《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第二章（更新版）

作者 庄司總一　著 楊東傑 指導 林俊育 台譯 2016.10.30

安子tùi教會拜三ê祈禱會tńg來，比清文早半點鐘到厝。

Hit暗，她se̍h tùi後壁門入來，她ê khiā家tī陳家大厝東pêng ê護龍（hō͘-lêng）接續落去ê所在，若tùi正門ê大通路入來，行到她ê khiā家ê距離有小khóa khah遠；而且hit中間tio̍h tùi前埕通過厝ê gîm簷（chîⁿ），會經過其他人ê房間，自然to̍h會tú-tio̍h眾人，tio̍h kah in講話，mā有可能tú-tio̍h人teh冤家吵鬧。所以，若是緊急ê時，á是操煩，心情無清爽ê時chūn，安子就習慣tùi khah近家己khiā家ê後門溜入來。

總是，kah tùi正門無仝，若se̍h tùi後門，tio̍h經過一段a-cha ê小路。陳家kôan牆ê外口，有tòa一kóa khah低層ê人，in hit片無清氣ê khiā家連接tī陳家ê後門，看起來kah-ná皮癬ê款式。陳家chit-pêng ê圍牆tī要點ê所在，有插一kóa麥á酒罐kah玻璃碎片，所以手iáu未去摸tio̍h，心肝頭to̍h有去hō͘ 它割tio̍h流血ê感覺，每pái安子看tio̍h，to̍h bē爽快。陳家驚去hō͘ hiah-ê皮癬穢（òe）tio̍h，mā驚去hō͘ hiah-ê sàn-chhiah人侵犯搶奪，所以並無真正優美kah豐盛ê生活。因此án-ne，厝裡ê主要人物絕對bē去使用後壁門，kan-taⁿ僕人kah cha-bó͘-kán-á tùi chia teh出入，而且天iáu未暗，後壁門就會鎖起來，所以，每暗lóng會聽tio̍h人phah門，á是kòng鐵門環，teh叫「開門！開門！」ê聲。

安子想講門已經鎖起來à，佳哉門閂(chhòaⁿ) iáu未閂起來。Tùi安子khiā家ê樓腳，燈火洩過樹á縫，kan-taⁿ有一屑á光；無月娘ê暗時，內埕暗bong-bong。若是熱人ê時，會聽tio̍h cha-bó͘人teh大細聲講話，kah kah-ná teh哀傷亡國ê絃á聲。總是，tī有感覺寒ê冬天，除了聽tio̍h竹林內ê風聲以外，四界恬chih-chih， lóng無啥物聲。

安子tùi後壁門入來，行向有燈火ê khiā家。Chit時，面頭前ê小門，有一個人影出現。安子tú行到楊桃樹椏(oe) jia-cha̍h步道ê所在，所以她看會tio̍h對方，對方卻無法度發覺她。Chit-tia̍p，日本式khiā家照出來ê微微á光線，hō͘ 安子ē-tàng看見人影；雖然看bē出是啥人，m̄-koh，知影一定是cha-bó͘人。Hit-ê cha-bó͘人向有燈火ê安子ê khiā家探頭一下，就用kah-ná是縛腳cha-bó͘人ê行路姿勢，碎步行向內埕入去。
「Chiah-ni̍h暗à，到底是啥人leh？」安子án-ne teh想。

安子有看見hit-ê cha-bó͘人確實一手the̍h小型ê竹椅á。陳家後埕有幾欉大細ê果子樹，tī夜空中伸展茂盛ê樹枝。總是，chit-má m̄是出果子ê季節，tī chit-ê無人影ê暗時，她專工the̍h腳踏台beh來挽果子，he to̍h真奇怪。

安子已經入來門內，m̄-koh因為心內感覺奇怪，就koh倒tńg去hit-ê cha-bó͘人行ê方向，beh kā她看māi。Hia有一個十坪大ê矩型水池，頂面有浮睡蓮，koh-khah過去ê內面有樹木。安子khiā tī無水蛙teh哮ê水池á邊，注目看暗bîn-bong ê所在。她無看tio̍h鯉魚teh跳，mā無聽tio̍h厝裡ê人teh笑，á是紅嬰á暗時teh哮ê聲，kan-taⁿ風微微á teh吹，真恬靜。安子kah-ná teh期待啥物tāi-chì，恬恬khiā leh，向看無物件ê所在斟酌看，tī寂靜ê狀態中期待有啥物會出現，m̄-koh，只有大自然引起ê tín動，並無啥物意義tī-.leh。總是，chiah一目nih久，安子就聽tio̍h有啥物聲；m̄知是cha-po͘ á是cha-bó͘，一種teh哼ê低聲連續不斷，m̄-koh，她若一行óa去樹á中間，哼聲就停，koh再回復原來ê死靜，tú-chiah ê人影mā消失無蹤。安子無意識tio̍h家己行為ê特別意義，她就án-ne tńg去厝裡mā ē-sái；事實上，她to̍h已經beh oa̍t tńg身ā。Hit時，她忽然發見tī一欉樹á邊，有一個長lòng-sòng，看起來kah-ná棍á ê人形，安子不知不覺叫出聲來。她看tio̍h一個cha-bó͘人peh起lih腳踏椅，頷頸伸長，雙手掠tiâu高高ê樹枝，聽tio̍h安子ê聲chhoah一tiô，失神ê目chiu起烏暗眩ê款，cha-bó͘人踏無tio̍h疊腳椅，就án-ne搖搖leh倒落去土腳。
「Ah！玉簾姊。」

安子發出ê聲音，kah-ná一下kā水瓶倒頭栽，tùi細細ê瓶嘴kan-taⁿ流出一滴滴á水ê聲。
「玉簾姊，玉簾姊！你ná會做chit款戇tāi-chì leh？你....」

安子盡力kā倒tī土腳ê cha-bó͘人身軀抱起來，m̄-koh，失神ê玉簾lóng無回答。安子kā她ê上半身抱起lih腳頭u頂，出力搖她ê頭，頻頻叫玉簾ê名。

Kám講死去ah！？
安子tú注意tio̍h taⁿ害ā lah，tú-chiah發見tio̍h人影，隨時to̍h jiok過來，kan-taⁿ過一屑á時間niā-niā，kám講她已經吊tāu成功，死去à？當她陷落時間錯覺ê時，kah-ná一陣山風teh擾亂安子的心胸。Tī微微ê星光之下，玉簾ê面ná親像幽靈hiah-ni̍h蒼白。原本kah-ná龍眼籽ê烏金目chiu仁，hō͘ 長長ê目chiu毛蓋tiâu-.leh，隱藏tī小khóa naih-o ê目chiu內；看起來驕傲款式ê翹鼻á，taⁿ kah-ná吐bē出傲慢薰煙ê大理石煙筒管；半開ê嘴唇ná親像死去ê貝殼，mā kah-ná白痴仝款。玉簾到底是死去ā，á是teh睏？假使無明á載，就是講無時間ê概念，án-ne，死kah睏之間就差無到一mi-lih(milimeter，厘)。總是，有時間tī-.leh，時間tùi thán-chhiò ê cha-bó͘人身軀，傳來到安子貼tī她身軀ê手。安子無koh搖玉簾kah-ná石頭ê頭殼，她直接用手摸她ê胸坎á，她ê乳房kah-ná靜靜ê大海teh呼吸。
「我....iáu活leh o͘h？」

玉簾phah開目chiu喘一下大氣。實際上已經是自殺未遂ê結局；她kah-ná感覺頷頸iáu束tiâu-.leh，用手摸她家己ê頷頸。
「是án怎我iáu活leh leh？」

她半信半疑，koh問一遍，chiah忽然發覺家己iáu活leh。就án-ne，對活命ê否定kah反抗，m̄是，應該是無意識對活命ê肯定kah接納，hō͘ 她真正起狂大歡喜；玉簾án-ne大聲hoah了，就倉倉pōng-pōng peh起來。
「M̄好hiah大聲hoah lah！你kám m̄驚hō͘人知影你做chit款戇tāi-chì？拜託leh，小鎮靜一下。你ná會做出hiah-ni̍h驚人ê tāi-chì leh？」

安子拚命抱tiâu玉簾，用手掩tiâu她想beh koh嚷ê嘴。玉簾chit時喘氣真緊，嘴koh去hō͘人掩leh，艱苦kah擋bē-tiâu，真無簡單chiah kā安子ê手póe開了後，已經全身無力。「安子嫂....」玉簾án-ne講了，就接bē落去。安子teh等風湧ê水面平靜落來，她beh hō͘ 玉簾ê心充分歇睏，就漸漸放鬆抱tiâu玉簾ê手。經過一段沉默ê時間，安子開始teh想講到底兩人siáng tio̍h先開嘴khah好ê時，玉簾已經tāi先phah破沉默。
「你看我án-ne是m̄是真見笑？」

玉簾iáu是顯出抗議ê口氣，m̄-koh暗淡無力ê聲音已經露出她內心ê失敗kah絕望ê感覺。

安子問她為啥物會有chit款恐怖ê想法，玉簾kan-taⁿ講活了真無面子，無想beh活落去；她m̄肯講出尋死路ê真正理由。
「你若知影理由，會kā我笑，koh宣揚出去，以前我對待你....」

玉簾講bē落去，mā是m̄敢講落去。安子hō͘ 翁婿清文tùi遠遠ê日本內地娶tńg來陳家ê時，厝裡ê人真chē無表示歡迎，尤其是玉簾出tī女性本能ê嫉妒kah敵意，不時對新來ê阿嫂阻礙á是欺負。Chit-má換一個位置來看，她是一個敗北者。個性好強ê玉簾平時絕對無法度忍受chit款情形。總是，她kah景文之間長期來無幸福ê婚姻生活，chit-má已經kā她ê鬥爭力完全消磨掉ā。總是，她siuⁿ過kā對過去家己行為ê m̄-tio̍h看做是罪惡，所以陷落因果報應ê迷思觀念，soah感覺自責kah驚惶。
「我並無恨阿嫂，我所恨ê kan-taⁿ是景文，請你mài kā我責備。」
「Mài講hiah-ê，我m̄是hit款人。你若無相信人，就無法度相信家己。」
「請你原諒。」
「玉簾姊，我真了解你不幸ê婚姻，m̄-koh，何必tio̍h án-ne想bē開leh？」
「阿嫂是好人，我就坦白kā你講，m̄-koh....」
「我bē kā別人講。」
「我chit-má koh大腹肚ah。」
「Án-ne ná會想bē開leh？」
「我無想ài chit-ê gín-á，kan-taⁿ想tio̍h gín-á出世了後就驚，因為ta̍k工會煩惱bē完....」

安子攬tiâu玉簾，kā她安慰，慢慢á行向厝裡。總是，玉簾chit齣tī意料之外ê告白，hō͘ 安子驚一tiô，soah kā腳步停落來。Kám會是婚外懷孕？Kám會án-ne？玉簾看起來真性感，美貌koh妖嬌，m̄-koh，實際上並bē chhìn-chhái烏白來，ē-sái講是堅持清白；準講比一般人khah多情，她ê性格mā m̄是會隨便po̍ah感情ê人。若是玉簾真正陷落差錯，安子感覺真可惜。
「到底是懷孕siáng ê gín-á leh？」安子當beh án-ne問ê時，玉簾講：
「我幾nā年前to̍h咒chōa無beh生景文ê kiáⁿ，taⁿ soah....」

玉簾開始án-ne講ê時，安子內心感覺家己tú-chiah ê猜測實在是真pháiⁿ勢，同時mā鬆一口氣。她kā玉簾攬khah ân，koh再向前行去。

兩人行到池á邊ê椅條坐落來。池á內暗bîn-bong，濕tâm ê睡蓮葉反射出幽幽ê星光；鯉魚撇（phiat）水ê聲音連續兩三下，擾亂了kah-ná tī薄絹頂面teh眠夢ê靜靜空氣。了後，有房間傳出嬰á暗時啼哭ê聲，ná親像冬夜遠遠聽會tio̍h ê海水聲，聽起來真稀微。然後，烏白報時ê雞公mā teh啼，雖然時都iáu未到。總是，chit-má所有ê物lóng為tio̍h chit兩個cha-bó͘人開始teh起動；死去koh進入墓穴ê性命，已經kah-ná拉撒路koh活起來(譯註：約翰福音11:1~16 ê koh活故事) à。
「真佳哉有hō͘ 我發見，若無to̍h....」

安子深深感謝chit-ê偶然ê發現，án-ne teh講。玉簾聽了，隨時kui身軀phak落去安子ê腳腿哭出來。Chit-ê不幸cha-bó͘人ê靈魂雖然無幸福感，m̄-koh，tī安子腳腿頂面起伏ê肉體卻呼吸tio̍h幸福；活leh總是tio̍h感謝。安子tùi玉簾啼哭流出ê目屎，鼻tio̍h kah-ná芳油ê氣味，就án-ne放teh chhut-chāi她哭，然後問她講：
「生lín翁ê kiáⁿ，是án怎會hiah-ni̍h苦惱neh？」

這是一個無聊ê問題。M̄-koh，hiah-ni̍h不和ê夫妻之間，hit-ê受翁婿凌辱ê bó͘ ê心情，安子實在無法度想像。
「若是án-ne，為啥物無ài離婚？生翁婿ê kiáⁿ若是hiah-ni̍h苦惱，ná會無ài結束chit-ê婚姻？你m̄是伊ê bó͘，細姨阿龍chiah是伊ê bó͘，kám有hiah-ni̍h大ê差別？竟然會hō͘ 你到beh chhōe死路ê地步，為何無ài一刀兩斷leh？」

安子想講若講kóa無實際ê話根本to̍h無路用，mā無法度表達她深深ê感情kah真誠ê熱情，所以她就講出冷酷ê話。

玉簾ê激情已經退潮，溢起來胸前ê啼哭餘波mā停止，她就tùi安子ê腳腿gia̍h頭起來，講：
「離婚kah chhōe死，tó一項khah痛苦？這無啥好決定。總是，chhōe死ē-sái，卻bē-sái離婚。你mā有可愛ê清子，設使你ê gín-á kah老母離別，老母離開gín-á，你想看māi，he有gōa悲慘leh？」

玉簾用暗淡ê聲音án-ne抗議。實際上，tú-chiah安子hiah-ê話，若是冷靜ê時，只不過是一篇理論niā-niā，安子講bē出嘴。第二夫人阿龍已經生三個kiáⁿ，m̄-koh，陳家直系ê孫，就是景文ê長男景仁kah cha-bó͘-kiáⁿ美圓ê重要性已經bē變；若是離婚，玉簾bē-tàng chhōa chit兩個kiáⁿ離開陳家。她已經hō͘ chit-ê堅固ê傳統kah世俗縛死死，tī chit-ê中產階級社會，離婚是相當困難ê tāi-chì。總是，假使本人有相當ê勇氣kah決心來離婚，續落來ê障礙beh án怎去面對？對玉簾來講，hit-ê kah-ná拳頭拇ê縛腳，kám有法度回復原來ê平底腳盤？若需要靠勞動來生活，有啥物職業可能會適合她leh？而且她ê後頭厝王家有困難借錢ê情況，她是無法度做一個閒sian-sian ê cha-bó͘人；koh再講，她已經是超過盛年ê歲數，mā chhōe無對象thang再婚。
「Kám無好好á來和好ê辦法？」

安子絕望án-ne講，顯然是無啥物ǹg望ā。
人teh講，夫妻bē和to̍h kah-ná kah蠍á tòa做伙ê災難；m̄-koh，世間上mā有一世人bē合(ha̍h)ê夫妻繼續teh tòa做伙。總是，玉簾ê心情無hiah容易對夫婦不和有免疫性。景文可能是一個ài錢koh冷淡ê人，tú親像做bó͘ ê慣勢翁婿ê放蕩一樣，玉簾對景文ê性格mā ē-sái免hiah-ni̍h計較；而且景文並m̄是放蕩成性，伊mā有踏實koh勤勉等等ê優點。M̄-koh，針對chit-ê性格上ê優點kah缺點，景文內心深處ê心靈，玉簾lóng無法度去親近kah接觸。這m̄是景文性格好pháiⁿ ê問題，卻是性格siuⁿ過顯明，可能是án-ne chiah會hō͘ 玉簾無法度突破hit-ê障礙，來接觸伊真實ê靈魂。既然夫妻做伙生活，一年三百六十五工mā m̄是kan-taⁿ互相怨恨，chē少mā是有婚姻ê樂園。M̄-koh，這kan-taⁿ是一暗ê安寧休息，m̄是真正ê樂園，只不過是一場眠夢niā-niā。若是夫妻無精神上ê親和，總講一句，性就無啥物意義tī-.leh，kan-taⁿ留落來悔恨kah侮辱感niā-niā。已經七八年無koh生kiáⁿ，mā決心無beh koh生，卻忽然發現有娠ê玉簾to̍h是chit種心情。玉簾怨恨丈夫，m̄-koh對家己koh-khah受氣；tio̍h生家己已經決心無beh加生ê kiáⁿ，chit種違背家己意志ê tāi-chì，實在是真oh原諒ê恥辱。這完全是出tī家己ê問題，家己無責備翁婿á是怨恨ê權利。Chit時，她chiah覺悟家己ê m̄-tio̍h，知影她無法度要求任何人，mā bē-sái有啥物怨言。
「人到底為啥物目的來活neh？」

玉簾再三問家己chit-ê問題，結局kā chit-ê m̄知答案ê問題the̍h來問安子。

安子mā無法度隨時回答她；這m̄是食茶餅ê時teh談論ê哲學議題，mā m̄是lóng無危險ê講台說教，這是針對實際上面臨生死選擇ê深刻問題，絕對bē-sái chhìn-chhái回答。

人是m̄是有活leh ê價值？任何人都無法度hiah容易來回答chit-ê疑問。大體上講起來，會想起chit-ê問題ê人。伊ê精神就是無健康。咱人本來to̍h是活leh ê，若是beh對活leh有啥物價值貼標籤，tio̍h ài tī無限ê時間kah空間內面受創造ê性命，有向前延伸ê意志。Chit-ê受賞賜ê性命tio̍h ài加上啥物leh？就是ài加上求神ê心，mā ē-sái講是愛心。
「不幸ê時chūn，á是破病ê時chūn，lóng會想beh chhōe求thang óa靠ê人，kám m̄是？這就是心內開始想beh óa靠啥物、chhōe求啥物ê時chūn。倒péng來講，幸福á是歡喜ê時chūn，mā是tio̍h ài有仝款ê心情。Kan-taⁿ家己單獨體驗無夠額，傳hō͘ 翁婿kah kiáⁿ兒mā是無夠額；無論啥人都有chit種心情，kám m̄是？」
「我聽了雖然無真了解，m̄-koh，阿嫂是m̄是講tio̍h ài有信仰上ê神？」
「Eh，kan-taⁿ全心致意家庭á是夫婦，我認為m̄是充分ê生活方式。以你ê情形來講，你既然無kah意景文，這是無可奈何ê tāi-chì。我想，你不如kā心肝khǹg tī其他方面，像講khǹg tiám kiáⁿ兒ê身上，á是koh-khah全心投入廣闊ê人生。總是，你kan-taⁿ恬恬bē-sái得，tio̍h ài有行動；有所作為chiah是重要ê，這是我kah清文久長生活中所體會tio̍h ê心得。一個人若是kan-taⁿ思考kah用嘴講，我想he無啥意義。」

安子並無提起宗教，mā無用說教ê方法，koh khah無叫她tio̍h去教會。Tio̍h用啥物來hō͘ 家己活落去，chit點玉簾chit-má已經真清楚à。