂、koh khah健康、koh khah長歲壽。孤單寂寞對健康有害！

真好ê關係m̄是在tī有真chē ê朋友á是一定tio̍h結婚，是在tī親密關係ê質量。和睦bā斗ê關係，有助健康；kui工發生衝突ê關係，有損健康。

實驗結果發見hit kóa中年（50歲）對親密關係siōng滿意ê，in到80歲，是siōng健康ê人。真好ê親密關係ē kā咱行向衰老ê腳步放慢。參與研究者中，hit kóa siōng快樂ê夫妻表示，雖然80 gōa歲生理疼痛ē日日加添，m̄ koh iáukoh ē tàng感覺日子過kah真幸福。Á親密關係拗蠻á, bóng tèng人意ê夫妻經歷tio̍h老化病痛ê時，疼痛感覺ē因為精神上ê痛苦放大。Chit場hoa̍h世代ê研究有說明，親密關係ê價值贏過富足、尊榮，親密關係ē 帶來健康。

彌賽亞來世間ê使命，tú好是為tio̍h beh hō͘各種破碎關係koh再和好！耶穌知影tī地chiūⁿ ê人類siōng需要ê是疼ê關係。聖Kiáⁿ—耶穌道成肉身、被戲弄、hông phùi嘴瀾、hông鞭phah、hông釘死tī十字架頂，是為tio̍h beh處理罪惡，來修復人kah上主、人kah人之間ê親密關係。

罪人有犯真chē錯誤，致使各種關係破碎。耶穌獻kakī、付出極大ê代價，hō͘罪人ē tàng蒙受救贖，犯錯誤得tio̍h赦免。以弗所書1:1-14提起耶穌帶來ê福氣「成做聖潔」、「屬tī上主」、「得tio̍h kiáⁿ兒ê名分」、「thang叫上主阿爸父」、「成做上主ê基業」、「得tio̍h基業ê根據」、「領受聖靈」，chiahê是人kah上主ê關係福氣。另外，做耶穌ê子民因為罪惡ē jú來jú少，人kah人之間疼ê關係to̍h ē tàng jú來jú親密、豐盛。

我因為信耶穌kah上主連結了後，續接是kah老母關係koh再和好。我原本是驕傲hiâupai，看bē起做家庭主婦ê老母，kah她講無幾話句。信耶穌ê頭一件事to̍h是去kah她認罪、道歉，老母真歡喜，了後母女兩人做伙去市場買菜，做伙落灶腳，有講bē了ê話。

成功神學ê差謬，在tī kantaⁿ關心注意富足、尊榮ê福氣，soah疏忽koh khah重要ê親密關係福氣。一kóa高舉成功神學ê教會，成員大部分是成功者—少年ê、健康ê、súi ê、有錢ê、有名ê，罕得有失敗者—老ê、病ê、醜ê、貧困ê、無名ê。追求成功ê價值觀ē暗示á是鼓勵kah失敗者切斷疼ê關係，he to̍h是是信耶穌chìn前ê我，kah老母無疼ê關係。

上主賞賜ê福氣，有tī chitê地ê，有tī hiahê天ê，超過所求kah所想ê。Á chiahê福氣，lóng tī耶穌基督內面相kap做伙。耶穌ê人民lóng已經得tio̍h！