《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 夫婦 第十二章（更新版）
作者 庄司總一 著 楊東傑 指導 林俊育 台譯 2017.06.04
陳陣hō͘ 瑞文睏tiàm in厝ê稻草被裡。
Hit暗發生ê tāi-chì差不多lóng bē記得，伊發高熱，腳手kah嘴唇tiāⁿ-tiāⁿ起痙攣，昏昏沉沉繼續睏落去。伊睏ê所在是一間kah-ná豬tiâu ê細間房，阿陣kah in老母阿笑全神貫注來kā伊看顧，部落ê人也趕緊去通知保正黃丙，村醫也有來kā伊血清注射，chiah-ê tāi-chì瑞文kan-taⁿ有霧霧無清ê記智。
第二工天未光，清文阿兄就tùi台南駛車趕來。Hit時，瑞文chiah tú醒起來，握阿兄ê手，目屎kiōng-beh流出來，也漸漸回復意識。
「阿兄，是hit-ê cha-bó͘ gín-á kā我救ê。」
舌頭麻痺ê關係，瑞文勉強講出chit句話。清文向阿陣說多謝，m̄-koh，阿陣無beh開嘴，老母阿笑代理kā昨昏以來發生ê經過一一說明。她有庄腳人特有ê戇直kah無客氣ê講話，她講若m̄是in cha-bó͘-kiáⁿ就無hit款ê應急處理，有in cha-bó͘-kiáⁿ ê關係，chit-ê人chiah無死去，kah-ná teh kā人討人情leh，kan-taⁿ希望人緊hō͘ 她報酬。清文講伊火急出門無準備錢，以後chiah koh來答謝，kan-taⁿ一kóa表示心意ê hō͘ 她。M̄-koh，一kóa表示心意ê小意思to̍h有十圓ê銀票兩張，庄腳人ê阿笑暢kah講bē出話來。
病人隨送去台南ê公立病院，m̄-koh，病情絕對m̄是hō͘ 人會放心得。台灣話ê龜殼花就是台灣ha-buh(譯註：habu=動物界門: 脊索動物門亜門: 脊椎動物亜門綱: 爬虫綱目: 有鱗目亜目: 蛇亜目科)，是台灣毒蛇之中siōng毒ê蛇。
瑞文ê bó͘ 春鸞tī眠床頭照顧，kui禮拜無睏，若是病症惡化，丈夫to̍h會死去。病症kah痛苦免講，kan-taⁿ容貌變形to̍h hō͘ 她bē放心。Hiah-ni̍h iân-tâu ê面容變成暗紫色koh浮腫ê醜面，hō͘ 人感覺真悽慘。
安子每工來探訪，向神祈禱講：「求你mài kā chit-ê人召去！」是春鸞哀求替伊祈禱。見若病人病症變bái，腳手痙攣，春鸞就會失態去攬tiâu安子ê身軀，ná親像gín-á teh哀叫：「求你用祈禱ê力量來幫助瑞文，向神祈禱，祈禱！」一kóa有關丈夫ê閒á話，當然hō͘ 春鸞感覺無受氣，m̄-koh，chit-má hiah-ê lóng m̄是問題ā lah！
二房ê bó͘玉簾也為tio̍h小叔，誠心準備好食ê糜kah湯。平時傲慢hō͘ 人認為心地不良ê玉簾，面對chit項大tāi-chì，mā顯出hō͘ 人感覺意外ê熱切人情味。老母阿嬌每工chhiàⁿ道士來念經，有時也親自去廟裡抽籤卜卦。老父阿山一開始to̍h嘴硬，表示免煩惱講：「Bē死lah！Hō͘ 蛇咬tio̍h死去ê人無夠一成。」伊阿片照食，m̄-koh，心內也是有小khóa憂慮，因為伊食阿片了後ê睏眠中，lóng夢見滑溜溜ê蛇kah氣味無好ê爬蟲類。
陳家就án-ne團結一心，全精神集中tī三房瑞文ê身上。世俗ê慾望、怨恨、欺瞞、虛假，kah-ná tī冰面展開，美化koh淨化去。瑞文雖然是無膽虛弱koh無作為ê男人，m̄-koh，伊人純潔、溫厚又koh有一點á寂寞ê好男子，所以厝裡ê人lóng對伊有好感。
陳家因為chit-ê偶發ê不幸事件，顛倒團結一心展現和平起來。Tú chit-ê時chūn，長男清文ê身上忽然遭遇真意外ê pháiⁿ tāi-chì。 天iáu未光，日本式ê房間內，過年to̍h三歲ê清子tī清文kah安子ê中間，lóng睏kah真甜蜜。
意外ê吵雜聲音kā chit對夫婦吵醒，幾位警官衝入來房間。
「真忽然，m̄-koh，請你來警察署一chōa。」
穿私服hit-ê人對清文講。實在是超過忽然ê忽然，清文mā一時想bē起是發生啥物tāi-chì。想講是m̄是老父阿山偷食阿片hō͘ 人發見？M̄-koh，無可能為tio̍h偷食阿片to̍h tī chit-ê m̄是時chūn衝入來。這顯然是kah家己本身有關ê事件，恐驚是思想上受懷疑，短短十秒內，清文to̍h án-ne覺悟。
清文非常鎮靜，因為伊有充分ê理由kah自信，表現出必要以上ê自然態度。伊隨同意kah in去一chōa，就做出外ê準備，同時mā講出kah-ná khau洗ê話。
「Khà一通電話來叫to̍h好，ná-tio̍h hiah-ni̍h勞煩大家，我掠準厝裡tio̍h賊偷，lín beh來掠賊hioh。我穿和服來去，安子，kā hit領有條紋ê hiaⁿh hō͘ 我。」
Chit款場合，一般人lóng會tio̍h驚、緊張、受氣，而且不管有弱點á無，為tio̍h維持人格ê威嚴，一定會抗辯講是án怎tio̍h去警察署。M̄-koh，清文無狼狽，無反抗，伊mā感覺家己真成熟。
總是，安子cha-bó͘人to̍h是cha-bó͘人，面色蒼白，緊張不安問警察。 「阮丈夫kám有做啥物m̄-tio̍h ê tāi-chì？為何tio̍h去警察署？我完全bē理解。」
「我mā m̄知，無lah，我是知lah，m̄-koh....。」
「若án-ne，請kā我講，阮丈夫是犯tio̍h啥物罪？」
「阮無講ê權，第一，chit-má m̄是講話ê場合。請趕緊準備。」 過一時á，清文hō͘ 四個巡查chhōa出去。 留落來一個穿私服ê刑事開始搜查住宅，koh有問陳家ê內情kah日常行動相關ê問題。
「請kā phoe信kah書類全部the̍h出來，若有兇器mā the̍h出來。雖然m̄是lín丈夫ê言詞問題，chit pái ê檢舉是以前m̄-bat有ê大規模。若有平常對lín丈夫來講有懷疑ê所在，請mài掩蓋講出來，án-ne對lín丈夫khah有利。」
「我想無啥物thang懷疑ê點，寫hō͘ 我ê phoe lóng tī chit間房間，hō͘ 阮丈夫ê phoe lóng tī樓頂ê冊房，請你免客氣去the̍h。」 安子有講白賊，她tiāⁿ-tiāⁿ煩惱in翁ê行動，m̄-koh無參加實際運動是事實，至少伊是án-ne相信。只是無了解伊頭殼底ê抽象觀念，he是小khóa不安ê種子。外國寄來ê phoe中間，兩三張有chit款ê懷疑觀念。 安子kā kui束ê phoe the̍h出來，她講。
「阮翁kah我lóng是熱心ê基督徒，無做半項m̄-tio̍h ê tāi-chì。」
Án-ne一講，安子忽然感覺家己失言來驚一tiô。社會性 ê罪惡是另外一回事，針對個人ê罪來講，基督徒，kám m̄是需要koh khah強ê自我意識？家己夫婦中間處處lóng是m̄-tio̍h ê所在，hiah-ê錯誤kah罪惡，tī被沒收ê phoe中間已經看現現。第二pái驚一tiô ê tāi-chì是她ê日記，日記藏tī鋼琴ê內面，連in翁都驚伊看tio̍h ê日記，若去hō͘ 無熟sāi ê人the̍h去讀了會得tio̍h安慰等ê想法，其實kah赤露露hō͘ 眾人監視仝款。
刑事peh起lih二樓，好佳哉有kā日記藏tī安全ê所在。刑事入去清文ê冊房，kā phoe信、原稿、手冊等全部lóng the̍h走去，然後環視四面壁頂ê冊架á，發出hō͘ hiah chē冊壓倒ê「Ai-ah！」感嘆聲。
「M̄-koh無論如何，人iáu是m̄-thang siuⁿ過熱心做學問，有人講過：mài讀冊khah bē有憂患，像我生來to̍h是無讀冊無憂患ê人，哈哈哈！」
伊顯然是teh笑家己ê卑下來恥笑別人，mā有感覺小khóa遺憾。伊m̄-bat橫寫ê字，無法度tùi hiah chē外國冊中間chhōe出想講有危險ê書籍。所以伊kan-taⁿ tùi文ê冊架á the̍h出幾本有關社會主義ê冊，án-ne伊to̍h感覺真iāng。
今á日早起被檢舉ê m̄-nā清文一人，kah社會運動有關係ê人，全台灣一網打盡。禁止新聞報導chit件tāi-chì，m̄-koh，chit件事件tī街á路謠言不斷，kah-ná滾雪球，jú滾jú大，變成一個大型ê怪物。日本人認為台灣人開始beh有不良企圖，引起輕視、討厭kah敵意。Hit當時殖民地ê人民並無顯露出hit種狹心胸ê本性，其實台灣人並無抱tio̍h大反抗ê心。因為對全台灣社會運動領袖ê L氏厝裡搜查，結果kan-taⁿ搜tio̍h一支空氣槍。當時歐洲大戰後ê自由主義思想之波浪也有phah到殖民地ê海岸，soah尾就提高一般ê階級意識。結果各種ê運動kah結社，致使當局真傷腦筋。為tio̍h維持秩序，無十分ê警戒bē-sái得，m̄-koh，矯枉過正mā m̄是好辦法。
假使清文tī檢舉前若無脫離當局嫌疑各團體之一ê文化協會，就會被判罪á是至少會罰金。Mài講伊ê思想，伊ê人生觀已經有起變化。總是，負責審問ê官員並無hiah容易相信伊ê話，因為清文寫hō͘ in bó͘ ê phoe中間，有兩三個無妥當ê所在，tùi巴黎寫tńg來hit張phoe有án-ne寫： 以後如何？聽講你已經懷孕，m̄知怎樣我有小khóa心神不安。你講chit pái身體無異常koh真有元氣，m̄-koh，想tio̍h頂pái你身體衰弱，kám有法度生gín-á，我真bē放心。M̄-koh，若早知你ê身體無問題，我真後悔無chhōa你做伙出來。M̄-koh，tùi另外一方面來想，這絕對m̄是我ê辯解；你hiah-ni̍h慎重koh清淨ê精神kah神經質，對chia ê環境kám會滿足，我真有疑問。到底地上ê天國，去tó位mā lóng chhōe bē-tio̍h。 所以我家己恐驚mā感覺幻滅無望，對歐洲文化舊ê既成觀念siuⁿ過受束縛，我一向lóng評價siuⁿ koân，無批判ê讚美，浪漫ê期待，chit-má lóng破碎à。尤其是歐洲chit-má teh破病，無法度lah！我原本想講是真優美ê建築物，卻是一間病院。長期悽慘ê戰爭soah尾就結束，歐洲四界創傷當teh喘大氣，過無gōa久kám會回復，文化koh再開花起來？開出無仝色彩ê花。今一切lóng hō͘ 殘酷破壞，只不過是重新建設前ê破爛。原本ê道德觀念kah精神秩序lóng失落去，女性ê墮落便是真好ê證明。無正派ê cha-bó͘人tī街路teh遊盪無話講，連有教養ê少女kah婦人mā是掠tio̍h無相識ê男人就相好，四界lóng看會tio̍h。M̄-koh講tio̍h我，做你放心，我是金牆鐵壁。
我到taⁿ lóng tòa tī豪華ê旅館，約十工前搬去khah俗ê旅社。雖然講我ê期待落空，m̄-koh，只有目頭結結來逃避mā算是卑鄙無膽ê做法。有ê物件去到tó位mā有，tio̍h面對現實，持守正確ê認識。雖然是án-ne講，我會想beh搬來chit-ê khah俗ê旅社，第一ê原因可能是身為豪華ê旅行者意愛搬徙。Chia óa近Mon-palu-nah-suh(譯註：巴黎西南ê藝術街)，lah-sap街路頂面ê lah-sap旅社。
幾日前kah tòa tī chit間便宜旅社ê一個cha-po͘人熟似，名叫Go-lih-chu-in ê 露西阿(Rusia)人，激烈ê Bo-lu-siu-bi-kih(譯註：Bolsheviki，華語譯做「布爾什維克」，提倡馬列主義)主義者，年紀約二十二、三歲，無像Su-la-bu(譯註：Slav，華語譯做「斯拉夫」)族hiah-ni̍h魁武，體型瘦抽，面色蒼白，hō͘ 人感覺是貧寒ê青年。我kah伊辯論兩三pái，我用La-su-khin(譯註：John Ruskin，1819~1900 ，英國ê社會改革家)主義—對社會組織ê改革kah人類生活ê提升ê各種理論lóng tio̍h用有人類包容力ê靈魂kah深深ê愛情做基礎—來kah伊辯。
Hit-ê青年看起來無啥學問，知識貧乏，我想講beh kā伊屈服是簡單ê tāi-chì，m̄-koh結果m̄是án-ne。我m̄是hō͘ 伊ê主義、理論屈服phah敗，只不過是不管伊ê思想kah理論án怎，伊to̍h是有鐵一般ê堅定意志，有火一般ê熱情，kah-ná宗教信仰一般驚人ê信念，chiah-ê氣力到底是tùi tó位來ê，chit件事實hō͘ 我真大ê震撼。
容允我以後chiah詳細kā你報告chit項tāi-chì，總講一句，chit-ê青年有奇妙ê力量，我感覺若無小心會去hō͘ 伊吸引去ê危險，想講tio̍h趕緊來搬離開chit間俗旅社。M̄-koh，tī我teh想ê chìn前，Go-lih-chu-in to̍h先搬離開。因為昨暗巴黎ê警察有來突檢，伊真有技巧來脫離危險地逃走。
我知影你對án-ne ê phoe信一向無趣味，就kā伊當做是我海外旅行ê一個插曲。Koh過一禮拜我就beh去柏林(Berlin)，續落去beh經過瑞士去義大利，koh續落去beh去Pha-lé-su-tà-in（譯註：英語Palestine，華語譯做「巴勒斯坦」)聖地巡拜，然後去希臘，旅程非常ân-táu。Beh去hiah chē所在，khah chē時間mā無夠，á我tī巴黎停留一個月以上，連我家己都感覺真奇妙ê矛盾心理。M̄-koh，chiah-ê暫時按下，回程kan-taⁿ經過印度，我tio̍h充分參觀，這是值得觀察、認識kah思考ê土地，因此chia可能是我beh停留siōng久ê所在。
Án-ne寫到chia，遙祝你kah你腹肚內ê gín-á有豐盛ê幸福。 Chit張tùi外國寄tńg來hō͘ in bó͘ ê phoe受真重視，清文受tio̍h真嚴格ê審問。若無chit張phoe信，應該真簡單就被釋放，因為清文lóng無需要講白賊ê弱點，一切照實在回答。紅色ê畫具(譯註：共產主義)有吸引伊ê興趣是事實，m̄-koh beh gia̍h畫筆chìn前，hit-ê色已經薄去loh，思想iáu未肉體行動to̍h逃走去à。
過兩禮拜，清文光明出來，這是一件無爽快ê tāi-chì。Chit-ê經驗hō͘ 伊深入思考，伊kah-ná hō͘ 人絞汁ê檸檬，竟然hō͘ 人絞出汁來。這家己ê汁，氣味無好。伊無偏右mā無偏左，伊koh khah意識tio̍h家己是中間路線ê社會人士。無論是善á是惡，伊無持有tio̍h tùi魂體拋出ê物件，家己mā感覺真不可思議。Tùi伊ê性格來講，tiàm chit種曖昧ê中間地帶微微á呼吸來活，家己mā無法度忍受。Hō͘ 伊浸tī chit種無燒無冷ê立場，確實是伊娶日本bó͘ ê關係。
因此，伊嘴鬚糊糊tùi警察局tńg來ê時，安子趕緊去迎接，歡喜kah tiô起來，清文一屑á都無歡喜。
「實在真好，我每暗lóng bē睏得，án-ne我知影你無罪à，m̄-koh iáu真擔心。」
「Kám án-ne？」
清文冷笑，in bó͘看起來是一個無知koh單純ê女人，想beh kā她輕視。
「你真thiám ê款，好好á歇睏一下，kám有受tio̍h刻薄ê對待？」
「無lah，無啥物特別，m̄-koh感覺真狼狽。」
「根據謠傳，chit pái ê事件講是真大，m̄-koh，我無相信。聽講台中ê L先生是一位思想極其溫和健全ê人，我認為台灣bē有hit款恐怖無智慧ê 人，m̄-koh可能iáu是有chit種人，kám m̄是？」
「Bē-tàng講無lah！日本內地kah世界各地mā lóng加減有chit種人。」
「Chit件事件kám有影有陰謀？Kám有明確ê組織teh推行？」
「無hit款tāi-chì lah！」
「總講你無事to̍h好，你kám lóng無關係？好佳哉你有脫離文化協會。」
「真佳哉，好teh有你，若無我可能bē脫離。」
講是感謝，其實hō͘ 人感覺tio̍h真強烈ê khau洗。
「Ngh，你tùi巴黎寫hō͘ 我ê phoe，然後tùi印度寄tńg來ê phoe，我想hiah-ê內容有hō͘ in質疑，kám有受tio̍h嚴重ê教訓？」
「有受tio̍h小khóa嚴重ê審問。我真thiám，想beh歇睏一下。」 Cha-bó͘-kán-á抱清子tùi內埕chông入來。
Gín-á ê面kan-taⁿ幾工無看就有變à，是清文感覺她有變。清文kā清子抱起來chim她ê面，嘴鬚糊糊目chiu 金金ê老父kah-ná是一個可怕ê小叔，所以tú會曉叫「爸爸」ê清子，chit時soah叫bē出來，tī清文ê手中感覺真gāi-gio̍h。清文為tio̍h beh彌補對bó͘ ê冷淡，極力愛惜gín-á，顛倒致使gín-á哭出來。入去眠床頂了後，清文流出熱淚，he m̄是受氣，mā m̄是怨恨，是孤單ê悲傷。Kah-ná想beh kā目屎流入去貯bē tīⁿ ê盆內，beh hō͘ 它滿出來。
