《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 夫婦 第十一章（更新版）
作者 庄司總一 著 楊東傑 指導 林俊育 台譯 2017.05.28
Tī庄腳ê車頭落車了後，景文kah瑞文koh坐鐵枝á路輕便車向東去。
車頂iáu有其他兩個乘客，兩個lóng戴竹笠á、thǹg赤腳。兩組人客tī輕便車頂面ê長車廂，kha脊phiaⁿ tú kha脊phiaⁿ坐teh；坐tī風尾ê chit對高尚人客，不得不tio̍h鼻另外hit兩人身上ê臭汗酸味。Koh加上in中間ê一個用薰管teh pok俗薰，臭薰味不斷吹來後面；另外一個teh食檳榔，不時kā kah-ná血ê紅汁phùi kah滿四界；無chhái清氣ê田園芳味soah hō͘ in舞lâ-sâm去。陳家兄弟有想beh請in換位；若kā in拜託，可能ē-tàng kah in換位，m̄-koh in一直講bē出嘴，因為tùi in相tú ê勇壯ê kha脊phiaⁿ有傳來奇妙ê壓迫感，這比臭味koh khah恐怖。尤其是兩人teh講土地ê tāi-chì，其中一個有小khóa激動ê款式。
「實在豈有此理，若講是柴片á是死人，to̍h有可能會hō͘ 水沖走，土地會去hō͘ 它流走，我從來mā m̄-bat聽過。」食薰ê講。
「確實二十年前bat做過大水，hit-ê大水mā kā阮tau ê厝流掉。」食檳榔ê講。
「Hit-ê大水hō͘ 曾文溪邊一帶淹水，當時阮老父mā淹死，田園成做魚ê厝，我無法度chiah去北部食頭路。十年了後tńg來，看ah！土地koh浮起來à，當然無koh像以前ê地形，已經變kah高低無平ê拋荒地。M̄-koh，我知影土地ê位置，所以koh開始慇勤耕作。Βeh耕作拋荒地實在m̄是hiah簡單，經過三年chiah有收成，阮翁bó͘ lóng真歡喜。想bē到忽然有人來講：『這m̄是你ê土地，是官廳ê。』因為án-ne，我bē-tàng koh種作，我聽tio̍h ná hō͘ 雷kòng-.tio̍h。」
「你kám無去法院告？」
「戇大呆！對方是官廳，無法度lah！我去派出所，mā請保正去交涉，m̄-koh，無人beh chhap我。無可奈何lah！是已經過去ê tāi-chì loh！Chit-má koh講mā是無伊法，雖然明知án-ne，tú-tio̍h人總是想beh講hō͘ 人聽。豈有此理！想tio̍h to̍h受氣。」
「若án-ne，chit-má chit塊土地到底是屬siáng ê？」
「A̍h知。Kám是大官á是好額人ê？」
Kah in kha脊phiaⁿ相tú ê景文kah瑞文兩位地主，清清楚楚teh聽chit兩個作穡人ê對話。尤其是陳景文有小khóa緊張，因為這m̄是kah伊無關係；農民若知影伊失去ê hit塊土地是屬kha脊phiaⁿ後hit-ê cha-po͘人ê，有可能會kā伊phah kah半死，所以in ná會敢因為臭薰煙kah檳榔汁來請in換位。可能是心理作用，景文感覺chit兩個作穡人ê話是眞知in ê身分chiah thiâu故意針對in講ê。M̄-koh，景文已經免驚伊會惹禍上身，因為土地chit-má已經屬in小弟瑞文所有ā。
輕便車行約一里半路，就到相當大ê庄頭。
陳家兩兄弟去拜訪黃丙ê厝，伊是陳家tī chit地方ê所有地ê管理人；伊本身mā是一個小地主，又koh擔任保正，是村裡有頭面ê人。
「歡迎hiah遠來到chia。」 黃丙對chit兩位無通知to̍h來ê人客有小khóa gōng-ngia̍h，m̄-koh非常慇勤招待兩人入去客廳。
「黃先生，chit位是我ê小弟瑞文，以後tio̍h請你多多照顧。拜託！」 景文kā小弟紹介hō͘ 管理人。
「我chiah tio̍h請伊關照。伊生做一表人才ê美男子，地主ê子弟畢竟無仝。」
這並m̄是扶tháⁿ ê話。瑞文穿一領全新ê深藍色西裝kah無領帶ê純白oâi-siá-chuh，抹油ê頭毛烏sìm-sìm會發光，koh有小khóa茉莉花ê芳味。Chit種流行ê都市打扮引起田庄老人ê注目，伊感覺án-ne ê稱讚iáu無夠額，m̄-koh，顧慮tio̍h景文ê打扮，就無koh講啥。景文原本to̍h無啥物風采，koh穿台灣服，當然無人會知影伊是百萬富翁，tī村裡行路mā bē引起人ê注目；chit對兄弟實在是真無相siâng。
景文當然清楚黃丙對in兩兄弟ê觀察比較以後，感覺奇怪ê心情，m̄-koh，伊lóng無掛意，工作chiah是siōng重要ê。
「黃先生，冬尾ê收成àn怎？」
「是平平lah！甘蔗ê收成有khah好，尤其是頂年風災真嚴重。」
「看起來舊年到今年上半期ê收成大減，今年秋天若無khah好，阮mā無法度。」
「無m̄-tio̍h。其中一個原因是佃農最近lóng無認真，而且提出種種ê要求來表示不平。」
「第一期作五成，第二期作三成，án-ne ê收入iáu講無公平？ Án-ne ê比例，農民應該感激chiah tio̍h ā。」
「無m̄-tio̍h，án-ne iáu-koh不服，實在是有khah過份。M̄-koh，你所知，最近有無路用ê啥物組織lah，啥物協會lah，in出來教農民kah勞動者一kóa pháiⁿ知識。咱對chiah-ê人無啥辦法；in嘴講是beh協調佃農kah地主來促進和睦，其實是beh kah地主敵對。Chiah-ê對lín khah大ê地主無啥物作用，m̄-koh，對阮chit款ê小地主，若照in ê講法來進行，阮會hō͘ in剝皮剝kah chhun無半項。以前ê農民真單純樸素koh萬事完滿，chit-má ê變kah真恐怖。世間ê進步到底是好是bái neh？」
黃丙一直搖伊hit粒大koh重ê頭殼。伊kui面全是天然痘(chu)ê痕跡，拋荒ê面皮半支嘴鬚都無；紅濁ê目chiu kah-ná teh睏，目chiu皮koh peh bē開；目chiu是靈魂之窗ê講法並無適合伊。景文知影黃丙並m̄是一個好ê管理人，伊khiā tī地主kah佃農中間，雙pêng吸收甜頭。像景文hiah精明ê人，ná會到taⁿ一直teh寬大處理？是為tio̍h萬全。地主kah佃農之間無一個直接ê契約，中間ê管理人mā m̄是絕對ê責任者；因為是chit款無確實ê關係，致使農民ê要求kah訴願，無所在thang投訴，tāi-chì tiāⁿ-tiāⁿ to̍h不了了之。若勉強講有契約，mā是只有口頭契約，並無交換書面ê證件，所以農民時常鋤頭放leh，就去chhōe別項頭路；地主chit pêng mā是ē-sái隨時tùi in收回土地，kā in解雇。所以kah tú-chiah黃丙所講ê仝款，社會ê進步帶來農民自覺，像以前án-ne地主隨意ê做法已經是行bē通ā。Chit種趨勢是事實，黃丙用這做藉口，最近tiāⁿ-tiāⁿ增加景文ê負擔，致使景文無法度koh出聲。
「照黃先生你ê講法，佃租m̄-to̍h會koh減少loh？ M̄-koh，我無beh koh再讓步ā，絕對無，因為我已經是一個情義相當深ê地主。」 景文面帶微微á ê半冷笑án-ne講。Hō͘ 伊先出手，黃丙小khóa目頭結結，用一種真為難ê口氣講：
「佃租就照án-ne，m̄-koh，chhiàⁿ人ê工資是問題；請你一定tio̍h提高，若無，bē用得，因為物價一直teh起。」
「Chit-má每工ê工資gōa chē？」
「Cha-po͘工五十一錢，女工三十一錢。」(譯註：一百錢=一kho͘=一圓)瑞文tùi邊á隨插話。
「真俗ah？」
一直tī邊á恬恬無講話ê瑞文忽然發出小khóa怪聲講，其他兩人掠伊金金看。
「真正俗，若是你去做工。」景文ná teh kā伊khau洗講。
「M̄-koh，街á ê人力車車伕走七、八百公尺就ē-tàng得tio̍h二十錢ê車資。一工若載十個人客就ē-tàng thàn二圓。
「Sàn-chhiah人mā有差別，kah好額人仝款。你若知影農民kah工人tòa啥物款厝，食啥物物teh過日子，你就bē驚一tiô講『真俗ah？』。」
「總是，一個人做一工ê khang-khòe kan-taⁿ ē-tàng thàn五角銀，算bē hô lah，我感覺in真可憐，無論in是過啥物款生活。」
「肥一桶五十錢，你kám會講它俗？對錢ê tāi-chì你kah-ná戇大獃leh。五十錢to̍h講它俗，á若一百圓to̍h講它貴，kan-taⁿ會曉án-ne想，kah-ná gín-á ê頭殼。你家己mā有土地，以後你會tú-tio̍h真chē傷腦筋ê tāi-chì。你tio̍h會記得，chit-má恬恬mái加講話，mài hō͘ 人看破腳手khah好。黃先生，你看我chit-ê小弟lóng m̄-bat世事。」
「若是án-ne，不管是五十一錢á是三十一錢，加hit-ê一錢lân-san頭á有啥物意義？」
瑞文án-ne疑問講，黃丙隨解說講：「He是一種感情ê問題；kan-taⁿ加一錢to̍h會hō͘ 人感覺額外加一錢ê滿足。這就是農民單純ê所在，製糖會社mā常常使用chit-ê方法。」黃丙感覺瑞文ê插嘴hō͘ 伊所提出ê主張增加氣勢，所以皺面ê黃丙向景文講；
「無的確lín小弟比你khah bat人情世事。無論如何，到taⁿ ê工資對勞動者來講mā是艱苦過日，而且農民組織mā要求tio̍h增加工資到一圓二十錢，這kah-ná teh講hàm古leh。」
「組織ê要求kah-ná teh眠夢leh；眠夢ê tāi-chì ná有法度ta̍k項lóng會達到？咱kám tio̍h用金ê鋤頭hō͘ in做工？Mài koh滾sńg笑lah！黃先生，到底tio̍h增加gōa chē工資leh？」
「是lah，kám tio̍h koh十錢？」
「十錢haⁿh。」
景文teh考慮一下；伊hō͘ 黃丙繼續講落去，伊ê頭殼底teh tia̍k算盤。
「若無án-ne，會chhiàⁿ無工人。最近大家若有khah好ê khang-khòe，就會走去製糖會社á是礦場。所以頂年lín-tau收成減少，人手不足是原因lah。Koh再講，chit幾年製糖會社ê做法hō͘ 人真傷腦筋，in不斷kā農民ê土地收回，來做會社ê甘蔗園。Án-ne落去，本底ê佃農就自然會變做苦力(khu-lí)，製糖會社mā大量吸收chiah-ê工人，所以咱會腳手無夠，而且因為農民講in ê土地hō͘ 人占去，á是in要求工作權無hō͘ 人承認，所以常常發生麻煩ê tāi-chì；農民心情激動，無像以前hiah-ni̍h聽話。」
景文忽然想起tú-chiah坐輕便車來ê途中有聽tio̍h兩個勞動者ê對話。In顯然有鬱卒想beh反抗ê心，這bē-sái大意得。Kah小khóa增加農作ê經費比起來，農民鬧動ê損失koh khah大。
「若án-ne，工資增加五錢好無？」
「五錢bē-sái lah，五錢」
黃丙一直搖頭，兩人互相無beh相讓。過一時á，景文屈服ê時，黃丙已經頭額（hia̍h）全汗，嘴角全泡。Kan-taⁿ為tio̍h增加五錢á是十錢，兩人拚死議論，瑞文tī邊á看，感覺真奇怪koh好笑。Chit部分ê交涉結束了後，in koh互相談論肥料、稅租kah其他有關收成ê tāi-chì。對chit方面完全無知識ê瑞文，聽了感覺真無聊。庄腳原來是hiah-ni̍h囉嗦麻煩，kan-taⁿ是一kóa無聊ê tāi-chì，瑞文tú-chiah來到庄腳興趣早就lóng消失去。伊掠準beh去東京讀農科是快樂ê tāi-chì，chit-má伊想講tio̍h koh修正chiah好。
Hō͘ 黃丙tī in tau請食中晝了後，景文講伊無閒tio̍h家己單獨先tńg去台南。其實伊本來有想beh tàu陣去看瑞文ê土地，m̄-koh，聽tio̍h輕便車頂面hit兩個勞動者ê話了後，就想無beh去。就án-ne，伊hō͘ 管理人黃丙案內in小弟去。
道路雙pêng ê麻黄tú種無gōa久，tùi村尾一直延續落去。瑞文kah黃丙兩人並肩而行，日頭kā in ê影照tī頭前；一個是瘦抽ê身材，行動輕快，另外一個是肥kah ná豬，戴一頂hō͘ 日頭曝kah臭ta ê台灣pa-na-ma草帽，gia̍h一支籐枴á，腳步kah-ná鴨á phiat一下phiat一下，顯然是習慣án-ne行路，雖然腳步細，速度koh算緊。道路ta-khok-khok，兩人ê鞋á無gōa久就變kah白siak-siak；連慢慢á teh行ê載貨馬車經過ê時，tùi路樹縫射入ê光線mā會照tio̍h飛起來ê塵埃。路邊雙pêng ê田地充滿澄清ê空氣，稻穗kah甘蔗葉 mā teh吸收秋天ê空氣。田園kah-ná大海hiah曠闊，只有遠遠ê所在浮出來茂盛ê樹林、竹林kah紅磚á厝ê小部落。Chit時已經是秋割ê時節，有人開始teh割稻á。瑞文沿路看tio̍h khiā teh做穡ê作穡人，有ê teh動鐮le̍k-á，有ê kā割起來ê稻á下tiàm機器桶phah粟（chhek）á。為tio̍h無ài hō͘ 粟á散去，機器桶有掛chiâⁿ丈koân ê網á；若kā它裝竹排á，mā是會浮tī水頂流。經過chit款奇妙ê機器桶phah了ê粟á，tī陽光之下kah-ná黃金波浪teh飛。
瑞文看tio̍h chiah-ê庄腳景色，結果ta̍k項lóng真珍貴，一直問黃丙種種ê tāi-chì，m̄-koh，黃丙無想be̍h kā伊說明，因為伊khah想beh問有關陳家ê情形。伊雖然有去過陳家幾nā pái，m̄-koh，感覺iáu無法度把握陳家ê一切，像講伊做陳家ê土地管理人已經二十年，連屘á-kiáⁿ瑞文mā今á日chiah頭一pái見面。陳家實在是大koh複雜，kah-ná用水目鏡teh看海底，tī hia藏真chē珍貴ê不可思議ê物件；chit-ê田庄阿伯á只好án-ne想。伊tiāⁿ-tiāⁿ停落來喘氣，kah-ná馬teh phe̍ⁿh-phe̍ⁿh喘，m̄-koh，he m̄是行路ê thiám，是因為連續講siuⁿ-chē話所引起ê。瑞文若bē赴回答，伊就koh再續teh講落去，無gōa久就提起陳安子ê tāi-chì。
「我kan-taⁿ看過hit-ê日本人ê陳夫人一pái，實在真súi，ē-sái kah她ê同姒(sāi)á玉簾相比並。若hō͘ 她穿台灣衫m̄知怎樣？」
安子受褒獎，瑞文kah-ná家己ê tāi-chì，就歡喜膨風講：
「她tiāⁿ-tiāⁿ穿台灣衫，比和服koh khah合軀，玉簾kah她無tè比；第一品是無仝lah。」
「Kám會是你愛她，所以teh kā她褒獎？」
黃丙滾笑án-ne問伊。Chit-ê阿伯á kám會知影家己kah安子ê關係？瑞文驚一tiô，話soah無法度繼續落去。
「M̄-koh，到底是án怎？日本人嫁來kám會幸福leh？ 講khah失禮leh，mā是因為hit-ê日本婦人入來了後，lín陳家就閙起問題來。因為雞to̍h是雞，鴨to̍h是鴨，tàu陣lok tiàm仝一個所在，啄來啄去一定真鬧熱。」
「烏白講，絕對無hit款tāi-chì。阮hit-ê阿嫂實在是真有氣質ê好日本婦人，真親切，m̄是會hō͘ 人討厭ê人。人講hiah-ê有ê無ê，是周圍ê人無了解，真pháiⁿ心，烏白亂講來中傷。」
瑞文忽然激動起來，對方卻冷笑講：
「免án-ne辯解lah！」
「啥物辯解？」
「免掩蓋lah！其他ê人免講，若是我ho͘ⁿh，是酸、辛(hiam)食過頭ê cha-po͘人lah。」
黃丙目chiu nih-kah koh khah細蕊笑笑á án-ne講，是teh叫人tio̍h信任伊ê款式。 Chit-ê cha-po͘人確實是一個好色ê人，聽伊講伊有三個細姨，二十個kiáⁿ無欠kah一個。伊真自高，講伊án怎協調大bó͘ kah細姨之間ê問題，koh án怎hō͘ 家庭bē起風波；伊m̄知pháiⁿ勢一直teh講m̄知見笑ê話，瑞文完全hō͘ 伊壓倒。
「你iáu少年，mā真有手腕。M̄-koh，lín阿兄án怎？有受氣ho͘ⁿh。」
「Hiah-ê無影無跡ê謠言，你是tùi siáng聽來ê？」
「Tùi啥人？因為chit-má ê時代kài發達，電話、電報lóng有。Hit-ê gín-á kám確實是你ê？」
「請你mài講hiah-ê。若koh講，我beh咬你oh。」
「惹你受氣à？我kan-taⁿ聽tio̍h hiah-ê風聲niā-niā」
「Lóng是白賊，人造話ê lah。」
「Heh，kám是白賊？」
黃丙顯出kah-ná失望ê表情，伊原本期待瑞文會講出koh khah刺激性ê好事。
瑞文對chit-ê庄腳人ê亂講起受氣，伊若koh繼續追問，瑞文有可能會動手phah伊á是咬伊。照tú-chiah伊講ê口氣聽起來，伊對陳家ê好奇心，m̄是日常生活á是財產ê tāi-chì，卻是其中男女ê愛慾ê瓜葛kah閨房ê秘密；瑞文chit-chūn chiah了解。食老m̄認老koh對色情有異常ê關心，瑞文感覺chit-ê老人實在有夠pháiⁿ心腸。講起安子ê tāi-chì ê時，瑞文看tio̍h伊ê面to̍h感覺真污穢。
行了約四公里路，來到一個無夠三十戶ê小部落，in只不過是簡單ê細間厝合做伙ê khiā家。
過hit-ê部落koh小行一下，路就慢慢á peh崎，而且來到chia就有偏遠ê氣氛。路ê一pêng真崎，四季長青ê灌木非常茂盛，koh有真chē羊齒類ê植物，mā有看tio̍h奇形怪狀ê蛇木kah kui片（phiàn）ê台灣芭蕉，有進入山地ê感覺。四界有野生ê檨á樹kah龍眼樹，koh有柚á樹結kah ná黃球ê果子。路ê另外一pêng是曾文溪，ta-khok-khok ê河床，tī秋日照射之下，目chiu看去是一片（phiàn）白siak-siak。
過無gōa久，黃丙kah瑞文行到曠闊ê低地，行過無水ê ta溪了後，河ê對岸就是闊bóng-bóng ê一片甘蔗園，hia有瑞文ê土地。
「非常遠，真無方便ê所在。」
一到田地，瑞文驚kah gāng去，m̄-nā真失望án-ne講，mā真厭倦。
「來歇一下。」
黃丙tī金龜樹腳坐落來拭汗，瑞文mā tī hia坐落來點薰。
「黃先生，這kám自古早to̍h是阮tau ê土地？」
「舊年chiah變更做景文ê名，hit時以後，lín ，kám m̄是有分財產？ An-ne，chit-má是你ê。」
黃丙kā瑞文lió一下，心內想講家己ê土地也m̄知影，地主ê少爺to̍h是hiah-ni̍h潦草koh糊塗。
「Kám講是有啥物因端ê土地？」
「是ah，原來chia是官地放領，起初是某官員買去，後來chiah koh轉手hō͘ lín阿兄，其中ê詳細情形我mā無真清楚。 」
瑞文ê面小khóa變tēng，嘴唇咬leh，無講話，心內無爽快。財產分配確實無公平，景文到底是bē吃虧ê人，伊比大兄分khah chē，koh是siōng好ê份。瑞文想講是家己抽tio̍h siōng-bái ê籤，因為家己pīn-tōaⁿ所以bē-tàng有啥物慾望，當然分khah少。M̄-koh mā bē-sái分hiah遠koh收成少無路用ê土地hō͘ 我，kám m̄是？
「Taⁿ，」土地管理人ná親像牛hiah笨chhiâng peh起身來講： 「咱來去巡一下á田園leh。」
瑞文hō͘ 黃丙催，m̄-koh，伊已經對hiah-ê田園無趣味ā。伊心內忽然koh想起tú-chiah輕便車頂面hiah-ê對話。「若án-ne，chit-má chit塊土地到底是屬siáng ê？」
「A̍h知，kám是大官á是好額人ê？」
Kám講in講ê hit塊土地是我ê chit塊？瑞文感覺khi-mo͘-chih無好，所以伊無想beh隨起身。
「是án怎？Kám是真thiám？」
「Bē lah！你雖然hiah肥，m̄-koh，你ê腳有力。原住民mā腳真勇，kám m̄是？」
「Mài lah！Mài kā我kah原住民teh比。」
「Chit tah kám有原住民？」
「已經無teh割人頭ê生番ā，lóng變成溫和ê熟番。In真chē tòa tī部落，穿台灣衫，講台灣話，看起來kah-ná是台灣人，m̄-koh，一看in ê面就隨知影。」
「原住民ê面kám是bē bái？」「Mài講sńg笑，in ê面容真驚 人，cha-bó͘ ê皮膚烏koh粗，iáu是咱縛腳ê三寸金蓮、楊柳腰khah好lah。」
「我學生時代bat去過霧社，hia有美人。若有美人tī chia，我想beh用相機kā她hip一張。」
「你頷頸phāiⁿ ê ，kám m̄是望遠鏡？」
「是相機lah。」
「你若beh hip番á cha-bó͘，不如kā我hip一張khah有功德。」
黃丙kā衫ê鈕á鈕好，真正經擺出姿勢，kah-ná肥豬ê身軀向後，正手thuh籐枴á。瑞文微微á笑kā快門chhi̍h落去。
「若是hip了bē bái to̍h真好。」
「無問題，因為hip相機bē講白賊。」
黃丙無感覺tio̍h少年人ê khau洗意思，心內大歡喜。伊一生hip相無幾pái。
「Pháiⁿ勢，請相片若洗出來，寄一張hō͘ 我kám好？」
「一定會寄hō͘ 你。」
「Hō͘ 你hip相去，我ê精氣kah運氣mā lóng hō͘ 你吸去neh。」
「我bē做hit款罪惡ê tāi-chì，做你放心。」
「總是，人一下老就感覺世間真無聊。看你ê款式，我真欣羨；人少年koh有錢，自由自在，實在有夠幸福。」
「Mā m̄是án-ne講，人無像外表所看ê hiah-ni̍h好。」
「你to̍h免客氣ā。」
「我若失去chit-ê甘蔗園，to̍h啥物lóng無。」
「有十甲ê土地iáu-koh teh埋怨，你來世會變做牛á是豬oh。」
兩人行tī甘蔗園中間ê路裡，甘蔗欉已經七、八尺高，ē-sái收割à。有ê甘蔗彎曲，有ê倒tī土腳。有時微風吹來，kā長長ê甘蔗葉吹kah相kheh，發出chha-chha叫ê聲。百舌鳥(譯註：就是紅頭伯勞) 傳來一chūn koân調ê啼聲，了後就恬chih-chih lóng無聲。黃丙chhōa瑞文kā伊所有地ê界線se̍h一liàn。雖然是ûn-ûn-á行，mā行將近一點鐘，所以是相當闊ê土地。Án-ne實際行一遍了後，瑞文chiah知影家己ê土地是有料想bē到ê闊，tùi án-ne伊chiah感覺家己是相當有財產ê人，ē-sái安心kah誇耀。
巡視田園了後，黃丙講伊暗時庄裡有聚會，需要量早tńg去。M̄-koh，瑞文m̄甘離開hiah寧靜ê田園，感覺隨時to̍h tńg去實在可惜，就kah有一點á討厭ê庄腳老人分開，伊ài家己一個留tiàm hia，而且tńg去mā無啥物趣味ê tāi-chì。
黃丙就照瑞文ê意思，家己單獨tńg去。
瑞文行出hit-ê田地，隨便行行leh了後，就chhōe一個所在坐落來。伊面向東坐tī小khóa高ê草埔，看過去是綠色ê山坡，續落去是藍色ê山，koh後壁是淺藍色ê阿里山山脈；伊ē-tàng清清楚楚看出三種色彩ê層次。Koh khah遠ê應該是新高山(譯註：玉山)，m̄-koh看bē-tio̍h。草埔ê下面是一條大河，就是tùi阿里山發源流向西南ê曾文溪，m̄-koh tī chit-ê所在，溪水忽然彎向西pêng，流入去平原；chia是hit-ê水流彎曲ê地點。熱天雨水期ê時，濁濁ê大水沖pháiⁿ橋樑，淹沒田園。Chit-ê hō͘ 農民心痛ê溪水，tī秋天到冬天是ta燥期，變成一點á水都無ê沙地；溪底露出大粒、細粒ê石頭，koh有樹kho͘ 堆積，有ê所在也發出蘆葦kah菅芒，á是雜草茂盛ê草埔。
瑞文神神teh看山，心內teh想安子ê tāi-chì，想講伊hō͘ 阿嫂迷去真是戇大獃。M̄-koh m̄知怎樣，chit-má想起來已經bē koh心痛。飛出去大地會hō͘ 身心得tio̍h健康，阿嫂bat án-ne kā我講，這是確實ê tāi-chì。日落西山，照tio̍h瑞文ê側面。今á日hō͘ 日頭曝kah有夠額à，鼻頭一定曝kah紅紅，瑞文想tio̍h心就爽快。伊pok了三、四支紅茉莉牌ê薰，chit中間伊有反省家己軟弱、無所作為、無健康ê生活，也有思考明年去東京讀大學ê計劃，koh夢想未來新生活ê發展等等，心頭就歡喜起來。
過一時á日頭落山，瑞文想講應該tńg去à，就peh起來落山，沿灌木kah草phō掩蓋ê溪邊無夠一公尺闊ê小路行落去。行無gōa久，伊聽tio̍h phah水ê聲。奇怪，溪底應該是無水à，伊感覺小khóa意外。對水聲ê方向看去，tī溪岸生kah一大片ê龍舌蘭kah茂盛ê林投樹縫，伊看tio̍h反射光ê水面。瑞文停落來，目chiu金金看草phō，tī hia確實有一個水池，而且有魚á teh跳ê聲，m̄-koh魚á mā無hiah大聲ā。伊行óa去兩三步，忽然一隻m̄-bat看過ê粉鳥á大ê鳥á tùi草phō飛出來，伊chiah知影水聲是chit-ê原因。瑞文koh一pái向水池看去ê時，伊ê腳忽然khiā tiāⁿ-tiāⁿ，因為伊看tio̍h水內有一個cha-bó͘ gín-á。伊koh進前兩三步，小心mài hō͘ 對方注意tio̍h，kā面貼óa龍舌蘭有刺ê長葉，tùi葉á縫看tio̍h cha-bó͘ gín-á ê身軀，ná有看tio̍h koh ná無看tio̍h。小水池是濁濁ê，m̄-koh，噴起來ê水滴tú-tio̍h日頭，發出銀色ê光。Cha-bó͘ gín-á ê面看bē真清楚，m̄-koh胸坎á看真明；是少女ê奶看kah一清二楚。瑞文偷偷á看，soah有想beh kā她hip相起來ê作孽想法。垂落來ê枝葉遮蓋leh，瑞文真無容易chiah chhōe-tio̍h khah好ê所在，左右移動，終其尾tī十一、二公尺後ê灌木中間kā鏡頭對好tī水裡ê少女。
Hit-ê cha-bó͘ gín-á聽tio̍h快門ê聲，驚一tiô大聲hoah，koh有跳出水ê聲。總是，瑞文仆tī草phō內，然後tùi tú-chiah來ê道路逃走。 Cha-bó͘ gín-á隨tùi後壁jiok來，雄kài-kài大聲罵瑞文，kah-ná起siáu 目，hàiⁿ頭kā tâm濕ê kui束頭毛ê水四界噴，koh手裡hàiⁿ一支鐮le̍k-á。
對chit-ê意外ê恐怖場面，瑞文驚kah身軀kiu-kiu，一直tòm頭kā她會失禮，m̄-koh，hit-ê cha-bó͘ gín-á無beh聽伊。瑞文就tùi lak袋á the̍h出一個五角ê銀角á，講：「Chit-ê hō͘ 你，請原諒，我無啥物pháiⁿ意。」
「我無ài錢，我m̄是趁食cha-bó͘ lah。你tio̍h kā hit-ê機械hō͘ 我，我beh kā它kòng pháiⁿ。」
「Án-ne bē-sái得，這是三百圓買來ê。」
「三百圓oh！」
庄腳cha-bó͘ gín-á驚一tiô就停止攻擊，她tio̍h驚ê目chiu 特別大粒，ná親像龍眼籽hiah-ni̍h烏，是非常野性驚人ê目chiu，m̄-koh，有帶茶色ê美妙色彩，kah-ná野生可愛ê動物，同時hō͘ 人有妖豔ê感受。看tio̍h她ê目chiu ê時，chiah懷疑她kám是純粹ê台灣人。後來，知影她有白人ê血統，chiah解開她茶色目chiu 仁帶有灰色條紋ê謎。
「我ē-sái kā相機hō͘ 你，請你mài koh hàiⁿ hit支鐮le̍k-á。」
「我無beh thâi你，你kah-ná是好額人，是tó位ê人？」 Hit-ê cha-bó͘ gín-á氣勢受挫折，就溫柔落來；tú-chiah受氣soah m̄知對方ê身分，chit-má平靜落來chiah知伊m̄是庄腳人，hit-su m̄-bat看過ê特別服裝hō͘ 她看tio̍h真無仝款。
「我是台南人，你kám tòa chia附近？」
「是lah。你tùi台南來chia chhòng啥物？Kám是用hit台機械hip chiah-ê風景？」
「是lah。我本來無想beh hip你，m̄-koh，因為你洗水浴ê光景非常súi，soah禁bē-tiâu kā你hip起來。請你mài kā我想做有惡意。」
「無法度lah！Hō͘ 機械hip去iáu無要緊，若hō͘ 你ê心肝hip去to̍h真討厭。你若是村裡ê cha-po͘人，我就無beh放你soah。」
「驚死人，連庄腳ê粗魯cha-po͘人都hō͘ 你動鐮le̍k-á，你真正是無對手。」
「空手我mā bē輸，因為大家lóng叫我『山貓』á是『豹彪。』
Cha-bó͘ gín-á家己就向前行去，kah tú-chiah大受氣ê她完全無仝，kah-ná無tāi-chì、無要緊ê態度，hō͘ 瑞文大驚一tiô。一開始hō͘ 她奇妙ê力量威脅，想beh趕緊逃走，m̄-koh，chit-má kah-ná受tio̍h無形ê命令，hō͘ 伊不得不tio̍h tòe她ê後壁行。Cha-bó͘ gín-á穿粗棉布ê衫褲，thǹg赤腳，對看慣勢細腳ê瑞文來講，她ê腳實在是siuⁿ過大kah hàu呆hàu呆。她ê身材並無koân大，體型真tú好，tùi洗了舊去ê棉布衫ē-tàng看出她雙肩堅實ê肉。她ê背影看起來kah-ná有猛獸ê腳步，堅定而且敏捷，一點á 都無危險性，kah縛腳軟chiáⁿ優美ê腳步完全倒反。行了大約五十公尺，cha-bó͘ gín-á又koh家己坐落來。He是一欉相思樹腳蔭影ê所在，四周圍lóng是雜草ê小高台。瑞文kah-ná她ê部下，坐tiàm她ê邊á。
「你beh pok薰無？」
瑞文想beh hō͘ 她歡喜，the̍h出一支茉莉牌ê薰hō͘ 她。Cha-bó͘ gín-á kah-ná無常常pok薰，用無慣勢ê手勢teh pok，m̄-koh津津有味，pok kah真歡喜。
「你kám真正beh用hit支鐮le̍k-á kā我thâi死？」
「Ngh，he是剉甘蔗ê工具，你實在有夠無膽。」Cha-bó͘ gín-á kah-ná無啥tāi-chì teh微笑，m̄-koh，瑞文ê恐怖感iáu tī-.leh，所以伊是輕聲細說，非常溫柔。
「Án-ne你是hō͘ 甘蔗園chhiàⁿ做工ho͘ⁿh？」
「是lah！無啥ài，m̄-koh mā無辦法。」
「Kui工流汗做工chiah thàn一個五角銀，有夠刻薄。我若是地主，會hō͘ in khah chē。」
「Cha-bó͘ 工chiah三十一錢。阮老父若iáu tī-.leh，我to̍h免hō͘ 人差用。」
「你ê家族kám真chē人？」
「Kan-taⁿ老母kah我兩人。」
「Án-ne有khah無伴。Lín老父kám mā是農民？」
「Ngh，m̄-koh，伊khah ài phah獵。」
聽tio̍h phah獵，瑞文想講她kám是原住民ê cha-bó͘-kiáⁿ，就koh詳細看她ê面一pái。Hit-ê cha-bó͘ gín-á無細膩，chhìn-chhái倒leh，目chiu kheh-leh，目睫毛長koh厚，面hō͘ 日頭曝kah烏金烏金。瑞文想beh問她是m̄是原住民，soah忽然講bē出嘴。根據黃丙ê講法，chia ê平地原住民早前kah台灣人通婚ê結果，chit-má外表上lóng kah台灣人過仝款ê生活；chiah-ê人極無ài hō͘ 人叫做番á。
Cha-bó͘ gín-á靜靜peh起來，ǹg山ê方向看去。
「我真想ài去phah槍（chhèng）？你bat phah獵無？」
「做gín-á ê時chūn bat用空氣槍á是pha-chín-koh phah過白頭殼á，m̄-koh....。」
「阮phah過熊、豹kah鹿á，阮老父是有名ê槍手，無比phah獵koh khah趣味ê tāi-chì lah。我十歲左右就tòe阮老父去phah獵，hit粒山m̄知peh過gōa chē遍。Ai-ah，我真想beh peh山。」Cha-bó͘ gín-á注目看遙遠ê阿里山，回想以前快樂ê日子，ná親像tī眠夢中ê目神。
「想beh peh山to̍h做你去，既然細漢就kah老父tàu陣去，你一定會曉phah獵，kám m̄是？」
「當然mā會曉，若是有ke-si，我chit-má隨時ē-sái飛去，m̄-koh，我siōng重要ê槍無，火藥、槍籽、弓箭ta̍k項lóng無。老父過身了後，厝裡散赤，ke-si lóng hō͘ 老母賣了了。我真正想beh去，若有一支槍就ē-sái à。真悲哀！」
「若是ài槍，我買hō͘ 你。」
瑞文chit句話m̄是滾sńg笑ê，因為cha-bó͘ gín-á ê真情teh催逼伊，伊ê嘴自然án-ne講出來。總是，對一個tú相bat ê cha-bó͘ gín-á講話，伊ê自尊心bē允准。所以瑞文講出嘴了後，隨感覺後悔。
「Beh買hō͘ 我？」Cha-bó͘ gín-á ê目chiu歡喜kah發光，m̄-koh隨時變面，改講無ài。
「你叫啥物名？」
「山貓lah，正名叫Chîn Chîn。」
「Chîn kám是我ê姓hit字陳？名ê Chîn是tó一字？」
「Ai-ah。」
「你kám m̄-bat字？」
「是ah，m̄-koh kan-taⁿ會曉家己ê名姓。」
Cha-bó͘ gín-á gia̍h起鐮le̍k-á，忽然伸手kā邊á ê龍舌蘭ê葉á一下to̍h phut落來。Hit-ê伶俐ê動作koh hō͘ 瑞文驚一tiô，m̄知她koh beh chhòng啥物。Cha-bó͘ gín-á tī軟軟ê葉á頂面用鐮le̍k-á尖寫字hō͘ 伊看。
「叫做陳陣oh，真好ê名。」
Chit-ê名一屑á都無súi，m̄-koh，瑞文驚她hit支鐮le̍k-á，所以chiah講好聽話。
「無人叫我正名，我真受氣。你ná會問我ê名？」
「只不過問看māi lah！」
「Koh hō͘ 我一支薰。」
瑞文kan-taⁿ chhun一支薰，若hō͘ 她，家己to̍h無ā，m̄-koh，伊已經無想beh koh pok薰。Chit-chūn已經是beh冬節loh，日頭落山有khah早淡薄á。伊若beh赴十點ê尾班車iáu免煩惱，m̄-koh，若siuⁿ-òaⁿ tńg去，厝裡ê人會感覺奇怪。到車頭有三里半路，m̄-koh，一半以上是山路，瑞文忽然緊張起來。
金色ê日頭漂tī深紫藍ê空中，山脈iáu浮tī頂koân，kan-taⁿ hit tah吸引伊ê目chiu，瑞文kā視線移到khah低ê所在，山崙á腳已經陰暗loh，續落去ê平地ê田園kah樹林mā蓋一重烏暗ê薄膜，tùi溪ê對岸吹來ê風hō͘ 瑞文pih手ńg ê手股kah面感覺冷起來。
Cha-bó͘ gín-á hō͘ 薰煙tòe風吹去，她ê目chiu iáu無離開山。看起來她ē-tàng kui暗無tín動坐tiàm hia。她到底teh想啥物？聽講in老父是去hō͘ 野獸ê拆食落腹死去，可能是hit-ê報仇ê心火當teh to̍h起來。Chit-ê cha-bó͘ gín-á雖然m̄是純粹ê原住民，m̄-koh，一定有lām-tio̍h原住民ê血。聽講割人頭時代ê原住民，為tio̍h beh割敵人ê人頭，mài講是一工、兩工，就是三工mā ē-sái免食免lim，bih tiàm草phō內埋伏。
瑞文開始起驚，頷頸感覺冷起來，想tio̍h她hit支利(lāi) ê鐮le̍k-á to̍h真煩心。Cha-bó͘ gín-á無tín動無講話，瑞文chhōe無thang好khiā起來ê機會。伊就倒leh，想beh裝做伊對cha-bó͘ gín-á並無感覺驚惶teh警戒ê心，然後伊to̍h beh ûn-ûn-á起身，行向倒tńg去ê路。
當伊身軀倒落去ê瞬間，伊感覺手股一絲á kah-ná hō͘ 刺鑿tio̍h ê痛niā-niā。伊忽然聽tio̍h cha-bó͘ gín-á尖聲teh hoah：
「龜殼花！」
瑞文跳起來，一尾蛇gia̍h起三角形ê頭，ná親像一支短枴á khiā teh；牠有ná紅色絹絲ê舌，烏珠ê目chiu ，白色條蚊光滑ê蛇皮。瑞文想講若去hō͘ 牠咬tio̍h就害loh，m̄知家己其實已經hō͘ 牠咬tio̍h à，kan-taⁿ有意識ê反射動作趕緊退後。陳陣揮起鐮le̍k-á，m̄-koh，刀á kan-taⁿ切tio̍h風，蛇就發出sa-sa叫ê聲，tùi草phō內消失去。陳陣跳過來瑞文退後tǹg-lap坐ê所在。
「你去hō͘ 蛇咬tio̍h？」
瑞文聽tio̍h chit句話chiah意識tio̍h倒手腕ê痛，伊ê面ná樹葉á變蒼白。伊伸手一看，kah-ná去hō͘ 針鑿tio̍h，有兩chōa hō͘ 蛇咬tio̍h ê痕跡。雖然khah無注射hiah痛，m̄-koh，死亡ê預感hō͘ 伊感覺比大孔嘴ê孔嘴khah痛。
陳陣忽然kā瑞文ê手股ân-ân掠tiâu，gia̍h起鐮le̍k-á，瑞文強强脫開她ê手。伊ê腦海中閃過一個以前聽tio̍h ê勇敢無比，會hō͘ 人感動ê故事，就是原住民ê手若hō͘ 毒蛇咬tio̍h ê時，in就會用番刀斷然kā手切斷。 瑞文寶惜家己ê手骨，拚命beh逃走。伊對chia ê地理無熟，隨時無路好走，不得不tio̍h chông入去甘蔗園內。聽講為tio̍h beh掠一個走入去kui萬支甘蔗園內ê賊á，tio̍h動員kui中隊ê兵á。所以，陳陣叫kui暗，m̄-koh beh tī甘蔗園內chhōe-tio̍h瑞文是無可能ê。總是，一時逃走ê瑞文又koh tòe cha-bó͘ gín-á ê聲óa近，因為伊發覺家己ê愚戇，知影jú慢處理是會jú接近死亡。
「拜託！拜託mài kā我ê手切斷。」
「戇大獃，無割會死去。」
「若tio̍h失去手，我寧可死khah贏。」
「你是想對tó位去lah？Kan-taⁿ hō͘ 蛇咬tio̍h ê所在切hìⁿ-sak就ē-sái得。有索á無？趕緊，索á，索á」偏偏兩人lóng無帶索á，陳陣用瑞文ê皮帶kā伊ê手股頂節縛tiâu，koh用家己縛頭毛ê紅色帶á kah瑞文ê鞋帶縛做伙，chiah kā伊ê手腕mā縛ân-ân。然後，不管瑞文beh á m̄，就用鐮le̍k-á ê刀尖，kā hō͘ 蛇咬tio̍h ê所在做十字形切開。瑞文痛kah haiⁿ-haiⁿ叫，kah-ná魚á teh滾liòng。陳陣tùi孔嘴kā有蛇毒ê血擠出來，án-ne iáu無夠額，koh用嘴大力suh，了後kā血phùi出來。 行出甘蔗園，日頭已經完全落山。瑞文用無tio̍h傷hit支手掛tiàm陳陣ê肩胛頭，拖腳步teh行。伊ê倒手腕已經失去感覺à；kah-ná真正失去hit支手ê感覺。過一時á，孔嘴流血滴落去土腳，瑞文mā無注意tio̍h。劇烈ê心情戰鬥hō͘ 伊kui個人倦tauh-tauh，kui身軀mā無力去。伊ê胃hia soah變冷，想beh吐koh頭殼眩（hîn）。
「阿陣，我會死bē？」
「Bē死lah！」
「我想beh逃走，實在有夠戇，kiám-chhái已經耽誤醫治ê時間？」
「你是驚我是m̄是？」
「已經bē驚à。阿陣，你知影有hō͘ 蛇咬死ê人無？」
「Ngh，m̄-koh，你bē死lah！」
「Án怎講leh？我無想beh死，我iáu少年。」
「你bē死lah！」
阿陣堅決一再án-ne講。因為她一屑á都無不安ê聲，hō͘ 瑞文感覺一股超越安慰ê神秘力量。瑞文心內一直想beh問她：「Ná會知影我bē死？」M̄-koh，伊講bē出嘴。瑞文chit-má只好kā家己全部lóng交託hō͘ chit-ê cha-bó͘ gín-á，就ná親像khîⁿ-tiâu大地ê大樹，ân-ân掠tiâu她ê肩胛頭。
