《台語chit條路》

 | | | 轉寄

《台語chit條路》--加學、加聽，做肥底 ─ 洪惟仁訪問(二十)

作者 楊允言 2008.09.14

台語刊物

(講著刊物kā人改字ê問題。)

洪：黃勁連mā kā人改，我寫ê序言，叫伊mai3ka7我改，結果mā攏kā我改用字。{註：黃勁連台語詩集【ak-齪ê城市】}逐家攏kiāu黃勁連kā改用字，伊tō講：無，你來編！

進：我認為伊ê態度是著ê，你khah gâu，無，你來編。

洪：黃勁連改別人ê文章是應該，改我ê無應該lah。

卵：改師父ê。

洪：我mā一粒頭chiok大ê，伊改別人ê無應該，伊改別人ê我真歡迎，因為伊若準無改，正經無法度看，伊不但kā人改字，連文章ê內容攏kā人改。其實我teh編《台語文摘》mā是按呢，有ê用詞攏mā kā改，因為用m̄著a，番藷詩刊，假使無黃勁連根本to bōe看ê。

言：真chē作家攏ùi北京話轉過來ê，寫ê時加減iá會lām一寡北京話。(討論著《台文通訊》連誼會ê情形、福佬ê語源、漳泉lām ê情形…)

近況

言：老師，你目前手邊ê空課有啥麼？方言調查、《台語文摘》，iá koh有啥？

洪：台灣語文學會，但是攏我一ê人teh舞，無閒bōe去；方言調查是尚介重ê空khòe。

我是有一ê希望lah，恁chit寡少年人，我想beh hō͘恁一寡建議，我生長ê過程，tī大學ê時chūn，pìⁿ台語干taⁿ我一ê人，hit chūn我開始teh寫台語，寫寫leh tō teh寫批a，無人認同，我雖然無gâu讀冊，m̄-koh mā會使算講不離仔會讀冊，像咱chit款人著是台灣話khah hām-bān講，我對台灣話ê研究是khah早覺悟，咱koh有hit ê敏感，koh去讀文獻。

我是希望恁，因為恁chit-má環境比阮khah好，資料真好chhōe，尚好是聽khah chē leh、看khah chē leh，假使無hit ê根底，正經beh講話ê時講bōe出來，所以，恁beh按怎去增加恁ê語詞，會使去訪問老人。另外，因為日本人有留真chē好ê台語資料，所以，著bōe曉日文，無法度。

我chit- má beh申請去日本。

言：老師，he是啥麼單位請你去ê？

洪：交流協會，beh去半年，我beh去寫一ê題目，著是小川尚義，我beh討論ê是伊漢語研究ê部分。中國漢語研究做尚chē ê，是瑞典一ê學者，叫做高本漢，伊用瑞典語落去寫，mā有用英語，趙元任到1923 ê時chūn，chiah翻做華語，對中國聲韻學ê研究，造成真大ê革命；方言學研究mā是高本漢開始ê，伊著是研究中國語文史ê時chūn去做中國各地ê方言調查，hit當chūn根本to無人teh調查方言，伊1915年開始發表，但是小川尚義1907 tō發表日台大辭典，內底有兩百幾頁，比較ê材料比高本漢khah有代表性，但是無人bat伊。 我去日本，著是beh寫小川尚義kap高本漢ê比較。我寫chit篇文章，著是beh hō͘日本iá是世界ê人知影，tī台灣oan-ná有真特出ê人，我是借用小川chit-ê人來做一ê例，表示講日本人hit chūn tī台灣，真正有真chē優秀ê人才，m̄-koh是干taⁿ伊niâ，我為啥麼beh提chit-ê題目？中國語言史是全世界ê漢語學家所關心ê物件，我tō提chit-ê hō͘ in知影講，台灣ê物件bōe使hō͘視。m̄是干taⁿ小川尚義，其他ê人mā是仝款，mā beh kā in講，台灣人ê成就，mā有chiok好ê。

koh譬如講日本人tú來台灣ê時chūn，hit chūn有一ê伊澤修二，伊是學務部第一任ê部長，相當chit-má教育部長，伊寫ê第一本冊是【中華字音鑑】，伊寫chit本冊，去kā日本ê首相講，咱chit- má beh統治台灣，我編chit本冊會凍了解台灣ê音按呢lah，伊chhōa差不多一百ê會曉北京語ê軍官，來到台灣，chiah發現，ê，台灣人攏總bōe曉北京語，伊hit本冊煞無路用，chiah開始訓練日本人台灣話，tō tī芝山岩；伊主要teh研究台灣話，伊編課本，教日本人讀，而且koh再教台灣人日本語，台灣人去hia上課差不多chiâⁿ十ê niâ，he台灣êアイウエオ注音符號按怎來ê你知bò͘？著是hit本【中華字音鑑】，【中華字音鑑】是標北京語，he標攏標甲chiok標準ê，chit-ê人是留美ê，去美國研究教育，伊對音韻學真有研究，來到台灣，taⁿ死a，我這北京語ê音標to無路用a，tō將chit-ê音標kā改做來寫台灣話，所以對台灣話ê研究，我m̄是teh自誇，我是多方面ê、深入tī teh做研究，m̄是清清彩彩講講ê nā-niā，不管文獻iá好、方言調查iá好，這攏chiok基本ê，無人beh做ê空khòe，我來做。