《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第三章

作者 庄司總一　著 楊東傑 指導 林俊育 台譯 2016.11.06

教會ê祈禱會九點左右結束，安子應該比清文khah早tńg到厝，taⁿ已經過十點ah, iáu無看tio̍h安子ê影。

清文看十一歲ê獨生女清子天真睏面了後，就行入去隔壁ê食茶間，靠tiàm火爐邊等十分鐘了後，安子iáu未tńg來，hō͘伊真bē爽快，伊感覺真奇怪。cha-bó͘嫺為伊泡ê茶已經beh冷去ah, 清文一口氣kā伊lim完，就行出去外口。

清文知影安子有時會ùi後門入來，行出玄關就往hit-ê方向行去。雖然伊已經過了急teh等待bó͘ tńg來ê年齡，m̄-koh顛倒感覺kah-ná湧起chit種年輕ê氣氛，用出去迎接做藉口，mā是不止趣味ê tāi-chì。

藉tio̍h星光行入後院向後門行去，忽然聽tio̍h toh位有人teh講話ê聲。清文腳步停落來注意聽，伊聽出是用日語講kah有高有低ê聲。若是用日語談話，一定是安子無m̄ tio̍h，清文就行向蓮花池hit pêng去，家己mā m̄知什麼原因，neh腳尾恬恬á teh行。....幾年前─當in夫婦兩人對年輕並無注意ê少年時代，連個性內向koh無性感ê安子，tùi青春ê呼吸中間，透露出一屑á kah-ná瘴氣ê氣氛。對三男瑞文kah-ná白色薔薇ê淺淡愛情─chit-má準講有時á提起，清文總是講he是「可惜ê愛情」(Pity is love)，雖然是笑笑á講，卻是沉重koh囉嗦ê感覺。但是，he bat是伸手去摸就kah-ná鑿tio̍h刺會流血hit種新奇ê現實。Tio̍h lah, 清文想起to̍h是chit-ê池過去約二十公尺ê柚á樹腳，in bó͘ kah瑞文當teh歡喜談論啥物ê時，偶然去hō͘伊tn̄g-tio̍h....。

但是chit-má neh腳尾teh行，m̄是出tī hit種ê僥疑或是嫉妒。只是因為是暗時，無論什麼人都無想beh踏破chit-ê暗靜。

清文來到池ê頭前約十二公尺ê一叢龍眼樹腳就停落來，看見安子kah玉簾kah-ná親姊妹，相倚坐tī長椅頂面。清文心內感覺奇怪，忍bē-tiâu就禁氣來注意聽。Chit-ê時chūn，chit-ê所在，清文想bē出兩人到底teh講什麼tāi-chì。但是，ùi in細聲講話ê內容傳來到大腦，隨時判斷明白。清文tú-tio̍h chit款ê場面，實在進退兩難。但續落來koh傳來講話聲，
「Ah, 玉簾姊，今暗ê tāi-chì就當做咱兩人之間ê祕密，若hō͘厝裡ê人知影to̍h會惹起麻煩。....Koh來索á iáu掛tī樹á頂，明á載若hō͘人發見就費氣，若無緊來去the̍h落來....」

清文聽tio̍h安子kā玉簾講chiah-ê話，比來ê時koh khah neh腳尾行tńg去。

憤怒變成肉體ê感覺，清文折回行ê腳步有小khóa phiân來phiân去。伊soah不知不覺小步行向正屋去。

清文發見chit-má ê趕緊腳步，kah-ná直往景文房間ê機械行為，無真妥當。第一，時間已經hiah暗ah, 而且chit-má ê心情見tio̍h景文，一定會引起暴力。暴力行為並bē hō͘內心滿足，mā無法度解決問題，只不過留落來人ê軟弱kah女性ê感傷。....雖然是án-ne, 伊激動ê心情bē-tàng像一口氣to̍h pûn-hoa蠟燭火hiah簡單來消失。

為tio̍h tháu氣，清文自然koh行向siōng細漢小弟瑞文ê房間。因為事實上瑞文有參加chit-pái ê事業計畫，今暗ê協議會議應該來參加chiah-tio̍h，m̄知什麼原因無講就缺席。瑞文是一個無lám無neh ê cha-po͘人，可能是無意義ê lán-si無來參加，但若有bē-tàng參加ê理由，為何無先講一聲？

清文行過中庭，來到óa近頭前厝ê瑞文房間。厝內傳出吵鬧ê人聲kah chhi-chhi-chha̍h-chha̍h ê聲，伊隨知是teh phah麻雀。 清文無khok門就開門入去，行向耍kah真熱ê麻雀桌á。Kah-ná攪一陣風颱，瑞文gōng-gia̍h khiā起來，續落來koh一個cha-po͘人khiā起來，另外兩個人bē赴khiā起來，可能是厚面皮照常坐teh，手弄半中站停落來ê麻雀子á，giâ頭看lòng入來ê人。
「阿兄，真失禮，有朋友來lah....」

瑞文差不多是透明蒼白ê面，瞬間變kah紅kòng-kòng，但無一時á koh回復蒼白。

──所以我有kā lín講今暗bē-sái，lín tio̍h為我辯護，若無to̍h慘loh。

瑞文ê目光ǹg朋友ê面án-ne哀求。
「Án怎，你mā來摸一lìn如何？」

坐teh ê一個想beh phah圓場來討清文ê歡喜，露出奸笑ê面，tú-beh khiā起來ê時，清文已經忍受bē-tiâu，無講半句話，狠狠伸出手臂，kā排tī桌頂ê麻雀子掃落去土腳。
「Tńg去lín-tau, beh poa̍h-kiáu去別位poa̍h。」 Chia屬陳家ê一部分，但絕對m̄是清文家己ê房間，一般常識來講，這是非常無禮貌ê行為，顛倒可能會受對方用竹篾á趕出去。但是清文闖入來kah-ná一陣風颱，人客驚kah kiōng-beh破膽，chhìn-chhìn-chhái-chhái phah招呼就離開。

清文討厭所有ê poa̍h-kiáu，對麻雀等bē理解也bē寬容。台灣自早有牌á之類，但無麻雀chit款物，這是最近幾年ùi日本傳入來，變成大流行。Ài tòe人流行新物ê瑞文也開始沉迷麻雀，m̄是tī家己ê厝內就去別所在poa̍h，poa̍h kah透暝m̄知soah。清文早to̍h感覺真痛心，但瑞文已經中年ah, 不便kā伊嚴格指責。

但是今暗清文無講幾句，kui腹肚ê氣bē消。這m̄但kan-ta針對瑞文小弟個人懶散生活，最近常常感覺tio̍h陳家全家庭發生ê矛盾引起伊ê反彈，chit-ê機會致使清文心內反感。

陳家已經分家伙，財產也分配好勢，家長阿山也過往ê現今，舊ê家庭──準講尾溜留落來真chē矛盾kah混亂，大家庭ê底tì iáu有一脈相傳teh流無失去，所以講一個以前bē搖動ê有機體家族，現今已經無koh存在。Ná親像激烈ê生活力kah生湠，無久就形成無法度活動ê蜂siū，就會各自選擇新ê蜂王來分房。陳家實際上mā是已經達到chit-ê時機，但是人類ê行為比昆蟲khah bē曉安排。Taⁿ各自財產ê繼承分好勢ah, 一家ê主宰者mā失去ah, 當然應該分厝各自獨立khiā起chiah-tio̍h。但家長阿山喪期了後，in iáu是tòa原來大家族ê厝，每工ê生活kah以往，本質上看bē出有改變ê款式。清文幾pái提出分厝各自khiā起ê意見，但老母阿嬌kah年老長輩lóng無beh採納。Chit-ê陳家ê大眮體已經無頭，腳手mā 已經li-li-lak-lak，但厝裡ê人iáu是抱tio̍h愛惜ê念頭。In所顧慮ê是社會ê體面問題，因為漢民族ê「兄弟鬩牆禦外侮」思想，iáu流tī in ê血管內。因此產生全體家族ê利益為主，個人利益為次ê觀念。若是beh ài維持chit-ê傳統思想，tio̍h ài保持原本合一ê密切家族關係，若無就無意義。Chit-má各自隨意獨立行動ê孤立感覺，只不過是一陣khiā作伙，無法度像以前án-ne有意義ê協同體。景文kā大bó͘逼kah去吊tāu自殺，四界chhit-thô ê瑞文koh娶chit-ê平埔族ê cha-bó͘-gín-á入門。清文想beh合作創業，結果是今暗發生ê情形，to̍h是腐敗kah混亂，也是新時代ê原因，舊皮囊裝新時代ê酒就beh破去ah。但是kā伊想起來，tāi先裝入去新酒ê，m̄是別人，to̍h是kah日本人結婚ê清文家己。因此其實chit-má清文ē-sái離開大家族，自由自在去過家己ê生活，卻顛倒teh關心陳家全體ê秩序kah幸福，就是出tī家己phah破家族制度ê大家庭ê柱á ê責任感。而且，本底個人絕對自由意志kah強烈自我意識ê西歐精神，因為年齡ê增加變khah圓滑。清文感覺家己ê思想已經hō͘新潮流沖到遠遠ê所在，結局iáu是沉tī舊家世ê歷史kah傳統內底，ná親像teh看伊放出遲鈍ê光芒。

食過ê柑á kah弓蕉四散kah kui桌頂，土豆皮落kah kui土腳，電火光下面全是薰煙，清文看tio̍h chiah-ê就憂頭結面對瑞文講。
「麻雀kah工作toh一個khah重要？」
「真失禮，tú-beh出門ê時，chit陣pháiⁿ朋友溢óa來，我講今暗有tāi-chì，卻硬hō͘-in....」

瑞文án-ne辯解，忽然起嗽soah講bē落去。因為嗽kah真艱苦，加上嗽koh講bē出話ê雙重痛苦，伊無真勇壯ê身體，kah-ná phāiⁿ重擔tī路裡搖來搖去。
「實在有khah過份，bē-tàng出席tio̍h講一句。而且你無beh來是真無好，m̄-thang學景文ê款式，今暗hō͘我感覺非常見笑。Oeh,瑞文....」

Khiā tī chit-ê忽然ê嚴肅場面，清文khiú-tiâu小弟ê肩胛頭，beh hō͘ chit-ê猴死gín-á痛。瑞文ê心肝kah-ná毛tī火裡燒kah起khiû。

但是清文並無出重手，kah-ná鷲鳥khiú伊肩胛頭ê手，忽然有無慈悲ê感覺，ē-sái講是小弟體弱引起chit-ê感受，一股奇妙ê強力溫暖傳過來，忽然想講tio̍h放低聲調。

「瑞文，你mā小khóa khah giám硬leh，lín kiáⁿ已經teh讀中學ah，做老父ê kám-ē-sái án-ne無lám無ne teh過日子。我hō͘你參加chit-ê事業，以前kā你講過，並m̄是kan-ta hō͘你thàn錢，是beh ài你真正用心做tāi-chì，所以hō͘你一份事業做，就是ǹg望你今後ē-tàng過一個振作ê生活。你tī田庄ê土地ê tāi-chì mā是án-ne，我kā你租來開墾農園，比放hō͘伊繼續收成bái ê甘蔗園khah好，若是hiah單純ê考慮，我會斷然拒絕你ê加入。」

「實在真無應該，我並m̄是有心無考慮阿兄ê事業。....今暗我真糊塗，我知phah麻雀poa̍h-kiáu並m̄是好事，一遍koh一遍想beh改，朋友koh一招，便無法度拒絕。....我thài會hiah-ni̍h軟弱leh！」
「以你ê年歲來講，你bē kā家己ê軟弱用感傷ê心情來想chiah-tio̍h。你應該koh khah認真phah拚，去得tio̍h生活ê意志kah力量chiah好。你無需要像景文hiah-ni̍h貪心thàn錢....但每pái看tio̍h明chit-ê gín-á，心內lóng會感覺m̄甘。」

清文teh無頭無腦責備瑞文ê時，忽然真無自然放低聲音，因為伊看tio̍h明ùi隔壁房間門籬探頭出來看。家己ê老父hō͘人嚴格指責，對gín-á來講真bē堪得，而且明是一個乖巧敏感ê gín-á。所以清文有顧慮chit點。....Koh再講chit-ê 無tāi-chì ê長男，為tio̍h準備中學ê入學考試，hiah òaⁿ iáu teh讀冊，聽tio̍h隔壁teh大細聲就出來探頭，做老父ê可憐相，清文就壓制受氣，就起gōng-gia̍h。

清文無歡喜行出瑞文ê房間來到中庭ê所在，無意中去tú-tio̍h ùi橫接巷路出來ê景文。

鬱卒ê時chūn去tú-tio̍h討厭ê人，清文ê憤怒其實是針對景文，到taⁿ已經夠額ah，火氣有khah消。清文避開景文beh行離開，但m̄知什麼原因，景文soah tòe伊jiok來。
「我去阿兄你ê khiā家，cha-bó͘嫺講你tńg來koh出去，我自tú-chiah就一直teh chhōe你。」

伊ê話真奇怪，今暗會議伊想beh退股ê tāi-chì，不管伊gōa gâu講話都無法度解說。所以照常裡來講，伊對阿兄敬而遠之來逃避，清文是ē-tàng了解。想bē到伊會倒tńg來chhōe阿兄，可見伊是jōa-ni̍h厚面皮ê人，清文真無簡單鎮靜落來ê激動又koh起磅。M̄-koh chit-chūn伊無beh koh講起無歡喜ê tāi-chì，清文無chhap景文就離開，但m̄知什麼原因，景文iáu是tòe-teh jiok過來。
「小等一下，今暗ê tāi-chì，阿兄誤會我loh，我無hit-ê意思。王肇基hit kho͘烏白講kah hiah無理，其實我ê本意m̄是針對你，我ê心情是....」
「講啥物？」

清文腳步停落來，身軀轉向景文。
「你ê本意是啥物？ē-tàng辯解就講。」

清文用輕視ê口氣講，逼近小弟。

伊堂堂ê漢草kah-ná ē-tàng掩蓋小粒籽ê小弟，但是景文退後一步，無像無膽ê瑞文án-ne倒kiu，暗時看起來白牙齒露出笑容。景文一向態度圓滑，一旦若beh堅持家己ê主張，就會用kah-ná kah布簾at手pâ ê方法。總講一句，以今暗ê情形來講，普通ê作法就是ngh-ngh-eh-eh露出卑怯ê笑容，頭殼抓抓leh彎腰，顯出一副無奈驚惶ê款式。但是今暗，伊he矮矮ê身軀準備beh接受一切ê打擊，講伊厚面皮，其實hō͘人感覺伊對家己ê話有beh堅持到底ê態度。
「今暗hō͘你無面子，真失禮。但是，我m̄是一個無人情味ê戇人。我故意採取hit種態度，其實完全為阿兄設想，我想beh kah你好好á談一下，來我厝坐一下kám好？」
「已經夠氣ah, 我真知你腹肚內teh想啥，我無ài聽家己無信任ê人講話。」
「Mài講kah siuⁿ過份，你無明白我是jōa-ni̍h á為你設想。來我厝坐一下，á是來lín-tau mā好....」

景文tòm頭kā伊哀求，伊chit種平常m̄-bat有ê充滿真實ê堅決哀求態度，清文感覺真不可思議，緊張ê火藥味心情輕鬆落來，m̄-koh想講kám會去hō͘伊騙去，心情koh再激烈起來。
「你實在hō͘人真討厭，若有啥物話，tiàm chia講to̍h好！」
「罐頭工廠ê tāi-chì，請你停止chiah好！」
「啥物？」
「一定tio̍h停止進行，我kā你懇求！」
「你家己臨時逃脫kám無夠？你家己退股，我kah其他股東kám to̍h kah你同生死，hō͘你看扁去？不管你jōa-ni̍h有錢，我無法度原諒你chit款ê傲慢。錢算啥物？你為tio̍h錢，世界上任何重要ê事lóng ē-tàng犧牲，甚至ē-tàng hō͘ bó͘去死....」

講到chia，清文趕緊停止，無論án怎都bē-sái講出chit-ê祕密。想beh講koh bē-sái講，hō͘伊ê嘴齒感覺癢癢，一腹火koh再to̍h起來。
「你ná親像真親切teh kā我忠告，其實心內是驚我事業成功，而且你無願意你ê財產hō͘我超過，你是án-ne teh想tio̍h無？」

清文án-ne teh講，忽然感覺家己ê話真討厭，soah驚一tiô。Án-ne kah gín-á冤家仝款pháiⁿ話相對，或是cha-bó͘人烏白相罵一樣。準講對方有án-ne ê想法，你對伊mā無可奈何，為什麼tio̍h講出hiah-ni̍h刻薄推測ê話leh？M̄是推測ê話，若去hō͘景文講kah對對，伊用chit款kē路ê話回答ê本身，便是家己精神kē路所發出ê。Chit點清文家己無法度否認....。Tio̍h lah, 是清文家己嫉妒，認為對物慾淡薄，尤其是對金錢。但看tio̍h景文年年非常可觀ê勢面teh增加資產，清文講心底無嫉妒kah反感，這是相當通俗ê事實，清文也不得不承認。....伊ùi家己ê心內挖出家己ê弱點，心內真懊惱。

景文真清楚chit種情形，因為伊kā人類ê精神khǹg-tī低水準頂面，像講社會上有人談論某某人jōa了不起，人格清白，景文聽了bē有欽佩，mā無感覺可畏。伊認為he只不過是一個標籤，阿兄清文chit點iáu算bē-bái，bē有chit款情形。景文tī社會上接觸ê人，真chē是堂堂ê空殼。所以在景文看起來，人格ê高低，只不過是五十步kah一百步之差而已，無啥物了不起。無論in阿兄對伊bat有pháiⁿ ê批評或是卑視，伊lóng無感覺痛。問題m̄是tī標籤，是在tī皮包內底ê內容。

「無論你án怎看待我ê心意lóng無要緊，總是希望你暫時停止，我無ài講pháiⁿ聽ê話....」
「Taⁿ好bē！你何必為我操心啥物？」
「當然tio̍h操心，假使你若失敗，破產，beh án怎chiah好？」
「你chit-ê人，你teh擔心chit款tāi-chì....」 清文不知不覺想beh進一步逼óa去ê時，本來會退後ê景文竟然勇敢過來面對，而且有一股改變清文主意ê熱情。
「請你慎重考慮，這m̄是阿兄你一人ê問題，若無順利，陳家全體lóng....」

景文án-ne講了，想beh輕輕搭阿兄ê肩胛頭ê時，因為景文極力勸解清文，清文忍無可忍，同時忽然明白景文堅持ê忠言背後ê含意。清文出力kā景文sak開，瘦koh薄板ê景文hiaⁿh起來，但因為身體輕，搖搖leh iáu保持身體平衡無跋倒，m̄-koh運氣bái，撞tio̍h後壁ê棕櫚栽盆，tī磚á路面liàn過去，重重phah tio̍h頭殼。

清文走過去kā小弟抱起來，掠tiâu伊ê頷頸講：
「我明白ah, 你是擔心我事業失敗了後，會來哀求你救濟。好，做你放心，我死mā bē kā你討飯食。」