《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第十章

作者 巴克禮普世版小組 2013.06.16

10 Iâ-so͘ Chhe-phài Chhit-cha̍p Lâng Chiah-ê tāi-chì liáu-āu, Chú koh chhe-phài chhit-cha̍p lâng, chi̍t tùi chi̍t tùi, chhe in chò I ê thâu-chêng, khì I só͘ beh khì ê ta̍k-ê siâⁿ kah ta̍k-ê só͘-chāi. 2 Iâ-so͘ kā in kóng, " Thang siu-sêng ê chin-chē, chò-kang ê lâng chin chió. Só͘-í lín tio̍h khì kiû hn̂g-chú phài khah-chē kang-lâng khì siu-sêng. 3 Lín khì! Góa chhe lín chhut-khì chò-kang, chhin-chhiūⁿ iûⁿ-á ji̍p-khì chhâi-lông ê tiong-kan. 4 M̄-thang tòa chîⁿ-tē, m̄-thang tòa hêng-lí-tē, m̄-thang chhēng-ê, tī lō͘-ni̍h m̄-thang kā lâng chhéng-an. 5 Lín bô-lūn ji̍p-khì siáⁿ-lâng ê chhù, tio̍h tāi-seng kóng, ' Goān lín chit ke ê lâng pêng-an!' 6 Tī hia nā ū ì-ài pêng-an ê lâng, in chiū ē tit-tio̍h lín kā in chhéng-an ê ' pêng-an'. Nā bô, hit-ê 'pêng-an' chiū ē tò tńg-lâi kui lín. 7 Tio̍h tiàm hit ke, lim-chia̍h in só͘ kiong-kip ê mi̍h, in-ūi chò-kang lâng kham-tit tit-tio̍h i ê kang-chîⁿ. M̄-thang tùi chit ke sóa kòe-khì hit ke. 8 Lín bô-lūn ji̍p-khì siáⁿ-mi̍h siâⁿ, lâng nā chiap-la̍p lín, tio̍h chia̍h in só͘ pâi tī lín bīn-chêng ê mi̍h. 9 Siâⁿ-lāi ū pēⁿ ê lâng, tio̍h kā in i-hó, sòa kā in kóng, ' Siōng-Chú Kok-tō͘ teh-beh kàu à.' 10 M̄-koh bô-lūn ji̍p-khì siáⁿ-mi̍h siâⁿ, lâng nā m̄ chiap-la̍p lín, lín tio̍h chhut-khì in ê tōa ke-lō͘ kóng, 11 ' Liân lín ê siâⁿ tiâu tī goán kha-té ê thô͘-hún, goán to beh pōaⁿ-tiāu, m̄-koh lín tio̍h chai, Siōng-Chú Kok-tō͘ beh kàu à!' 12 Góa kā lín kóng, sím-phòaⁿ ê ji̍t-chí nā kàu, Só͘-to-má só͘ siū ê hêng-hoa̍t, pí hit-ê siâⁿ iáu khah hó jím-siū." 13 M̄ Hóe-kái ê Siâⁿ-chhī (Mt 11:20-24) Ko-lia̍p-sìn ah, lí ū chai-hō! Pek-sài-tāi ah, lí ū chai-hō! in-ūi Góa tī lín tiong-kan só͘ kiâⁿ chiah-ê koân-lêng, nā kiâⁿ tī Chhui-lô kah Se-tùn, in chá to̍h chhēng môa-saⁿ, sám hóe-hu chē-teh lâi hóe-kái. 14 M̄-koh tī sím-phòaⁿ ê sî, Chhui-lô kah Se-tùn tio̍h siū ê hêng-hoa̍t pí lín iáu khah hó jím-siū. 15 Ka-pek-lông ah, lí siàu-siūⁿ hō͘ lâng hû khí-lih thiⁿ-téng? Lí ē hō͘ lâng chhia lo̍h-khì im-hú. 16 Thiaⁿ lín ê ōe chiū-sī thiaⁿ Góa, khì-sak lín ê chiū-sī khì-sak Góa; khì-sak Góa ê chiū-sī khì-sak chhe Góa lâi ê Hit-ūi." 17 Chhit-cha̍p Lâng Tńg-lâi Pò-kò Hiah-ê chhit-cha̍p lâng tńg-lâi teh hoaⁿ-hí kóng, " Chú ah, goán hōng Lí ê miâ bēng-lēng, siâ-sîn mā lóng khut-ho̍k." 18 Iâ-so͘ kā in kóng, " Góa ū khòaⁿ-tio̍h Sat-tàn, chhin-chhiūⁿ sih-nà tùi thiⁿ lak lo̍h-lâi. 19 Góa í-keng hō͘ lín ū koân-lêng thang ta̍h chôa kah giat-á, koh ū chè-ho̍k tùi-te̍k lóng-chóng ê khùi-la̍t, choa̍t-tùi bô chi̍t-hāng ē kā lín siong-hāi. 20 M̄-koh m̄-thang in-ūi chiah-ê siâ-sîn khut-ho̍k lín lâi hoaⁿ-hí, tio̍h in-ūi lín ê miâ kì tī thiⁿ-téng lâi hoaⁿ-hí." 21 Iâ-so͘ ê Hí-lo̍k (Mt 11:25-27; 13:16-17) Hit sî, Iâ-so͘ hō͘ Sèng-Sîn chhiong-móa kah móa-sim hoaⁿ-hí kóng, " Thiⁿ-Pē ah, thiⁿ-tē ê Chú, Góa o-ló Lí, in-ūi Lí chiong chiah-ê tāi-chì tùi tì-hūi chhong-bêng ê lâng am-khàm khí-lâi, khiok tùi sè-hàn-gín-á ū hián-bêng chhut-lâi. Thiⁿ-Pē ah, sī lah, in-ūi che sī Lí khòaⁿ án-ne chò hoaⁿ-hí. 22 Góa ê Thiⁿ-Pē í-keng kā it-chhè lóng kau-thok Góa. Thiⁿ-Pē í-gōa bô chi̍t-ê bat Kiáⁿ sī siáⁿ-lâng; Kiáⁿ kah Kiáⁿ só͘ ài beh khé-sī ê lâng í-gōa, mā bô chi̍t-ê bat Thiⁿ-Pē sī siáⁿ-lâng." 23 Iâ-so͘ oa̍t-tńg-sin, thau-thau-á tùi bûn-tô͘ kóng, " Ū ba̍k-chiu khòaⁿ-kìⁿ lín só͘ khòaⁿ-tio̍h ê lâng, si̍t-chāi ū hok-khì! 24 Góa kā lín kóng, í-chêng ū chin-chē sian-ti kah kun-ông, ài-beh khòaⁿ lín só͘ khòaⁿ-tio̍h ê mā bô khòaⁿ-tio̍h, ài-beh thiaⁿ lín só͘ thiaⁿ-tio̍h ê mā bô thiaⁿ-tio̍h." 25 Siáⁿ-lâng Sī Hó chhù-piⁿ Ū chi̍t-ê lu̍t-hoat-kàu-su khiā khí-lâi chhì-thàm Iâ-so͘ kóng, " Lāu-su ah, góa tio̍h án-chóaⁿ chò chiah ē tit-tio̍h éng-oán ê oa̍h-miā?" 26 Iâ-so͘ ìn kóng, " Lu̍t-hoat ū kì-chài siáⁿ-mi̍h? Lí tha̍k-liáu án-chóaⁿ?" 27 Hit lâng ìn kóng, " Lí tio̍h chīn-sim, chīn-sèng, chīn-la̍t, chīn-ì thiàⁿ Chú lí ê Siōng-Chú; mā tio̍h thiàⁿ chhù-piⁿ chhin-chhiūⁿ ka-kī."( chù: SBK 6:5; LBK 19:18) 28 Iâ-so͘ kā i kóng, " Lí só͘ ìn ê sī tio̍h. Chiàu án-ne khì chò, chiū ē tit-tio̍h oa̍h-miā." 29 M̄-koh hit lâng ài-beh hián-bêng ka-kī chò liáu chin tio̍h, chiū koh mn̄g Iâ-so͘ kóng, " Siáⁿ-lâng sī góa ê chhù-piⁿ?" 30 Iâ-so͘ ìn kóng, " Ū chi̍t-ê lâng tùi Iâ-lō͘-sat-léng lo̍h-khì Iâ-lī-ko-siâⁿ, tú-tio̍h thó͘-húi chhiúⁿ i ê saⁿ-khò͘, kā i phah kàu pòaⁿ-sí, jiân-āu kā i pàng hē-teh, chò in khì. 31 Tú-hó ū chi̍t-ê chè-si tùi hit-tiâu lō͘ lo̍h-khì, khòaⁿ-tio̍h hit-ê lâng chiū siám tùi lō͘ ê hit-pêng kòe-khì. 32 Koh ū chi̍t-ê Lī-bī-lâng kiâⁿ kàu hit só͘-chāi, khòaⁿ-liáu mā kāng-khoán tùi lō͘ ê hit-pêng kòe-khì. 33 Chóng-sī ū chi̍t-ê Sat-má-lī-a-lâng, kiâⁿ-lō͘ tùi hia keng-kòe, khòaⁿ-tio̍h chiū kā i liân-bín. 34 Kiâⁿ óa-khì, ēng chiú sé tio̍h-siong ê khang-chhùi, ēng pò͘ kā i pau-teh, jiân-āu hû i khí-lih khiâ ka-kī ê lî-á, chhōa i kàu kheh-tiàm, lâi kā i chiàu-kò͘. 35 Keh-tńg-ji̍t, i the̍h nn̄g-ê gîn-á hō͘ tiàm-chú, kóng, " Chhiáⁿ lí chiàu-kò͘ chit-ê lâng. Só͘-hùi nā khah ke, góa tò tńg-lâi ê sî chiah pó͘ lí.' 36 Chit saⁿ lâng tiong-kan, lí siūⁿ tó chi̍t-ê sī tú-tio̍h thó͘-húi hit lâng ê chhù-piⁿ?" 37 I ìn kóng, " Kā i liân-bín hit lâng chiū-sī." Iâ-so͘ kā i kóng, " Lí khì, chiàu án-ne khì chò." 38 Iâ-so͘ Hóng-būn Má-tāi kah Má-lī-a Iâ-so͘ kah bûn-tô͘ kè-sio̍k kiâⁿ, lâi-kàu chi̍t-ê chng-siā. Ū chi̍t-ê miâ-kiò Má-tāi ê hū-jîn-lâng, chiap-thāi Iâ-so͘ ji̍p-khì in chhù. 39 Má-tāi ū chi̍t-ê chí-mōe, kiò-chò Má-lī-a, chē tī Chú ê kha-chêng teh thiaⁿ I ê kà-sī. 40 Má-tāi in-ūi chiap-thāi in tāi-chì chē, soah sim-koaⁿ loān-chhau-chhau, chiū lâi kā Iâ-so͘ kóng, " Chú ah, góa ê chí-mōe pàng góa ka-kī teh bô êng, Lí kám bô teh iàu-kín? Tio̍h kiò i lâi kā góa tàu-kha-chhiú." 41 M̄-koh Chú ìn kóng, " Má-tāi ah, Má-tāi ah, lí ūi-tio̍h tāi-chì chē teh chhau-hoân. 42 M̄-koh só͘ su-iàu ê kan-tāⁿ chi̍t-hāng. Má-lī-a í-keng kéng-tio̍h hó ê hit hūn, bô-lâng ē-tàng kā i chhiúⁿ khì."