《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 第九章（更新版）
作者 庄司總一 著 楊東傑 指導 林俊育 台譯 2017.05.14
妻ê日記
四月X日
伊去海外，到taⁿ約有七十日。Tī途中，伊tùi新加坡kah馬賽港(譯註：法國 Marseille) 寄phoe來，昨昏，伊koh有用壯麗ê白金漢宮ê風景明信片通知我，伊已經到倫敦à。
真久無體驗tio̍h家己一人生活ê輕鬆自在ê滋味，m̄-koh，這是對日常生活ê表面感覺，其實心底mā是有一種無聊ê失落感。Tī無意中，我卻發見寫日記bē bái，心肝也真自然安定落來。去阮翁ê冊房，tī排滿冊ê架á頂beh chhōe家己ē-tàng讀ê冊ê時，發見一本小khóa bat聽過ê《A-mi-el ê日記》(譯註：作者 Henri Frederic Amiel，1821~1881，瑞士作家)。一讀chiah知，原來是一本hiah好ê冊。用「hiah好」來形容是無夠額ê，冊內底ê文章實在值得敬佩，我感覺ná親像tī沙漠中發見珍珠hiah-ni̍h-á歡喜。這是「我mā來寫一本日記」ê動機。Tī漸漸寫落去ê中間，當然無法度親像A-mi-el先生寫出hiah有深度ê真理kah 優美ê詞句，m̄-koh，對我來講，he是心靈ê米糧kah安慰。
四月X日
今á日下決心去看醫生chiah知，原來是我第二pái ê有娠ā。總是，我kah阮翁 lóng m̄知。兩人離開 hiah-ni̍h遠，kah-ná tī地球ê後面kah前面，感覺小khóa奇怪。假使阮兩人ē-tàng tàu陣出門，大腹肚ê我去旅遊世界各國，若是tī外國某一個所在來生產，he to̍h真費氣，kám m̄是？
若趕緊kā chit件tāi-chì報hō͘ tòa tī倫敦ê清文知，伊mā會驚一tiô chiah tio̍h。不管是男是女lóng好；頂pái生cha-po͘ 嬰á死亡，chit pái若koh生cha-po͘ ê是siōng好。總是，無論如何，嬰á ê名tio̍h像伊ê名，ài有一字「清」。Phoe內，我一定beh án-ne寫。
五月X日
我chit-má是tī第二pái ê有娠中間。真正感謝，我一再重複án-ne感謝；真正感謝ê tāi-chì是chit pái完全無前一pái hiah-ni̍h艱苦。Kah-ná眩船ê嘔吐、目眩、胸坎cha̍t；á是手指頭á瘦抽kah真可憐，面無血色kah嘴phóe凹（naih）落去等等，hiah-ê痛苦chit pái lóng無發生，真是不可思議。M̄-koh，我iáu是向神祈禱，m̄-thang koh有產後ê熱病kah嬰á ê死亡；無論如何絕對mài koh有hit款不幸ê tāi-chì發生。頂pái，雖然講是發燒ê結果，我家己mā m̄知ná會有hit種kah-ná起siáu ê行為。我想，這是信仰kah修養無夠ê證據。Chit pái無論gōa困難，gōa痛苦，gōa不幸，絕對bē-sái koh有hit款起siáu ê tāi-chì發生。婦人人生產ê痛苦，若kah約伯(譯註：請看舊約聖經「約伯記」) 比起來，是無算啥物。早起，我kā「約伯記」讀一遍。Ta̍k時讀起來，「約伯記」lóng是壓倒性ê好文章，ē-sái講是文學中ê大文學。
「上主賞賜，上主the̍h去。」(譯註：約伯記1:21) 咱tùi神領受福份，kám講免亦領受災禍？
我ài chiah-ê話深深進入我ê心靈kah肉體；我ài幸福mā tio̍h ài無幸福。若講siuⁿ過簡單掠tio̍h世間ê幸福kah滿足chit款心情，我想是siōng驕傲ê。 總是，我ê翁婿清文無ài我一刻久離開幸福ê寶座，伊本身驚幸福被奪，驚受災禍，驚kah phi̍h-phi̍h-chhoah；伊過頭強烈拒絕不幸。所以伊ê幸福ná久ná被奪去，án-ne ，kám m̄是受tio̍h創傷？伊去海外旅行，就是kah-ná受傷ê鹿á走落山谷去chhōe水lim ê情形仝款。
所以伊單獨出門ê時，我若硬beh tòe伊去，當然chit-má一定mā tī倫敦ê街路teh行。伊本來無想beh留我單獨tiàm厝；起初伊叫我tio̍h夫婦tàu陣出門，當然我歡喜kah心肝phok-phok跳。M̄-koh，後來我改變主意，因為我看出伊ài單獨旅行ê心，所以我忽然無想beh去，mā感覺無應該去。Hit時，伊講：「產後已經一年gōa，m̄-koh，你ê身體kah-ná iáu未完全回復，你kám有自信？若tī遙遠生疏ê所在破病，he to̍h傷腦筋loh。」Chit時，我忽然看出伊ê心意。何況，hō͘ 伊án-ne講起來，本來體質虛弱ê我，kám有法度忍受長途ê旅行？實際上，我mā m̄是無感覺不安。所以我at-sa-lih (譯註：日語ê「あっさり」，華語ê「乾脆」) kā伊推辭。我kā伊講：「其實我心內mā teh擔心，hō͘ 你án-ne講，我soah無信心起來。Koh再講，我本來to̍h無適合做樸素ê家庭婦女，kiám-chhái去國外旅行tńg來，soah變koh khah西洋化，án-ne有khah無妥當，所以....。」
「Mài講hiah-ê戇話！出去大大吸收新空氣，廣闊見聞，提高思想，kám m̄是好tāi -chì leh？我所擔心ê kan-taⁿ是你ê健康問題lah！」 Kám是án-ne？M̄是lah！Ná會無ài坦白直接kā我講是你想beh 單獨一人去旅行？想tio̍h hit時伊hit種無老實ê態度，soah hō͘ 我感覺孤單起來。M̄-koh，詳細想起來，tī一般情形下，我若講無beh去，伊就bē勉強我去。總是，chit-má卻奇怪講伊有伊ê理由，思考伊出國ê動機，就會清楚。伊忽然想beh出遊，是因為舊年ê聖誕節暗暝發生一件無歡喜ê tāi-chì。其實tī hit-ê無歡喜ê tāi-chì chìn前，伊不得不辭掉官職ê chit-ê遭遇，真久以前to̍h已經種落遠因。Tùi辭掉官職hit時起，伊就漸漸減少kah日本人ê交際，講tio̍h日本人ê tāi-chì，就憂頭結面，mā khah無講日本人ê好話。Hiah-ni̍h流利ê日本話，經過一年無講soah變kah bē liàn-tńg，可見是心理上ê隔離。Ai-ah，加上我是日本人，chit點hō͘ 伊對我特別客氣。Tú-tio̍h不平不滿、bē爽快、受氣kah其他真chē苦惱ê 時，講伊是用節制，其實是不得不透過偏見kah棄sak ê面紗來對我表示而已。對做伊ê bó͘ ê我來講，mā是真pháiⁿ做人。做bó͘ ê是無比ê無奈kah ngāi-gio̍h，對伊來講koh khah是雙重ê苦惱。連tī 「各各他ê山崙á」安靜祈禱、思考kah交談ê hiah-ê清純快樂ê日子，伊mā是一隻迷路ê羊羔；到 chit-má想起來，我chiah ē-tàng瞭解。伊tī人生ê路途 tú-tio̍h走投無路ê困境，伊想beh開拓一條新ê光明之路teh苦鬪。所以伊需要暫時脫離社會ê各種纏絆，過一個完全孤獨ê生活，回復到樸素ê心靈狀態，甚至伊ê bó͘，尤其是一個日本人，tī chit-ê時chūn mā需要恬恬離開伊亂操操ê心房。所以，伊驚chhōa bó͘ 去海外旅行變做kan-taⁿ平凡ê遊山玩水hit種無意義ê tāi-chì，he是伊所驚ê。我kám bē了解伊hit種ê心情？我無hiah愚戇lah！
六月X日
連續不斷ê落雨，落雨....。進入雨水期以來，每工鬱卒心悶。落雨會hō͘ 熱氣有khah退，有khah好過日，m̄-koh，房間ê濕氣真重，壁頂生菇，親像世界地圖。因為身體kah平時無仝，所以對chit種ê氣候koh khah感覺bē爽快。M̄-koh，這kah日本內地陰濕ê梅雨期有小khóa無仝，雨勢親像男性ê雄勢，tùi窗á看出去，心情就爽快起來。三年來，茂盛起來ê庭園內，靑翠ê樹木爽快沐浴tī雨水中，只有花kah-ná紙tâm濕，謝去，看起來有小khóa可憐。
今á日仝款坐tī室內走廊ê藤椅teh看庭園，心內並無特別teh想啥物 ，kan-taⁿ親像女王，神神坐tī hia，恬恬無tín動，消磨二點鐘。最近lóng是án-ne無精神，家己mā感覺厭倦。我注目看hō͘ 雨ak-tâm ê扶桑花，想講巴黎街路ê栗子樹路樹是啥物款樹？開啥物花？家己一個人浸tī浪漫（譯註：英語romantic）ê氣氛中。Ai-ah！我ná會無kah伊tàu陣去neh？我iáu少年。「來時kah-ná花落，去時如影bē停。」阮 cha-bó͘人ê青春就是án-ne。總是，我ná親像世事bat透透ê老婆á，放棄hit-ê bē koh再來ê機會，而且chit pái ê大腹肚，我ê 身體真好勢，連衣索比亞á是亞馬遜lóng mā ē-sái去。Bē-sái得，我bē-sái講hiah-ê不滿ê話。因為若後悔á是講hiah-ê不滿ê話，我對伊ê hit份善意，就失去價值loh 。
何況日頭下腳無新鮮事，而且去外國mā無lóng總是快樂，mā m̄是免tam輸嬴。外國ê風物確實是稀奇koh súi，m̄-koh，in所過ê社會生活kah人民ê精神，無tú-tú lóng是值得咱欣羨ê hiah-ni̍h完美，這tùi伊寫tńg來ê phoe to̍h ē-tàng看出因端。
六月X日
Ai-ah！無比今á日ê tāi-chì koh khah驚人。Chit-má想起來，心肝頭to̍h phi̍h-pho̍k-chháiⁿⁿ，頭殼亂操操。Kā hiah-ni̍h無路用koh見笑ê tāi-chì寫入去日記kám好？M̄-koh，阮翁無tī-.leh，無其他thang講話ê對象。無要緊lah！啥物lóng thang隨便烏白寫寫leh，可能心肝會輕鬆起來。 到taⁿ我 lóng m̄知Z對我是真情ê愛慕。(用啥物暗號來稱呼chit-ê人？讀者讀tio̍h chit-ê日記自然會知是伊。我m̄是對別人客氣kah顧慮，實在是我家己想beh kā伊小khóa含糊一下，所以就暫且用字母Z來稱呼伊。)
今á日下晡，坐tī走廊邊á ê藤椅，讀完阮翁tùi巴黎寄來ê phoe了後，kah平常時仝款無注神放心teh看落雨ê庭園。Z tùi走廊hit pêng沿路用hō͘ 人會起雞母皮ê聲喝：「阿嫂，你好」，ûn-ûn-á行óa來。又koh來ā！我hit時有小khóa受氣。對chit位Z，我比對其他家族ê人有khah親近感koh好意，所以我家己一人ê時chūn，伊來做我講話ê對象，mā chē少ē-tàng解我ê心悶，m̄-koh因為siuⁿ chia̍p來，最近soah hō͘ 我感覺真煩。所以，雖然有聽tio̍h伊teh叫我，我mā假teh睏，裝做無聽tio̍h。「你戇神teh想啥物？」Z án-ne問，teh探視我ê面ê款式。M̄-koh，伊看tio̍h我ê目chiu kheh-kheh，用真意外ê聲問講：「Haⁿh，你teh睏o͘h！」M̄-koh，因為雨聲ê關係，伊ê聲聽起來koh khah恬靜。Z koh一pái叫我「阿嫂！」，來確定我有teh睏á無。鼻tio̍h一chūn kah平時仝款ê頭毛油味，我就想beh假睏到底。伊若看我teh睏，應該就會án-ne離開tńg去chiah tio̍h，這是禮貌；到taⁿ，伊iáu m̄-bat做過失禮ê tāi-chì，驚見笑koh小心ê Z，我感覺伊會信用得。M̄-koh，伊掠準我真正睏重眠，soah大膽起來，起狡怪koh邪惡ê企圖ê款。Z發出kah-ná賊á beh偷the̍h物件ê聲念「睏睏去」ê時，我感覺不妙；kah-ná盲人ê第六感，我忽然發覺有危險，目chiu peh開。M̄-koh，ná會án-ne lah？Hit時，Z kui身軀ê重量teh tī我ê手腕頂面。我kah-ná草蜢á tùi椅á頂跳起來，pak開hō͘ 伊掠tiâu ê手，koh順續用hit支手對伊ê面pa落去。我kám有需要對伊hiah狠(hiông)？可見這是我大受氣ê行為。M̄-koh，若無án-ne kā伊sai嘴phóe，Z ê糊塗頭腦可能bē醒起來。Hō͘ 我用kah平常無仝ê凶勢壓倒ê Z hián-leh hián-leh退後，驚kah面青sún-sún teh chhoah。
Cheng-seⁿ！起siáu！Hō͘ 我嚴嚴罵一兩句，Z就雙腳軟落去，跪tòa土腳，頭貼tiàm走廊謝罪。「失禮lah！請原諒！請m̄-thang大聲，若hō͘ 人聽tio̍h，就慘loh！我絕對絕對無想beh做pháiⁿ tāi-chì，只是阿嫂你睏ê面容真kó͘-chui，所以禁bē-tiâu，就án-ne….。我kan-taⁿ想beh kā súi花摸一下看māi niā-niā。」我無好好á聽Z驚惶想beh辯解ê話，kā伊sak開，koh嚴令伊隨時tńg去。除了án-ne做以外，我mā m̄知beh án怎chiah好；我家己ê心mā亂操操。Z起身，頭lê-lê teh beh離開，m̄-koh又koh m̄甘離開，坐落去邊á ê椅á，仆tī圓桌頂，kah-ná gín-á哭出來。Taⁿ beh án怎chiah好leh？我ê心頭真困擾；若mài kā伊phah hiah利害mā ē-sái得。伊一定感覺真見笑kah受侮辱，我khiā tī伊ê立場來想，感覺伊真可憐。總是，我心掠橫，無講半句話。伊頭殼gia̍h起來，ngh-ngh teh哭，吐出伊lò-lò長ê心情。
「阿嫂，我坦白kā你講，自你踏入陳家，我就開始愛你。你ê面kah心kah-ná蝴蝶蘭hiah-ni̍h清幽美麗，而且清文阿兄並無hiah-ni̍h愛你，若無，伊ná會無chhōa bó͘出國？Ná會留你孤單一人tiàm厝？我bē-tàng忍受chit點氣。伊無愛你lah！我眞知影。Tùi你ê cha-bó͘-kán-á，我有聽講lín m̄是真相好ê夫妻，阿兄tiāⁿ-tiāⁿ對你發脾氣，你經常真寂寞....。阿嫂，人真正ê幸福無法度用錢買，用地位kah名譽來瞞騙mā是無可能。對我來講，分財產ê致蔭hō͘ 我比以前khah有錢，m̄-koh，kah以前ê我無啥物無仝。無幸福，無價值，我對每日án-ne茫茫渺渺，醉生夢死ê生活已經忍受bē-tiâu ā！我想ài beh做一koá啥物tāi-chì，心真着急，kan-taⁿ空思夢想，啥物辦法都無；我無法度做啥物，chiah-ni̍h無意志，無氣力。講起來是因為我無喜樂ê目標，因為m̄知是beh為啥人來做啥物tāi-chì。講tio̍h阮bó͘，我討厭她。我án怎努力lóng無效；愛情bē-tàng用錢買，用努力mā得bē-tio̍h。M̄-koh，請你知影，我m̄是tùi你beh來求補我ê無幸福。我對你ê感情是另外一個問題，he是自然koh純粹ê，是hiah-ni̍h激烈ê戀慕。久長以來，我只有想tio̍h你，家已一個teh艱苦。你罵我cheng-seⁿ、愚戇，我mā無要緊。Ho͘ⁿh，安子小姐，我án-ne講，你可能會kā我當做siáu ê，m̄-koh，請你kah我tàu陣逃走kám好？咱來去新加坡，tī hia我有親友。來去hia….。」
Ai-ah！無ài lah，無ài lah！寫到chia to̍h好停筆，這kah-ná tùi通俗小說抄來ê淺薄觀念kah廢話連篇。講是án-ne，我是án怎會chiah認真teh kā它詳細寫落來neh？為啥物tio̍h來污染我美麗ê日記紙面neh？為啥物無beh at斷筆，kā紙裂破tàn掉neh？Z án-ne哭teh講chiah-ê話ê時，若有人看tio̍h hit-ê場面，我想有可能會致使啥物款ê誤解。我對hiah-ê話假無聽tio̍h，kan-taⁿ不安四界看看。我虛驚一場，感覺家己真戇，對家己受氣。M̄-koh，chit-má無受氣kah hiah-ni̍h利害。講實在，我ê心情bē bái，這是怎樣neh？這親像走入去洞穴ê狐狸hiah狡怪，無意中kā Z hō͘ 人起鷄母皮ê話寫寫出來。我chit種ê心情，宛然親像小說家ê氣派，寫kah熱狂，有時目屎滴，有時微笑，自我陶醉。Tī beh赦免Z ê慈悲寬容下面，有隱藏無誠實、無純潔，甚至是有淫亂ê感情....。
神ah，求你赦免我ê罪惡，親像我ê丈夫bat沉重kā我指點，我mā是一個軟弱koh 見笑ê女人。 心靈仰望至善，肉體卻是軟弱。
七月X日
雨停ā。Hip熱ê熱天，連喘氣都kah-ná金魚。約略十gōa工無做每日ê 功課à，m̄是熱kah pîn-tōaⁿ gia̍h筆，是hit件tāi-chì發生了後，soah無心chiâⁿ面對日記簿。Z mā可能感覺無面子，一直lóng無koh看tio̍h伊ê面，今á日忽然來訪，會失禮了後順續kah我參詳今後ê方針。
伊顯然無啥元氣，明顯有悔改ê心情。十工中間，伊謹慎冷靜反省，總是，閒閒無tāi-chì做是m̄好，chiah會想kóa hiah-ê無聊ê事。Chit-má伊mā已經得tio̍h所分ê財產，所以phah算beh去日本內地讀大學。伊講為tio̍h準備入學考試，the̍h出中學時代塵埃滿滿是ê教科書kah參考書。真好ê想法，m̄-koh，伊講明年to̍h 25歲à，kám iáu ē-tàng去學校讀冊？Hiah-ni̍h消極ê態度。無lah！你ê情形kah一般ê子弟求學意義無仝，你m̄免靠學歷來求生活ê路，你讀冊是為tio̍h家己ê教養，所以無需要考慮年歲。我án-ne kā伊苦勸，鼓勵伊the̍h出勇氣。Z真温順，tòm頭同意我ê話。伊感覺自卑ê時chūn，hiah-ni̍h溫柔順服ê態度，ē-sái講hō͘ 人感覺真kó͘-chui。想起來，我mā是有m̄-tio̍h ê所在。當時伊過份ê行為致到我tio̍h驚，soah嚴格對待伊。憑良心回顧我家己ê做法，實在mā bē-sái kan-taⁿ責備伊，我家己mā是有失覺察ê所在。我認為伊iáu是gín-á，koh想講伊有家後ê安全性，chiah hō͘ 伊容易接近我，致使造成錯誤。其實，早前我to̍h有感覺伊對我有無正常ê好感，kám m̄是？M̄-koh，我lóng無警戒，我應該責備我家己ê怠慢，以後 tio̍h凡事更加注意，ài khah聰明leh。
雖然Z已經有改變，m̄-koh，伊對我hit種程度ê戀慕，無可能一工to̍h消失，我一定tio̍h小心，再小心。Tùi伊今á日ê表現ē-tàng看出伊有善意beh努力，ná親像鹿á舐(chī)家己ê創傷來求醫治一樣。Hō͘ 我特別歡喜ê是，我tú想beh勸伊，結果是伊家己先表示對信仰ê關心。 照伊ê 拜託，我kah伊約束，下禮拜beh chhōa伊去教會。
七月X日
已經有幾nā工無見tio̍h ta-koaⁿ阿山ê面；今年只有兩pái見tio̍h伊，就是新年kah丈夫beh出國ê時。Hō͘ ta-ke阿嬌指責以後，ta-koaⁿ就無koh來阮êhú-loh間洗身軀。最近伊因為久長ê氣喘病，lóng無出門，我家己mā因為有娠，真久無去kā伊請安。總是，我想有時mā tio̍h去請安，所以三日前我有去，m̄-koh可惜無見tio̍h伊。
我行到ta-koaⁿ ê房間門口，ta-koaⁿ ê老cha-bó͘-kán-á素娥tú出來，她搖手koh用目神表示mài入去。我想講kám會病kah hiah嚴重，就問她：「大人kám有真chē病？」素娥憂頭結面tòm頭，我驚一tiô，想beh kā她問khah詳細，m̄-koh話語bē通，只好oa̍t 頭tńg來。
我m̄知ta-koaⁿ阿山病kah hiah嚴重 ，到taⁿ lóng無去kā伊探訪，這是我ê失察kah怠慢。家長ê身體欠安，應該有人kā我通知chiah tio̍h ā，m̄-koh到taⁿ lóng無消息傳來我ê耳孔。若問Z應該siōng清楚，m̄-koh，hit件事了後，我對in bó͘春鸞有小khóa pháiⁿ勢，就無意去in hia。我有問過我ê cha-bó͘-kán-á，m̄-koh，她講m̄知。Chit件tāi-chì掛tī我ê心頭，hō͘ 我不安。經過三工，昨暗忽然tùi小khóa tāi-chì真相大白。
昨暗黃昏khah涼爽ê時，我想beh tī七月半(中元節)送我ê cha-bó͘-kán-á皮鞋，就chhōa她去街á買。以前ê hit-ê cha-bó͘-kán-á pin-tōaⁿ koh厚話，無kā外口ê情報帶tńg來無打緊，koh kā阮夫婦ê tāi-chì有ê無ê lóng四界講hō͘ 人聽，實在真頭痛。我想講若有khah好ê，tio̍h beh來換人。Tú好教會有一位律師ê夫人講beh搬tńg去日本內地，她就kā她ê cha-bó͘-kán-á紹介hō͘ 我；她就是chit-má chit位，叫做阿英。雖然她已經十七歲，m̄-koh看起來iáu gín-á款，是一個天真無邪，氣質好koh乖 ê cha-bó͘ gín-á，對我有真大ê幫助。M̄-nā是陳家有使用真chē ê cha-bó͘-kán-á；台灣chit種cha-bó͘-kán-á lóng是用錢買來ê。總講一句，in to̍h是有奴隸ê命運。總是，chit pái我無仝，是用正當ê道德方式kā她chhiàⁿ ê。就是講，她雖然只是小小一個職業婦人，卻hō͘ 我心情好起來。我用日本式ê名「英子」叫她，看起來她真kah意chit種親切ê叫法，所以有時若叫她「阿英」，她顛倒無beh kā我應。 我kā她買鞋了後，beh tńg去厝ê路中，阮入去一間siōng閙熱ê大路ê大間冰店，chhōe-tio̍h壁角一個空位坐落來。阿英點草莓冰，我點牛奶雞卵chhoah冰。Hit時，阿英giú我ê手ńg，然後靠óa我ê耳孔細聲講：「景文先生....。」我mā細聲問她講tī tó位。我四周圍看一下，tùi阿英指點ê方向看去，我知伊是tī我ê正後面。我想beh oa̍t頭去看，m̄-koh，阮ê座位kah後座中間有一個淺紫色ê薄綿布ê布簾cha̍h-.leh，kan-taⁿ ē-tàng看出後壁桌人ê烏色霧霧無明ê kha-chiah影。阿英mā m̄是tùi景文ê身影來發見伊，是tùi伊講話聲ê特色認出來。無論如何，景文kah我是kha脊phiaⁿ對kha脊phiaⁿ坐leh，我想講bē-sái kek m̄知，to̍h想beh khiā起來，m̄-koh，阿英無出聲，kan-taⁿ目頭phah結，kā我阻擋。我m̄知究竟是為啥物，只好繼續坐leh。阿英用非常好奇ê目神注目布簾á hit pêng，一直耳á iah利利teh注意聽。後壁是景文kah一個cha-bó͘ gín-á細聲teh講話；準講in大聲講話，台灣話聽無ê我mā m̄知in講話ê內容。阿英kā冰食了à，m̄-koh iáu無beh起身離開，所以可能是真趣味ê話題，á是有重大ê秘密。M̄-koh，可能是我lóng聽無，而且偷聽mā m̄是啥物好tāi-chì，我就硬kā ài beh koh留tī hia ê阿英拖出來外口。Tńg到厝，我就叫阿英kā in講話ê內容翻譯hō͘ 我聽。He是我完全m̄知ê新鮮事，莫怪會引起她ê趣味。
第一，Ta-koaⁿ阿山teh食阿片。
第二，最近景文小弟beh娶細姨。
Ta-koaⁿ阿山破病無beh出門是表面話，其實是伊沉迷tī食阿片。為啥物chit-ê消息會洩漏出來？Koh無gōa久beh做景文ê細姨ê後頭厝teh開藥房，聽講是景文為tio̍h老父偷偷á去hia買阿片。 阿英ê話有koh khah詳細ê內容，m̄-koh tī chia我kā它省略起來。
八月X日
大家teh等景文ê細姨娶入門，m̄-koh，到taⁿ iáu未看tio̍h她ê身影。Kám講tio̍h等到秋天？Á是為tio̍h啥物都合來取消ā？Ta-koaⁿ阿山陷落tī魔藥ê俘虜是真意外ê tāi-chì，景文beh娶細姨mā是hō͘ 人感覺tùi外貌是看bē出ê。可能是伊火熱ê金錢慾望，soah hō͘ 伊其他ê慾望失去光彩ê款，m̄-koh，tùi反面ê好處來講，伊是一個意志堅定ê人。實際上，自我來到陳家，iáu m̄-bat聽過伊ê風流事，而且伊ê男子氣慨kah色情無仝；oh，我án-ne講有khah失禮lah。伊m̄知tang時去啥物所在交tio̍h chit-ê cha-bó͘ gín-á，koh講無gōa久to̍h beh娶入門，我想感覺意外ê人一定m̄-nā我一個。
若án-ne，伊ê大bó͘ 會án怎leh？她氣質好，容易受氣，koh嫉妒心重，若第二夫人娶入來，難免會起風波，將來家庭mā會不得安寧。玉簾一向kā我當做敵人，hō͘ 我真痛苦，taⁿ輪到她家己來承受痛苦ā。雖然我無應該án-ne講，m̄-koh，心情總是有khah甘願。
總是，到beh考慮別人ê tāi-chì chìn前，iáu是先煩惱家己ê事khah好。Kah Z ê問題一直掛tī心頭。伊tùi hit時起有去教會，我為tio̍h驚厝裡ê人批評，避免kah伊tàu陣出入教會。M̄-koh，假使Z有真心懺悔來phah神ê門，我為tio̍h避人話屎來án-ne做，ē-sái 講是我ê卑鄙。尤其是我看伊iáu需要久長ê時間kah努力，chiah有法度消滅情火，洗清心肝。
今á日禮拜soah，我第一pái kah Z tàu陣行tńg來。途中Z招我看beh去lim涼水無，我無客氣kā伊拒絕。Koh行無gōa遠，伊買路邊teh賣ê花講beh送我；是玉蘭花，白色真芳ê花，m̄-koh，我mā是kā伊拒絕。然後我嚴嚴，帶有一半戲弄kah刁難ê口氣，問伊：「你kám bē記得你講無ài做無聊ê tāi-chì ê話ā？到底是án怎lah？」。Z恬恬無回答，表情看起來有一點á寂寞kah無奈。M̄-koh，過一時á，伊反駁講：「Án-ne聖經中ê《雅歌書》是啥物？He實在真精彩。阿嫂，你對《雅歌書》ê教示看法如何？」我感覺無需要回答，無beh chhap伊；m̄是，我是一言不發，顯出受氣ê面chhiuⁿ tńg來到厝。
Hit時，我眞正想beh phah pháiⁿ感情，對伊受氣，m̄-koh，事後想起來，he只不過是我teh擺姿勢niā-niā，我發覺he並m̄是tùi心底發出ê受氣。眞無氣魄。為啥物我對Z chiah-ni̍h寬容，並無tùi心底受氣á是怨恨neh？我對丈夫清文to̍h無chit種寬容ê感覺；是一種端莊死板，bē放鬆e心態。比較起來，Z to̍h ná親像gín-á容易hō͘ 人親近。伊純潔正直，bē kek派頭變面，心腸好，所以對待khah輕鬆。話雖然是án-ne講，Z kah我之間只不過是如此niā-niā。我用超過友愛ê感情來起風m̄是無路用。Bē-sái得！Hit款可怕ê事無應該發生。丈夫一旦回國tńg來，就bē koh有攪擾ê聲；看起來tāi-chì已經結束à。
九月X日
該來ê事總是會來。Cha-bó͘-kán-á阿英哭teh走來kā我tâu，她講Z kah我ê關係已經tī其他厚話ê cha-bó͘-kán-á中間傳開。雖然阿英拚命辯解講她ê主人m̄是hit款pháiⁿ cha-bó͘，m̄-koh，hiah-ê cha-bó͘-kán-á teh笑，無beh聽她ê解說。若是kan-taⁿ怪阮兩人iáu無要緊，連我腹肚內ê gín-á mā講m̄知是siáng ê，tī hia惹起chit款侮辱人ê hàm古批評。M̄-nā是眾cha-bó͘-kán-á之間teh謠傳，事實上，連in ê主人，陳家全家族mā lóng teh談論。Ai-ah，beh án怎chiah好leh？我對難免會被懷疑已經有覺悟，m̄-koh，這是無法度忍受ê侮辱，致使我有講bē出ê暗淡心情。我ê應付方法可能加減欠缺智慧，m̄-koh，我做人徹底正直，無做啥物見笑ê事，並無需要提心吊膽。雖然我是án-ne teh想，m̄-koh，若是丈夫tńg來無beh相信我ê話，beh án怎leh？應該bē有chit款tāi-chì lah！M̄-koh，萬一若無相信，到底beh án怎chiah好leh？又koh準講伊無beh相信hiah-ê謠傳，只是付之一笑，án-ne mā是加減會破壞伊長途旅行所帶tńg來ê清新感。我無希望會án-ne，這實在hō͘ 我非常困擾。
九月X日
大昨日，景文ê第二夫人入門，坐紅色ê轎；he是真正ê新娘坐轎。喜事ê紅龜粿kah美食料理mā有送來我chia；放炮á聲 kah音樂真鬧熱。 今á日，想講鬧熱已經過去，卻聽見中庭傳來嚷聲，我就行出去看。景文ê大bó͘ 玉簾tī hia非常激動teh tâu東tâu西，吐她心中ê苦水。二十幾個cha-bó͘人kā她圍leh，有ê勸解，有ê呼應，ná親像鷄鴨á kui陣tī hia ki-ki ka̍h-ka̍h；當事人景文kah伊ê細姨lóng無tī hia。Chit種ê冤家iáu是支那式ê；無beh正面kah對手挑戰，kan-taⁿ是一種tī眾人面前雄辯kah訴求ê宣傳法。我行óa去，玉簾隨時kā我掠tiâu，講in翁ê pháiⁿ話，求我同意她ê講法kā她解救。她kah-ná對我ê敵視kah惡宣傳，lóng bē記得了了à，hō͘ 我感覺真奇怪。Tùi chia可見，玉簾有相當ê心事，實在hō͘ 我真同情。Tī chia娶細姨是真平常ê tāi-chì，m̄-nā m̄驚人知，koh顛倒是富裕kah權勢ê表徵。M̄-koh，kah日本內地相像，這bē-tàng講是純良ê風俗。總講一句，chit種風俗m̄是有koân ê道德價值lah。Koh再講，bó͘對翁beh娶細姨無拒絕ê權利，這對bó͘來講，當然是真bē爽快ê tāi-chì。人ê心，世間ê人情，去到tó位lóng仝款。玉簾ê憤怒m̄是無理ê。她氣kah忍受bē-tiâu，án-ne講：「Tī chit款翁ê所在tòa bē落去lah，今á日to̍h來離婚，tńg來去外家厝。」她氣kah忍受bē-tiâu án-ne講。雖然是án-ne，會kā hit款tāi-chì隨便講出嘴ê人，通常是實際上無hit款意思。玉簾mā是bat一pái逃走後，無gōa久to̍h koh倒tńg來；她mā是bē-tàng脫離世間ê常例chiah tio̍h。
總講一句，二房ê新鮮事引起陳家每一人ê注目，像今á日ê爭執會koh不斷發生，各種謠言一定mā會繼續落去。
好佳哉是án-ne，大家ê關心chiah移向hia去，我kah Z ê謠言可能就會án-ne消失去，我家己安慰家己，án-ne teh想。
十月X日
生產ê日期漸漸逼近，萬一有狀況，就ē-tàng隨時去K病院入院ê手續已經有辦好勢，所以ē-sái安心。想起來，chit pái身體算是非常輕鬆，kah頂pái ê痛苦比較起來，實在是感謝不盡。我ê身體狀況真好，koh是家己一個留tī厝裡，閒閒無tāi-chì，kā身邊雜事寫落來，不知不覺，kui百頁ê筆記簿已經無空白thang好寫à。M̄-koh，chit-má讀起來，lóng是寫kóa無啥意義ê雜事，家己感覺真無滿意。Mài講這是閒閒無tāi-chì chiah寫來安慰家己ê，橫直若beh寫tio̍h寫khah美好ê tāi-chì。尤其是kah Z ê關係hit部分，hō͘ 我ê心lóng bē平安，恐驚會引起誤解。有時想beh kā它擦消，擦除兩三chōa了後，忽然感覺án-ne koh khah會引起人ê注意，就án-ne kā它留leh。有一工有人á是阮翁看to̍h ，kan-taⁿ hit部分擦除，顛倒會成做懷疑ê因端，所以我改變我ê想法。 Koh續落去，我想chit本日記iáu是mài hō͘ 人看tio̍h khah好。本來想講丈夫tńg來ê時，beh kā日記當做是我單獨tī厝裡日常生活kah心境ê記錄，是對丈夫ê忠實報告，m̄-koh chit-má soah驚對伊公開chit本日記。原因m̄-nā是kah Z ê tāi-chì會有困擾，我mā感覺家己厚話會hō͘ 人討厭，而且koh m̄知見笑，kā別人á是丈夫ê tāi-chì the̍h來評論，koh假gâu ，有一部分kā in做心理分析。何況，chiah-ê mā m̄是堂堂正正teh講，是私底下隨便講講leh，hit種奸詭kah內心驕倣ê態度眞明，家己mā感覺討厭。
我想iáu是kā chit本日記秘密khǹg tiám箱á底khah妥當；年久月深以後，時間會hō͘ 有缺角ê現實變成圓滑，koh阮ê心對hit件事會有理解kah寬容；到hit一工，若想起有chit件事，就ē-tàng笑笑á來讀chit本日記。
今á日，我chit本卑微ê日記就到chia停筆，想起來mā是有小khóa m̄甘。因為有kah-ná女學生ê感情，今á日黃昏ê時，不管別人án怎看我，我行向曠闊ê墓地山崙á，peh起lih崙á頂，坐tī kah-ná絨毯ê草埔頂面，沐浴tī beh暗á ê金色日光中。我ná親像牛反芻青草，回想頂年仝chit-ê季節來chiaê時，hit段充滿幸福ê時間，koh想起伊唸Ui-liam-suh O-su-oh-suh （Williams Wordsworth）ê詩句：
美麗ê黃昏，心靜自由自在；
神常常kah你同在，咱雖然m̄知。
伊去海外旅行m̄知有得tio̍h啥物？Chit-má變kah像(sêng)啥物款leh？這是我留tī厝裡期間，頭殼內一直離bē開ê期待kah掛念。我非常希望新經驗ē-tàng帶hō͘ 伊精神上ê和平；我所指ê和平m̄是伊所想ê安逸kah軟弱，顛倒是tī苦難kah煩惱中間，有根本bē搖動，kah-ná船碇ê hit種安定。伊講回程beh tiàm印度停留幾工，伊是beh tiàm印度觀察啥物？思考啥物？我m̄知，m̄-koh，我知一切應該是tùi疼出發，終局mā是用疼來結束。若無對睏tī重重疊疊無盡ê墓內hiah-ê家己ê民族靈魂抱tio̍h敬愛之心，án-ne，伊對殖民地kah民族ê問題不管有gōa好ê意見kah思想，結局，kám m̄是kah無根ê樹仝款？
確實是血比水khah厚，我腹肚內ê gín-á beh有阮兩人各一半ê血混合來出世，ǹg望這hō͘ 伊ê心變成koh khah美好。
