《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 第十章（更新版）
作者 庄司總一 著 楊東傑 指導 林俊育 台譯 2017.05.21
安子生落來ê嬰á是cha-bó͘ gín-á。清文旅行中有寫phoe tńg來講，若是cha-po͘ ê，就kā伊號名「清長」。因為嬰á是cha-bó͘ ê，安子就kā她號名「清子」。嬰á遺傳tio̍h老父ê體格，是一個將近3.6公斤ê大漢嬰á。
過了年ê早春，去海外旅行足足一年ê陳清文tńg來ê時，嬰á已經出世一百工以上，大到會tín動肥chut-chut ê腳手，顯出幼氣ê笑容kah-ná teh歡迎老父。清文並無因為生cha-bó͘-kiáⁿ來失望，阮雖然無啥想beh生chē kiáⁿ，m̄-koh，今後若koh生幾個á ê中間，mā有可能會生tio̍h cha-po͘ ê，而且清文已經無像以前hiah-ni̍h熱切teh ǹg望生cha-po͘-kiáⁿ。雖然cha-po͘- kiáⁿ ê光榮kah價值應該khǹg tī siōng高位，m̄-koh，chit-má身為cha-po͘人ê清文已經無koh kā家己理想化。伊出國旅遊第一個收獲(或者應該講是損失)，就是無koh kā所有ê tāi-chì理想化。伊改用實際kah嚴峻ê看法來思考，這是伊成熟ê結果，m̄-koh另外一方面來講，這是標示伊已經喪失夢想ê溫柔美麗ê青春。M̄-koh，安子並無注意tio̍h清文chit種內心ê變化。久長望伊早歸ê丈夫chit-má已經tńg來à，面肉kah-ná有小khóa消瘦，看會出是因為旅途ê厭倦，m̄-koh，心情活潑，精神開朗。稀奇ê國外見聞，外國式ê愛撫，甜蜜ê慇勤，á是伊ê髮型，西洋式ê穿插，領帶ê配色等等，hō͘ 人感覺伊真phāⁿ，安子mā真自然to̍h沉迷tī新奇ê愛情中。安子看會出丈夫ê改變ê只有一項，就是清文會食薰ê tāi-chì。「出外真chē時間無聊，就án-ne 開始食薰，soah變成習慣，chit-má tio̍h趕緊來改薰。」清文án-ne辯解。因為基督教無規定教徒to̍h絕對bē-sái lim酒、食薰，koh安子mā無拘束tī chit種古板ê想法，所以她無想beh特別kā伊問罪。M̄-koh，過去伊lóng無食過薰草，而且伊家己對hit種事是堅定ê禁慾主義者(譯註：Stoicism，希臘哲學家Zeno tī紀元前308年倡導ê學說)，chit-má看tio̍h伊用薰kā肺臟污染，koh tùi鼻孔吐出來，安子感覺真意外。M̄-nā án-ne，天氣漸漸炎熱起來，清文常常ài lim冰麥á酒；暗頓tio̍h chhoân一罐，hip熱ê暗時，伊mā會peh起lih樓台頂，家己一人tī hia lim。Chit種新ê趣味，若hō͘ 伊海外旅行tńg來，ē-tàng脫離本來偏激固執ê傾向，成做一個開通明朗ê人，án-ne mā是bē bái；m̄-koh，伊hō͘ 人感覺伊精神上嚴格認真kah激烈ê氣魄soah變khah薄弱。安子感覺清文確實有改變，m̄-koh，到底本質上有啥物改變，她暫時iáu無法度了解。
Hit中間，tú tńg來所造成ê新感情，無gōa久就退潮，又koh回復平常ê夫婦生活。為tio̍h無ài破壞丈夫歡喜ê心情，安子一直無講起丈夫出國中間所發生ê tāi-chì。總是，她想講chit-má ē-sái對伊講à。M̄-koh，丈夫對她jú溫柔體貼，瑞文對她所講ê tāi-chì 她jú講bē出嘴。本來想講今á日beh kā伊講明，結局mā是koh kiu去。俗語講「人ê謠言只有七十五工」；七十五工後，厝裡眾人對hit件事ê風評，就會消失去。若無，可能已經傳入清文ê耳孔ā。其它ê tāi-chì，親像景文娶細姨kah老父阿山ê食阿片等等，清文tńg來以後，早to̍h知ā。清文並無像安子所想ê hiah-ni̍h驚kah gāng去，á是受氣。對景文ê tāi-chì，伊kan-taⁿ冷笑，講伊是戇大獃以外，並無特別表示激烈ê道義感。伊有重視老父阿山ê tāi-chì，bat一兩pái發表意見，m̄-koh，hō͘ 人感覺伊無像以前有hiah-ni̍h真情直接ê表現。這證明伊ê處世已經有khah平和，心胸有khah寬闊。若是án-ne，安子想，kám是ta̍k項tāi-chì lóng ē-sái直講，無需要掩蓋啥物秘密？
安子下決心想beh講出hiah-ê tāi-chì ê時chūn，夫婦兩人tī暗頓ê桌頂有小khóa意見bē合(ha̍h)。
「安子，ná會無the̍h麥á酒來？」
食飯chìn前，清文án-ne teh問。這雖然是第一pái發生ê tāi-chì，m̄-koh清文ê口氣kah-ná講暗時lim酒是當然ê，hit時安子對án-ne ê講法感覺真意外，所以顯露出討厭ê面chhiuⁿ。
「無ā lah！M̄-koh若beh，差人去the̍h好無？」
「若無，免lah！」清文at-sa-lih án-ne講，m̄-koh，口氣無講真好，因為伊看出in bó͘有無奈ê面色。
「你kah-ná真ài lim，是koh想起tī外國tó位ê酒味？」
「Tī外國這叫做 “a-pé-li-ti-huh” (譯註：法文ê “apéritif”，餐前酒)。In習慣tī食飯前lim一杯酒來促進食慾，不管是tī大飯店、餐廳，á是家庭，lóng會chhoân酒。我tī英國有lim過khǹg kui百年ê ui-su-kí (譯註：Whisky，華語譯做「威士忌」)，tī德國lim麥á酒，koh有tī法國lim白葡萄酒，hiah-ê滋味hō͘ 人bē bē記得lah。」清文絕對m̄是對酒有深入ê研究，伊是thiau故意膨風來惹in bó͘厭煩。「Lim酒無一定是罪惡，只要對神ê殿堂，就是身體無傷害ê程度，kám m̄是無要緊leh？日本內地一般ê基督教徒受tio̍h形式ê拘束，欠缺精神性ê內容，hiah-ê嘴講m̄-thang做啥物ê人，究竟有做出啥物積極性 ê堂堂正事leh？」
「看起來你有真大ê改變；以前你mā是像你講ê嚴格顧守原則ê人，kám m̄是？」
「我ê改變，你內心teh煩惱是無？」
「無lah！你若對新ê想法kah行為有信念，我lóng無話講。M̄-koh，講『以後無koh做』，he to̍h有責備ê口氣，kám m̄是？顛倒堂堂去做，我就khah安心。」
「堂堂oh？Βē-sái koh kah以前仝款ta̍k項lóng tio̍h堂堂lah。Chit點我有變kah謙遜。Tī成做基督徒chìn前，我有想beh做一個堂堂有路用ê人，kā家己ê罪kah弱點隨時排列tī神ê面前。He到底是謙卑ê精神，ā是卑鄙傲慢ê心肝？我想人tio̍h先有全心忍受苦痛ê意志。Beh kā家己ê罪惡kah過失chhōe出解決方法。我心內是m̄是有比lim酒食薰koh khah大ê惡毒？人類lóng teh phāiⁿ原罪，beh án怎做一個堂堂正正ê人neh？He chiah是會hō͘ 石頭tìm死。總是，安子，你充滿信念，看起來是一個正正當當ê人。」
清文ná親像無ài kā心內所想ê講出來，甚至用微笑來假做無事，án-ne反tńg ná蛇無聲無說漸漸縛tiâu安子ê胸坎。翁婿teh想啥物，teh kā她暗示啥物，她已經明白à。
「你teh受氣是無？」
「我並無受氣。」
「阿英，你去酒店吩咐送麥á酒來。」
「免lah，免lah！講hiah chē酒ê tāi-chì，我腹肚已經飽à，免去買à lah！」
清文拒絕in bó͘叫cha-bó͘-kán-á去買麥á酒，mā無顯出特別無歡喜ê表情，就開始食無“a-pé-li-ti-huh” ê暗頓。食飯中無適合講瑞文ê tāi-chì，安子想講食飽後chiah ûn-ûn-á來講。
總是，tú食beh飽ê時有人客來。自從清文回國以後，人客出入有真明顯ê增加。伊真無閒；擔任教職以外，koh加入hit當時真chhiaⁿ-iāⁿ ê文化協會ê一個文化團體，kah hiah-ê有關ê人來往頻繁，koh tio̍h為機關雜誌寫稿，mā tio̍h出去演講。另外，iáu koh有真chē學生對伊慕名而來，最近甚至成立一個用伊做指導者ê研究會。
安子對chit種情形並無歡喜；清文以前對社會問題to̍h有teh關心，m̄-koh，chit-má是實際全心teh參與。
無論這是啥物性質，chit種台灣人ê心情動態kah實際運動並無受日本當局歡迎；tī社會議論kah新聞報導，lóng是真明顯。安子有感覺不安ê心情，問清文講：「你kám變成社會主義者？」 這是kah-ná gín-á ê單純質問，清文面露笑容，簡單回答講：「我m̄知是m̄是社會主義，m̄-koh一屑á危險都無。這kan-taⁿ是我ê精神tùi屈tī個人狹狹ê框á內，踏出去社會niā-niā，bē造成你ê困擾，做你放心。」
這是伊內心ê轉向；當初tú回國ê時，安子無注意tio̍h伊本質ê改變，chit-má chiah知影清楚。安子無法度對chit種tāi-chì判斷是非，因為她kan-taⁿ生活tī神kah正義ê小kho͘-á內，而且清文無想beh kā她tùi hit-ê kho͘-á內強giú出來；安子若問伊，伊mā bē講真chē。安子感覺in kah普通夫婦ê感情有無仝款，ná像去hō͘ 伊放拺，心內感覺失落，to̍h寂寞起來。這kah以前講tio̍h人生、靈魂kah神ê時，lóng講kah詳細koh熱phut-phut，kah-ná beh kā她giú koân起來hit款熱情，比較起來，實在是天差地。
Hit暗，清文所教ê神學校kah師範學校ê學生幾人，tī二樓ê冊房聚集。不管啥物國家，啥物世代，少年人to̍h是少年人，in談論熱烈，大聲傳到外面來。安子beh phâng茶入去ê時，tiāⁿ-tiāⁿ有感覺beh踏入無適合ê場所ê躊躇。熱心激動ê學生ê面kah-ná熱氣充滿房間，hō͘ 安子有小khóa驚惶。尤其是她一入門，in就停止談論，á是放低聲音，hit種被壓縮ê片刻安靜，soah hō͘ 安子感覺她tio̍h禁氣起來。其實in肅靜落來，並無其它啥物意思，kan-taⁿ是對陳老師ê夫人表示禮儀kah客氣；á是因為恬靜美麗ê夫人入來亂七八糟ê室內，ná親像一蕊花飄入來，hō͘ hiah-ê學生小khóa驚kah gāng去而已。
M̄-koh，究竟是啥物話題hō͘ hiah-ê少年人hiah-nih熱心teh討論？清文教導in啥物？啥物熱風吹入去in ê胸坎？In本底是用台灣話講，m̄-koh，安子一入去，in就改用日本話。這可能是對日本人ê陳夫人ê禮儀，m̄-koh，tùi另外一方面來講，改用日語，話題kám bē脫離議論ê中心？Kám bē hō͘ 重要ê議題沖淡去？安子sa無研究會真實ê性質。M̄-koh，幾日前tú-tio̍h神學校MacNell校長ê時，她趁機會kā伊問chit-ê問題。校長溫柔kā她講：「陳先生kā John Ruskin(譯註：1819~1900，英國美術批評家、思想家)ê “Unto this Last” (《到最後一個》)做教材teh教學生。Ruskin是一個基督徒，伊ê學術堂堂正正，絕對bē有危險。Lín陳先生mā仝款，絕對bē有危險，請你安心。」
經過MacNell先生ê蓋印保證，安子有安心落來。M̄-koh，昨暗ê聚會，她看tio̍h in翁清文本身比少年學生khah興奮，這m̄是常有ê tāi-chì，安子soah起tio̍h驚。聚會中途phâng水果入去，清文連kā她看一下都無，一手the̍h冊(有可能是Ruskin ê冊)，phah另外一手，用熱火一樣ê聲調對學生teh講話，而且伊kah平時教冊á是論述ê時無仝款，目神帶有忿怒，面色青sún-sún。學生mā m̄是真感心teh聽，ē-sái講是受tio̍h激烈譴責，面相變tēng，lóng恬恬無聲。
無gōa久學生tńg去，安子行入去冊房。
「Tú-chiah lín是teh講啥物話題？Kah-ná非常興奮ê款式。」
「Ngh….。」
清文ê面色沉重，雙手交叉tī胸前。安子雖然想講chit時恬恬khah好，m̄-koh mā是感覺無講bē-sái得。
「我有話想beh對你講。」
「M̄免講lah，你免煩惱，我已經想beh kā研究會停止；hiah-ê學生ê意識形態kah我ê有無相容ê所在。我想講in siōng信賴我，siōng尊敬我，我án-ne teh自我驕傲，m̄-koh，其實in內心對我有小khóa不滿。甚至有人敢批判我講：『老師，你無勇氣lah。』因為這，eng暗chiah會惹我受氣；尤其我受氣ê是in刺激tio̍h我痛苦ê所在。我對in講：『原來lín ê思想可能正確，m̄-koh tī人生，正義m̄是全部。Lín若到我ê年齡，有bó͘-kiáⁿ，過社會人ê生活，iáu-koh ē-tàng堂堂講出chit-má ê理想，我就可能會承認lín。』我án-ne kā in訓示，感覺我已經輸in。我án-ne受氣，無辦法lah！總講一句，我無勇氣lah！」
清文án-ne艱苦心teh自我譴責，完全kah安子想beh對伊講ê tāi-chì無對頭，安子m̄知beh án怎講chiah好。 「Ai-ah！M̄是án-ne lah！我想beh講ê是我kah瑞文ê tāi-chì。」 安子án-ne決心beh kā它講出來。清文kah-ná tú夢醒，看in bó͘一目，就隨時看對別位去。
「你kám講到taⁿ lóng m̄-bat聽講hit-ê謠言？」
「聽過à。」
「若án-ne，ná會到taⁿ你lóng恬恬無對我講半句？」
「我希望你家己講出來。」清文回答講。伊話中帶毒氣ê責備，koh oa̍t頭無beh看她，hit種kah-ná安子是gōa-ni̍h-á亂來koh不貞ê態度，hō͘ 安子一時soah無話講。清文koh用仝款ê口氣講：「為啥物你躊躇到taⁿ chiah beh講明？」
「因為我想講你tú tńg來，無想beh hō͘ 你為tio̍h chit項無聊ê tāi-chì來無歡喜。」
「無比隱瞞會hō͘ 對方koh khah無歡喜，你kám無考慮過？」
「失禮lah！」
安子承受重大ê壓力，頭beh àⁿ落，m̄-koh，想講chit時若表現自卑，會增加對方ê憢疑，就決心堅强來求對方ê信任。
「M̄-koh，你kám bē相信我？」
「當然相信。你若會生出一個m̄知啥人ê gín-á，chit-ê世界就無啥物thang hō͘ 我相信。總是，會hō͘ 人有機會製造chit款不當ê謠言，這m̄是會hō͘ 人佩服tit。」
「Ai-ah！我聽tio̍h hit款ak-chakê話to̍h會起雞母皮ā，何況是你，你聽tio̍h mā會真討厭，kám m̄是？所以我一直講bē出嘴，你kám bē了解我ê chit種心情？」
不管in bó͘ án-ne一直想beh解說，清文卻kah-ná teh戲弄她，嘴角露出無心ê微笑，恬恬m̄講話。
「你tú-chiah因為麥á酒ê tāi-chì；這可能是我ê感覺；講一kóa hō͘ 人bē爽快ê話。M̄-koh，我會記得我無做過啥物會hō͘ 你責備ê tāi-chì。你無tī厝ê中間，我用啥物心情，啥物態度teh過日子，你kám知？」 安子想beh講日記ê tāi-chì，m̄-koh，忽然想講án-ne會危險，就無講。雖然丈夫有講過「我相信」，m̄-koh，若準講he是伊kan-taⁿ嘴講講leh niā-niā，其實心頭iáu有一片疑雲，結局會án怎？若是án-ne，以前想講beh hō͘ 伊看日記kah-ná khah會有好結果。 事實上，清文並無完全tháu放心情。後來，根據伊有大大責備瑞文小弟，koh kā伊phah倒ê事實，安子chiah知影丈夫對chit件事有料想bē到ê致意。
Tāi-chì雖然是án-ne，chit種瓜葛ê柴屑á也tòe時間流失去。Tòe-tio̍h日子teh過，對gín-á ê疼hō͘ 夫婦之間koh完滿起來。
秋天來到，嬰á清子kah-ná木瓜teh成長，健康koh豐滿teh發育。清文ài嬰á身軀ê芳（phang）味；比木瓜，mā比檨á koh khah好ê芳味。她ê嘴phóe kah頷頸kah-ná軟滑ê麻糬，清文ná親像狗á teh鼻hit-ê氣味。後來嬰á ê奶hiàn漸漸消失，染tio̍h老母皮膚kah衫褲ê氣味mā無去，koh再無gōa久to̍h是度chè à。Chit時，清子kah-ná熊á-kiáⁿ開始學行路，mā講起人聽m̄知ê話。她ê體格像老父koân大，智慧ê發展mā khah早。M̄-koh，她ê鼻孔khah大，嘴唇khah厚，有一點á cha-po͘ 面；若beh成做美人，to̍h ài像老母khah好。不過，ná親像粉鳥á hiah-ni̍h圓liàn-liàn ê目chiu仁，ē-tàng料想是有聰明伶俐ê素質。清文tiāⁿ-tiāⁿ誇口講：「Chit-ê gín-á一定會真聰明。」
清子第一pái ê生日有招待親chiâⁿ朋友，舉行盛大ê慶祝宴會。眾人送嬰á筆、墨、算盤、秤(chìn)á等等十二種ê禮物。安子hō͘ 嬰á穿桃色ê台灣衫，掛銀手環、玉á ê耳鉤，裝飾kah真súi，然後照慣例chhōa到廳堂去拜公媽。禮儀一結束就kā眾人贈送ê十二項禮物khǹg入去篩(thai) á內，hō͘ 嬰á去sa一項物件。
「清子ah，好好á想一下，tio̍h選siōng好ê物件oh。」Kah-ná beh kā已經聽bat ê gín-á叫她 tio̍h注意ê講法，安子家己都感覺好笑。嬰á若選算盤á是秤á，大漢會做seng-lí人；若選肉，就會食真chē肉hō͘ 身體健康，用án-ne來祝福嬰á ê將來。安子並無相信chiah-ê吉兆，若beh成做seng-lí人á是大食漢，不如預選一個高尚ê未來。 老母kā清子抱óa去桌頂ê篩á邊，m̄知半項ê嬰á伸手beh去sa物件。她想beh sa小型ê算盤kah布包，koh想beh sa雞腿，無liú-lia̍h ê細支手開一下合一下。每pái老母lóng kā嬰á抱khah後壁，hō͘ 她ê手sa bē-tio̍h物件。無一時á，嬰á ê手伸到一支小紙卷，tú sa-tio̍h ê時，安子隨時退身離開桌á。
「Sa-tio̍h啥物物件？」
罕得出房間ê阿公阿山tú好tī hia，就問。安子tùi嬰á ê手中kā紙卷the̍h來hō͘ 阿山。阿山phah開來看，kah-ná真感心hmh-hmh細聲講。紙頂寫「無名天地之始，有名萬物之母」。
「看ah，這是老子講ê話。Chiâⁿ有意思，chit-ê gín-á大漢會成做文學家oh！」
阿山kā安子講，在場ê眾親chiâⁿ mā用台灣話傳講仝款ê話。安子想講清文若tī-.leh一定會真歡喜，可惜伊tio̍h去學校出勤，無tī-.leh。阿山tùi新婦ê手kā嬰á抱起來。「Ngh，真kó͘-chui。」伊細聲講，koh詳細掠嬰á金金看。M̄-koh，伊bē堪得嬰á ê重量，一時á就kā嬰á抱還安子。無看tio̍h阿山chiah無gōa久，伊ê面、手骨lóng老去loh。以前肥chut-chut ê肢體已經消瘦落肉，原來闊lòng-lòng ê支那式禮服chit-má koh khah是明顯siuⁿ闊。伊ê面色kah-ná病人，白色ê山羊鬚mā薄koh無金滑，目chiu濁濁，嘴齒mā lî-lî-lak-lak。阿片chit種魔藥hō͘ 伊變成án-ne，甚至連七、八公斤ê嬰á重都抱無法。安子看tio̍h chit種衰弱老人ê姿態，心內同情也感傷；無chhái本來是歡喜榮耀ê度chè，soah忽然hō͘ 烏雲罩暗來。
「你真gâu假孔neh！」
安子hō͘ 人tùi後壁輕輕phah肩胛頭koh細聲對她講話，她oa̍t頭看，原來是景文ê大bó͘ 玉簾。她是指安子無hō͘ 紅嬰á隨便選擇ê做法，安子ê方法確實有khah狡怪，m̄-koh，對她來講，he只不過是無啥意義ê迷信，她只是beh hō͘ 家己滿意niā-niā。玉簾責備安子ê無妥當做法，是m̄是想beh tùi做度chè祝賀chit件事挑毛病leh？M̄-koh不可思議ê是，她ê目chiu lóng無pháiⁿ心肝ê眼色，她kan-taⁿ想beh製造kah安子講話ê機會。
「Chit款tāi-chì假孔mā無要緊lah。」
玉簾笑笑á改口講，而且為tio̍h beh hō͘ 阿嫂了解她並無意思beh破害阿嫂ê心情，所以koh khah用笑面kah滾笑ê口氣講話。
「我生第二個gín-á度chè ê時，伊無sa文字hit款好吉兆ê物，一伸手to̍h sa-tio̍h雞腿，khǹg入去嘴裡食。想講án-ne伊m̄知會gōa-ni̍h健康來生長，結果過一個月to̍h死去，koh是因為pháiⁿ腹肚ê關係。」無人笑，因為tī祖先牌á kah佛像頭前講chit款笑話，是不敬ê tāi-chì。M̄-koh，玉簾繼續講出koh khah褻瀆(siat-to̍k) ê話。「所有lóng是假ê，佛祖、神明mā lóng是假ê。雖然講是『慘ah，無佛thang拜』，自開始to̍h無有佛à！」
「玉簾，你講啥物痟話？！你chit-ê人ā無考慮場合。」連家長阿山都目頭結結kā她責備。
「M̄-koh是事實ā，無辦法lah！」
玉簾用無正經 ê口氣對ta-koaⁿ講：
「我想我比hit-ê ná牛ê戇面cha-bó͘ khah súi，m̄-koh，景文卻kan-taⁿ照顧她，無beh chhap我。這到底是啥物意思？我m̄知。」
「我mā m̄知，無人知lah！」
「我真m̄甘願，連阿爹都án-ne講，食阿片了後soah變糊塗。前幾pái去chhōe伊參詳，伊kā我趕出來。講kah阿母，她綿綿疼景文，lóng為伊。」
「你chit-ê戇大獃，丈夫娶細姨to̍h嚷bē-soah，我m̄-bat看過chit款ê cha-bó͘人。總講一句，是景文凍霜m̄好。Ná準伊娶三四個細姨，你chiah看會開，bē koh加講話lah！」
阿山講了，就慢慢á tńg身，拖tio̍h雙腳無力ê腳步行出去室外。佳哉ta-ke阿嬌因為感冒無來tàu一腳，若在場，就有可能會開始相罵。玉簾m̄甘願，teh看ài相諍（chèⁿ）ê老父ê背後，感覺真無奈。M̄-koh，她隨koh oa̍t tńg身對安子講：
「安子姊，你真giám硬，為啥物你有法度頭到尾安心自在neh？」
「無no͘h，我mā有一般人ê辛苦kah煩惱。」
「M̄-koh，你一點á都無表現出來；我m̄-bat看過你受氣、啼哭，á是像我án-ne kah人冤家、chho̍p-chho̍p念。這是啥物原因？Kám是信上帝ê關係？」
「O͘h，是lah！」
「基督教ê神kám有影hiah-ni̍h好？Án-ne我mā beh來信看māi leh。最近m̄知啥物原因，我感覺世間真無意義，ta̍k項lóng無趣味，甚至連受氣、啼哭mā懶懶。Ah！安子姊，看tang時chhōa我去教會kám好？」
「好，無問題。我真了解你ê心情，另工來我hia chhit-thô，互相來談談leh。」
安子án-ne回答。因為玉簾ê改變真大，是安子內心m̄敢相信ê意外，所以hō͘ 她相當tio̍h驚。安子m̄-bat看過玉簾hit款消沉可憐ê面色。以前有ná孔雀hiah-ni̍h傲慢作風ê玉簾，而且kā安子當做眼中釘teh欺負她ê人，chit-má顛倒ná親像孤鳥飛來她ê懷中，chit種情形實在是真奇妙。
Chit-ê hō͘ 玉簾敗北、看破，叫做「阿龍」ê細姨，到底是gōa khiàng腳ê cha-bó͘人？玉簾m̄是容易屈服ê女子，安子想講她若ē-tàng屈落來求神拯救，是真好ê tāi-chì。安子感覺玉簾真可憐。
安子想講看beh用啥物話來kā玉簾安慰，m̄-koh，因為tī gín-á度chè ê時刻，她驚氣氛會hō͘ 人phah-pháiⁿ去，安子無加講話，就離開廳堂，行tńg去家己tòa ê所在；後面有聽tio̍h玉簾縛腳輕輕á行tī磚á路ê頂面，發出小小寂寞ê聲。
Gín-á度chè慶祝生日了後無gōa久，安子得tio̍h寒熱病，一chūn一chūn ê交陰寒(ka-iam-kôaⁿ) hō͘ 她寒kah嘴齒ka̍p-ka̍p叫，身軀mā kah-ná地動tiô起來，續落來koh有ná火teh燒ê高熱。安子親像tī寒帶kah熱帶之間來回。Ná像是惡性ê寒熱病，真無容易回復，安子足足一個月久倒tī眠床頂。
安子有當beh回復ê有一工，瑞文帶一盒chhio-kho-liat-toh糖á來探訪。阿兄回國了後，伊感覺户tēng koh khah koân，真無自在，坐無十分鐘to̍h beh告辭。
「Ai-ah！koh加講kóa話lah！你準備考大學ê情形如何？準備了bē bái ho͘ⁿh？」
安子kā伊挽留。伊有想beh問，mā有想beh講ê話，mā ē-tàng安慰眠床頂ê無聊，所以她叫伊koh小留一下。
「M̄-koh，若hō͘ 阿兄看tio̍h，會hō͘ 伊罵。Koh….。」
「Koh有啥？為tio̍h hit件tāi-chì，阮翁真嚴重kā你責備ho͘ⁿh？」
「Hō͘ 伊大修理，koh siàn嘴phóe。雖然kan-taⁿ siàn一下，m̄-koh非常痛。」
「Án-ne，he是tang時？」
眠床頂ê安子看tio̍h瑞文平滑蒼白ê面，想起瑞文對她做出失禮行為hit當時，家己mā是siàn伊ê嘴phóe。總是，he安子khah無teh在意；她感覺丈夫清文phah瑞文是siuⁿ過頭暴力。
「Ai-ah！你hō͘ 阮夫婦兩人phah，he是因果。」
「自作孽lah，m̄-koh，阿兄mā是嫉妒心真強ê人。頂pái我挽柚á hō͘ tī樹á邊ê你ê tāi-chì，我無掩蓋對伊講，結果阿兄無接納我ê解說，想講我kah你有khah深ê關係，所以大大kā我責備。看伊hiah拗蠻受氣，我mā soah起反抗講：『你若hiah-ni̍h無信任阿嫂，ná會無chhōa她出國？』講soah，伊ê拳頭母隨cheng來。阿兄對chit-ê無聊ê謠言掠做是真實ê款。」
「Mā m̄是án-ne，可能只是khi-mo͘-chih (心情) bē爽lah！」
「聽tio̍h講我hō͘ 你生kiáⁿ ê無聊閑á話，我真正是驚kah gāng去，koh m̄知beh án怎。He是玉簾傳出Chit件tāi-chì ê。」
「Kám是玉簾？」
「因為細姨入門，她家己變kah完全無趣味，使khioh-ka̍k（華語ê「自暴自棄」），soah造謠惡意宣傳。我有現場聽tio̍h玉簾對人講hit-ê tāi-chì。」
玉簾真有可能做hit種tāi-chì。M̄-koh，清子ê生日hit工，她tī廳堂對家己所表示ê安慰kah求帮助ê低姿勢態度，若kā in合óa想起來，安子無相信玉簾有hiah-ni̍h邪惡。當然人無可能改變hiah緊，mā有可能這是她一時chhìn-chhái講講leh mā無一定，m̄-koh，安子寧可希望he是她ê煩惱痛苦所生出ê真實。
安子teh想hit件事，恬恬ê時，瑞文就繼續講落去。
「M̄-koh mā真奇怪，玉簾最近來我ê所在借聖經kah讚美歌。我感覺非常好笑，hit-ê cha-bó͘人mā會入信仰？她比我khah無ǹg望，而且她ê無定性mā siuⁿ過頭。」
安子想beh kā伊khau洗，m̄-koh，她khah趣味有關玉簾ê tāi-chì。瑞文繼續講：
「玉簾非常恨景文ê細姨，對hit-ê叫做阿龍ê真殘酷刻薄。Chit幾工；阿嫂這請你保守秘密；她計畫想beh thâi阿龍。玉簾實在是恐怖ê cha-bó͘人；她tī饅頭下毒藥beh hō͘ 阿龍食，m̄-koh又koh起驚惶，tī阿龍伸手去the̍h ê瞬間，聽講玉簾koh kā饅頭搶來，tàn出去窗á外。為啥物會知影饅頭有毒leh？因為食tio̍h hit粒饅頭ê狗á；男僕人飼ê hit隻lah-sap老狗；soah死去。」
「這kah咱兩人ê謠言仝款，kám m̄是siuⁿ過膨風ê假風聲leh？」
「Ai-ah！有可能。狗á mā有可能是食tio̍h人街裡teh thāu狗ê毒藥，á是自然老死mā有可能ā。M̄-koh，一般來講，人bē製造chiah-ni̍h恐怖ê謠言chiah tio̍h。另外一方面，阿龍kah-ná是一個怪人，無論hō͘ 人án怎pháiⁿ嘴罵，án怎殘酷對待，她lóng無反應，ná親像啞口ê恬恬，bē哭mā bē受氣。若kā玉簾譬喻做狗á，無論她án怎kā她阿龍吠，阿龍lóng假做m̄知，kah-ná是一隻遲鈍ê牛。另外一方面，丈夫景文對玉簾ê惡毒作為lóng無責備、無受氣，kan-taⁿ恬恬teh看。玉簾對in chit種無抵抗主義完全無對應ê辦法。」
「M̄-koh，景文到底saⁿh-tio̍h阿龍ê tó一點neh？」
「大家lóng感覺真不可思議。大概阿龍是kah奢華愛化妝ê大bó͘ 倒反ê cha-bó͘，恬恬á做khang-khòe koh凍霜，hō͘ 景文感覺bē bái，koh她ê面mā無súi。」
「Kám是án-ne？」
「如果對方有玉簾ê容貌，koh kah她仝款奢華，玉簾mā bē輸。總講一句，人ê條件無仝hō͘ 玉簾無法度接受chit件事實，無辦法lah！」 「玉簾是一個美人，對家己真有自信，忽然tú-tio̍h打擊，koh khah m̄甘願。總是，她ê心情也會漸漸改變chiah tio̍h；她叫我tio̍h chhōa她去教會。」
「若講她會成做基督徒，不如講她會起siáu，這我敢kah你相輸。」
「無lah！她hit種倔強ê人，mā會hō͘ 人意外忽然看tio̍h她完全改變。Chit點比你瑞文khah….。你chit-má ，kám m̄是lóng無去教會？」
Hō͘ 安子án-ne一講，瑞文感覺真pháiⁿ勢。伊無資格án-ne評論人，她去教會講是好奇，不如講是表面假好；伊去敬拜上主，不如講是為tio̍h beh看伊所戀慕ê安子ê面。雖然伊知影chit種虛偽做法已經hō͘ 安子看破，m̄-koh，瑞文iáu是beh小khóa辯解來留一kóa體面。
「宗教ê教義真困難了解，我koh teh無閒考試ê準備。」
「明年三月beh去東京，有beh chhōa春鸞kah gín-á去無？」安子明知瑞文無beh chhōa bó͘-kiáⁿ去，thiau故意án-ne問。果然瑞文用無歡喜ê面色回答講：
「Ai-ah！Βeh án怎chiah好？若chhōa bó͘-kiáⁿ去留學，生活費是不得了。」
「無hit-ê tāi-chì。橫直bó͘-kiáⁿ留tī厝裡mā是仝款ài開銷，kám m̄是？春鸞mā真ài去東京，有一工見面ê時，她叫我tio̍h勸你ài án-ne。她對你ê改變心意，想beh過新生活ê想法感覺真歡喜，mā hō͘ 我真感動。Hiah-ni̍h溫柔貞淑ê bó͘，你若無beh kā她愛惜，是罪過neh。」 安子chit種說教比教會ê講道khah無聊，而且koh khah困難瞭解。
「叫討厭nîn-jín (紅菜頭) ê gín-á食nîn-jín是真困難ê tāi-chì。」
「Mài有chit種觀念。講真ê，你一定tio̍h chhōa春鸞去東京。生活kah環境若改變，你ê心情mā一定會改變。」
若是別人án-ne勸伊，伊ē-sái免chhap伊；taⁿ勸伊ê人是安子，伊to̍h bē-tàng án-ne做。瑞文顯出難堪koh鬱卒ê面色，就án-ne恬恬無講話。安子mā有發覺瑞文ê心情，就無想beh koh kā伊說教。
「大學beh讀啥物科？」
「想beh讀農科。」
安子小khóa微笑，若m̄是破病，可能會笑出聲。Chit-ê面色蒼白，身體軟弱koh純潔ê少爺，hō͘ 人無法度kā伊kah土味ê農業聯想做伙。
「為啥物beh選農科？」
「Ai-ah！無啥物特別理由。我若有清文兄ê好頭腦，就ē-tàng選法科； 若像景文hiah ài thàn錢，mā ē-sái讀商科。M̄-koh，我實在。」
瑞文jiàu頭殼to̍h是teh講伊家己頭腦無好。然後，伊忽然想tio̍h啥物tāi-chì，講：
「Tio̍h lah，tio̍h lah！我明á載想beh去庄腳，來去看分hō͘ 我ê土地。」
「Kám真遠？」
「無遠，坐火車tùi台南出發ê第二站落車，m̄-koh túi hia káⁿ tio̍h koh行一段路。我lóng m̄-bat去過庄腳。家己ê土地tī tó位？生做啥物款？完全m̄知mā是bē-sái-tit。」
「Tú-tio̍h à，去就好lah！對健康mā好。你tòa tī chiah-ni̍h深落ê厝宅，閒閒無tāi-chì，自然會想無聊ê事，心情mā bē開朗。阮tī寒帶地方大漢ê人，真ài厝外ê大自然kah日頭。我出世ê所在是日本海沿岸ê特種氣候，kui個冬季lóng看bē-tio̍h日頭，每工所看tio̍h ê lóng是灰色鬱卒ê天空，koh有非常大ê風雪。所以到春天ê時，hit-ê歡喜是真特別；温和ê日頭teh微笑，人、動物、草木mā tòe-teh歡喜tiô跳。日頭kā全地一切生物ê暗淡kah濕氣lóng吸收去。Tòa tī chia ê人因為習慣日頭ê恩惠，soah討厭日頭，koh想beh逃避它。Tī chia，熱m̄-nā是真熱，而且四季變化koh無分明，莫怪人會討厭日頭。M̄-koh，去闊bóng-bóng ê原野，充分曝日看māi leh，心情一定會好起來。你ê面若hō͘ 日頭曝烏，你ê心mā會燒kah變玫瑰紅。」
安子細聲ûn-ûn-á講，她ê話句句充滿熱情kah真實，這hō͘ 她ê語調帶有詩ê韻味。這是因為安子家己tú當teh回復，她伸開欣慕ê手，tùi病床beh行向健康ê情景。瑞文深深感動，靜靜teh聽，忽然khiā起來，講：
「我有了解，án-ne to̍h請保重」
總是，伊khiā tiàm hia iáu無beh離開，四界巡視一下，躊躇講：
「阿嫂，我kám ē-sái kah你握手？Tī咱beh離別ê chit時」
「Ai-ah！講kah ná beh永遠離別hiah嚴重。」
「若ē-tàng，我想beh握手。」
「咱是仝家族，友誼mā真好。過去to̍h過去à，無必要永遠記tiâu-.leh。阮翁mā bē koh án怎想ā，所以....。」
瑞文恬恬無回答，kā手ǹg眠床ê方向伸去。安子gāng一下，m̄知beh án怎chiah好？手tùi被ê下腳伸出來。她ê手腕瘦kah ná蠟燭條hiah細支，bái指(cháiⁿ) 掛一kha手指。He是丈夫tùi國外買tńg來ê值得驕傲ê禮物，是kah-ná川蟬ê羽毛深綠色閃閃發光ê翡翠玉。大概是想beh試看掛起來會合她ê手cháiⁿ á無，結果無名指(cháiⁿ)掛起來有khah lēng，所以掛tī中指；chit kha手指hō͘ 她感覺真安心。安子手一伸出，對方就過來握手。瑞文ê手掌kah-ná饅頭hiah-ni̍h柔軟koh温暖。安子偷偷á看伊ê面，伊kah-ná去看tio̍h大光，目chiu隨kheh起來；像beh永久離別，有哀傷koh歡喜ê氣氛。
