《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第二十二章（更新版）
作者 庄司總一著 賴永祥指導 林俊育台譯 2017.04.02
因為自動車故障，清文中途落車。落雨了後，tī郊外ê路teh行，沿路tio̍h設法閃開tâm糊糊ê路面。相閃身ê水牛ê kha脊phiaⁿ iáu tâm-lok-lok，牛ê目chiu顯出真爽快ê款；甘蔗、棉花kah黃麻園，tī大雨中洗浴清氣了後，hō͘ koh再出來ê日頭照射，漸漸teh ta去。總是，清文ê心情kah-ná是踏tâm去ê鞋á，無法度隨時ta去。
行入市區ê街路，伊ê心情鬱卒；清文想講án-ne bē-sái得，就想beh暫且做kóa啥物tāi-chì。伊想beh去剃頭，m̄-koh，頭毛iáu未長；伊koh想講去一下á真久無去交關ê古董店，chit-ê主意mā bē bái。Hit間正面有三間店面闊ê古董店，光線無真光，m̄-koh會散發出歷史ê氣味。Tī hia經常有滿載人類智慧á是美事ê圖畫流傳出來ê歷史。看支那ê古錢，頂面有映出in ê皇帝ê面；摸hiah-ê陶器，to̍h kah-ná摸tio̍h幾百年á是幾千年前ê人民ê肌膚；若是ē-tàng tī hia chhōe-tio̍h kah意ê珍貴ê出土之物，he是siōng kài好ê。
清文teh bóng行se̍h街，來到市中心圓環ê小公園ê時，看tio̍h對面有三個五個下課做伴beh tńg去ê女學生。Tī日頭投落ê鳳凰木、苦楝á樹kah椰子樹ê樹影中間，眾少女tī hia teh行過來。清文隨時想tio̍h清子，想講有可能會tī chia tú-tio̍h她。
清文kah女學生所行ê兩條放射路tī圓環會合，koh向中央ê大路行去ê時，伊kah清子相tú。清文心內teh想：「Ngh，實在真好；tī雨停ê日頭下已經行相當一段路，有一點á流汗，而且清子tùi學校下課mā thiám à，ē-sái chhōa她來去啥物所在食涼ê，若是她ê同學ē-tàng做伙去tàu鬧熱，to̍h會koh khah好。」伊beh去ê古董店tī chia附近，m̄-koh，伊就án-ne bē記得tú-chiah teh想像ê歷史源流，換beh行oá去cha-bó͘-kiáⁿ hia。
「Ah，清子，小等一下！」
清文差不多to̍h beh叫出來à，m̄-koh，tī伊ê嚨喉iáu未發出聲ê時，清子m̄知為啥物，忽然趕緊走入去亭á腳。清子看tio̍h老父ê時，面色tńg白，koh面無表情。Kah她做伙ê同學hō͘ 她放tī後面，in mā感覺心悶；in teh看khiā tī hia ê清文。
清文出tī父女ê親情，真自然beh近oá清子ê時，她soah真意外忽然走開，hō͘ 清文tī hiah-ê少女面前感覺真gāi-gio̍h，真pháiⁿ勢；伊感覺家己ê cha-bó͘-kiáⁿ是一個奇怪ê cha-bó͘ gín-á。她ê同學隨時jiok óa清子，大概是一直teh問她是啥物原因？續落來in to̍h消失tī人潮中。清文khiā tī hia，戇戇á teh看in ê背影。
然後，清文行入去古董店，m̄-koh，伊對歷史ê悠久長流一點á to̍h無法度集中心神，伊ê腦海中一直teh想in cha-bó͘-kiáⁿ ê ku怪態度。 暗時，親子三人圍桌食飯；安子m̄知影今á日父á-kiáⁿ tī路裡發生ê tāi-chì。
「我今á日去農場，看見菜頭非常好；我忽然想beh煮 “hu-lo-hu-ki”（譯註：風呂（hú-loh）吹き，請參考圖：
）菜頭滷；tho͘-má-to͘h mā真好，kan-taⁿ蘆筍總是生長不良，真緊to̍h硬khok-khok。」
面hō͘ 日頭曝kah烏金ê安子án-ne講。台灣ê菜頭kah日本內地ê比起來，滋味有khah差淡薄，而且菜頭煮湯並無適合天氣熱ê時，m̄-koh，她想講家己種ê，in應該會歡喜chiah tio̍h。
「滋味án怎？」
「好食！你講chit項菜叫啥物名？」
「“hu-lo-hu-ki”，菜頭滷。」
「Hah-hah！」
清文發出chit種勉強ê笑法，安子chiah注意tio̍h清文kah清子lóng無teh講話；tú-chiah到taⁿ，lóng只有她家己一個人teh講。
「今á日ê菜kah-ná lóng是素食ê料理，m̄-koh，阿爸控制食肉對身體bē bái；近來社長ê腹肚有一點á凸（phòng）起來neh。」
安子án-ne講，m̄-koh，父á-kiáⁿ兩人lóng無teh笑。
「清子若看tio̍h桌頂無肉，總是無意無意。可能是當teh成長ê期間，m̄-koh，chit-má kám m̄是停止成長à？以前量ê時，你已經比我koân兩寸à，kám m̄是？你hō͘ 我看起來特別矮neh；he以後，有koh khah koân ho͘ⁿh？Oeh，清子？」
老母án-ne teh kah她講話，m̄-koh，清子恬恬無應話，kah-ná希望ē-tàng緊食飽ê款。清文teh期待清子講話，所以kā想beh tín動ê箸停落來，m̄-koh，清子iáu是恬恬m̄出聲，無想beh應話ê款。清文講：
「阿母teh問你，你是án怎leh？」
清文ê話雖然無嚴厲，m̄-koh，老父心內ê不滿kah責備ê氣氛，自然顯露tī食飯桌頂；安子mā有感覺tio̍h。總是，觀察tio̍h cha-bó͘-kiáⁿ teh無歡喜ê清文，tùi tú-chiah mā是面色àu-tu̍h-tu̍h，恬恬teh食飯。總講一句，可能是有啥物不如意ê tāi-chì。M̄-koh，這是因為事業上的操心neh？Á是 kah cha-bó͘-kiáⁿ直接有關係ê tāi-chì？安子一直推測bē出來，她認為應該是清子ê m̄-tio̍h。平常時，她kah老父講ê話無kah老母講ê話ê一半chē；安子感覺她對雙親ê感情流露有分別。她是in唯一ê寶貝cha-bó͘-kiáⁿ，老父對她ê疼當然一屑á都無chham任何雜質；總是，cha-bó͘-kiáⁿ若無率直接受伊ê疼，án-ne，老父對她ê疼ê表達，mā會tī意識上khah bē自然。安子感覺近來父á-kiáⁿ之間kah-ná有小khóa代溝，她希望bē有chit種可能；m̄-koh，若是真正án-ne，tio̍h án怎chiah好leh？安子有時會家己一個人án-ne teh想。M̄-koh，她koh感覺是家己想了過頭，看起來事實上mā是án-ne而已。總是，tī eng暗ê食飯桌頂面，她有感覺tio̍h父á-kiáⁿ之間hit種無自然ê氣氛。
清文到taⁿ lóng m̄-bat責備過清子，所以安子雖然感覺tio̍h父á-kiáⁿ之間有小khóa代溝，m̄-koh，她iáu是真安心。
「你食飯ê時間，kám iáu teh想小說情節ê發展？Chit-ê gín-á有時kah-ná是一個讀冊狂leh。」
「Teh讀一koá啥物冊？」
清文án-ne問，清子iáu是恬恬；安子代替她回答講：
「大概是昨日，她teh讀To-su-tho-i-e-hu-su-kí（譯註：日語：ドストイエフスキ—，英語：Dostoyevsky，華語：杜斯妥也夫斯基；Lo-se-a ê小說家；代表作：《罪kah罰》）ê作品。
「是To-su-tho-i-e-hu-su-kí oh？」
「她閱讀ê速度非常緊，tī我teh做裁縫ê時，她就讀完一本冊ê款。」
「Tī英國一流ê國家，家長對gín-á ê讀物有嚴格ê選擇。」
清文ê講法無真率直；暗頓已經teh beh結束，清子teh等機會beh khiā起來。
M̄-koh，老父ê話kah-ná hō͘ 她有後chan去夾tio̍h物件hit種感覺，清子soah不便khiā起來離開。氣氛有一點á gāi-gio̍h，安子自然想beh hō͘ 兩人之間ê氣氛khah平和leh，她講：
「M̄-koh，清子ê成績m̄-bat lak落來第二名，chit方面無啥thang嫌lah。」
「學校成績ê好bái，kah注意她閱讀ê冊是兩回事。M̄是講chhìn-chhái讀chē冊to̍h好；若是siuⁿ過沉迷小說，顛倒會m̄知應該有ê人情世事，kám m̄是？」
清文為tio̍h beh打破沉重ê氣氛，án-ne隨意講講leh。M̄-koh，清子趁老父ê話有一個坎站ê時khiā起來。
「清子，你小等一下！阿爸有話beh kah你講，你等一下來我ê房間。」
安子聽tio̍h án-ne，她想講清文會受氣是當然ê。
「真是ku怪ê gín-á，ná會有chit種性格？」
「講tio̍h性格？雖然她自細漢to̍h脾氣有一點á怪，m̄-koh，m̄是親像chit-má án-ne。」
清文ê意思是beh講這m̄是她本來ê性格，是因為tī特別ê境遇受tio̍h扭曲，chit種性格顯然是tùi後天（hiō-thian）形成ê。安子mā是án-ne teh想，只是她無ài講出嘴；若是án-ne講出嘴，結果，kám m̄是會koh倒tńg去她kah清文結婚ê宿命？
「這kám可能是因為她身體無真健康？她只是身材生了khah koân，其實是外表好看頭；若小khóa過度運動，á是讀冊過度，她隨時to̍h會發燒，心臟mā chih載bē-tiâu。」
「身體lám的確會影響個性，希望她ê身體會勇健起來。你就kā她講，eng暗免來kah我講話，以後chiah koh講。」
「所以清子tiāⁿ-tiāⁿ講她ê體質無適合熱ê所在，她chiok無ài熱ê國家。我有看她最近交hō͘ 學校ê報告，她引用《氣候kah文明》hit本冊，kā台灣kah日本內地做比較來發揮。」
「她平常時無啥有嘴尾，寫作ê時koh真無客氣，想tio̍h啥to̍h寫啥，不管人ê感受。」
「她畫圖真好，作文mā相當厲害。」
清子ê作文題目是「論貧惰」；早to̍h發展文明ê印度kah埃及，ná會無法度繼續維持，soah衰敗落去？In ê文化、文明，以及in ê盛衰，大概kah地球ê緯度有關係；人民ê性格mā免不了會受tio̍h氣候kah水土ê支配。她án-ne論述，結尾ê時koh寫講：所以ǹg望各位老師，tio̍h特別寬容阮chiah-ê tī真熱ê殖民地teh生活ê cha-bó͘ gín-á ê貧惰kah頭腦bái；她án-ne用充滿khau洗ê語氣來做結論。
M̄-koh，清文讀chit篇文章了後，伊無kā她誇耀，mā笑bē出來；kan-taⁿ有講bē出ê寂寞感。伊看tio̍h文章中間有莫名奇妙ê虛偽，若講是àu古（拙劣）mā ē-sái-.tit；文章若是ē-tàng koh khah天真kah真實to̍h好。所以講chit-ê gín-á已經受tio̍h扭曲，已經失去她ê純真；而且看ê人ê目chiu mā是有受tio̍h扭曲，kám m̄是？無論如何，對感覺hiah-ni̍h迷惑ê清文來講，kám m̄是真寂寞ê tāi-chì？
安子對in翁ê心情真了解。伊kah少年ê時代無仝；經過充分ê磨練，伊chit-má無koh有激烈ê感情。安子mā真無奈ê寂寞感。Tú-chiah伊有受氣，m̄-koh，清文kah cha-bó͘-kiáⁿ講話ê中間，顯然變kah真弱勢。 清文tú-chiah講「希望她ê身體會勇健起來。你就kā她講，eng暗免來kah我講話，以後chiah koh講。」，chit句話顯示出伊kah-ná beh放棄ê弱點；安子感覺he比激烈ê感情koh khah hō͘ 她感覺無奈。
「你án-ne，bē-sái得lah。你一直kā她théng-sēng，會成做習慣性，án-ne對她無好。eng暗，請你好好á kā她問看是啥物原因，koh開拆道理hō͘ 她聽。」
過無一時á，清子tùi樓頂老父ê房間落來。雖然她ê面àu-tu̍h-tu̍h，m̄-koh無teh哭。安子想講她有叫in翁tio̍h嚴格kā清子說教，m̄-koh，她想bē到清文對清子卻hiah-ni̍h溫和，安子就安心落來。Chit時，安子想講家己無講幾句bē-sái得，就叫清子來，m̄-koh，清子連oa̍t頭都無，tùi坐tī人客間teh等她ê老母身邊快步經過，行入去家己ê讀冊房。
過無一時á，安子聽tio̍h清子ê哭聲。
「清子，你哭kah hiah悽慘，是m̄是hông責備kah真thiám？」
清子仆tī鋼琴koà頂面，kha脊phiaⁿ起起落落teh哮；安子tùi她ê後壁親切teh kā她安慰，講：
「你莫怪hō͘ 人án-ne責備，是你家己m̄-tio̍h。今á日，你到底是án怎leh？阿爸tī路裡看tio̍h你，歡喜beh chhōa你去食涼；m̄-koh，阿爸就近你ê時，你卻假做無看見，án-ne當然是你m̄-tio̍h。M̄-koh，你ná會假做無看見，你án-ne做是出tī啥物心情leh？」
「無啥物lah，無tāi-chì。阿母，請你做你去。」
「有啥物tāi-chì，你kā我講。心內若有啥物煩惱，á是痛苦ê tāi-chì，你m̄-thang khǹg tī心內，lóng tio̍hkā我講。」
「免lah，我想beh家己一個人靜靜，mài管我！」
「無no͘h，án-ne bē-sái得。你若m̄講，我to̍h beh一直tòa chia。」
準講清子kah-ná貝類kiap-tiâu岩石án-ne，固執m̄開嘴，安子mā決心beh kā她sóa tín動，絕對無beh放棄戰鬥。她kā cha-bó͘-kiáⁿ桌前ê椅á giú óa來鋼琴邊á，坐落來。
「清子，你若是家己m̄講，我來替你講。」
清子ê面色蒼白，tú親像欠缺信心ê外科醫生tī手術chìn前，teh擔心手術了ê結果會顛倒變khah bái。
「你心內大概teh討厭阿爸ho͘ⁿh？Tī學校上課中，有一位老師惡言批評基督教，koh kā你khau洗。聽講這hō͘ 你感覺真艱苦心，所以阿爸有去kah校長理論。Koh有上體操課ê時間，iáu有每年hit-ê四十公里ê行軍訓練，阿爸lóng堅持無ài你參加，因為你每pái參加了後，lóng會身體無爽快，發燒，心臟chih載bē-tiâu。每pái阿爸lóng會去學校陳情，m̄-koh，án-ne顛倒hō͘ 你ê立場無好；阿爸kah-ná是teh加做無需要ê tāi-chì，顛倒惹起麻煩，是m̄是án-ne？」
安子嘴內án-ne teh講，心內卻感覺顯然m̄是chiah-ê原因。今á日gín-á對阿爸ê態度，一定是出tī完全無仝ê創傷。安子ǹg望ē-tàng chhōe出hit-ê創傷，thang減輕她ê痛苦；安子雖然án-ne teh想，m̄-koh，她對hit-ê重要ê因素有驚惶，所以，soah講tùi別位去。
「總是，阿爸chiah-ê做法lóng是出tī疼cha-bó͘-kiáⁿ ê用心，你soah來討厭阿爸。He若有一個程度是無要緊，m̄-koh，你今á日對伊ê態度無sêng對家己阿爸ê態度。Hit時，阿爸tī你hiah-ê同學面前ê心理感受是án怎？你mā tio̍h替阿爸小khóa想一下。」
「M̄-koh，我並m̄是討厭阿爸ā....」
「Án-ne對待阿爸，kám ē-sái講m̄是討厭阿爸？」
安子知影清子的確m̄是討厭阿爸；chit-má講ê是極其表面ê tāi-chì，關鍵是在tī koh khah深ê因素。
「你並無了解阿爸，伊少年ê時食過苦，種種ê苦。」
「我完全知影。」
「你ná會知，he是你出世以前ê tāi-chì。」
安子想起清文少年時hiah-ê暗淡ê時期，目屎禁bē-tiâu to̍h流出來。阿爸hiah-ê滿腹ê苦楚，清子自然會承受；安子chit-má想beh講出來，hit-ê勇氣卻受tio̍h挫折。
「阿爸自細漢to̍h討厭做m̄-tio̍h ê tāi-chì，而且tiāⁿ-tiāⁿ為tio̍h正直ê tāi-chì堂堂正正teh戰鬥。你有chit種出色ê阿爸，你tio̍h家己認為真幸福。M̄-koh，你總是顯出kah-ná無幸福ê面色；無lah，並m̄是tiāⁿ-tiāⁿ án-ne。」
「我看起來kah-ná無幸福oh？」
清子講tio̍h真gāi-gio̍h。她ê面雖然iáu仆leh，m̄-koh，哭聲已經停；她又koh顯露出她固執ê好（hò͘ⁿ）勝心。
「我m̄知你有chit種感覺。」
「阿母，你kám m̄是仝款無幸福？」
「Ai-ah，我kám無幸福？你tùi tó位講起？你kám teh講戇話？」
「因為我看過阿母ê日記。」
「啥物日記？」
安子因為cha-bó͘-kiáⁿ意料之外ê話，忽然soah m̄知beh án怎講。He是她tī丈夫出國ê期間，家己一個人tī厝裡閒閒無tāi-chì所寫ê舊日記。Tú好hit時，chit-ê gín-á iáu tī腹肚內。這是真久以前ê tāi-chì，她kā日記khǹg tī衫á櫥內面，chit-má連khǹg tī tó一個角落mā lóng bē記得à。總講一句，he是十七年前寫ê，到底是hō͘ 人看見無妥當，á是hō͘ 人看見mā無所謂，chit-má連chit點都bē記得à；後來mā無kā它koh the̍h出來讀，所以到底寫kóa啥物tāi-chì，安子mā一時無法度回想起來。Cha-bó͘-kiáⁿ講她tùi hit本日記讀出老母ê無幸福，安子記bē清楚寫過hiah-ê tāi-chì，m̄-koh，她chit-má一定tio̍h否認家己有hiah-ê無幸福ê感受。
「你讀了日記，to̍h認為阿母無幸福。你ê想法m̄-tio̍h，你對啥物tāi-chì lóng用無平正ê眼光teh看，所以會m̄-tio̍h；你真正是一個gāi-gio̍h ê gín-á！」
「因為我是阿爸ê cha-bó͘-kiáⁿ，有hit種老父to̍h有hit種cha-bó͘-kiáⁿ。」
「你認為阿爸怎樣？」
「伊是一個真gāi-gio̍h ê人，名譽心重；伊希望家己了不起，希望幸福；伊做事倉倉pōng-pōng，卻做bē到；伊tiāⁿ-tiāⁿ煩惱東煩惱西，hō͘ 阿母苦惱。伊既然是án-ne ê人，ná會beh娶日本bó͘ leh？」
「清子，你！」
「而且，伊後悔kah阿母結婚。」
「清子，你ná會án-ne講？你講ê lóng m̄是事實，he是你ê誤解。」
安子極力否認；cha-bó͘-kiáⁿ講ê確實有一半是誤解，m̄-koh，mā有一半是tio̍h ê。Hit時，她kah chit-má ê心情無仝，有小khóa無開朗；mā ē-sái講hit時是無幸福。
過去ê已經過去，m̄-koh chit-má leh？
安子án-ne teh想，心內鬱卒；她kā兩支手骨khòa tī鋼琴koà頂面，面仆tī雙手，開始哭起來。她就án-ne想起日記最後添寫ê話：「我想iáu是kā chit本日記秘密khǹg tiám箱á底khah妥當；聽候年久月深以後，時間會hō͘ 有缺角ê現實變成圓滑，koh阮ê心對hit件事會有理解kah寬容；到hit一工，若想起有chit件事，就ē-tàng笑笑á來讀chit本日記。」總是，經過十七年ê久長歲月了後，甚至連她ê cha-bó͘-kiáⁿ都無法度笑笑á來讀；如今，現實iáu是像菱角尖尖，會鑿人。
「你認為阿母無幸福，我無法度接受。Hit當時，阿爸可能有kah-ná你所講ê gāi-gio̍h ê缺點，因此hō͘ 我苦惱；iáu有，我ê軟弱hō͘ 伊感覺不滿，mā是事實。雖然是án-ne，我並m̄是你所認為ê無幸福。Iáu有hit當時ê情形，我無了解chia ê風俗習慣，chiah會引起阿媽á是阿嬸對我ê種種排斥。M̄-koh，這是事實而已，我從來m̄-bat感覺家己是無幸福á是絕望。M̄-koh，我ê cha-bó͘-kiáⁿ卻講我....。」
老母感覺捶（tûi）心肝ê悲哀，悽慘teh哭；chit時soah變成清子khiā tī安慰者ê立場。
「失禮lah！阿母，是我m̄好。我m̄是恨阿爸，á是討厭伊，我應該bē án-ne chiah tio̍h。我kan-taⁿ希望阿爸是日本人，若無to̍h是阿母是台灣人。想tio̍h chit點，我to̍h會忽然受氣，我真戇。」
「Chit種心情，我真了解。」
「M̄-koh，阿母，我所講ê無幸福，kah阿母所講ê無幸福無仝款。我所講ê m̄是煩惱lah、心酸lah、辛苦lah chiah-ê無幸福；我講ê是我做一個陳氏清子ê tāi-chì，是chit種血統ê無幸福。我kan-taⁿ án-ne模糊感覺tio̍h chit點，m̄-koh，無法度講khah清楚明瞭。」
「這to̍h是清子所giâ ê十字架，所以我beh kā你講：tùi狹門入去。」
「Ngh，m̄-koh，我無beh逃避入去宗教。He看起來是脆弱koh感傷ê。」
「你chiah是有一點á感傷neh，kā tāi-chì看kah siuⁿ大。我感覺你對 陳氏清子虐待siuⁿ過份，án-ne bē-sái得；我想beh對你講ê是：你成做陳氏清子ê chìn前是日本人；雖然你ē-sái講是日本人，mā ē-sái講是台灣人。M̄-koh，siōng確實ê，是你ê名是日本人ê名。你若有án-ne ê覺悟，你應該會khah開朗。」
「M̄-koh，阿母，án-ne講kám有道理？」
「Ngh，m̄-koh，若無án-ne講....。」
「我明白à。」
清子清楚回答，她ê語氣露出罕得有ê開朗。起先安子感覺母kiáⁿ真oh得溝通意見，m̄-koh意料之外ê是雲霧竟然一掃to̍h清清。安子ê心情爽快，清子ê感受顯然mā仝款。
「M̄-koh，你chit-má tio̍h去向阿爸好好á解說，kā伊會失禮。」
「Ngh。」
「所以，是你m̄-tio̍h。」
「M̄-koh，我已經真清楚是家己m̄-tio̍h à。」
「清子，你真固執。」
老母án-ne講ê聲音已經是一點á都無責備cha-bó͘-kiáⁿ ê意思。她想講án-ne ê固執to̍h是清子ê個性，若硬ài她koh再一pái上樓，她無一定會肯，不如家己去向清文解說，所以安子就上樓。
清文tī冊房teh看冊，安子tùi伊oa̍t頭來看ê目chiu感覺tio̍h有目屎teh閃光；伊根本都無teh讀冊。安子teh kah清子講話ê時，伊mā是teh想仝款ê問題；伊了解一切ê tāi-chì，所有lóng明白à。安子án-ne teh想，忽然感覺她真疼惜清文，所以她無意中編出一套謊言，講：
「清子今á日是he來lah；he若來，她總是會身體bē爽快，心情ak-chak。今á日koh特別ku怪。」
