《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第九章

作者 巴克禮普世版小組 2013.06.09

Iâ-so͘ Chhe-phài Cha̍p-jī Sù-tô͘ (Mt 10:21, 5-15; Mk 6:27-13)
1 Iâ-so͘ kiò cha̍p-jī sù-tô͘ lóng lâi, hō͘ in ū lêng-le̍k kah koân-pèng, thang chè-ap lóng-chóng ê siâ-sîn, koh i-tī só͘-ū ê pēⁿ-chèng. 2 Jiân-āu chhe in khì thoân Siōng-Chú Kok-tō͘ ê Hok-im, koh i-hó pēⁿ-lâng. 3 Koh kau-tài in kóng, " M̄-thang tòa lō͘-hùi, m̄-thang tòa koái-á, m̄-thang tòa hêng-lí-tē, m̄-thang tòa kan-niû, m̄-thang tòa chîⁿ-gîn, mā m̄-thang tòa nn̄g niá saⁿ. 4 Lín bô-lūn ji̍p-khì tó chi̍t-keng chhù, tio̍h tòa tī hia, mā tio̍h tùi hia chhut-hoat. 5 Lâng nā bô chiap-la̍p lín, lín lī-khui in ê siâⁿ ê sî, tio̍h kā lín kha-ni̍h ê thô͘-hún pōaⁿ-tiāu, lâi kā in kéng-kò." 6 Bûn-tô͘ chiū chhut-khì, tī hiah-ê chng-siā kiâⁿ thàu-thàu lâi thoân Hok-im, koh tī ta̍k só͘-chāi i-hó pēⁿ-lâng.

Hi-lu̍t-ông ê Put-an (Mt 14:1-12; Mk 6:14-29)
7 Hun-hong ê ông Hi-lu̍t thiaⁿ-tio̍h só͘-ū hoat-seng ê tāi-chì, sim-lāi hui-siông put-an, in-ūi ū-lâng kóng, Iok-hān tùi sí-lâng tiong koh-oa̍h. 8 Mā ū-lâng kóng sī Í-lī-a chhut-hiān. Koh ū-lâng kóng sī kó͘-chá sian-ti tiong-kan ê chi̍t-ê koh-oa̍h. 9 M̄-koh Hi-lu̍t kóng, " Iok-hān góa í-keng kā i chām-thâu à. Taⁿ góa thiaⁿ-tio̍h lín teh kóng chit-ê tàu-té sī siáⁿ-lâng?" I chiū chhōe ki-hōe ài-beh kìⁿ Iâ-so͘.

Iâ-so͘ Hō͘ Gō͘-chheng Lâng Chia̍h Pá (Mt 14:13-21; Mk 6:30-44; Ih 6:1-14)
10 Sù-tô͘ tńg-lâi, chiong in só͘ chò ê tāi-chì pò-kò hō͘ Iâ-so͘ thiaⁿ. Iâ-so͘ chiū chhōa in siám-phiah, khì-kàu chi̍t-ê kiò-chò Pek-sài-tāi ê siâⁿ. 11 M̄-koh kûn-chiòng chi̍t-ē chai chiū koh tòe I khì. Iâ-so͘ kā in hoan-gêng, kóng Siōng-Chú Kok-tō͘ ê Hok-im hō͘ in thiaⁿ. Koh i-hó hiah-ê su-iàu i-tī ê lâng. 12 Thiⁿ beh àm ê sî, cha̍p-jī sù-tô͘ lâi kā Iâ-so͘ kóng, " Chhiáⁿ kā kûn-chiòng kái-sàn, hō͘ in khì sì-chiu-ûi ê chng-siā, siat-hoat tòa kah chia̍h, in-ūi lán chia sī phian-phiah ê só͘-chāi." 13 Iâ-so͘ tùi in kóng, " Lín tio̍h siat-hoat hō͘ in chia̍h." In kóng, " Lán chia kan-tāⁿ ū gō͘-tè piáⁿ, nn̄g-bóe hî. Goán nā bô khì bé, ná ū kàu chiah-ê kûn-chiòng chia̍h?" 14 In-ūi kûn-chiòng chha-put-to ū gō͘-chheng lâng. Iâ-so͘ tùi bûn-tô͘ kóng, " Kiò kûn-chiòng hun cho͘ chē lo̍h-khì, múi cho͘ chha-put-to gō͘-cha̍p lâng." 15 Bûn-tô͘ chiàu án-ne chò, hō͘ kûn-chiòng lóng chē lo̍h-khì. 16 Iâ-so͘ the̍h gō͘-tè piáⁿ kah nn̄g bóe hî, ǹg thiⁿ kám-siā liáu-āu peh-khui, the̍h hō͘ bûn-tô͘ khì pun hō͘ kûn-chiòng. 17 Ta̍k-ke lóng chia̍h kàu pá. Bûn-tô͘ khioh só͘ chhun ê piáⁿ-sut-á, lóng-chóng ū cha̍p-jī nâ.

Pí-tek Sêng-jīn Iâ-so͘ Sī Ki-tok (Mt 16:13-19; Mk 8:27-29)
18 Ū chi̍t pái, Iâ-so͘ ka-kī teh kî-tó ê sî, bûn-tô͘ kah I tī hia. Iâ-so͘ mn̄g in kóng, " Chèng-lâng kóng Góa sī siáⁿ-lâng?" 19 Bûn-tô͘ ìn kóng, " Ū-lâng kóng, Lí sī kiâⁿ-sé-lé Iok-hān; mā ū-lâng kóng, Lí sī Í-lī-a; koh ū-lâng kóng, Lí sī kó͘-chá chi̍t-ê sian-ti koh-oa̍h." 20 Iâ-so͘ koh mn̄g in kóng, " Á lín ê khòaⁿ-hoat lè. Lín kóng Góa sī siáⁿ-lâng?" Pí-tek ìn kóng, " Lí sī Siōng-Chú só͘ siat-li̍p ê Ki-tok."

Iâ-so͘ Ī-giân I ê Sí-bông kah Koh-oa̍h (Mt 16:20-28; Mk 8:30-9.11)
21 Iâ-so͘ bēng-lēng in m̄-thang chiong chit hāng tāi-chì kā lâng kóng. 22 Iâ-so͘ sòa lo̍h-khì koh kóng, " Jîn-chú it-tēng tio̍h siū chin-chē kan-khó͘, ē hō͘ tiúⁿ-ló, chè-si-tiúⁿ, keng-ha̍k kàu-su só͘ khì-sak, koh hō͘ in hāi-sí, tē-saⁿ ji̍t Siōng-Chú hō͘ I koh-oa̍h." 23 Iâ-so͘ koh tùi kûn-chiòng kóng, " Lâng nā beh ài tòe góa, tio̍h pàng-sak ka-kī, ta̍k-ji̍t giâ i ê si̍p-jī-kè lâi tòe góa. 24 In-ūi ài beh kiù ka-kī sèⁿ-miā ê lâng ē sòng-sit sèⁿ-miā, m̄-koh nā ūi-tio̍h Góa lâi sòng-sit sèⁿ-miā ê lâng tian-tó ē kiù-tio̍h ka-kī ê sèⁿ-miā. 25 Lâng tit-tio̍h choân sè-kài soah sòng-sit ka-kī, á-sī sún-hoāi ka-kī, ū siáⁿ-mi̍h lī-ek lè? 26 Tùi Góa kah Góa ê ōe kám-kak kiàn-siàu ê lâng, Jîn-chú tī ka-kī kah Thiⁿ-Pē í-ki̍p sèng thiⁿ-sài ê êng-kng tiong lâi-lîm ê sî, mā ē ūi-tio̍h hit-ê lâng kám-kak kiàn-siàu. 27 Góa si̍t-chāi kā lín kóng, " Khiā tī chia ê lâng, ū-ê iáu-bōe sí í-chêng, ē khòaⁿ-tio̍h Siōng-Chú Kok-tō͘."

Iâ-so͘ Kái-piàn Hêng-siōng (Mt 17:1-8; Mk 9:2-8)
28 Kóng chiah-ê ōe liáu chha-put-to peh ji̍t āu, Iâ-so͘ tòa Pí-tek, Iok-hān, Ngá-kok chò-hóe chiūⁿ soaⁿ khì kî-tó. 29 Kî-tó ê sî, Iâ-so͘ ê bīn-māu ū kái-piàn. I ê saⁿ piàn kah pe̍h-siak-siak koh kng-iàⁿ-iàⁿ. 30 Hut-jiân-kan ū nn̄g-ê lâng, chiū-sī Mô͘-se kah Í-lī-a, lâi kah Iâ-so͘ kóng-ōe, . 31 In tī êng-kng tiong chhut-hiān, tâm-lūn Iâ-so͘ teh-beh tī Iâ-lō͘-sat-léng sí-khì, lâi oân-sêng Siōng-Chú ê chí-ì. 32 Pí-tek kah tâng-phōaⁿ lóng thiám kah khùn-khì. In cheng-sîn ê sî chiū khòaⁿ-tio̍h Iâ-so͘ ê êng-kng, í-ki̍p kah I khiā chò-hóe hit nn̄g lâng. 33 Hit nn̄g lâng teh-beh lī-khui Iâ-so͘ ê sî, Pí-tek kā Iâ-so͘ kóng, " Lāu-su, Lán tī chia chin hó. Goán lâi tah saⁿ-keng liâu-á, chi̍t keng hō͘ Lí, chi̍t keng hō͘ Mô͘-se, chi̍t keng hō͘ Í-lī-a." I si̍t-chāi m̄-chai ka-kī teh kóng siáⁿ-mi̍h. 34 Kóng chiah-ê ōe ê sî, ū hûn kā in tà teh. In hō͘ hûn pau-ûi teh, chiū khí kiaⁿ-hiâⁿ. 35 Ū siaⁿ tùi hûn-ni̍h chhut-lâi kóng, " Chit-ê sī góa ê Kiáⁿ, góa só͘ kéng-soán ê. Lín tio̍h thiaⁿ I ê ōe." 36 Hit-ê siaⁿ kóng liáu, chiū chhun khòaⁿ-tio̍h Iâ-so͘ ka-kī tī hia. Bûn-tô͘ tiām-tiām bô chiong só͘ khòaⁿ-tio̍h ê tāi-chì kā lâng kóng.

Iâ-so͘ I-hó Siâ-sîn Hū-sin ê Gín-á (Mt 17:14-18; Mk 9:14-27)
37 Keh-tńg-ji̍t, in tùi soaⁿ-téng lo̍h-lâi ê sî, ū kui tōa-tīn lâng lâi gêng-chiap Iâ-so͘. 38 Kûn-chiòng tiong-kan ū chi̍t-ê lâng tōa-siaⁿ hoah kóng, " Lāu-su ah, kiû Lí lâi khòaⁿ góa ê kiáⁿ, i sī góa ê ko͘-seⁿ-kiáⁿ. 39 I nā hō͘ siâ-sîn hū-sin chiū sûi-sî tōa-siaⁿ hoah, hō͘ i thiu-chhoah kah phū pe̍h-pho nōa, koh tāng-tāng kā i siong-hāi, lóng bô beh pàng i soah. 40 Góa ū chhiáⁿ Lí ê bûn-tô͘ kóaⁿ siâ-sîn, m̄-koh in lóng bô hoat-tō͘." 41 Iâ-so͘ ìn kóng, " Ài ah, m̄ sìn koh pōe-ge̍k ê sè-tāi! Góa tio̍h koh kah lín tòa jōa kú? Tio̍h koh jím-nāi lín jōa kú? Kā lí ê hāu-seⁿ chhōa lâi chia!" 42 Gín-á hō͘ lâng chhōa lâi ê sî, siâ-sîn kā i siak tó, hō͘ i tōa thiu-chhoah. Iâ-so͘ chiū chek-pī siâ-sîn, i-hó hit-ê gín-á, kau hō͘ i ê lāu-pē.

Chèng-lâng tùi Siōng-Chú ê tōa ui-giâm, lóng kám-kak tio̍h-kiaⁿ koh kî-koài .

Iâ-so͘ Tē-jī Pái Ī-giân I ê Sí-bông (Mt 17:22, 23; Mk 9:30-32)
43 Chèng-lâng iáu teh kî-koài Iâ-so͘ só͘ chò ê tāi-chì, hit sî Iâ-so͘ tùi bûn-tô͘ kóng, 44 " Chiah-ê ōe lín tio̍h chù-ì thiaⁿ, in-ūi Jîn-chú teh-beh hō͘ lâng chhut-bē, kau khì hō͘ lâng ê chhiú-thâu ā." 45 M̄-koh bûn-tô͘ bē bêng-pe̍k chit-kù ōe ê ì-sù, in-ūi ū tùi in am-khàm chit-kù ōe ê ì-sù hō͘ in bē-tàng liáu-kái. Bûn-tô͘ mā m̄-káⁿ mn̄g Iâ-so͘ chit-kù ōe ê ì-sù.

Siáⁿ-lâng Siōng-tōa (Mt 18:1-5; Mk 9:33-37)
46 Bûn-tô͘ tiong-kan hō͘-siōng cheng-lūn, khòaⁿ siáⁿ-lâng beh chò tōa. 47 M̄-koh Iâ-so͘ khòaⁿ-chhut in sim-lāi só͘ cheng-lūn ê tāi-chì, chiū khan chi̍t-ê gín-á hō͘ i khiā tòa sin-piⁿ, 48 chiah kā in kóng, " Lâng nā ūi-tio̍h Góa ê miâ chiap-la̍p chit-ê gín-á ê, chiū-sī chiap-la̍p Góa; chiap-la̍p Góa ê chiū-sī chiap-la̍p chhe Góa lâi ê Hit-ūi, in-ūi tī lín chèng-lâng tiong-kan siōng bî-sè ê, chiū-sī siōng úi-tāi."

Bô Hoán-tùi Lín Chiū-sī Chàn-sêng Lín (Mk 9:38-40)
49 Iok-hān ìn kóng, " Lāu-su, goán ū khòaⁿ-tio̍h chi̍t-ê lâng ēng Lí ê miâ teh kóaⁿ-kúi. Goán kā i chó͘-tòng, in-ūi i m̄ sī kah goán kāng-khoán teh tòe Lí ê lâng." 50 Iâ-so͘ tùi i kóng, " M̄-thang kā i chó͘-tòng, in-ūi bô hoán-tùi lín ê chiū-sī ūi lín."

Sat-má-lī-a-lâng Kī-choa̍t Iâ-so͘ (Mt 8:19-22)
51 Iâ-so͘ siū chiap chiūⁿ-thiⁿ ê ji̍t-kî teh-beh kàu, chiū koat-ì beh khì Iâ-lō͘-sat-léng. 52 I chhe-phài sù-chiá chò I ê thâu-chêng khì, in ji̍p-khì Sat-má-lī-a-lâng chi̍t-ê chng-siā, beh kā Iâ-so͘ chún-pī it-chhè ê tāi-chì. 53 M̄-koh hit só͘-chāi ê lâng bô beh chiap-la̍p Iâ-so͘, in-ūi I bêng-bêng sī beh khì Iâ-lō͘-sat-léng. 54 I ê bûn-tô͘ Ngá-kok kah Iok-hān khòaⁿ-tio̍h án-ne, chiū kóng, " Chú ah, Lí ài goán tùi thiⁿ-téng kiò hóe kàng lo̍h-lâi kā in siau-bia̍t, sī-bô?" 55 Iâ-so͘ oa̍t-tńg-sin kā in chek-pī. 56 Iâ-so͘ kah bûn-tô͘ chiū khì pa̍t-ê chng-siā.

Chò Iâ-so͘ Bûn-tô͘ ê Iàu-kiāⁿ (Mt 8:219-22)
57 In tī lō͘-tiong, ū-lâng tùi Iâ-so͘ kóng, " Lí bô-lūn khì tó-ūi, góa lóng beh tòe Lí khì." 58 Iâ-so͘ kā i kóng, " Hô͘-lî ū khang, khong-tiong ê poe-chiáu ū siū, m̄-koh Jîn-chú liân khòa thâu-khak ê só͘-chāi to bô." 59 Iâ-so͘ koh tùi lēng-gōa chi̍t-ê lâng kóng, " Lâi tòe góa!" Hit lâng ìn kóng, " Chú ah, hō͘ góa tńg-khì seng bâi-chòng góa ê lāu-pē." 60 Iâ-so͘ kā i kóng, " Chhut-chāi hiah-ê cheng-sîn-siōng ê sí-lâng khì bâi-chòng in jio̍k-thé-siōng ê sí-lâng, m̄-koh lí tio̍h khì thoân-pò Siōng-Chú Kok-tō͘ ê Hok-im." 61 Koh ū chi̍t-ê lâng kóng, " Chú ah, góa beh tòe Lí, m̄-koh chhiáⁿ chún góa seng khì kah ke-lāi ê lâng sio-sî." 62 Iâ-so͘ tùi i kóng, " Chhiú hōaⁿ gû-lê iáu-koh it-ti̍t teh oa̍t-thâu khòaⁿ āu-bīn ê lâng, bē kham-tit chò Siōng-Chú Kok-tō͘ ê chú-bîn."