《陳雷文選》

 | | | 轉寄

寫hō͘學生朋友 ê 代誌 3 - 阮台北阿媽

作者 陳雷 2019.11.10

（Siá hō͘ ha̍k-seng pêng-iú ê tāi-chì 3） (寫hō͘學生朋友 ê 代誌 3)

Goán Tâi-pak a-má / 阮台北阿媽

Goán a-má lâng siōng-kài hó-siàng, put-sî khin-siaⁿ sè-soeh, bīn-á chhiò-gi-gi, m̄-bat khòaⁿ i siū-khì pháiⁿ siaⁿ-sàu. Chi̍t-sì-lâng kan-taⁿ nn̄g-hāng khiàm-tiám, chēng siàu-liân ta̍k-ji̍t ài suh chúi-hun-chhoe, chia̍h pûi ti-bah.

阮阿媽人上蓋好性, 不時輕聲細說, 面á笑gi-gi, m̄-bat看伊受氣pháiⁿ聲sàu. 一世人kan-taⁿ 二項欠點, chēng 少年ta̍k日愛suh 水薰吹,食肥豬肉.

70 hòe ê sî, i-seng kóng I ū koân-hoeh-ap, m̄-thang koh suh-hun chia̍h pûi ti-bah. Ē tio̍h sim-chōng-pēⁿ, tio̍h hì-gâm. Goán tōa-kū iú-hàu, thiaⁿ i-seng chhùi, kiò-I nn̄g-hāng lóng kái-tiāu. Koh kiaⁿ goán a-má m̄-thiaⁿ-ōe, chúi-hun-chhoe kā siu--khí-lâi, chhù-lāi bô-koh bé pûi-bah.

70 歲 ê 時, 醫生講伊有koân 血壓, m̄通koh suh 薰食肥肉. Ē tio̍h心臟病, tio̍h肺癌. 阮大舅有孝, 聽醫生嘴 , 叫伊二項攏改掉. Koh驚阮阿媽m̄聽話, 水薰吹kā 收--起-來, 厝內無koh買肥肉.

Goán a-má hiông-hiông bô suh-hun, bô chia̍h pûi-bah, chē iā m̄-sī, khiā iā m̄-sī, bē-su tio̍h tōa-pēⁿ. Tòng bô chi̍t-lé-pài, cháu-khì keh-piah tâu Gím--a:「Góa hòe-thâu chia̍h kau370--a, koh chia̍h sī kúi-tang？....Goán Chhun--a thiaⁿ-thiaⁿ he i-seng chhùi, chit-khoán kā góa lêng-tī.」siàn-tōng Gím--a khì chhī-á bé pûi-ti-bah chú hō͘ i chia̍h. Gím--a tông-chêng i, chiâⁿ-si̍t bé ti-bah lâi thau khòng hō͘ i chia̍h. Iū-koh o͘-se Gím--a khì bé chi̍t-ki chúi-hun-chhoe, ta̍k-ji̍t lâi Gím--a in tau suh hun-chhoe, chia̍h pûi-bah.

阮阿媽雄雄無suh 薰, 無食肥肉, 坐也m̄是, khiā也m̄是, bē輸tio̍h大病. 擋無一禮拜, 走去隔壁 tâu 錦--a ：「我歲頭食到70--a, koh 食是幾冬？....阮村--a 聽聽he 醫生嘴, 這款kā我凌治.」 煽動錦--a 去市á 買肥豬肉煮hō͘伊食. 錦--a 同情伊, 成實買豬肉來偷khòng hō͘伊食. 又koh o͘-se 錦--a 去買一枝水薰吹, ta̍k 日來錦--a in tau suh薰吹, 食肥肉.

Án-ne pêng-an kòe chi̍t kò-goe̍h, a-kū khòaⁿ a-má koai-koai bô su-hūn, bô chia̍h-bah, gū-tio̍h Gím--a tō kā phín:「Goán bú-á chiâⁿ-si̍t khì-phek, hoah kái tō kái, chi̍t kò-goe̍h bô hun bô bah, bô hì-haiⁿ--tio̍h.....」Gím--a tiām-tiām iā bô ìn--i.

按呢平安過一個月, 阿舅看阿媽乖乖無suh薰, 無食肉, 遇tio̍h 錦--a tō kā 品：「阮母----a 成實氣魄, hoah 改tō 改, 一個月無薰無肉, 無hì-haiⁿ--tio̍h....」錦--a tiām-tiām 也無應--伊.

A-má ióng-kiāⁿ chia̍h kàu 99 hòe, chhù-lāi poa̍h chi̍t-tó, kho̍k tio̍h thâu-khak, náu chhut-hiat kòe-sin. Liáu-āu tōa-kū kā Gím--a kóng:「 Ka-chài chá tō kái-tiāu, bô suh-hun, bô chia̍h-bah, oa̍h kàu 99 .」Gím--a tiām-tiām bô-ìn. Ū-sî siàu-liām goán a-má, chúi-hun-chhoe the̍h tī chhiú--ni̍h so, chhùi-liām:「Thiaⁿ-thiaⁿ he i-seng á chhùi, bô-iáⁿ bô-chiah.....」

阿媽勇健食到99 歲, 厝內poa̍h 一倒, kho̍k tio̍h頭殼, 腦出血過身. 了後大舅kā 錦--a講：「佳哉早tō 改掉, 無suh 薰, , 活到99.」錦--a tiām-tiām 無應. 有時數念阮阿媽, 水薰吹the̍h tī手--裡 so, 嘴念：「聽聽he 醫生á 嘴, 無影無跡....」

（chok-chiá chù：chhiáⁿ-iōng pe̍h-ōe-jī）（作者注：請用白話字）