《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第二十一章（更新版）

作者 庄司總一著 賴永祥指導 林俊育台譯 2017.03.26

過無gōa久，流行病to̍h結束。本來hō͘ 人非常擔心ê游德仁mā因為有及時ê治療，真意外ē-tàng早早to̍h回復健康，chit-má koh kah以前仝款，老實koh認真teh做工。安子感覺in夫婦冒tio̍h被傳染ê危險去救治伊ê熱心，並無變成無chhái工，所以心內感覺真歡喜kah安慰。

瑞文kah春鸞kā阿陣埋葬了後，有一段時間有茫茫失落ê款式，m̄-koh，hit-ê意料之外ê經驗，kah-ná tī in夫妻之間puh出一個力量之芽。In去農場ê時，常常順續去hit-ê公墓，tī阿陣ê墓前獻花kah墓粿，koh燒銀紙。總是，tī in kiáⁿ阿明ê目chiu看起來，he是雙親脆弱心靈ê迷失kah妄想，是無體面ê，所以伊感覺真不滿。M̄-koh，夫妻兩人對in kiáⁿ ê看法一屑á都無掛意；尤其是本來比一般人koh khah注重外表ê瑞文，chit-má已經厭倦hit種kan-taⁿ關心外表美觀ê生活。以前，瑞文感覺像玉簾hit種會徹底表示愛kah恨ê人lóng比in bó͘ khah好；伊一向lóng認為春鸞無súi、無伶俐，根本都無kā她看在眼內；伊koh為tio̍h顧慮世間ê體面，一直過tio̍h猶豫不決ê生活。總是，hiah-ê情形對chit-má ê瑞文來講，伊m̄-nā感覺無意義，mā感覺真可怕。「我若是án-ne死，你可能連我ê頭毛都無beh摸一下。」春鸞講ê chit句話，ná親像猛烈ê鞭teh phah瑞文；hit-ê被鞭phah ê肌膚紅腫ê痛iáu未消失chìn前，伊至少會做一個誠實koh溫和ê丈夫。

玉簾雖然無像以前hiah-ni̍h chia̍p去，iáu是無停止去農場，m̄-koh iáu是繼續teh去。神有垂聽她ê祈禱kah ǹg望，hō͘ 游德仁得救，想tio̍h chiah-ê tāi-chì，她ê心內充滿感謝之情。M̄-koh，游德仁活leh，mā ē-sái講是農場，m̄-koh iáu是繼續teh去。神有垂聽她ê祈禱kah ǹg望，人人koh khah相信：她是為tio̍h chit種短暫ê虛幻安慰chiah去農場。

陳清公司ê農場koh再有活氣起來，kah市內ê自營工廠ê配合mā順序ā。總是，清文bat聽過鳳梨罐頭公司beh合併ê tāi-chì，chit-ê消息iáu殘留tī伊ê心內，hō͘ 伊ê心情一直無法度開朗起來。

有一工，tī落大雨ê下晡，清文去巡視工廠。
伊落車beh行入事務所ê時，目chiu看向對面khǹg原料ê倉庫頭前，竟然看tio̍h其中一箱亂七八糟koh無蓋koà ê鳳梨tī hia teh淋（lâm）雨。今á日伊是為tio̍h有一件無如意ê tāi-chì chiah來工廠，soah看tio̍h chit種hàm-kōa-kōa（粗心大意）ê tāi-chì，伊禁bē-tiâu，大受氣起來。
「你為啥物án-ne處理？」

清文進入事務所，就責備工廠監督郭萬春。郭萬春辯解講：鳳梨中晝chiah送到位，我想講beh隨時kā in上機械，所以無必要特別koh收入去原料庫。清文本來無必要當場kā伊責備，m̄-koh，伊今á日心內hit片無歡喜ê烏雲mā是tùi郭萬春所引起ê，he是比鳳梨hō͘ 雨ak koh khah嚴重ê tāi-chì。所以伊講：「總講一句，鳳梨án-ne khǹg tī hia hō͘ 雨ak，會感冒neh！」伊nauh一句半khau洗ê話，想講問題以後chiah koh講，所以伊就趕緊去巡視工廠。

因為落雨，工廠內面濕濕koh陰暗；平常時會散發出鳳梨肉ê芳味，m̄-koh，今á日ê空氣沉重koh沉悶，mó͘-tah á是蒸汽所發出ê響聲，刺激tio̍h清文ê鬢邊，hō͘ 伊聽tio̍h感覺bē爽快。

落雨天，工廠ná會無beh開電火leh？清文án-ne teh想；m̄-koh，聽候伊ê目chiu已經習慣室內ê光線了後，chiah感覺其實ia̍h m̄是真暗。兩排ê機械mā kah平常仝款，無啥koh樣teh運轉；堆積ná山ê鳳梨上（chiūⁿ）起lih電動輸送帶了後，一刻to̍h無停隨送入去生產線ê機械。進入去機械ê鳳梨，隨時自動削皮清氣，雙頭切除，koh除去鳳梨心；黃色ê鳳梨肉kah粗皮，以及鳳梨心就án-ne lóng分開。這是極新發明ê機械，叫做「Ji-ná-khah（ジナカ）」，是世界罐頭工業第一大產地ê Ha-óa-ih（Hawaii，華語譯做「夏威夷」）所發明ê革命性ê新機械；陳清公司tùi當地用美金五千kho͘ 進口一台。用chit種機械，一分鐘ē-tàng處理75粒鳳梨；其它小規模ê工廠所使用ê機械，叫做「Sai-chá（サイザ—）」，tio̍h用手kā雙頭切除ê鳳梨一粒一粒送入去機械，所以一分鐘kan-taⁿ ē-tàng處理15粒á是20粒niā-niā。清文tú進口Ji-ná-khah來工廠ê時，kah其它工廠相對比，伊感覺真驕傲。總是，一旦開始使用，若因為無熟手致使機械失能，á是因為原料供應不足，bē-tàng符合原來ê預算，to̍h會感覺有一點á算bē hô。M̄-koh，農場確立以來，ē-tàng供應夠額ê鳳梨原料，所以機械有充分發揮功能，hō͘ 人感覺事業ê將來發展有希望。陳清公司真無簡單chiah達到chit-ê境界，chit時卻聽講beh成做合併制度，所以清文感覺真無奈。

清文就án-ne變kah真神經質；削落來ê鳳梨皮tī地上siuⁿ過雜亂，伊會提醒員工注意；看tio̍h加工ê糖漿兩三罐有土粉，伊交帶講bē-sái án-ne；切做環狀ê鳳梨，若有完全ê kah無完全ê lām做伙，伊就無滿意nga̍uh-nga̍uh念。清文無心所講ê hiah-ê話，tī員工看起來，卻是社長tī巡視ê時teh挑毛病。

尤其是社長重視衛生，有一屑á都bē-sái馬虎ê性格，加上伊以往是學校ê教師，紀律嚴格，討厭無清氣ê行為。若是顧慮tio̍h細菌á是腐化ê問題，最後一關有排氣處理kah鍋爐加熱消毒，所以bē有問題。總是，無清氣ê行為會影響tio̍h精神，所以清文禁止tī工廠內面pok薰，á是隨地phùi瀾，長指甲內mā bē-sái有lah-sap。Chiah-ê tāi-chì有一kóa kah生產效率無啥關係，m̄-koh，可能會污染tio̍h siōng重要ê產品。商品ê生產過程，常常是tùi勞動產生出來ê性命總量來表現；若無，to̍h無生產á是勞動ê喜樂。清文努力beh kā chit種理念勻勻á栽入員工ê心內，m̄-koh，真無容易ē-tàng達成伊ê願望。因為in大多數無受過教育，kan-taⁿ用話語教導是無chhái工；一切lóng tio̍h用實際ê方法教導，其它無啥辦法。工廠採用新式ê機械，伊想beh hō͘ 員工加減對科學有一kóa關心；伊koh用心費神建立光線好koh空氣流通ê廠房設備，盡量beh hō͘ 員工有歡喜工作ê環境。工廠園地iáu有一棟真phāⁿ ê木造建築物，成做員工ê休閒娛樂中心，ē-sái tī hia食中晝；tī hia有ē-tàng theⁿ á是坐ê籐椅條，有電唱機，mā有一koá冊kah雜誌。另外一間成做醫護室，有酒精、io-lo-chìn-khih（華語譯做「碘酒」）、hŏ͘ -tái（華語=繃帶）kah藥膏等等，有夠額thang做小khóa tio̍h傷時ê醫護。

員工若ē-tàng正確使用chiah-ê設備，清文有考慮beh做koh khah大ê設施；m̄-koh，in無hiah-ni̍h容易ē-tàng進步到chit種程度。起初，in真小心koh好奇teh使用chiah-ê設備，無gōa久慣勢了後，就lām-sám用。男工kah女工tī hia做鬼做怪、吵鬧、冤家；唱片頂面有pit孔，á是phah-m̄見；雜誌破去，á是hông the̍h去做別種用途；酒精tiāⁿ-tiāⁿ減少，hŏ͘-tái kah藥膏tú chiah加添to̍h隨koh減少去。
「Chiah-ê物件m̄是屬啥人ê，是屬lín大家ê。Lín為啥物beh蹧躂家己ê物件？為啥物beh偷the̍h家己ê物件？」

清文án-ne kā in教導，in mā是bē明白hiah-ê意義。In認為chiah-ê設備是屬tī社長陳清文ê，m̄是員工所有ê；in無法度改變chit種觀念。 清文teh想：實在是無辦法thang教導in。伊行tńg來鳳梨整理站，tùi Ji-ná-khah機械處理好勢ê鳳梨肉，tī chia koh做整修，hō͘ 它khah美觀。女工坐tī細條長長ê輸送台ê兩pêng邊á，kā輸送帶傳來ê鳳梨肉the̍h起來，用刀á kā留tī鳳梨肉頂面ê皮削掉，koh kā鳳梨肉ê烏目挖掉；鳳梨不斷tī輸送帶頂面傳送過去。Chiah-ê女工大多數是小學畢業無gōa久ê台灣少女，穿白色ê制服，掛樹乳手套，雙手敏捷teh做khang-khoè，動作liú-lia̍h；in不時看起來lóng天真koh清氣，hō͘ 人感覺心情愉快，tī單調ê工廠中散發出柔和ê氣氛。

M̄-koh，今á日清文tùi in ê邊á行過ê時，in lóng無露出微微á笑ê笑容。兩禮拜前，伊偶然發現tī chia工作ê李淵淵小姐有無純潔ê心，chit件tāi-chì chit-má iáu留tī伊ê腦海中，hō͘ 伊感覺擋bē-tiâu。 李淵淵是一個開朗，工作敏捷，koh會引人注目，hō͘ 人好感ê cha-bó͘ gín-á，無論tī khang-khòe上á是行為上，她lóng是無缺點ê模範女工。總是，兩禮拜前，她無小心失誤，去hō͘ 刀á割傷她ê手指，引起惡性病毒感染，結果必須切斷手指。而且，想bē到tùi chit-ê意外，引起清文對她ê做法感覺失望。

李淵淵tòa ê所在是tī 出名ê繁華台灣人街ê hit kho͘ 圍á。昨hng清文親自去hia beh kā她探訪。伊行入去到廟埕內角ê lah-sap巷路，tī小khóa頭前ê十字路口有一個路邊擔á，有四五個cha-bó͘ gín-á tī hia teh食寒天ê食物。其中一個tú teh食物件ê十五六歲ê少女忽然看tio̍h清文，就kā碗放hē-.leh，雄雄狂狂tùi邊á ê巷路消失形影。
「李萬丁ê厝kám是tī chia？伊ê cha-bó͘-kiáⁿ叫做淵淵。」

清文問khiā tī路邊擔á邊á ê人，in隨時kā伊講to̍h是tī hia。伊行入去一看，是一間真簡陋ê khiā家；門柱ê對聯破糊糊，紅字mā lóng褪色。踏入門to̍h是廳堂，神佛ê像kah掛軸kan-taⁿ是形式ê物件；土粉滿滿是，致使廳堂中央ê桌á變成白色，頂面有排碗箸。主人李萬丁出去作穡；女主人招待伊入去廳堂隔壁ê睏房，壁ê雙pêng有雙層ê床，李淵淵倒tī下腳層。清文tùi赤iāⁿ-iāⁿ鑿目ê厝外入來，kah-ná入去烏暗ê地穴；tùi灶腳斜斜射入一條參雜土粉ê光線，kan-taⁿ ē-tàng看tio̍h倒teh ê cha-bó͘ gín-á淺黃色ê面kah縛白色hŏ͘-tái ê手，其它lóng看無物件。
「淵淵，你chit-má情形án怎？你ài食chho-kho-liat-toh（華語譯做 「巧克力」） ho͘ⁿh？」

清文án-ne親切kā她安慰，m̄-koh，姑娘kiu手，無beh接受ê款，m̄-koh，房間內koh無thang hē ê所在，所以伊只好一直the̍h tī手裡。清文一時bē-tàng了解，tī伊kā女主人講是來探訪淵淵ê時，為啥物淵淵本身無beh出來接待？Ia̍h m̄是tio̍h大傷，siōng無mā tio̍h來廳堂kā伊迎接ā。但是，淵淵m̄-nā無beh tùi a-cha驚人ê房間出來，而且伊入去房間ê時，koh看tio̍h她teh haiⁿ艱苦。
「Oh，iáu-koh hiah痛oh。」

清文小khóa感覺意外，oá去眠床頭án-ne kā她問；淵淵用kah-ná蚊á hiah細聲ê哭聲回答講真痛。
「Kám有發燒？」

清文想講可能有pū膿，若無，kan-taⁿ一支手指—無名指ê尖頭切tio̍h，chit-má bē iáu-koh痛kah連社長來探訪都tio̍h tī眠床頂接待。伊teh問她有發燒無，soah無意中beh oá去眠床頭；淵淵可能是驚人kā她摸，sut一下koh倒落去睏；她無應，m̄-koh，chit pái發出悲痛haiⁿ-haiⁿ-chhan ê聲。清文小khóa起懷疑，m̄-koh，伊無想beh koh摸她ê頭額。因為，不管房間gōa簡陋，ē-sái無需要顧禮儀；不管房間gōa-ni̍h a-cha驚人，á是有gōa-ni̍h想beh突破hit-ê秘密原貌ê無意識衝動，iáu是m̄-thang去動tio̍h少女ê身軀。

所以，清文koh khah感覺有真chē懷疑，實在有夠意外；kám講伊m̄免家己親身來，派人來to̍h真好ā？伊一屑á都無考慮chiah-ê tāi-chì，直接to̍h來，kah-ná有小khóa無妥當；伊感覺in ná teh演奇妙ê戲。M̄是lah，chiah-ni̍h優秀ê cha-bó͘ gín-á bē án-ne lah，無可能lah！清文án-ne teh否定，m̄-koh，tī無意識中，kah-ná想beh做啥物pháiⁿ tāi-chì，所以伊kā房間內部巡視一遍。然後，伊ê目chiu看向灶腳，看tio̍h一個cha-bó͘ gín-á khû tī灶邊，不斷teh看伊hia。Tú-chiah tī路邊擔á teh食物件，雄雄狂狂tùi邊á ê巷路消失形影ê cha-bó͘ gín-á，to̍h是她。她是淵淵ê小妹，hit時她會逃走，hō͘ 伊感覺真奇怪；這to̍h是起先引起清文產生懷疑淵淵ê原因，m̄-koh，伊盡量beh排除hit-ê疑雲。
「真頭痛neh，hiah-ni̍h嚴重，tio̍h緊去chhōe醫生診斷。你若無beh去，我to̍h叫醫生來chia。」

淵淵聽tio̍h án-ne，chhoah一tiô，看對清文chit pêng來；她盡量teh掩蓋內心ê驚惶。目chiu已經習慣烏暗ê清文，kā她ê狼狽kah困擾看kah清清楚楚。
「無要緊lah，免叫醫生lah。」
「M̄-koh，指頭á chit-ê物件bē-sái馬虎tit。若有細菌留leh，有可能會湠到手腕，聽講tio̍h kā手切掉。」

清文責備家己ê疑心，chit pái真心án-ne講。
「你kám驚hō͘ 醫生kā你醫治？實際上，手指確實會痛。我mā bat tio̍h過皮膚潰瘍，痛kah三工lóng bē睏tit。」
「M̄是lah，bē痛lah。M̄-koh，我感覺家己真可憐；若無手指，我會嫁bē出去。」

淵淵就án-ne哭出聲。照清文ê預感，她是teh假哭。Tāi-chì發生已經無法度復原。社長雖然有不可侵犯ê嚴格個性，m̄-koh mā是感情豐富ê人；淵淵tiāⁿ-tiāⁿ抱tio̍h敬畏ê心。實際上，伊今á日koh親身專工帶禮物來kā她探訪，kám m̄是？伊kah日本夫人mā常常來工廠，一屑á都無kek頭家ê派頭，lóng對in親切講話。Hiah-ni̍h好ê人，我ná會kā伊悖逆，想beh kā伊騙？她chit-má koh khah後悔，koh khah怨恨hit-ê hō͘ 她陷入chit種不義行為ê郭萬春。手術kā無名指第一關節切斷了後，郭萬春bat有一二pái來探訪她，kā她講kóa親切koh同情ê話，然後，教她tio̍h要求傷害賠償金；koh教她講手指是cha-bó͘人ê性命，一屑á錢是無法度解決ê，tio̍h向公司要求khah chē錢；伊對淵淵本人kah in老父李萬丁lóng án-ne講。Tú開始，淵淵對郭萬春ê講法感覺無理；她想講家己ê tio̍h傷m̄是公司ê罪，只不過是她家己ê失錯，án-ne向公司要求賠償是無合理ê。她一再kā郭萬春說明，講她bē-tàng了解ná tio̍h án-ne做，m̄-koh，郭萬春一直煽動，叫她至少mā tio̍h要求三百圓á是五百圓ê時，她kah in老父就不得不接受án-ne做。
「無手指to̍h無法度嫁，你kám án-ne teh煩惱，teh悲傷？」

清文無意中感覺苦笑。伊想講tī chit-ê容易感傷ê年紀，準講kan-taⁿ小khóa ê不幸，她mā會聯想到結婚ê tāi-chì，he mā m̄是無理。M̄-koh，因為hiah-ni̍h小khóa ê tio̍h傷，to̍h隨時想講會嫁bē出去來感覺心痛，這對下層階級ê少女來講，koh khah是無可能；何況她koh會kā chit件事四界宣傳，清文想講這mā是心理上講bē通ê tāi-chì。
「淵淵ê老父，請問是啥人教你án-ne做？」
「無lah，he是....。」

少女受tio̍h良心ê鞭phah，想beh講出來，m̄-koh，她有受tio̍h交帶，一定bē-sái講，所以她無kā郭萬春ê名講出來。
「是啥人使弄你講chiah-ê無聊ê話？」

淵淵無回答，kan-taⁿ胸坎á phi̍h-pho̍k-chháiⁿ teh哭。Tī chit-ê時刻，一定是jú催逼會jú m̄肯講。清文想tio̍h有郭萬春tī她ê背後teh使弄，伊非常無歡喜，m̄-koh，伊對chit-ê少女受氣chìn前to̍h已經感覺真失望。伊若koh對chit-ê少女勻勻á教示世間ê道理，她一定會koh khah悽慘哭。清文無法度忍受chit種kô-kô纏ê感傷，伊想beh趕緊離開chit間破厝á。
「到底是啥人教你ê？你無需要擔心hit種滾sńg笑ê話。一指無去無要緊lah，iáu有四指tī-.leh，beh掛手指（chí）無啥困難lah。」

清文講chiah-ê話了後，伊kā chho-kho-liat-toh khǹg tī少女ê枕頭邊，無憐憫mā無棄嫌，就án-ne離開hit間厝。

清文kā工廠巡視一liàn，然後kā郭萬春叫來狹狹ê醫務室，對伊問起昨hng ê tāi-chì。
「淵淵一直哭講無手指無法度嫁，你chit-ê cha-po͘人實在有夠ài管閒事。」
「淵淵án-ne講oh？」
「她無講是你教ê，m̄-koh，用腳頭u想mā知；你kám m̄是有專工去過她hia？」
「是ah，我有去。」
「Án-ne，好，你既然坦白承認，你kám相信你家己煽動她ê行為是正當ê？」
「我相信he是正當ê。」
「M̄-koh，正當ê事kám tio̍h暗中進行？有關淵淵慰問金ê tāi-chì，你kám bat kah我參詳過？」
「總是，因為hit當時，你lóng無beh聽我ê意見。」
「M̄-koh，若是正當ê tāi-chì，我ê心會有充分接納ê餘地。」
「我認為正當ê事m̄-nā kan-taⁿ是一面之詞；你看做正當ê事，在我看起來....。」
「無m̄-tio̍h。」

兩人做伙恬落來。窗á外iáu teh落大雨。清文心內teh念講：tio̍h kā伊辭頭路，伊控制bē-tiâu伊ê不滿kah受氣，chit種意思自然to̍h表現出來，所以郭萬春ê態度變kah真無自然。話切斷ê時，兩人瞬間互相teh睨對方，目chiu射出koh樣ê敵意火花。然後兩雙目chiu分開，m̄-koh，兩人對tú-chiah所講ê正當之事ê看法，iáu是kah-ná tī一塊肉骨頭前ê兩隻狗á仝款，彼此teh挑戰。

銀牛kah水牛ê角隨時teh beh相tak ê款。郭萬春是嘉義田庄sàn-chhiah作穡人ê獨生kiáⁿ，少年ê時有一個叫做銀妹ê未婚妻，是人所講ê新婦á；父母用小khóa錢分（pun）一個cha-bó͘ gín-á來飼，將來thang成做家己ê kiáⁿ ê bó͘，án-ne ē-tàng省in kiáⁿ娶bó͘ ê一筆費用。郭萬春對chit-ê新婦á無滿意，所以小學畢業to̍h離開厝，四界流浪，結果tùi東京ê機械工業學校夜間部畢業。總是，八年後回鄉探親ê時，家己ê老厝kah一切lóng無了了，老父kah銀妹mā lóng phah-m̄見去。四界探聽了後，chiah知影tī伊無tī-.leh ê期間，in老父因為有小khóa負債無法度還，hō͘ 某地主kā伊ê田地kah厝lóng奪去，致使伊落魄kah去tòa乞食寮，koh死tī hia。

M̄-koh，清文m̄是因為同情伊ê境遇chiah kā伊雇用；ē-sái講是因為伊tī逆境之下iáu-koh努力求進步，無失去戇直ê開朗個性，koh有敏捷ê行動kah理性ê頭腦。清文認為tú kah游德仁適合處理農場事務仝款，郭萬春mā適合處理複雜ê工廠事務。另外一方面，郭萬春對陳清文ê人道主義真敬佩，而且tùi心底一開始to̍h贊同伊ê創業；不管伊ê力量無大，伊iáu是全力phah拚。總是，一旦實際開始作業，chiah發現雙方ê觀點根本to̍h無仝。

郭萬春認為kā珍珠hō͘ 豬á是無意義，hō͘ in豬á食物to̍h夠額；這是siōng重要ê，這已經成做郭萬春不可搖動ê觀念。所以伊提出ê問題lóng是：夠額ê薪水、解僱津貼、反對辭頭路、職業傷害ê補償等等。總是，社長陳清文所重視ê是精神方面：教育kah慰勞；這雖然是需要，m̄-koh，這m̄是低水準ê現實生活所緊急需要ê，ē-tàng以後khah慢chiah來考慮。親像講擾亂風紀，無守衛生，偷the̍h物件等等，清文對chiah-ê道德性方面ê要求siuⁿ過嚴格。若是技術性ê缺點當然應該糾正，m̄-koh，tī chiah-ê道德性頂面mā beh對勞動者要求，講起來有khah刻薄。所以，不管陳清公司ê工資比其它ê公司加付兩成（siâⁿ），離職津貼mā bē少，郭萬春對清文ê基本觀念iáu是bē滿意，認為伊ê人道主義大部分lóng是情感上ê物件，是siuⁿ過天真ê想法；郭萬春ê心內難免會感覺幻滅，soah kā伊輕視。

總是，chit-má chit兩人khiā tī奇怪ê對立狀態，這kah-ná m̄是hiah單純ê思想kah理論ê無仝產生ê。
「正當ê事m̄是kan-taⁿ一面，若無，所謂ê正當to̍h m̄是真正ê正當。你可能認為煽動淵淵是正當；你認為並m̄是煽動，只是beh kā她啟蒙。M̄-koh，她用假病ê做法，koh用做戲ê行為；她kan-taⁿ是一個十八歲ê小姑娘。」
「社長就因為án-ne感覺bē爽快。M̄-koh，tī chit-ê社會這並無稀罕，這是醜陋（chhiú-lō͘）ê tāi-chì。總是，社長看tio̍h hit種情形，m̄-thang kan-taⁿ認為是醜陋，你kám無感覺in可憐á是好笑？」
「感覺in可憐，kah容允in án-ne做是無仝ê。」
「因為社長是一個極大嚴謹ê人。」
「畢竟人生ê終極目的是teh追求正義kah得tio̍h正義，你ê理論lóng是tī限定的範圍內。你一屑á都無想到永遠的方面，你kan-taⁿ kā注意力集中tī現實ê問題；ná親像想beh起厝無設計，kan-taⁿ急beh收集材料。有一pái咱teh討論問題ê時，你to̍h講只要材料齊備，就ē-tàng kā厝起起來；這可能無m̄-tio̍h。M̄-koh，厝的設計圖，hit-ê理想tī tó位？Án-ne起起來ê結構，它所留落來會tú-tio̍h ê問題，只有人類kah人類之間ê精神而已，無koh再談tio̍h理想。」

清文ê目神顯露出決意，伊停止講話，決心tio̍h緊kā郭萬春辭頭路。 總是，清文心內iáu-koh有一kóa躊躇。這是因為伊bat hiah-ni̍h-á信任郭萬春，kā一切khang-khòe lóng交託伊，而且伊對機械真了解，處理事務koh正確，beh chhōe一個來代替伊ê人有一點á困難。清文ê躊躇m̄是出tī chiah-ê弱點，是有koh khah基本ê純粹人際關係，伊感覺chit-má in兩人無法度koh和諧握手。M̄-koh，這已經是絕望ā。世間有銀牛（財主）kah水牛（sàn-chhiah人），清文想tio̍h聖經ê話：「無欺貧重富，因為hiah-ê lóng是祂ê手所造ê。」（約伯記34：19）。清文一心一意teh想：Tio̍h án怎chiah ē-tàng hō͘ 人得tio̍h光明？M̄-koh，伊chit-má iáu無法度hō͘ 人清楚看tio̍h光明。這m̄是在tī經濟上á是金錢上，mā m̄是oh得bat ê理論上，卻是在tī欠缺koh khah根本ê親和力；簡單來講，就是本質無仝ê人之間ê合作關係；chit點kah-ná是永遠bē交接ê鐵枝á路。對手郭萬春chit-má ê想法to̍h是án-ne ê款。 清文soah尾就提出kā郭萬春辭頭路ê決定，想bē到郭萬春一聲to̍h同意，所以表面上伊並無顯露出pháiⁿ看面。兩人行出室外了後，大雨tī不知不覺ê中間已經停止；tùi窗á外射入來ê下晡時燒lō ê日頭光中，伊suh chhun ê薰煙tùi桌頂ê薰屎khok-á裊（niáu）裊升koân。