《宋澤萊ê台文蕃薯園》

 | | | 轉寄

2017年台灣文學獎台語短篇小說創作金典獎得獎作品評語

作者 宋澤萊, 台譯：Lîm ChùnIo̍k/林俊育 2021.09.26

2017年台灣文學獎台語短篇小說創作金典獎得獎作品評語

◎宋澤萊執筆

● 戰後ê台灣，來到80年代才開始有人用台語寫小說。Tú開始，以陳雷ê小說siōng好，技巧 kah 70年代ê北京語鄉土小說無什麼精差，不而過平民性超過北京語鄉土小說真chē。經過30年ê發展了後，現此時台語小說ê優秀寫手無論是語言、技巧、平民性，lóng超過陳雷，hō͘人真驚奇，也真hō͘人歡喜。

下面to̍h是本屆【2017年】台灣文學獎台語短篇小說創作金典獎得獎各篇作品ê評語：

● 1.〈命〉chit篇小說是首獎ê作品。主要是寫「我」kah國小同學「阿明」ê一段故事。

※ 「我」是一个家境bē bái、有真chē chhinchiâⁿ ê正常家庭gín’á。

※ 阿明chitê gín’á就khah無仝款，伊tī紅 eⁿ’á ê時to̍hhō͘人放sat tī土地公廟內，後來hō͘一个khioh骨師「金斗á」收養。Chit位khioh骨師看破世間ê一切，一世人無買土地也無娶某，凊彩tī野外ê墓á埔邊á搭一間土角厝，tòa tī內面，日常替人khioh骨吃三頓。A明ê生活習慣當然受養爸真大ê影響。不而過阿明品行bē bái，性底溫和、恬靜、無愛講話。伊有一个絕招，就是kàu墓á埔去lia̍h蟋蟀á﹝sihsut’á﹞，養飼蟋蟀á，也真歡喜kā蟋蟀á送hō͘「我」。

※ Chit兩个gín’á ê感情真好，自ánne to̍h展開一段離奇、神秘、鬼怪ê交往……。 ※ tī chitê故事中，作者描寫中邪昏迷ê情形、khioh骨入甕ê經過、童乩做法ê過程、台灣下層鄉村ê生活、鬼怪ê傳說，lóng寫tīchit篇小說內底，非常精彩。

※ 台灣自70年代鄉土文學開始描寫台灣小人物以來，chit篇小說siōng kài下階層化、平民化。這是chit篇小說得著首獎ê最大原因。

※ 另外，作者ê語言非常在地、溜lia̍h、活骨， kā台語ê優美性lóng表現出來。人物ê描寫活潑，每一个人lóng真有個性。場景ê描寫也真幼路，真真正正寫出台灣庄腳ê景緻。情節也步步驚魂，有高度ê趣味性。

※ 所以，評審ê結果，得著首獎。

● 2.〈翻身‧番身〉chit篇小說是入圍作品。寫幾百年來，平埔族受盡漢人欺壓ê故事。

故事ê主角之一叫做陳添有，是清朝乾隆皇帝時ê台灣馬卡道人。Chitê人 kā伊ê kiáⁿ兒陳高太是當時族裡siōng gâu走標ê人，to̍h是送公文ê麻答。Kiáⁿ兒陳高太有一páitī送公文ê過程中，bat著縣老爺êchabó͘kiáⁿ喜春，兩人soah戀愛，後來喜春也有身。縣老爺是漢人，真苦惱，因為伊無想beh kāchabó͘kiáⁿ嫁hō͘番á。

※ 陳添有走標ê速度驚動清朝皇帝，台灣知府to̍h送伊kàu唐山，tī乾隆皇帝ê面前 kah馬á走標，陳添有走起來比馬á koh khah緊，結果得著皇帝賞賜。

※ 縣老爺感覺陳添有chit一對爸á kiáⁿ有一日一定會做大官，到時恐驚chabó͘kiáⁿ to̍h beh嫁給番á lah，所以縣老爺to̍h設計陷害chit對爸á kiáⁿ，講in兩人偷提官銀，叫人將in兩人lia̍h起來，想要處死陳高太。最後經過陳添有求情，由伊替陳高太死。陳添有tī死進前chiù重chōa，講以後kiáⁿ孫bē sái到伊ê墓前認祖，若無，一定有災禍，結果致使未來ê kiáⁿ孫凡是到墓前認祖ê人，m̄是死亡to̍h是起痟。

※ 最後一代有一个kiáⁿ孫叫做杰á，bat tī世大運得著金牌，伊 kā厝內ê人去祖先ê墓前祭拜認祖了後，結果小妹soahsoahhō͘漢人欺騙，吊tâu自殺。杰á為小妹報仇，用計thâi死對方，結果tī世大運中失神跋倒，最後起痟，失去人生ê一切……。

※ Chit篇小說是一个真大ê悲劇，短短ê小說，寫出平埔族幾百年來ê命運，是目前「西拉雅書寫」中ê傑作，意義非常重大，這是伊入圍êsiōng重要ê原因。

※ 作者ê文字是所有徵文者之間siōng好ê一位，語言十分在地，溜lia̍h koh有動作。人物非常突出，性格外形lóng寫kah真súikhùi。場景ê描寫幼路，真有畫面。情節安排真sùsī。

※ 假使作者ē tàng降低「大悲劇」ê氣氛，hō͘小說有淡薄ê光明，無的確會提著首獎。

● 3.「Mo͘h壁鬼」chit篇小說也是入圍作品。內容書寫噍吧哖事件。小說ê講者想起伊tī國中三年ê時，因為老爸hō͘上級調派到玉井警察分局，一家口á ê人to̍htòa 入去噍吧哖ê一个日本警察宿舍內底。tī宿舍內底，伊時常看著壁面出現一个20 gōa歲人ê形體，chit个形體其實是一个死去ê鬼。有一pái，chit个鬼á指示伊tī宿舍下kha the̍h一个柴箱á，裡面有一本日記，寫chit位鬼先生前經歷過ê噍吧哖事件。

※ 故事ê主角是一个日本時代ê台灣青年，伊tī警察局擔任巡查捕，kah一位台灣年輕女性「月娥」戀愛，最後有提起婚姻ê tāichì。Chit个女性是大富戶人ê chabó͘kiáⁿ，tòa tī一間五落大厝宅裡。噍吧哖事件爆發，日本屠殺余清芳chit幫反抗者ê時，附近莊頭to̍hlóng絞入去戰爭內底，月娥一家口ê人死傷無數，最後伊soah來跳古井自殺。Tī戰爭中，chit位台灣人巡查補並無幫助台灣人，顛倒是khiā tī日本警方ê立場，用槍thâi死真chē台灣人，月娥有當面責備伊。月娥自殺了後，伊也自殺死亡。

※ chit篇小說，寫出三腳á台灣人ê心內矛盾。

※ 這是一篇台灣歷史小說，一个chiahnih大ê事件，ē tàng用chiahnih少ê文字寫出來，真無簡單，這是入圍ê主要原因。

※ 作者ê文字無問題，散文ê技巧真好。人物ê性格lóng真突出。事件ê地景描寫幼路。

※ 假使作者ē tàng tī小說ê結構安排上koh khah活骨，避免硬chiaⁿ ê歷史文字kah寫法；ánne，chit篇小說to̍h ē koh khah好。

● 4.〈癮頭莊〉chit篇小說也是入圍作品。寫一个莊頭裡真chē人hō͘人騙錢ê tāichì。比如講：一表人才ê財哥tī國外騙人，hông lia̍h tio̍h了後，hō͘人送去中國審判，chìn前莊裡ê錢á舍bat借伊一筆錢，chit筆錢可能永遠to̍h the̍h bē tńg來à。又koh比如講：莊頭來一个外地ê phah拳賣膏藥ê師父，一直推銷傷藥，明珠ê amá用真chē錢買一大堆傷藥，吃了，mā m̄知有效á是無效。Koh比如講：有人到莊頭推銷一種叫做總統級ê布料，明珠ê外má也用錢買一塊布，又kohhō͘人騙去。明珠ê老母tī銀行ê門口tú tio̍h金光黨，the̍h假金條beh hām伊換現金，好kachài騙無成。Koh比如講：有人到莊裡推銷瓦斯保險器，一支ài七千元，有真chē人hō͘伊騙去，實際上瓦斯保險器ê價數只有幾百塊niāniā。Koh比如講：田中央有一个中藥行專門賣治療骨頭痠痛ê虎骨酒，一甕要幾萬塊，也有人hō͘伊騙去，lim一甕了後無功效，去找中藥行理論ê時，中藥行早to̍h已經搬走à……。總是，莊頭裡hō͘人騙去ê人實在有夠chē。

※ Chit篇小說內容真接近台灣庄腳ê日常生活實情，kā田莊人hō͘人騙去ê經驗lóng寫出來，有警世作用，也寫kah真趣味，這是入圍ê主要原因。

※ 作者ê文字也真滑溜，台語真在地。

※ 假使作者ē tàng加強描寫人物ê性格、外型描寫，避免人物只kantaⁿ是一个名字；同時加強莊頭ê景色描寫，to̍h會得到更加好ê成績。


● 5.〈黃昏e古亭町〉也是入圍作品。chit篇小說寫二戰末期日本人kah台灣人之間無法融合【有差別】所產生出來ê一个無成功ê戀情。

※ 故事ê男主角叫做育澤，是台南人，去北部讀台北高校，tòa tī學生宿舍。伊是學校文藝部ê一份子，真gâu寫小說。有一工去草山chhitthô tńg來，tī古亭區ê一tàⁿ擔á吃一碗米粉湯，tn̄g tio̍h一个真有氣質ê台北高女學生，叫做靜子，是日本人。當時落大雨，靜子借育澤一支雨傘，兩个人開始有感情，時常tī米粉湯擔á見面。後來育澤約靜子到北高見面，tī混亂中，靜子ùi育澤ê校服頂面所繡ê名字中發現育澤是一个台灣人，靜子一時pìⁿ面，soah講育澤欺騙伊。自ánne，兩人分開無koh見面。戰後，tī東京帝大畢業ê阿兄育壬ùi日本轉來，tī法院就職，228事件發生，chit位阿兄hông害死。育澤先tī高中教冊，後來去香港，koh偷渡去日本，繼續tī日本讀大學，提著博士學位。之後，開始tī日本推動台獨運動，辦《台灣青年》雜誌，有bē少讀者。某一工，一位《台灣青年》ê日本人贊助者來找育澤，原來chit位日本人to̍h是靜子ê翁婿。chit位日本人提一張靜子過身前寫ê批來hō͘育澤，chit張批當然是寫hō͘育澤ê，內容是會失禮，後悔伊少年時幼稚ê觀念傷害著育澤……。

※ Chit篇小說是一个歷史戲劇，對台灣戰前ê歷史做反省，真有意義。這是入圍ê最大原因。 ※ 作者所描寫ê人物性格lóng真突出，有時代感。場景ê描寫一流，景色活骨美麗。故事ê衝突性真大，戲劇性真強。

※ 文字、語言方面，假使作者ē tàng koh khah口語化一點點á，koh khah接近台灣人日常所使用ê語言，ánne，chit篇小說to̍h ē koh khah有價值。
──2017、10、19寫於鹿港