《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第十九章（更新版）
作者 庄司總一著 賴永祥指導 林俊育台譯 2017.03.12
游德仁倒tī農場宿舍ê房間teh睏。
伊ê病況iáu未到會講譫（chiam）語hiah嚴重，m̄-koh，發燒ê熱度真koân，koh tiāⁿ-tiāⁿ頭痛beh吐，真艱苦。總講一句，因為醫生真無閒，時常請bē來；koh因為是可怕ê傳染病，農場ê人mā無想beh近óa去kā伊照顧。
清文隨時kā紅包附上伊ê名片，派人去請醫生來。就án-ne，已經去tī離農場約六公里ê山地ê村醫林文貴醫生koh oa̍t tńg來。講起來mā莫怪，因為近來傳染病四界teh發生，伊實在非常無閒。
Tī醫生teh治療ê中間，清文tī病人ê邊á照顧；安子因為m̄敢看病人艱苦ê情形kah治療過程，她一個人離開，行ǹg別莊ê方向去。雨期已經過，土變黃色koh ta-khok-khok，四界pit裂。厝前庭院ê日日草，花開kah滿四界，搶奪其它花蕊ê光彩；蔭影下面露出tō͘-tēng綠色ê光芒。
別莊ê正門入口日頭光iàⁿ-iàⁿ，安子摸tio̍h門，手感覺真燒。她一入門to̍h鼻tio̍h土粉kah臭phú ê味，她就phah開窗á，hō͘ 光線kah風入來。室內無像她有一暗所眠夢ê hiah荒廢；掛tī暖爐頂面壁頂ê Ta-bin-chhih（譯註：ダウィンチ，意大利文=da Vinci，華語=達文西）「最後ê晚餐」仿作油畫，mā無去hō͘ ka-choa̍h咬過，m̄-koh，耶穌ê面kah-ná變kah真憂愁。空空ê厝內kah-ná墓穴，散發出陰沉ê氣氛。
「游先生chit-má teh接受醫生ê治療，求祢m̄-thang延chhiân拯救伊。神ah，求祢m̄-thang奪取伊ê性命；醫好了後，求祢m̄-thang hō͘ 伊變成啞口，á是筋肉麻痺，á是白痴ê恐怖後遺症頭。」
安子kā手hē tī 圖畫頭前ê椅á扶手頂面，她想beh祈禱。M̄-koh，她kan-taⁿ tī有土粉ê扶手頂面留落來手印，無法度祈禱落去。玉簾以前bat講過保羅ê話「人因信稱義，m̄是在tī行為」，安子抱tio̍h幾分ê疑問，一直到chit-má她chiah了解真正ê意義。無支持信仰ê行為是無意義；kā義當做信仰ê第一重要ê是有理由ê。Chit-má ê安子驚破病koh驚死，一直等到最後chiah來chia；無信心kah勇氣ê時，祈禱kám有啥物價值？
她對家己ê軟弱感覺見笑，就離開「最後ê晚餐」ê hit幅圖，peh起lih二樓。她tùi二樓ê窗á看出去，看tio̍h闊bóng-bóng ê農場。日頭赤iāⁿ-iāⁿ，一片發白ê鳳梨園，園中間ê路頂有一台hông棄sak ê牛車。無人teh做khang-khoè，已經是採鳳梨ê時期，若無採收，kám m̄是會過頭熟去？若siuⁿ過熟to̍h無適合做鳳梨罐頭；tio̍h tī iáu青青ê時採收chiah好。安子想tio̍h chiah-ê tāi-chì，忽然開始煩惱起來。M̄-koh，kah chit-ê土地ê眾人tng teh受難ê不幸比起來，這實在是無tè比ê小事。
安子聽tio̍h清文tùi病人所在tńg來ê聲，就落去樓腳。
「游先生ê情況án怎？」
「我想是無問題，chit-má teh tùi龍骨髓抽骨髓液。」
「Án-ne to̍h真好。M̄-koh，iáu是bē放心得。Tio̍h chhiàⁿ一個附添，mā tio̍h請林醫生ta̍k工來往診。」
「我lóng安排好à。」
「真失禮！我lóng無做啥物。Án-ne，咱是m̄是隨時來tńg？」
「Tio̍h koh順續kā農場巡一下；游德仁是忠實ê人，伊tī病中痛苦ê時，iáu teh關心農作物neh。」
就án-ne，in兩人來到鳳梨園，土ná親像烘燒燒ê麵包。In兩人lóng掛嘴lom，ta燥ê熱氣hō͘ in連喘氣都有困難。 兩人khû落來檢查鳳梨果實。
「害loh。」
清文無奈出聲án-ne講。前一chām-á 落大雨，致使鳳梨受tio̍h相當ê傷害，有bē少出現烏斑ê毛病。
「Ah，這是烏目á lah。」
「無m̄-tio̍h，你知影chit-ê名詞，你對鳳梨mā ē-sái算是專家loh。」
清文用小khóa khau洗ê口氣án-ne講，m̄-koh，兩人lóng無笑。 Ná親像面對家己用疼扶養長大ê kiáⁿ teh破病，夫婦兩人lóng心情憂鬱。平常時看起來ná親像真好看ê閱兵隊伍ê鳳梨園，長koh尖ê葉á ná劍一樣ê鳳梨隊伍，今á日soah ná親像倦tauh-tauh ê一隊傷兵，無lám無ne。安子講：
「你看，chit第一區ê鳳梨若無上生產線ê機械來製造成品bē-sái得à。」
「時期有小khóa khah慢，做食用應該真tú好。」
清文有teh使khio͘h-ka̍k án-ne講，安子kā伊安tah講：
「Bē lah，koh兩三工iáu無要緊，chia ê腳手若無夠，咱thang tùi工廠派人來採收。」
「Chia有流行病，in會m̄肯來。M̄-koh，chhut-chāi它腐爛mā bē-sái，tio̍h緊kā in推出去市場chiah好。」
總是，若án-ne kā青鳳梨供應市場，工廠ê機械就會hē teh閒。
「看起來今年ê營業會koh是紅字。」
清文對chit項事業，到taⁿ iáu m̄-bat吐氣，á是講過失志ê話，chit時真難得流露出失望ê款式。一切ê tāi-chì lóng是tùi失去信心ê瞬間開始崩盤。Án-ne bē-sái得；安子平常時對清文ê大膽作風感覺不安，m̄-koh，chit時她ê信心堅定。
「Tī基礎穩定以前是無可奈何，m̄-koh，明年起就會順利。總是，為tio̍h beh應付chit種天災所造成ê損失，iáu是需要設立一筆相當ê預備金。」
「當然是tio̍h án-ne。M̄-koh，若beh án-ne做，結局mā是tio̍h先每年有相當ê利純。」
「有利純chiah好，因為虧損to̍h無法度發展事業。」
「當然是án-ne。我並m̄是無ài咱ê陳清公司有大發展，成做幾百萬資本ê公司。總是，chit方面ê發展準講有jóa大，若kah家己ê理想無一致，去妨礙tio̍h理想，án-ne就無啥意義；理想kah大發展實在是真oh得兼顧。」
清文講了，就恬恬á起身，行向別莊，安子mā無koh講話。照丈夫所講ê，beh hō͘ 事業致富kah理想一致，確實是siōng困難ê問題。M̄-koh，安子忽然恬恬無講話，並m̄是因為對丈夫ê話感覺已經無koh再表示意見ê餘地，卻是因為chit-ê問題以前to̍h tī清文ê思想中，安子知影其中含有啥物曖昧不明ê意思，m̄-koh，安子並m̄知he到底是啥物。
安子心內tú有chit種微妙感覺ê時，清文koh開嘴講：
「安子，咱ê事業可能不得不tio̍h提早結束neh。」
「Ai-ah，是án怎leh？講chit款失志ê話，這無sêng你ê作風neh。咱ê心神起初to̍h有準備beh面對困難，kám m̄是？」
「M̄是驚困難，是因為有聽tio̍h鳳梨公司有beh聯合ê風聲。」
「聯合啥物？」
「你kám iáu未聽人講過？」
「M̄知影leh。」
「我mā是昨昏chiah對某方面聽tio̍h，聽講全島ê鳳梨公司beh合併成做一間公司。」
「Kám是謠言？」
「Iáu m̄知。M̄-koh，若是án-ne，咱to̍h去了了à。」
「你講情形iáu未明朗，kám m̄是？總是，若是án-ne，mā是無可奈何。 一切lóng是神ê旨意，m̄-koh，無到最後ê關頭，咱iáu是tio̍h堅持落去。」
「我ê看法mā是án-ne，chit-má無需要急beh放棄。」
清文án-ne表示伊ê決意，又koh用自我khau洗ê語氣講：
「總是，因為有chit種變化，照tú-chiah所講ê，準講想beh hō͘ 事業壯大，mā大bē起來。」
無beh hō͘ 事業大起來。安子kā丈夫最後chit句話tī心內koh再思考ê時，忽然理解iáu tī她ê思想中teh纏ê曖昧意思。伊無希望用伊所擁有ê條件來創造一間一千萬圓ê公司，這並m̄是kan-taⁿ因為無chit-ê資本。
雖然人常常teh講台灣錢淹腳目，其實這只不過是對一陣十萬、二十萬ê小資本家來講而已；tùi chit點來想to̍h ē-tàng明白。清文起初to̍h知影公司無法度真大，伊是用chit-ê做前提來開始伊ê事業。物質上發展ê限度，ē-tàng用精神ê充足來彌補。伊tī新事業開始ê時ê美好理想、抱負kah熱情，若kā它想起來，m̄是tùi伊純粹ê思想kah清廉潔白ê人格中直接放出ê映目光輝，卻是透過伊暗淡ê無奈中所流露出來ê微微á光。
清文無掠利純為主，卻是對生產kah勞動本身歡喜，以及常常用人道精神ê協調kah融合做公司宗旨ê基礎。總是，清文chit種崇高理想ê光，就án-ne有一點á暗淡落來。安子有了解，m̄-koh，她並無感覺理想幻滅。清文tī可能ê範圍內lóng真正直；安子想tio̍h ē-tàng達到chit-ê境界ê人並無chē，她顛倒對丈夫感覺驕傲。
清文kah安子tùi鳳梨園tńg來，koh去看游德仁一pái chiah tńg來厝裡。
Tùi台南chhiàⁿ來ê包租車tī幾百公尺外teh等；因為早前做大水，tùi大路到農場ê道路，有兩個所在崩去，iáu未修理好勢。林醫生kah in做伙行到大路，因為路狹，三人soah tio̍h排一列來行。
「林醫師，聽講腦炎ê流行有khah減弱à，chit-má ê情況到底是án怎？」
做頭前ê清文用日語問。村醫林文貴行tī中央，安子tòe tī siōng後壁，恬恬á teh聽in兩人講話。
「看起來有teh減弱，m̄-koh又koh出現，親像游德仁ê情形。Kan-taⁿ chit禮拜中間，我to̍h看tio̍h二十人死亡。雖然講是行醫ê職業，我mā是會感覺小khóa鬱卒；若是有報酬to̍h講khah會得過。」
林文貴是大約三十歲ê少年醫生，平常時to̍h有一點á神經質，chit-má伊ê身體明顯真倦（siān）ê款，蒼白ê面色露出憂鬱ê表情。
「而且今年流行ê是惡性ê，大約有70% ê死亡率。Mā有病人kah-ná去hō͘ 雷公kòng-.tio̍h，soah隨時死亡。」
安子聽tio̍h chiah-ê話，就起畏寒，加速她ê腳步，腳踏tio̍h投tī醫生後壁ê身影。本來聽講量早醫治to̍h會無問題，m̄-koh，chit-má游德仁ê現況koh引起安子ê不安。
「無隔離病院，chit種情形真困難。」清文講。
「是ah，村裡無chit-ê預算，每pái提出議案lóng無法度實現。」
「M̄-koh，hiah-ni̍h危險ê患者mā tio̍h好好á處理，kám講to̍h kā in放tī各人ê厝？」
「當然m̄是，是收容tī一定ê場所。這koh是一個大問題；in kah-ná teh對待貓á kah狗á án-ne，teh款待病人。我chit-má to̍h是beh去hia往診。Tio̍h lah....。」
林醫師kah-ná想起啥物án-ne講：
「患者中間，有一個人發燒nga̍uh-nga̍uh念ê時，有講起府上ê tāi-chì neh。」
「是m̄是農場ê chhiàⁿ工？講啥物tāi-chì？」
「因為是發燒，講話聽bē清楚，kah-ná是teh nga̍uh-nga̍uh念：瑞文....瑞文....阿舍。伊kám是你ê小弟？」
安子聽了，忽然想tio̍h，她問講：「He kám是cha-bó͘人？」
「Ah，是lah，我tú-chiah無講tio̍h。」
「Án-ne，她to̍h是阿陣。」
安子án-ne講了，行tī頭前ê清文mā知影是她，小khóa驚一tiô回頭看，腳步mā停落來。三個人óa做伙，距離近kah kiōng-beh相碰。
「Kám是kah府上有關係ê人？」
林醫師án-ne問，繼續向已經看會tio̍h ê大路行去。清文kah安子一tah久恬恬無應答。
「你tú-chiah提起ê患者，kám ē-sái會面？」
In來到tī街路teh等in ê車ê時，清文忽然問醫生。醫生感覺chit-ê問題真奇怪。
「Mài看khah好，hit-ê場面真bái。」
「無lah，kan-taⁿ小看一下to̍h好，hit-ê收容所kám真遠？」
「無講真遠，m̄-koh，途中有一段路bē-tàng駛車，tio̍h用行路。你若想beh去hit款所在，siōng好是mài；hia kah-ná是地獄leh。」
林醫師表示無同意，m̄-koh，清文堅持beh去。
「安子，你坐chit台車tńg去，我去看一下to̍h好。」
M̄-koh，安子若坐chit台包租車tńg去，清文tio̍h ài行路。所以，安子講：
「我陪你去到收容所ê附近。」
Chit pái，in兩人無像beh來農場ê時án-ne來回吵bē soah。Βat成做陳家一份子ê陳氏陣，chit-má面臨生死ê關頭，若是完全無chhap她，oa̍t頭to̍h走，人情上kah義理上lóng講bē得過；in兩人有chit種ê默契。
三人就坐車，駛ǹg beh tńg去厝裡ê反方向。車駛一段山路了後，來到車無法度koh繼續駛ê所在，三人就落車。然後，in行落去狹狹ê落崎á路，進入山谷中間ê一個平埔族部落。Tī hia大約有十間簡單粗俗ê厝，lóng是用土角kah竹篾á起造ê。Hit帶ê山谷kah山坪，有一kóa親像chit種ê部落。
Tú-chiah落山谷了後，koh小khóa peh上崎，tī半山腰有一個崩山ê遺跡，收容所就起tī hit頂面ê小小平台頂。Tú-chiah醫生有講過收容所真簡單粗俗，m̄-koh，比清文in iáu未看tio̍h chìn前所想像ê koh khah bái。既然講是患者收容所，掠準至少有小khóa簡單ê設備，m̄-koh，in kan-taⁿ看tio̍h用菅草圍teh ê簡單寮á，患者倒tī菅草蓆á頂面，亂七八糟，而且二十幾個患者ê衫褲lóng破爛，有一個kan-taⁿ穿一領褲，ná親像赤theh-theh ê患者，看起來有夠殘忍。有牙齒咬teh發出kiⁿ-kiⁿ-kóaiⁿ-kóaiⁿ ê聲；有ê痛苦kah mo͘h頭殼，haiⁿ-haiⁿ-chhan，發出可憐ê聲；有ê發燒teh nga̍uh-nga̍uh念，其中mā有頭昏昏teh睏ê。
清文感覺tio̍h kui個身軀變硬起來，勉強行oá去hit-ê寮á厝。安子koh khah免講，她kui身軀sih-sih顫，心臟pho̍k-pho̍k跳；她靠tī丈夫ê身軀，掠tiâu伊ê手，勉強忍leh。
「Ah，果然是她，tī hia。」
清文tī寮á ê入口看對內面，細聲kā安子講。參雜tī真chē cha-po͘患者ê中間，cha-bó͘ 患者只有兩個ê款，倒tī內角草蓆á頂hit-ê果然是阿陣。菅芒草蓆kā日頭cha̍h-.leh，tī濁濁暗暗ê光線中看bē清楚。阿陣kah-ná teh睏，真平靜ê姿態。不可思議ê是，其他患者ê衫褲lóng是破糊糊，kan-taⁿ阿陣穿iáu算清氣ê烏油綢ê衫kah褲。若beh講是不可思議，不如講是一種懷念情感進入安子ê心頭。阿陣雖然是一個卑微ê田庄cha-bó͘ gín-á，m̄-koh，她bat做過好額人陳家ê第二夫人，她bat有過ê chit種品味iáu無失去。
林醫師入去內面做治療，因為村裡kan-taⁿ支付伊有名無實ê津貼，以及已經無藥醫ê放棄治療ê心chiâⁿ，伊kan-taⁿ為hiah-ê特別hoah痛teh滾liòng ê患者注射，所以真緊to̍h出來。
「Hit-ê cha-bó͘人án怎？Kám iáu有希望？」
「Chit-má kah-ná teh睏，總講一句，她he ná親像是hō͘ 雷kòng-.tio̍h ê腦膜炎，一開始to̍h昏迷，意識不清。」
阿陣kah-ná根本to̍h無希望ê款，m̄-koh，tī死chìn前tio̍h盡力kā她拯救，這是安子ê真正心意，因為可能有時會出現奇蹟。游德仁ê情形是有及時ê治療，而且受tio̍h siōng謹慎koh siōng完善ê治療，tùi腰椎穿入去，抽出腦脊髓液，koh用醫藥鹽水洗，注射Chu-lu-hoa-mit（硫酸胺）。安子特別來到chia，她希望阿陣mā ē-tàng接受chit種ê治療，所以她對醫生講：
「Chit-ê cha-bó͘人以前bat tòa阮tau，請你照游德仁ê方法kā她治療kám好？醫療費用由阮負責。」
林醫師the̍h伊ê醫療皮包，koh再入去草寮á內。M̄知情況án怎？清文kah安子迫切teh等á等，結果看tio̍h真無奈ê款行出來。
「Hit-ê cha-bó͘人tú-chiah to̍h死去à，我掠準她是teh睏。」
