《台語chit條路》

 | | | 轉寄

《台語chit條路》--加學、加聽，做肥底 ─ 洪惟仁訪問(十四)

作者 楊允言 2008.08.03

台灣語言政策 (講著福佬話受北京話透lām、入侵ê情形。)

卵：政權攏tī北部，北部愈來愈外來、愈放棄，北部khah早接受現代化，khah早放棄原來ê話。

洪：你若講福佬話亡去，che確實是北京話ê競爭，he完全是政治ê，若講台灣話腔口會變，che攏自然ê，像台北，講外省人有25﹪，mā少數a，但是我一四界去聽，攏講華語，所以我講台北已經淪陷去，chit-má台灣hò͘ⁿ，聽話尚爽快ê，to宜蘭、台東。

進：高雄mā bōe bái。

洪：市內ne，去hia食飯mā『歡迎光臨』。

卵：老師你講chit-ê我chiah想著，有一擺阮去師大分部hia食飯，入去in講『歡迎光臨』，可能阮tī內底講福佬話，beh賜走ê時chūn伊著講『chiah koh來』。

洪：一開始著假設你是外省人a，我真tu̍h-lān chit款ê，bōe chêng bōe著假設我是外省仔。我感覺語言hò͘ⁿ，m̄是咱tī chia推sak台語對好a，這是社會問題，社會問題著是政治問題，所以你政治ê問題先解決，koh來著是社會問題，所以我一直teh講，講華語ê人，你kā歧視mā無要緊，有人會講『咱mài歧視in lah』，我kā你講，咱hō͘ in歧視四十年a，歧視久，懶著有才調講，ê，按呢m̄好，自然著會解決a。有當時仔愛khah殘忍lah，一ê物件hông áu oan去，你若beh chhiâu hō͘直，著愛彎khah過來ê，chiah chhiâu會正，咱hông罵無要緊a，咱to甘願去hông罵。

卵：老師：依對台灣未來ê語言政策，烤比講共同語、語言環境按怎，老師ê理想是啥？

洪：你是講，chiah呢chē ê語言做伙，beh按怎尚理想？

我感覺客人應該愛保存in ê母語，tī客人ê地區內底講客語，che是in ê權利，但是若準tī全台灣，應該是福佬話做標準，che chiah是正常，因為全台灣福佬人佔多數，多數人ê語言當做標準語真正常，華語kā當做外國語，咱對外國話mā m̄ thang好歧視，英語咱to teh學a，華語mā是真有路用ê一ê語言，是按怎愛kā歧視，無必要，尚介chē人講ê話做標準話是正常，像講印度，in有國家ê標準語，但是各省有各省ê省語，各省內底，各縣mā可能有縣語，che攏縣定ê語言，是合法ê，你講會亂，哪會使按呢講，he本chiâⁿ著愛按呢a，一ê地區用in尚自然ê話做標準語，che尚介自然ê a。

卵：雖然che是真自然，但是chit-má iá koh無啥人敢講。

洪：主要驚客人。

卵：我參加chiok chē客人ê活動，in若講著共同語，攏主張用北京語，chit-ê問題chiok歹處理ê，伊tō講北京話你mā聽有，為啥麼無愛用，chiok歹去kā人說服ê。

洪：像鐘肇政，伊甘願講北京話，著是無愛講福佬話。 卵：我聽蕨伊講福佬話lah。

洪：tī台灣筆會，伊第一句一定是客話，chiah講北京話按呢福佬話絕對無愛講。像伊kap巫永福講北京語，巫永福kā講『你講客話lah，你講客話lah，我聽有。』其實，講客話實在是聽無lah，聽三、四siâⁿ著chiok gâu ê。你chit-má kā說服無路用，in chit- má有一ê危機感，in感覺尚大ê敵人是福佬話，所以咱對chit種少數ê人，愛抱著一種愛護ê心理，但是mā bōe凍卒仔食過河a，siuⁿ過ah霸、siuⁿ過無理mā是抹使。