《台語chit條路》

 | | | 轉寄

《台語chit條路》--加學、加聽，做肥底 ─ 洪惟仁訪問(九)

作者 楊允言 2008.06.29

言：是按怎無出版？

洪：做了無好mà，無完全，資料太chē，收集bōe齊全。事實實在是做了無好，我家治mā m̄敢發表，內底有一寡資料我一直beh補，但是攏無時間，he若補補ê，我著會出版a。

入去研究院，方言調查做一年，頭a計畫是真大，報名beh做調查ê真chē，但是落尾大部分ê khang-khòe是我做ê，所以計畫不得已著愛停起來。我soah變做約聘助理研究員，約聘兩年ê時間；我利用chit兩年ê時間，編一套【閩南語經典辭書彙編】。

真早ê時chūn，我著kā自立晚報講，我beh編一套閩南語字典ê全集，閩南語字典差不多有百幾集套，我講咱kā伊總出，自立晚報無愛，到尾a我tú著林聰夫﹝註：武陵出版社頭家﹞，伊講『你che計畫to有趣味！』我hit chūn m̄敢講全集，我講，è，精選著好，算算ê有十本，伊講無稿費，我講『無要緊，我tī中央研究院有薪水，你hō͘我khah chē稿費mā無夠hia ê本錢。』伊講『我送你十五套。』出兩百套送我十五套。

﹝註：【閩南語經典辭書彙編】一套十本： 第一本【泉州方言韻書】/黃謙等編 第二本【漳州方言韻書】/謝秀嵐等編 第三本【福建方言字典】/麥都思編 第四本【廈英大辭典】/杜嘉德編‧巴克禮補編 第五、六本【日台大辭典】/小川尚義編 第七、八本【台日大辭典】/小川尚義編 第九本【台灣語常用語彙】/王育德編 第十本【台灣十五音辭典】/黃有實編﹞

言：chit-má賣了按怎？

洪：大部分攏mā我kā賣ê，無生理lah。

言：尚過貴a lah，像阮學生根本買bōe起。

洪：你若無teh做研究是無需要買，若是有心做研究一定愛買。

言：問題是講，內底有幾本阮早著有a。

進：我m̄是kā你講過，拆leh賣。

言：我mā感覺按呢khah通lah。

洪：先愛將chit兩百套賣完，因為伊歹處理，伊chit-ma2hou7你調一本去，chhun ê beh按怎？其實chit內底是攏無啥好銷。但是尚重要ê是，我其實m̄是干taⁿ beh賣he資料niâ，最重要頭前ê題解kap研究，he 下gōa chē工夫ne！我干taⁿ beh寫王育德，尚chió用過半年ê時間，王育德ê文章外chē leh你知m̄？干taⁿ伊博士論文著hiah大本，我攏看ne，我m̄是凊采寫寫ê，伊ê文章toh一篇刊tī toh一本雜誌，逐篇我攏chhōe出來看，做年表，王育德ê年表有人做a，所以我無做，像麥都思、杜嘉德、巴克禮，he攏mā是愛做年表、傳記，我以前根本m̄知影啥麼叫做麥都思，伊有漢名我mā m̄知，著查資料，chiah知影chit-ê人ê來歷，有夠厲害！台灣話研究者inkhah早做ê物件實在愛了解，了解人是做啥麼khang-khòe，chiah知影咱chit-má khang-khòe愛按怎做，咱ê成就beh按怎比in khah高？ 這是做研究ê部分，其實我ê khang-khòe m̄是攏純研究ê，研究是算做我ê基礎。