《台語chit條路》

 | | | 轉寄

《台語chit條路》--加學、加聽，做肥底 ─ 洪惟仁訪問(七)

作者 楊允言 2008.06.15

洪：hit陣仔有ê著是董同龢ê物件，iá koh有，吳守禮，吳守禮ê物件chiok chē ê a，伊是算戰後尚介有研究ê，khah早ê老前輩li，a董同龢是khah有學術性ê，像阮老師ê物件我攏mā有看，所以m̄是講beh寫chia來做研究，本來著有hit-ê底。 廖：老師，恁hit-ê時代ê環境，大部分攏是講台語，m̄-koh阮chit-má攏是講國語a，像我chit-má著改無啥會過來。 洪：著lah，像恁chit-má khah少年，抵著攏mā講華語，著bò？阮hit chūn講台灣話，kap外省人chiah有講華語、台北華語。其實恁mā m̄是講北京語，北京語m̄是按呢，北京語語詞真豐富，平平講北京語，台灣著輸in thiám-thiám，啥麼原因？咱chit-pêng講ê話語，ó͘，chiok艱苦ê，he話攏用tèⁿ ê，tèⁿ kohboe7出來，人in凊采講著有詞，hiah自然、有土地mà，所以台灣ê華語實在是無啥麼價值，無土地ê lah。語言是按怎？是hit-ê生活chiah有hit-ê語言，有hit-ê語言chiah有hit-ê文字，有hit-ê文字chiah有文學；今仔日伊m̄是，倒péng，先有文字、有文學，chiah koh學語言，按呢無自然，華語過來台灣，語詞làu鉤真chē，有ê詞無a，beh按怎？著創新。伊chit-má來kah chia，beh適應，會吸收一寡台灣話lah，所以產生一種新方言。a有人問講『che m̄是算做語言ne，是lingua franca，普通話。』我講m̄是ô͘，華語tī台灣，確確實實有人以chite5語言做伊ê母語，有伊ê使用人口，所以確確實實是方言，已經tī台灣釘根a。 言：che，電視若攏用台語著好a，in hia自細漢著一直看一直看。 卵：老師，你開始是接受學院派ê，kah尾a接觸日本時代ê資料iá是講字典，he是當時ê代誌？ 洪：he mā是最近十年以來ê代誌，做che著愛感謝吳守禮教授，吳守禮有做過真chē書目，書目kā你講啥麼時chūn出啥麼冊，著一本仔一本仔去chhōe，hit陣仔趁ê錢攏the̍h去買hit寡冊。 言：老師，tī toh位買有？ 洪：舊書攤。 卵：ô͘，che著貴a。 洪：收集資料a，台北ê舊冊攤有著kā買起來，攏日文ê，好家在我日文看有，若無beh研究台灣話著無可能，日本人留落來ê物件太chē，你若bōe曉日文tio̍h干taⁿ中文ê，但是中文ê無啥麼物件，一寡縣誌，hia太少，日本人khah有受著現代學術ê洗禮，in ê研究加chiok清楚ê，ma7chiok用心ê，恁若想beh做khah深ê研究，日文愛會曉。 hit當時仔，一本冊六千箍、八千箍，我著愛趁一個月ne，但是我mā是kā伊買起來。但是家tī生活無問題，我m̄免煩惱厝nih ê生活，chit條路行了順序順序，是愛感謝阮太太，我to四界走，tī厝nih ê時間mā無chē。