《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第二十章（更新版）

作者 庄司總一著 賴永祥指導 林俊育台譯 2017.03.19

阿陣死了後，她ê埋葬成做一個問題。因為清文以前bat去過瑞文發生災難ê所在，hia mā是阿陣出世ê部落，所以伊就去hia，想講看chhōe有她ê親人，thang託in安排埋葬。

安子就坐teh等in ê hit台自動車tńg去厝裡。到厝了後，她就叫瑞文來，kā今á日發生ê tāi-chì講hō͘ 伊聽。
「阿兄án怎teh處理leh？」
「伊去阿陣出世ê所在，因為總是bē-sái kā死人放hē-.leh；伊去hia chhōe看有她ê親人á無。」
「她可能是無親人。」
「Án-ne，只有chhun你一人ā。」
「我beh án怎chiah好leh？」

瑞文忽然感覺真困擾，連面to̍h變蒼白。
「Beh án怎？當然tio̍h辦葬式。」
「Kám tòa陳家辦？Hit-ê cha-bó͘人有khah....。」
「M̄是lah，tio̍h去in hia，你tio̍h kā她埋葬。」
「請mài叫我，我連看tio̍h死狗都會kui工phi̍h-phi̍h-chhoah，心情真bái。」

瑞文為tio̍h beh隱瞞伊ê驚惶，thiau工án-ne teh嬉笑；伊揮動雙手，微微á teh笑。
「這m̄是心情好bái ê問題。」

安子注目kā瑞文睨，koh真嚴肅án-ne對伊講。因為她今á日kui工lóng tú tio̍h慘淡ê場合kah意外ê tāi-chì，已經真thiám，所以她ê口氣加真刻薄。
「阿陣病kah真艱苦ê時，一直teh叫你ê名，實在真可憐。你kám無beh好好á替她想一下？」
「我當然bē bē記得她ê tāi-chì。M̄-koh，我....我家己一個人去處理死人，真恐怖neh，我無法度lah，而且hia koh有流行病；當然我以後會去拜她ê墓。」

純情專一ê瑞文畢竟是kan-taⁿ án-ne ê程度nā-tiāⁿ。安子聽tio̍h伊án-ne講，chhoah一tiô，m̄-koh就無koh受氣。

總是，過無jóa久清文tńg來，伊對無良心ê小弟非常憤慨，就趕緊叫伊來，真受氣對伊講：
「阿陣，她kám m̄是你以前ê bó͘？而且hit當時，咱厝裡ê人自開始to̍h反對，是你強強kā她娶入門。無lah，是m̄是春鸞希望án-ne做，這m̄是問題。無論如何，她m̄是lín bó͘ ê姊妹，她是你kā她當做bó͘ á是細姨ê cha-bó͘人。你確實bē bē記得少年時hō͘ 蛇咬tio̍h ê tāi-chì；我忽然接tio̍h通知，隨時to̍h拚去到hit-ê cha-bó͘人ê厝ê時，你tī hia teh haiⁿ-haiⁿ-chhan，強beh死去。你應該知影hit-ê人情kah義理chiah tio̍h，m̄-koh，你知mā無路用，因為你軟弱。總是，你想看māi leh，像阮kah hit-ê cha-bó͘人並無真深ê關係，m̄-koh一去到hit-ê病人kah-ná hông棄sak ê恐怖所在，mā是會去到hit-ê庄頭kā她看māi leh，kám m̄是？其實，我起初mā想beh kā chit件tāi-chì當做m̄知，m̄-koh....。」

清文去拜訪阿陣出世ê部落，hit時ê心情是án-ne：Chit種不幸ê關係，若傳出去，hō͘ 人批評，對陳家來講是真不利，而且kā阿陣死去ê tāi-chì報瑞文知，mā是無chhái工。若是有人ē-tàng kā她埋葬，實在是無比這koh khah好ê tāi-chì，m̄-koh，lóng chhōe無她ê親chiâⁿ。本來想講不得已ê時，只好chhiàⁿ人去處理；hiah-ê人一定會要求小khóa ê報酬，m̄-koh，錢若ē-tàng解決，m̄免費氣，he是siōng好ê。當清文teh想beh用錢來解決ê時，伊chiah忽然明白這是陳家ê人tio̍h負責處理ê tāi-chì；埋葬阿陣當然to̍h是瑞文ê義務。

事實上，瑞文無承擔chit-ê責任mā bē-sái得。因為伊感覺家己一個去驚驚，所以就hō͘ in bó͘ 春鸞陪伊去。

第二工，天iáu未光，in兩人to̍h chhiàⁿ車，恬恬á ǹg庄腳出發。因為chit種tāi-chì若hō͘ 人知，無啥體面，而且清文有事先kā伊交帶，mài吵tio̍h厝裡ê人，tio̍h盡量選無人看tio̍h ê時刻起身。

In來到前一工清文夫婦落車改用行路ê所在，chhōa路ê人已經tī hia等in。瑞文kah春鸞hō͘ 伊chhōa路，tùi患者收容所ê方向行去。過無一時á，in行落去山谷，koh tùi山腰peh起lih。In行近收容所ê時，聽tio̍h kah-ná野獸遠遠teh吼（háu）ê聲，瑞文夫婦驚kah ná無teh活ê款；尤其是瑞文，伊驚kah kui身軀硬piàng-piàng，tiāⁿ-tiāⁿ因為忍受bē-tiâu，soah sih-sih顫，kah-ná強beh哭出來。

寮á邊已經khǹg一副棺材，邊á ê菅芒草蓆頂面，用菅芒葉蓋teh ê是屍體。除了chhōa路ê以外，koh有三個beh扛棺材ê cha-po͘人tī hia teh等；chiah-ê lóng是昨昏清文所安排好勢ê。瑞文m̄-nā無感謝伊ê好意，koh kan-taⁿ感覺家己kám m̄是mā成做喪葬工人？為啥物清文tio̍h kā伊安排來chit-ê hō͘ 人sih-sih顫ê恐怖所在leh？為啥物kā伊安排來chit-ê hō͘ 人sih-sih顫ê恐怖所在？伊án-ne teh咒詛清文多管閒事。
「Oeh，khah緊leh好m̄？Ná會iáu tī hia teh慢sô-sô？」

好佳哉天暗暗iáu未光，寮á內ê活地獄kah死去ê cha-bó͘人ê面看bē清楚；瑞文苦bē-thang緊kā屍體khǹg入去棺材埋葬，m̄-koh，hiah-ê cha-po͘人慢sô-sô，khiā teh無beh動手。
「頭家，阮lóng是農民，是受拜託來ê，阮lóng m̄-bat扛過死人；阮kan-taⁿ會曉扛棺材，收屍入棺ê tāi-chì tio̍h lín家己做。」
「Hiah kē路！Lín kám無想beh thàn khah chē錢？」
「若是頭家你án怎都無法度做，án-ne to̍h無辦法，只好阮來做。」

瑞文心中ê恐怖感hō͘ 伊非常為難，所以若是ē-tàng用錢解決，開koh khah chē錢都無要緊。Hiah tú好，hit時春鸞已經kā蓋屍體ê菅芒草掀開，想beh kā屍體ê頭扶起來。
「Oeh，你teh chhòng啥物？Chiah-ê人講in會kā屍體扛入去棺材，你mài摸！你kám m̄驚去hō͘ 她煞tio̍h？」

瑞文無意中oá去in bó͘ teh khû ê所在。雖然是烏暗暝，春鸞掛ê白色嘴lom映入瑞文ê目chiu；伊隨時oa̍t頭m̄敢看死人。
「你扛下身kám好？」
「你teh起siáu hio͘h？」

瑞文根本都無法度相信春鸞ê膽量，而且hiah-ê cha-po͘人to̍h已經答應beh處理à，所以伊非常受氣春鸞ê愚戇。春鸞一向lóng真服從丈夫，瑞文掠準kā她heⁿh驚一下，就會hō͘ 她收手，m̄-koh，chit時ê春鸞kah平常時無仝。
「瑞文，你實在真無膽，koh無情無義neh。Chit-má你án怎罵我，phah我，我lóng m̄驚你。」

瑞文感覺真意外，soah無她法。
「你想beh án怎bú leh？」
「無，是beh án怎bú？你chiah是m̄知án怎bú ê戇大呆。阿陣已經án-ne死去à，實在真可憐；我若是án-ne死去，你可能mā是連我ê頭毛都無beh摸一下。」

春鸞嚴厲責備丈夫。翁á-bó͘ tī chit款所在冤家實在是真pháiⁿ看，所以瑞文講：「我來chhòng。」就póe開hiah-ê tàu腳手ê cha-po͘人。瑞文mā有想講，若koh拖時間，天一下光，就會koh khah可怕；所以除了伊kah春鸞兩人kā屍體hē入去棺材以外，其它無啥辦法。伊kah-ná teh用拚死ê心情，目chiu kheh-kheh m̄敢看，tī「無我ê夢中」，伊啥物都m̄敢想。因為siuⁿ過拚命，雖然無經驗過扛屍體，真oh得想像它ê沉重，m̄-koh，chit-má瑞文hit兩支瘦瘦ê手，竟然hiah輕鬆to̍h kā阿陣ê屍體扛起來。
四個cha-po͘人扛棺材，瑞文夫婦tòe in後壁，行向公墓。

In兩人穿麻衫。In準備來ê物件只有麻衫、銀紙kah鮮花；無和尚、道士，無kòng鉦、念經，mā無親人ê哭聲；這是真寂寞ê野外出山。In經過烏暗ê山路，除了扛棺材ê棍á聲，無人開嘴講話；連瑞文掠準會沿路行沿路哭ê春鸞，mā kah-ná啞口恬恬無聲。瑞文感覺chheⁿ-chhìn，有擋bē-tiâu ê款。總是，伊無koh驚惶；伊扛過屍體，已經無比這koh khah恐怖、討厭ê tāi-chì ā。
過無gōa久，in行到hit帶部落ê公墓山坪。

當然hia無風水先在場來決定墳墓ê地理方向，夫婦兩人決定kā坪頂有五六欉相思樹ê所在選做墓地，叫hiah-ê cha-po͘人開始挖墓穴。挖土用了相當久ê時間，已經漸漸天phú光。春鸞忍tiâu kui腹肚ê悲傷，kui路恬恬無出聲。Chit時，她忍bē-tiâu，kah-ná堤岸崩去，大聲哮出來。她phah開棺材koà，kā帶來ê夜來香kah黃梔á花，掖（iā）tī阿陣ê面kah身軀，koh chia̍p-chia̍p燒銀紙。瑞文khiā-.leh，kah-ná釘根tī大地，身軀lóng無tín動；伊teh看人挖墓穴，kah-ná想tio̍h家己teh beh hō͘ 人埋（tâi）落去ê款。

伊心內ê驚惶chit-má已經消失去à，m̄-koh，有新ê哀傷koh再湧出來。挖土ê鐵鍬kah鐵鏟sa-sa teh響ê聲，kah-ná一下一下深深teh挖掘伊ê哀傷。春鸞ê哭聲mā漸漸提高，tī四kho͘ 圍teh迴響；hit-ê沿路低聲訴求沿路哭ê聲，有時是哭kah beh死beh活ê低低哭聲，有時是kah-ná遠遠傳來嬰á暗時teh哭有節奏ê哭聲。He是她bat tī街路聽過ê出山孝女ê哭法，mā是她自細漢to̍h聽慣勢ê；tī這不幸ê場合，她mā無bē記得tio̍h加上音樂節奏ê技巧。Kám講使用技巧ē-tàng減輕悲傷，á是這是teh假哭？其實lóng m̄免án-ne；chit種柔腸寸斷ê個人哀傷，koh khah ē-tàng表現活人beh活落去ê哀傷形式。春鸞是一個khah遲鈍ê女子，她原本tī親人死亡ê不幸中ê哭法lóng真臭笨，m̄-koh，今á日她ê哭kah-ná是teh奏哀樂ê高手，一聲一聲打動瑞文ê心。

墓穴挖好，beh kā棺材hē入去ê時，瑞文kā tàu腳手ê人講chhun ê khang-khòe in家己來處理to̍h好，就hō͘ hiah-ê人tńg去；伊beh用家己ê手來kā阿陣埋葬。她bat是陳家ê一員，家己ê bó͘；m̄-koh，chit-má án-ne kah-ná teh埋葬乞食，實在真可憐。伊若連kā她埋葬都beh迴避，伊會對家己ê無情，koh khah感覺慚愧。

Chit-ē女子bat救過伊ê性命，家己tio̍h án怎來回報neh？根據前一工清文tī hit-ê部落小khóa聽tio̍h ê話，有講起阿陣死前ê遭遇真悲慘。以前她離開陳家tńg來田庄ê時，她ê穿插真華麗；hit種都市ê打扮引起人人ê注目，無gōa久to̍h成做某一個財主ê bó͘。M̄-koh，he並無維持jóa久ê時間；m̄知是她家己離開，á是hông趕走，她過三個月to̍h離開hit間厝，去到某一個部落。就án-ne，她tùi chit-ê部落到hit-ê部落，四界teh流浪；每到一個部落，就成做某人ê細姨á是女婢。總講一句，她是入去好額人ê厝，m̄-koh，入去無gōa久，就koh離開。她chit種反覆無常kah意愛流浪ê性格，m̄知是tùi tó位來ê。總是，她帶獵槍入山，á是tī溪裡洗浴ê形影，偶然會去hō͘ 人看tio̍h；大家lóng認為她是一個粗野ê cha-bó͘人，m̄-koh，人人無她法。Koh有人認為她打扮kah ná像花teh展súi，chit種奢華koh驕傲ê女人，準講一時受tio̍h她ê服事，mā會無gōa久to̍h對她厭倦。Tī chit種ê情形之下，她就tùi hit所在消失形影，lóng無koh有啥物消息；有關她ê傳聞mā不知不覺消失去。一年前，tùi chia有通到阿里山ê鐵路，有人看tio̍h她tī火車頂kah一個原住民teh講話。聽tio̍h chit件tāi-chì ê人，lóng ioh講她無tòa ê所在，就án-ne成做原住民ê bó͘。總是，她忽然tī幾工前tńg來到她出世ê所在。有人問她tńg來chhòng啥？她kan-taⁿ回答講：聽講chit帶已經成做陳家ê鳳梨園，我ē-tàng去hia hō͘ 人chhiàⁿ做工人。M̄-koh，hō͘ 人問tio̍h她以往án怎teh生活，á是chit-má teh做啥物tāi-chì，她lóng無beh提起家己ê境遇。M̄-koh，她穿kah真整齊，頭毛梳kah真sù-phoè；她穿烏油綢ê衫kah褲，甚至mā有穿鞋á，hō͘ hiah-ê認為她ê境遇悽慘ê人驚一tiô。總是，hō͘ 人koh khah tio̍h驚ê是她外貌ê改變；她ê年紀並無大，看起來卻真臭老；略á帶茶米色ê頭毛ta燥koh無金滑，看tio̍h她臭火ta款ê浮腫肌膚kah倦tauh-tauh ê大目chiu仁，會感覺她一定是身軀tó位有問題。早前她iáu是姑娘á ê時，kah-ná豹母，m̄-koh，她hit種一摸to̍h tiô起來ê活跳，已經lóng看bē-tio̍h à，所以可能是她已經破病chiah會tńg來故鄉。若是有像以前hit種結實ê身軀kah飽足ê精神，準講tńg來村裡ê第三工to̍h去染tio̍h流行病，mā bē án-ne隨去hō͘ 病魔打倒。

總是，對瑞文來講，阿陣離開伊以後ê境遇，m̄是伊ê大問題；伊唯一後悔ê是伊hō͘ 她致到死亡ê境地。伊án-ne teh想，跪tī墓穴邊á；注目看棺材內ê屍體，出聲哭起來。
「阿陣，求你原諒我！是我hō͘ 你成做落魄ê cha-bó͘人！是我hō͘ 你死kah chiah悽慘！」

春鸞看tio̍h丈夫哭出來，她停止iáu未燒完ê銀紙，靜靜á oá近丈夫ê身邊，她講：
「無lah，是我m̄好，空氣槍射tio̍h美圓目chiu ê是我。Hit時，阿陣為tio̍h beh袒護我，chiah會頂替我ê罪來離開厝。」

瑞文頭一pái聽tio̍h in bó͘ ê告白，m̄-koh，伊kan-taⁿ講「是oh」，並無非常感動ê款。伊所想tio̍h ê阿陣並m̄是hiah-ni̍h深bat道理，mā m̄是照一般人所講ê有高尚ê犧牲精神；她是tùi伊hō͘ 蛇咬tio̍h ê孔嘴suh血，mā是chhōa伊閃避暴民ê火燒打劫，koh hō͘ 伊騎牛tī暗暝逃走ê姑娘。M̄-koh，chit-má ê瑞文kám ē-tàng甜蜜回憶chiah-ê事實？Chit-ê cha-bó͘人已經死去à，teh beh hō͘ 人kā她埋葬落去土底。Chit-má打擊瑞文心靈ê是koh khah嚴肅ê tāi-chì。阿陣m̄是出tī她ê自我意識，所以她ê行為ē-tàng講是善，而且她有一屑á都m̄知beh要求回報ê心。Chit種世間罕有ê自然kah樸素，已經去hō͘ 社會上chē-chē ê花心cha-po͘人污染，soah消失去à。瑞文想：我kám有chit種權利？雖然he是她ê德性，是罕有ê自然kah樸素，m̄-koh，mā有可能是一蕊無值得挽ê野花。雖然是án-ne，啥人有權利kā它挽起來，hō͘ 它ta去？瑞文想：像伊家己chit種對人生無堅定ê信念，而且任何信心lóng無ê人，koh khah無權利kā它挽。

天漸漸光，m̄-koh，墓穴內iáu是暗淡，hō͘ 花蓋teh ê陳氏阿陣ê面霧霧看bē清楚，看bē出中年ê衰老。瑞文無ài看清楚，希望ē-tàng緊kā她埋葬。瑞文印象中ê阿陣，是年輕koh充滿生命力ê田庄姑娘，是射豹、洗水浴、騎牛ê山頂姑娘。她個性直爽、急性、任性、無慾望、m̄知thang驚....。Tio̍h lah，瑞文想：她絕對bē恨伊，bē chheh伊。她生tī大地，就hō͘ 她歸tī大地。她chit-má看起來kah-ná真懊惱teh講：「真煩neh，你ná會iáu teh哭bē soah？Hō͘ 我倒tī chit-ê冰冷ê所在，不如hō͘ 我變成牛行來行去。Mài koh tòa hia慢sô-sô，緊kā我tâi落去土裡lah！」
「Ah，春鸞，有來iáu是有khah好；我感覺變成ē-tàng挺胸，心情真好。」
「你tú-chiah iáu teh驚kah phi̍h-phi̍h-chhoah leh。」
「我已經無koh再驚惶，準講tio̍h入去墓內mā無teh驚。」
「你若ē-tàng，我mā ē-tàng入去。」
「總是，咱tio̍h緊kā她埋葬，若無，阿陣會受氣；她急性koh脾氣無好。」

因為跪tī土腳siuⁿ久，腳頭u hō͘ 露水濕tâm去。In兩人khiā起來，蓋棺材koà，用hiah-ê人留落來ê鐵鍬kah鐵鏟蓋土。Tī早起時ê露水中，兩翁á-bó͘ 喘phēⁿ-phēⁿ喘teh流汗做工。無gōa久，in做成一個饅頭形ê土堆墓ê時，東方ê天頂已經變kah ná草莓ê色，無一時á，日頭to̍h tùi山嶺升起來。
「Ah，soah尾就天光ā。」
「Hiah-ni̍h súi ê天空，是tī街á lóng m̄-bat看過ê。」

In兩人ê胸坎á深深teh呼吸。In無koh哭à，因為in感覺阿陣ná親像tùi死koh活起來。Tī相思樹枝teh唱歌ê鳥á，以及tī偏僻ê山廕thí開目chiu醒起來ê動物，kah-ná lóng是阿陣變成ê；阿陣ê性命to̍h tī chia附近teh展翼，親像世界一切ê山川、草木、禽獸kah生物。今á日mā出日頭ā，已經beh開始有活命ê一工。

就án-ne，tī比個人ê後悔á是悲哀koh khah大ê力量kah作為ê面前，夫妻兩人ê心內充滿m̄-bat有過ê新鮮感情。