《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第四章
作者 庄司總一 著 楊東傑 指導 林俊育 台譯 2016.11.13
瑞文ê chhit-thô同伴溢來厝裡phah麻雀，in bó͘春鸞捧茶餅出來了後，koh kah平常仝款hō͘人放tiàm壁角。因為無聊，想講看做什麼tāi-chì來消磨時間，就行入去瑞文ê細姨陣ê房間，招伊來i「葫蘆笨」ê poa̍h-kiáu。但是，阿陣kah平常無仝，心情鬱卒，精神振作bē起來。
「你平常siōng愛i葫蘆笨....無ài to̍h mài i。但是，你今暗thài會無元氣leh？....你若生一個á gín-á to̍h好。」
春鸞不可思議án-ne問阿陣。In翁瑞文娶阿陣入陳家ê門，到taⁿ已經滿四年ah。丈夫ê細姨無生kiáⁿ，對大bó͘來講是真好ê tāi-chì，但春鸞並無kā阿陣看做是丈夫ê細姨nā-tiāⁿ。
起初chit-ê姑娘tú入來厝裡ê時，因為siuⁿ過意外，春鸞mā gōng-gia̍h kah哭出來。幾年前，當景文娶身分低koh無姿色ê楊氏龍來做細姨ê時，陳家ê人非常gōng-gia̍h，以玉簾為中心引起種種ê摩擦，á瑞文ê情形有超過無不及。因為暴露in兩人tī田庄ê痴情關係，無法度藉口kan-ta kā阿陣當做cha-bó͘嫺來看待。而且她m̄是純粹ê台灣人是大問題，加上一個難題是她mā姓陳，仝姓ê婚姻tī台灣是根深柢固ê禁忌。另外一方面，大兄清文kah安子對道德ê觀點極力反對。脆弱ê瑞文遭遇全面ê反對，伊一個人抵擋bē-tiâu。結局盡力支持丈夫，hō͘伊ē-tàng達tio̍h願望ê卻是in bó͘春鸞，hō͘人感覺真意外。In bó͘認為可以，ē-sái講是希望án-ne，厝裡ê人無辦法只好默認。
春鸞屈服ê看破態度，kah狷介任性ê玉簾tú好相反，兩人lóng成做hō͘人討厭kah恥笑ê對象。但是，講起來mā是無辦法，春鸞m̄是「愛」ê君王卻是奴隸，伊愛丈夫卻kā丈夫所愛ê奪走，chhun落來ê iáu有啥物？她感覺真疑問。
但是，過了一段日子了後，春鸞漸漸感覺──原諒瑞文kah阿陣ê關係，並m̄是完全為tio̍h丈夫設想，mā是出tī對chit-ê姑娘來考慮。M̄知什麼原因，春鸞kah意chit-ê名叫阿陣ê cha-bó͘-gín-á。雖然kah意有種種無仝ê情形，她講bē出kah意ê程度kah理由hit款奇妙ê吸引力。
「你tī田庄kah瑞文熟悉，算起來也有六七年loh。....為什麼iáu未生kiáⁿ？」
「Ngh....」
阿陣感覺真無聊to̍h搖搖頭，桌á頂面ê電火照光in兩人對坐ê六仙桌，房間內ê四角落光線光線暗淡。阿陣穿開叉ê上海式流行長衫旗袍，因為室內光線無真光，深藍色ê絨質長衫，看起來色緻發烏。她hit-ê粗骨ê手帶雙股ê金手環，黃玉ê耳鉤搖leh搖leh真kó͘-chui。她ê耳á細細，形狀無súi，看會出她ê樸素卑微身世，但整體ê容姿看起來算是非常脫俗，chit-má已經是富豪人ê第二夫人，也無什麼thang見笑ê所在。但是，阿陣對已經習慣ê旗袍高領，tú-chiah就感覺gāi-gio̍h搖頷頸，真合軀ê長衫hō͘伊感覺拘束，心情kah-ná無真爽快ê款。春鸞是想講伊已經有娠chiah án-ne問伊，阿陣回答講m̄是。
「Ngh, 阿陣ah, 你身體bē-bái，thài會無boeh生kiáⁿ？」
「我mā m̄知什麼原因，bē生lah，我mā真ài有kó͘-chui ê gín-á。」
「去媽祖宮拜註生娘娘求子看bāi，若bē-sái chiah來kā人分kiáⁿ。」
「春鸞ê kiáⁿ分我一個kám好？」
「分你ē-sái....。但你kah-ná無想boeh ài有kiáⁿ。」
「真寂寞neh。....春鸞，你有boeh pok薰無？」
「無，你pok to̍h好。」
阿陣ùi原住民獨木舟型ê薰盒抽出一支薰來點to̍h，kah-ná boeh kā心內ê憂愁吐出來，尖嘴連續吐出一兩嘴薰。她hit兩蕊茶色ê大目睭投向壁頂，壁頂掛竹雕刻字句ê對聯下面，有一幅白朗峰(Mont Blanc, 阿爾卑斯山ê最高峰)風景圖，是瑞文最近ùi古物店買tńg來掛ê。「你看án怎？真súi ho͘ⁿh！比新高山kah次高山khah高。」瑞文指hit-ê hō͘萬年積雪蓋tiâu kah-ná剃頭刀削過ê連綿雪白山峰án-ne講。伊原本無想boeh hō͘ 阿陣看山景，免得引起她ê回憶，但最近她露出無精彩ê心情，對山kah田園大自然ê鄉愁，所以瑞文chiah掛chit幅風景圖來安慰她。
陳氏阿陣並無幸福。人對環境有適應能力，tùi習慣上來講，習慣文明生活比習慣野蠻未開化khah容易，習慣富裕生活比習慣貧窮khah容易，但chit-ê定則並無適用阿陣ê身上。她ê老母阿笑隨時習慣文明ê氣氛，真愉快teh享受。M̄-koh tī chia所講ê習慣，並m̄是指精神上ê文化，是指tòa高尚ê人家會感覺快樂，ē-tàng食chheⁿ-chhau，就是指chit種物資生活ê向上。可能是因為阿笑siuⁿ過度，暖衣飽食ê劇烈生活變化，她kah cha-bó͘-kiáⁿ同時來到陳家無夠一年，留落來田庄人無見過世面ê笑話，to̍h因為身軀浮腫來突然死亡。
In cha-bó͘-kiáⁿ阿陣to̍h完全無仝，她用一定ê物資，有時極少ê物就知足，自然界生物樸素ê習慣，她bē hiah容易消失。奢華ê衫褲是瑞文硬叫伊穿ê，koh講她是田庄人，想講她會大量貪食，其實餐桌頂面無論jōa chheⁿ-chhau，她絕對bē食siuⁿ飽。買金手錶hō͘伊ê時，她非常珍惜，但he只不過是kah-ná gín-á有玩具hit種ê歡喜。她隨時會曉讀時針kah分針，但無用頭腦來計算時間。「Chiah九點o͘h, iáu早。」瑞文án-ne講，但是九點對阿陣來講，只不過是一個記號nā-tiāⁿ。Iáu早á是siuⁿ òaⁿ，chit款tāi-chì她用肉體去感覺日頭ê位置就有夠額。但是tī陳家，頭腦中無時鐘bē-sái得，冬天另外一回事，若是春天kah夏天to̍h無分日夜。Kui暝lóng有人tī房間起床，mā有人tī半暝食飯，聽會tio̍h笑聲kah講話chhi-chhi-chhu̍h-chhu̍h ê聲，絃á kah月琴ê聲。阿陣ài早睏早起床，對伊來講，看bē-tio̍h日頭，地熱冷去，續落來一工ê疲勞──筋肉無teh振動ê時，習慣無意識感覺血流慢落來，肉體變遲鈍，就是teh命令她去睏來休息。她kan-ta渴望陳家所無ê日頭kah土，kah-ná hō͘人關tī牢獄hiah-ni̍h渴望日頭kah土。
有一pái發生下面ê事件。
過往ê阿傳阿叔有一個叫做秀通ê kiáⁿ，chit-ê少年人真ài耍phah鳥槍，每工早起時lóng出去phah鳥á。但是hit工掛tī壁頂ê槍phah無去，伊kui厝內問透透，一個一個問hiah-ê有腳手無清氣嫌疑cha-bó͘嫺kah僕人，lóng無結果。Iáu teh chhōe ê時chūn，阿陣忽然ùi後門tńg來，是她無講一聲to̍h借用hit支槍，她腰裡吊約二十隻山斑鴿(pan-kah)kah白頭殼á。
「你chit箍hō͘人驚一tiô，賊á原來to̍h是你，cheng-siⁿ！透早to̍h hō͘人bū-sà-sà，你tang時偷走入來我ê房間？」
秀通火to̍h大受氣，kā阿陣tu還伊ê槍一手奪過來，槍口向阿陣ê腹肚lu去。
「我一槍kā你phah死，用你ê腸á來灌ian腸飼狗！」
阿陣ê腹肚hō͘槍口tu teh, 身軀退後，她掠準真正會開槍。因為秀通bat兩三pái向她求愛hō͘她拒絕，這是求之不得ê報復機會，所以想boeh大大kā她heⁿh驚。阿陣真戇直，感覺jú來jú趣味。對精神發動kah行為表現之間無真正距離ê阿陣來講，假使她是hit-e5cha-po͘人，若是伊表現出來ê激怒真正ùi內心燒起來，她大概會從án-ne開槍。
「Án怎，你有服無？以後你若koh án-ne做，一定kā你phah死！」 阿陣真正受tio̍h heⁿh驚，顯露出對死ê恐怖kah緊張。少年人因此滿足報復消氣ê爽快，bâ-bûn笑起來，tú-boeh kā槍收起來ê時，拚boeh設法脫離chit-ê恐怖ê阿陣，趁chit-ê機會拔開槍口衝過去，狠狠咬伊ê手腕。
陳家ê人看tio̍h阿陣chit-pái意外ê狂暴了後，對她ê恥笑kah欺負to̍h有khah節制。其實衝過去咬人，這是阿陣來到陳家ê第一pái，koh再這kah一kóa cha-bó͘人見若冤家to̍h互相giú頭毛或是哭鬧比起來，阿陣ē-sái講加真鎮靜斯文。
Chit-ê kah-ná豹母ê cha-bó͘人，kám ē-tàng tī都市ê上流家庭生活？當初瑞文mā真擔心，但娶入來了後顛倒無必要hiah擔心。她ná親像hō͘人移徙無仝土地ê花，失去原來ê色芳。Tī阿里山連綿山脈ê所在，tī曾文溪流過廣闊ê甘蔗園kah田園，hit時她連家己ê價值kah存在ê理由lóng m̄知。但來到hō͘牆圍所圍kah-ná監獄ê陳家了後，她自然就了解家己本身。
「你ná親像啥物動物leh。」
瑞文常常真無奈何án-ne問，無論經過jōa久，阿陣有bē-tàng hō͘人理解ê所在。阿陣本身mā m̄知是án怎家己hō͘人講做kah-ná是動物，kah tī田庄ê時比較起來，伊已經加真溫純古意ah。
「你非常不可思議，看tio̍h你to̍h會起驚。」
「有啥物好驚？我á無giâ鐮le̍k-á，mā無giâ槍。」
「我m̄是指這lah，阿陣，你對我ê bó͘-kiáⁿ到底抱啥物心情？」
「是án怎leh？....我lóng真合意每一個人。阿明看tio̍h我to̍h用咬牙切齒ê目神看我，但伊生kah真像你，一副kó͘-chui ê面，一定是一個乖gín-á。春鸞是一個好人，kah她作伙lim茶講話，感覺她kah-ná真寂寞ê款。」
「To̍h是leh, 你chit-má講阿明kah春鸞是好人。Án-ne社會上人teh講，chit-ê是好人，hit-ê是pháiⁿ人，你kám知是什麼原因？」
「He我m̄知。」
「你to̍h是m̄知leh, án-ne你對阮bó͘，你有感覺做啥物pháiⁿ tāi-chì無？Kám一屑á都無感覺？」
「你講pháiⁿ tāi-chì....？」
「你看，你lóng bē明白。」
「你是講什麼人做pháiⁿ tāi-chì？」
「所講ê pháiⁿ tāi-chì──to̍h是指講白賊、hō͘人痛苦，奪人所愛ê物，to̍h是chiah-ê tāi-chì。」
「我會記得m̄-bat tùi春鸞奪取什麼物件，mā無講白賊，mā無hō͘伊痛苦ah。」
「若是你家己一個án-ne想，便無問題，但是對方若無án-ne想，會án怎？」
「Kám有啥物無好？因為你暗時mā m̄是lóng來我ê房間。」
阿陣無感覺tio̍h啥物矛盾或是疑惑，kah-ná真當然án-ne講。瑞文chhoah一tiô，從án-ne看破，無想boeh koh kā伊教化、提高她ê雅氣。她無自我意識，mā無反省ê能力，瑞文想講她kám會是白痴。性慾發起來ê時，以外ê tāi-chì全部ùi她ê意識中排除，全心一意koh純潔，ná親像滾滾湧出來ê泉水hiah-ni̍h清潔，無法度hō͘伊污穢。想講用手lā hō͘伊變濁，無一時á to̍h koh hō͘湧出來ê泉水澄清。瑞文hō͘ chit種湧出來ê力量kah大膽完全壓倒，tiāⁿ-tiāⁿ chhoah teh等m̄知如何是好。瑞文是一個氣派小氣ê人，若講伊想boeh做啥物tāi-chì，kan-ta ē-sái講伊是天生ài夢想，而且身體虛弱，siuⁿ過強烈樸素ê性刺激，hō͘伊bē堪得。伊快樂lim酒lóng tio̍h thàu水，無法度承受侮辱、不安、痛苦參雜ê tāi-chì。
「你kah-ná鹿á leh，驚死死ê lám鹿á，隨時hō͘ 豹kah熊食去，hō͘槍phah死，ná親像探頭探尾落來溪谷lim水ê花鹿。....Kan-ta關心別人ê tāi-chì, 老母án怎loh, 阿兄án怎loh....驚死無膽，真討厭。....今暗我真歡喜，黃昏ê時並m̄是án-ne, he ê chìn前mā無án-ne, 今暗to̍h是án-ne, án-ne kám m̄好？Mài 煩惱kah面青sún-sún，像日頭án-ne khah有元氣leh，自早以來to̍h是日頭kah月娘結成夫妻....」
阿陣對瑞文hit種半熟卵ê情熱真無奈，因為她無法度了解文化人ê自我意識，想講瑞文án-ne煮bē熟可能是病弱ê關係，美中不足伊m̄是Na-pa-la-mah英雄hit款ê壯男。
阿陣tiāⁿ-tiāⁿ講「征伐日頭」ê故事：古早古早，天頂有兩個日頭，日夜無停一直teh照地球，熱kah會燙人，河水乾去，草木lian去，人mā嘴乾kah真艱苦。有一個聰敏koh有膽量ê青年叫做Na-ba-la-mah，已經五六點鐘用弓箭射無鳥ah, 就遠征去射chit-ê日頭。Chit-ê Na-ba-la-mah出全身ê力，su-ut一下射出，瞄準無對，箭頭soah深深射入去日頭ê身軀，血流ná the落雨。因此，兩個中間hit-ê被射落來ê日頭ê死骸就án-ne隨變成冷冷ê月娘。
阿陣沿路講chit-ê神話，to̍h閃避伊bē-tàng kā日頭流血滴滴ê絕頂光景完全表現出來，就無客氣khiā起來，做出模仿Na-ba-la-mah giú弓ê動作。總是，tùi伊細漢to̍h死去ê老父所聽tio̍h番á ê傳說kah口頭傳述，有koh khah驚人ê故事。像講「戀慕鹿á ê cha-bó͘ gín-á」、「鲛魚有利齒」....「cha-bó͘人ê故事」、「蛇性ê淫亂故事」....等等。M̄-koh，阿陣kan-taⁿ kā chiah-ê傳說當做笑話kah低俗ê閨房， tī嘴裡無講出來。有tang時á 感覺好笑，會家己講講來笑笑leh，ná親像gín-á對不可思議ê傳說，koh驚koh ài聽，hō͘ 面增加光彩而已。起初，阿陣ê chit種行踏，tī瑞文ê眼內有討厭kah見笑ê感覺，m̄-koh，小khóa慣勢了後，to̍h無感覺gāi-gio̍h，soah變成kah-ná gín-á天真無邪koh自由ê清氣感覺。
總是，hit-ê阿陣mā年久月深了後，漸漸有改變。
台灣ê眠床大部分有安裝鏡，阿陣ê眠床mā tī頭頂安裝一面鏡，鏡面顯出她ê面容，嘴phé發光，熱情ê目神光iàⁿ-iàⁿ。Tú開始她家己無注意tio̍h，鏡是鏡，kan-taⁿ顯出家己ê面容。總是，無jōa久了後，她開始漸漸注意tio̍h hit面鏡。鏡內面m̄-nā有家己，mā有瑞文ê影像；無久koh有春鸞kah gín-á，koh感覺會顯出陳家全體ê影像。
阿陣就án-ne開始意識tio̍h家己所看tio̍h ê物件中間，kah以前有參雜變化。He是舊年一個熱天ê炎熱暗暝，瑞文beh招她去看戲來到她ê房間，阿陣tú tī屏風前拭身軀，兩人想beh tī屏風隔開來交換三言兩語ê時，in kiáⁿ阿明無出聲入來房間。
「Haⁿh, 阿爸有tāi-chì oh？」
老父真困擾，隨時tùi屏風出來。阿明穿落霜ê時穿ê洋服，kah-ná銅像khiā tī門口，身軀勉強khiā在，目神有koh樣。因為是tī老父ê情婦ê房間，想講一定有cha-bó͘人tī-.teh，假做kah-ná無看tio̍h，目睭巡視房間ê四箍圍。
「Oeh, 阿明，你為甚麼來chia？明年to̍h beh讀高中ā，無認真讀冊bē-sái得oh。」
瑞文真無奈teh隱藏家己ê失錯，強強用做老父ê威嚴，beh kā阿明趕出房間。M̄-koh，阿明無振動，大人ê虛假勢面kah困境ê弱點等等，hō͘ 純潔koh真實kah-ná尖錐ê少年人ê目睭看破。瑞文想講kah gín-á先做伙離開房間是siōng巧ê辦法，佳哉阿陣bih tī眠床前ê手工真幼ê屏風後面，人看bē-tio̍h。Tú-tio̍h chit款pháiⁿ剃頭ê情景，就án-ne bih tī hia，hō͘ 人看做無tī房間內。想講連無法度分別數量ê阿陣mā會運用hit-ê智慧，m̄-koh阿陣忽然tùi屏風ê頂面露面，kah-ná teh唱情歌講：「Mài講可憐ê話，請chhōa伊做伙來去看戲」，lóng無管人ê感受án怎。 M̄-nā án-ne, 她露出原形，tùi屏風ê後面出現，講：「緊準備，阮等你。阿明mā ài看戲，kám m̄是？今暗ê戲齣叫做....，諸葛亮ê勇敢故事。」
阿陣一直微微á笑，面緊向鏡，穿起水色ê對領ê衫。Kah-ná慢sô-sô koh bē曉分別，父kiáⁿ同時感覺受tio̍h侮辱，面對hit-ê非常無關心ê背影，kah-ná teh睨仇敵hit種敵意來看。
阿陣簡單穿插了後to̍h直直兩三步來到伊ê面前，m̄-koh兩人互相交換無平常ê目神，無意中腳步停落來。尤其是阿明ê面kah-ná強風飽帆膨tu-tu，目睭因為見笑kah受氣，火to̍h起來。
「你tńg去，kā我出去！」
阿明án-ne大聲hoah。因為非常突然，阿陣bē-tàng了解發生啥物tāi-chì。總是，chit-ê gín-á一定是有甚麼原因beh對家己做出hiah-ni̍h劇烈ê挑戰。三人ê胸坎隨時引起莫名其妙ê壓迫感，到底是甚麼tāi-chì kah理由，鬥爭ê感覺臨到肉體ê時，天真發出理性kah寬容ê本性，突然出現tī阿陣ê嚴肅ê目神中。Án-ne bē-sái得，瑞文有危險ê直覺，beh入去內面ê時，koh khah bái ê tāi-chì發生，阿明tùi洋服ê袋á the̍h-chhut發光ê物件。
「Tńg去lín田庄！Tùi阮tau出去！若m̄出去，我to̍h beh用這kā你刺殺！」
阿陣跳退後，掠tiâu桌á角。動物若是tú-tio̍h受危害ê時，非常恐怖kah受氣—防禦kah回避，koh khah bái ê場合tio̍h隨時ē-tàng猛然挑戰ê敏捷，kui身軀充滿hit種感覺。
阿明khiā在在，kā小刀gia̍h tiâu teh。Chit-ê少年人左思右想想bē開，m̄知如何進退khiā teh。M̄-koh，對手án怎講mā是gín-á，kā伊溫柔安撫絕對m̄是困難ê tāi-chì。總是，阿陣m̄知chit-ê簡單ê tāi-chì。
「想beh刣我，你chit-ê畜牲，我kám有做啥物pháiⁿ tāi-chì？」
「Kám無做pháiⁿ tāi-chì？Hō͘我ê老母無幸福，hō͘ 阮hiah-ni̍h艱苦....。戇大呆，pháiⁿ番á，緊tńg去山裡！Tńg去！若m̄ tńg去....」
阿明目屎kâm teh，chit-má kui身軀lóng beh哮出來。....人lóng teh講老父是不修邊幅ê阿舍kiáⁿ，老母是無自尊心ê薄命人。阿明無beh án-ne想，無論如何，伊無beh án-ne相信。因此，chit-ê加出來ê cha-bó͘人若存在，to̍h無法度辯解。Lóng是chit-ê cha-bó͘人ê緣故，chit-ê垃圾鬼ê lo̍k-kô͘-moâi-á土若汲出去，家己ê家庭to̍h會清氣liu-liu，阿明一直án-ne teh想。為tio̍h老父，為tio̍h老母，mā為tio̍h in chiah-ê gín-á，無kā chit-ê cha-bó͘人tùi厝裡趕出去bē-sái。家己chit種熱phut-phut ê心情，想講一定會hō͘ 對方心動，án-ne ê英雄情緒kah若bē通to̍h beh kā她刣死ê想法，kah強暴ê情緒kap做伙，少年人未完成ê肉體充滿興奮。Kui腹肚lóng是強烈ê責備kah懷恨ê言語，kah-ná厚雲聚集做伙，隨時液化變成哀傷ê哭聲，kui身軀ê力量脆弱分裂，腳手kah嘴唇軟siô-siô kah phi̍h-phi̍h chhoah。就án-ne，gia̍h起小刀koh再逼óa去ê時，動物的快速ê手當然一下to̍h hō͘阿陣壓落去。
阿明kah-ná水壩崩去哮出來，受掠tiâu ê手骨kah-ná魚á teh跳，阿陣扭轉伊ê手，就án-ne phah放hē teh，gín-á ê頷頸to̍h bē振bē動。
「Chhòng啥hoàiⁿ？Ba-ka-iá-ló͘! 馬鹿野郎！」
瑞文kah兩個相phah ê人仝款興奮chông óa去，對阿陣ê嘴phé連續搧五六下。
阿陣驚kah gāng去就放手，氣勢受折，無koh抵抗，變kah乖乖乖。
瑞文án-ne處理，m̄是臨機應變，kan-taⁿ想beh防止危險，只不過是興奮起來ê行為。總是，tùi結果來講，感覺he是一種ê靈機應變，kah-ná馬戲團中，對付原始的狂暴性動物，馴獸者揮動鞭索大聲hoah-hiu，tī人類ê睿智面前hō͘ 野獸順服。
Chit-ê tāi-chì發生了後，tī日頭光照射阿陣ê心野內面，憂鬱ê黃昏蔭影罩落來。
Hit暗，阿陣仆tī眠床the哭，以前m̄-bat kah-ná kā紙濕澹án-ne kā她ê神魂濕澹。小麥色ê嘴phé生出紅斑，hō͘ 瑞文ê手掌phah ê痛疼雖然真疼，並無án-ne ê感受，無受氣，mā無感覺可惜，至少kah她以前ê經驗過ê悲哀無仝。
「Kám是家己有做m̄-tio̍h？」
「是lah，你teh做pháiⁿ tāi-chì。」
「為甚麼？」
「Kám m̄是án-ne？你kám有án-ne teh想？」
M̄知tùi tó位傳來chiah-ê悲歌，從到taⁿ m̄知mā m̄-bat經驗過ê新奇悲歌，因此，阿陣本身mā暗中tòe teh和chit-ê悲歌來唱。仆tī眠床teh哭，目睭ǹg掛tī枕頭頂面ê鏡teh看。鏡內反映出懷念ê廣闊野原，對面有紫色ê山尖kah延續不斷充滿活命ê樹林。總是，hiah-ê lóng是以前ê感受，kah chit-má有無仝ê情趣。不管tang時、tùi tó位來，lóng bē-tàng進入pêng-an ê心境，雜錯kah bē-tàng kah以前仝款ê情景，目睭無法度清氣，四界lóng是「禁止進入」、「禁止捕捉小鳥」、「禁止折斷樹枝」ê khiā牌。
Chit叢是pháiⁿ樹，hit叢是好樹。—罪ê意識kah深入地下暗中teh流ê活命ê根明顯露出，失去水氣，已經bak-tio̍h乾燥ê lah-sap土。
阿陣就án-ne絕滅去。
「今暗非常寂寞，真想ài有gín-á。春鸞，請你m̄-thang kā我放sak！」
「Mài講hiah-ê五四三，真奇怪，無sêng阿陣ê款....」
「你ná會對我hiah-ni̍h親切？我bē了解。」
「因為我ài阿陣。」
「Ná會án-ne....。你kám是teh滾sńg笑？舊年ê熱天，阿明劇烈對抗我ê時，講是因為伊ê老母無幸福....。」
「Gín-á m̄-bat tāi-chì lah，我並無無幸福。你看，自從你來到阮tau，瑞文顛倒變khah溫柔，mā比以前khah tiâu-ti̍t，lóng對我講真實話。....我有一屑á疼to̍h好，無ài虛假ê疼。
「受tio̍h真chē疼siōng好，我感覺非常對不起春鸞，真pháiⁿ勢。」
「一屑á pháiⁿ勢to̍h無。....你ná會變kah hiah-ni̍h kiu-kiu，咱kám m̄是已經成做互相坦白ê好朋友ā？」
阿陣teh看掛tī壁頂ê Mong-bu-láng（Montblanc, 歐洲Alps/阿爾卑斯山ê siōng高峰）圖片，感覺chit-má to̍h想beh逃走出去hit-ê所在。
「你kám iáu想behtng2去田庄？」
「Ē-tàng當然siōng好，m̄-koh，chit-má已經bē-tàng。」
「是ah，chit-má koh khah bē-tàng，無法度ā lah。」
春鸞老實kā她否定，因為想講阿陣無tī chia mā無帶來啥物差別。玉簾講她愚蠢kah無自尊心來看她bē起，安子罵她舊頭腦，m̄-koh，春鸞無講kah半句話。M̄是講無beh講啥物，家己想beh有結構正確ê巧想法。像家己chit種容貌無起色koh無才情ê cha-bó͘人，bē-sái獨占cha-po͘人，寧可kā he想做是僭權。一般cha-po͘人絕對bē滿足一個cha-bó͘人，lóng是盡量忍受tiâu teh，chit項tāi-chì tī世間中lóng仝款。春鸞想講：違背chit種世間ê風俗kah人類ê本性無啥路用。因此，龍當做細姨入門ê時，玉簾痛苦kah亂chhau-chhau koh煩惱。若是我，kā第二夫人入門當做好事來看待，春鸞證實chit-ê美事。He mā是極其自然ê感受，m̄是特別ê努力á是虛假ê表現。丈夫娶入來ê情婦若是pháiⁿ cha-bó͘，完全無合家己ê意to̍h另外一回事，若m̄是án-ne，就ē-tàng充分和好。阿陣無智識，ta̍k項禮儀lóng m̄知，以大bó͘ ê優越身分來ûn-ûn-á kā她教導，春鸞有滿足感。另外一方面，春鸞感覺chit-ê cha-bó͘ gín-á有chit種奇妙ê新鮮活力，ē-tàng hō͘ 家己萎縮ê弱小心靈加添新ê活命。兩人tī無意識中互相添補空虛ê部分，就án-ne建立兩人中間ê奇妙親密關係。
「阿陣已經成做家內bē-tàng缺席ê人物，tio̍h覺悟chit點chiah是。」
「會án怎leh，瑞文可能會無ài我。」
「烏白講，無論如何lóng需要你。瑞文chit-ê人是ài滾sńg笑koh心軟ê人，因此，我家己tio̍h堅強....。」
「雖然是án-ne，瑞文最近對我lóng無teh關心，已經對我厭倦，討厭我。」
「無hit-ê tāi-chì，因為伊ê身軀無tú好。」
「M̄知甚麼原因，kám自早to̍h án-ne？」
「自我嫁來to̍h m̄是真勇健，m̄-koh無像chit-má hiah bái，hit時伊有真奇怪ê嗽....」
「Kám是肺病？」
「M̄是，醫生講可能是hō͘ 蛇咬tio̍h soah引起身體ê故障。總是，假使肺pháiⁿ去....」
瑞文tī曾文溪河邊hō͘ 毒蛇咬tio̍h，hit時阿陣應急處理，孔嘴用鎌刀割傷，koh用嘴吸收毒液。伊雖然救tio̍h一命，以後身體就漸漸變bái，關節tiāⁿ-tiāⁿ會痛疼，寒天容易感冒，koh無hiah簡單好，像流行感冒án-ne發高燒，失去食慾，所有ê關節lóng kah-ná神經痛。有時chūn因為黃疸症，清清ê目睭變kah黃濁黃濁。有時mā會引起腰子炎，súi-súi ê面浮腫起來。醫生講這是毒蛇咬tio̍h ê後遺症。
春鸞kah阿陣當the談論煩惱瑞文ê健康ê時，伊行入內房間。
無笑意ê視線投向in兩人了後，瑞文停tī入口ê所在點薰，然後行去到桌á邊，伊無隨時坐落來，雙手掛tī空椅á ê靠背，khiā tiàm hia。雙目teh看兩位夫人，伊ê面色比以往koh khah蒼白。
「Ah, phah麻雀已經soah à，今暝有khah早結束neh。」
因為in翁有受氣ê款，春鸞小心án-ne講。面對án-ne，瑞文想beh講啥，吐出ê薰煙chhèng入去目睭，半pêng面kah-ná顏面神經痛án-ne kiù筋。
「Koh輸ā ho͘ⁿh。」
阿陣用輕浮ê口氣án-ne嘲笑講。春鸞捏一把汗續teh講：
「輸贏ê tāi-chì無thang講，若是輸to̍h真可惜。」
「Chit-ê家kám thang放hō͘它敗落去？hit-ê麻雀有啥物趣味leh？每暗每暗，面色蒼白，講話沉重....
「面色真正真bái，你kám身軀有tó位無tú好？暗時深更ê薰草有毒。」
「免為我ê tāi-chì煩惱lah，無hiah嚴重....」
針對in bó͘真正為伊ê身體teh操煩，瑞文卻用惡毒koh無情ê話回答。
「M̄-thang放hòng-hòng，siōng無mā tio̍h斟酌阿明ê tāi-chì，koh無久to̍h beh中學ê入學考試ā。」
瑞文對chit種嚴格ê責備真憤慨，chit-má全部對in bó͘ 拚出來。 「我phah麻雀半暝tńg來，he是男子漢ê形象，無法度。照顧gín-á kám m̄是做老母ê義務？你差不多lóng注意hiah-ê芝麻小事，真傷腦筋neh。你bē放心，我就聽你ê話，今暗無beh去phah麻雀。請你體諒做翁婿ê心情，hō͘ 我有體面，mài kah-ná the趕人客，做一個有才情koh有智慧ê cha-bó͘人。」
瑞文kā家己ê tāi-chì暫時放hē-teh，kā in bó͘ chha̍p-chha̍p唸責備。春鸞頭lê-lê，無回半句話，想講家己mā有真chē缺點，m̄-koh，án-ne teh責備ê瑞文無koh再hiah-ni̍h無檢點。伊對chit-ê tāi-chì真清楚，為tio̍h準備考試tī隔壁房間teh讀冊ê長男，hí-lí-hôa-lah teh chhit-thô ê老父，kám有責備in bó͘ ê權利？針對充分了解家己理屈koh bē-tàng吐出苦衷ê翁婿ê感受ê可憐事(tāi)，春鸞tāi-seng khiā起來。
「春鸞無做pháiⁿ tāi-chì，是因為我無理kā她關tiàm厝內....」 阿陣想beh替春鸞án-ne辯護講。
「Kā我恬去！你m̄-bat tāi-chì。」
瑞文用冷酷koh嚴格ê話氣kā阿陣壓落去，然後kā劇烈ê視線對阿陣ê面睨一下，隨時koh oat tńg來向春鸞chit pêng，無koh再想beh向阿陣hit pêng看去。平常時劇烈反抗ê阿陣，chit-má kah春鸞仝款，無koh再反抗，視線落tī桌á頂面。....Tāi-chì是夫婦kah親子ê問題。
阿陣tú-tio̍h「禁止進入」ê khiā牌，驚一下soah gāng去。 三人一時恬靜落來，天井ê仙尪á叫兩三聲。若是kan-taⁿ春鸞tī chia iáu ē-sái，連平常時活跳跳ê阿陣mā無話koh無抵抗，瑞文忍受bē-tiâu。橫霸ê主人iáu講會過，m̄-koh，實在是笑詼ê悲哀cha-po͘人，沉默ê時間比較的khah bē-tàng忍受。
「Oeh, ná會m̄講話？」
匆匆pōng-pōng想tio̍h án-ne講，mā koh嗽出來。彎身koh用手掩嘴，東倒西歪phiân去椅á坐落來。春鸞走óa去，kā伊ê 尻脊骿loah-loah leh，無koh嗽à，就用手摸伊ê頭額。
「Ah，你有發燒。」
阿陣óa來邊á，想beh為瑞文做甚麼，家己m̄知tio̍h án-ne做chiah好，節拍笨chhiâng，想beh kā手伸去摸伊ê尻脊骿ê時，
「好à，án-ne好à。」
春鸞硬kā她阻擋，kah-ná摸tio̍h會有有大tāi-chì。然後就講： 「真艱苦ho͘ⁿh，緊入去房間內ê眠床歇睏。」
講soah就kā無力peh起來ê翁婿扶入去房間。
阿陣掠兩人出去ê門ê方向一直看，一時失神soah gāng去。總是，出tī hit種空虛ê感受，忽然焰火to̍h起來，隨時jiok óa去，阿陣想beh kā兩人giú開。M̄是án-ne nā-tiāⁿ，koh khah可怕ê tāi-chì是，瞬間想beh kā春鸞刣死，阿陣從來m̄-bat像chit-má án-ne hiah恨春鸞。M̄-koh，to̍h起來ê火柱隨時變弱，tī砂地變成死灰沉落去。然後，kah-ná tī砂頂面hông phah hoa去所chhun落來ê柴片，kan-taⁿ是受棄sak tī hia無味無素ê家己形影。
春鸞並無啥物意識來án-ne做，只是考慮翁婿ê身體，是以一個大bó͘ ê絕對權利kah自由來做。總是，阿陣tio̍h清楚家己ê地位kah角色，她ê感受kah-ná是奴隸hit款ê悲慘kah pháiⁿ看。
她kah-ná有啥物重要ê物件脫離肉體後ê無依óa，tī房間內顛來顛去。無一時á，她gia̍h起弔tī眠床頭ê空氣槍，一個人開嘴大聲hoah，寂寞大笑，向壁頂ê掛像piàng一下發射出去。
