《台語chit條路》

 | | | 轉寄

《台語chit條路》--建立台語文ê文學批評─林央敏訪問(一)

作者 謝瑞華 2008.10.19

br>
時間：1993年8月初1下晡2：30至6：00 地點：林央敏老師in tau(桃園縣龜山鄉永吉街178號4F 參加者：滷卵、慧真、自敬、允言、為文、瑞華、永進、春凰 整理：瑞華 phah字：允言

前言

凰：你chit-má攏寫台文--a，是m̄是？

林：兩種攏有寫，尤其若創作主要攏台文。

凰：你〈西北雨直直落〉hit篇是台文？

林：he原文是台文，尾—akoh翻做中文。因為hit chūn我寫--ê攏台華對照。台文ê冊規本--ê我干taⁿ hit本【駛向台灣ê航路】。恁chit遍是台灣全國teh走iá是按怎？

言：是有一ê計畫，toh是beh來採訪台文ê工作者，將chit-ê資料整理起來，譬如講老師以前ê經歷，iá是chit- má有啥麼計畫，老師會使家己講，阮若感覺有欠--e iá是àn-nóa，chiah koh問，看老師beh講啥儘量講。

卵：ùi偉大ê出生年月到神話傳說，為台灣來拍拚…

林：我ê年表，【霧夜ê燈塔】、【第一封批】chit兩本冊加減有列出來。1995年出世tī台灣尚大ê嘉南平原ê中心，王得祿放落來土地太保鄉，gín仔時代是足艱苦--ê，箸我ê真chē作品攏有寫過。

正式創作文學

林：正式創作文學，第一篇作品hō͘人印做印刷品ê字到chit- má已經是二十二冬前，主要是發表詩，he攏是中文ê作品，ùi hia開始。第一篇tī khah早ê中央日報發表，koh來聯合報。因為唯美--e，不管詩iá是散文攏chit類--e。

思想ê改變

林：尚大ê改變是做兵以後，會來改變，可能個性也有關係。我個性khah愛思考，想東想西，若看著kiâu正義、家治信仰ê真理無仝攏會去kā批判。退伍了吸收chiok chē關係民主、文化、自由、人權chit種ê思想理論。我感覺，chit-ê社會真奇怪，ná會一直講民主，講啥主權tī人民身上，但是我發覺講--e kap事實無仝，chiah引起我ê思想ta̍uh-ta̍uh仔變，美麗島事件，因為受媒體、教育ê影響，hit chūn我mā認為黃信介、許信良、林義雄、姚嘉文…hia ê攏是叛徒。hit chūn我調來一間新學校，teh種理前任老師留落來ê桌仔ê時chūn，發現著許信良永過競選縣長時ê一寡文宣品，像【風雨之聲】節錄本，hit chūn看著cheboe7輸是看著共匪仔ê傳單，心內驚驚，但是我無交出去，chôaⁿ收起來。我是讀冊人，愛冊我著kā藏tī我toa3e5倉庫裡，有一暝hia ê冊the̍h起來讀，讀--e是許信良tī省議會ê質詢稿，一面讀、一面讀，感覺伊內面所質詢著ê錯誤，台灣政治iá是政策錯誤造成ê弊害，親像感受著--e仝款。因為我是作田人ê子弟，看著chiok感動--e，著teh思考講報紙攏報導許信良是叛徒，外nī殘酷，m̄-各伊ê質詢稿卻是替台灣人、百姓，特別是散赤ê人講話，讀起來chiok感動--e，所以對政治ê問題我開始認真去思考、關心，因為按呢煞造成我ê大改變。