《台語chit條路》

 | | | 轉寄

《台語chit條路》--建立台語文ê文學批評─林央敏訪問(十二）

作者 謝瑞華 2009.01.04

林：做che ê時m̄是干taⁿ做一項物件然後傳播出去niâ，有傳播著、無傳播著攏m̄知影，算做咱道是面對面落去傳播。另外我感覺有一點真重要，台文，尤其是文學部分愛建立文學批評；台文ê文學批評。你若認為你個人做文學創作尚介適合，你道去做創作，另外chiah koh來做推廣。a你若對正統台灣文學有興趣，m̄-koh創作ê能力khah bái，你會使行台語文學批評，ùi理論chit部分來行，建立咱家治台語文學ê文學批評。咱若beh ǹg望目前teh寫批評ê文學批評家來研究台語文學是chiok困難＝e，伊若有teh接觸ê時chūn是kā咱看bōe起，所以咱家治著來做。我個人是有做寡，但是我chit生無法度做正式ê學者，做文學家道好。che oan-ná愛按呢，咱台語文學chiah會加khah有力量。評論ê時chun7khah m̄免hit種藝術天份，有智慧、有眼光、有批評ê道行道會凍。寫好寫bái he攏另外一回事。像我若teh寫台灣ê台語文學kap中文文學ê比較ê時，我發現幾十冬ê中文文學藝術性已經無贏過咱台語文學ê藝術性，但是咱一定愛證明hō͘人看，詩ê部分無輸＝a lah，因為khah chē人寫、khah短、藝術性khah好照顧著，小說、散文是iah koh輸人thiám-thiám。che是創作部分愛加強＝e，批評ê部分ma7chiok需要ê。現步鄭良偉、洪惟仁叫in做文學批評in無法度，鄭良偉對文學ê了解，我感覺koh比洪惟仁khah淺，洪惟仁會凍做解說、分析chia ê khang-khòe，文學批評kán-ná khah做bōe來，鄭良偉干taⁿ會凍做語言kap研究kap推廣，文學批評稻khah無法度。beh做文學批評除了讀文學作品以外，mā愛有寡美學眼光，文學kap非文學chia ê理論mā愛知，所以講在座各位，若有人感覺beh寫台文，但是寫ê台文khah m̄是文學性，文學性＝e khah無法度，你道來寫理論性＝e，按呢來kā發揚。

用家治尚介切身ê語言來寫絕對是bōe bái lah！

凰：翻譯咧？

林：若beh翻中文作品，翻譯中國人ê作品做台語，本地ê作家咱愛逼伊、鼓勵伊改用台文寫，我ê原則是按呢，beh翻伊ê作品mā無要緊，道是儘量鼓勵伊用台文寫，伊ê中文詩、中文小說既然寫了chiâⁿ好，伊若用尚介切身ê語言來寫也絕對bōe bái＝e lah！初期準做bōe使，像我無認為我ê台文作品輸我ê中文作品。另外，翻譯西洋人、外國作品oan-ná有需要。

江：你主要teh講＝e是西洋作品。

凰：khah健康性＝e。

林：翻西洋ê作品我無啥會曉，但是我mā kā試看mài 咧！bat翻過四首英國詩kap美國詩，翻kah chiok艱苦＝e，無啥會曉。

用台語思考是寫作介大ê方便，因為台語ê音域chiok闊、調khah chē，聲調kap調配合起來加真闊lah！所以譯音beh譯hō͘準比中文容易… (阮ê訪問，tī師母熱情招呼阮留落來食暗ê聲音中結束。)