《巴克禮普世版聖經（試讀本）》

 | | | 轉寄

巴克禮普世版（試讀本） 路加福音第八章

作者 巴克禮普世版小組 2013.06.02

Ho̍k-sāi Iâ-so͘ ê Hū-jîn-lâng
1 Kòe bô kúi ji̍t, Iâ-so͘ tī ta̍k-ê siâⁿ-chhī kah ta̍k-ê chng-siā, sì-kè kiâⁿ-thàu-thàu, soan-káng tō-lí lâi pò-iông Siōng-Chú Kok-tō͘ ê Hok-im. Cha̍p-jī ê bûn-tô͘ lóng kah I chò-tīn. 2 Chi̍t-kóa bat hō͘ siâ-sîn hū-sin á-sī phòa-pēⁿ hō͘ Iâ-so͘ i-hó ê hū-jîn-lâng mā kah in chò-hóe, kî-tiong ū Boa̍t-tāi-lia̍p ê Má-lī-a. Iâ-so͘ bat tùi chit-ê Má-lī-a sin-chiūⁿ kóaⁿ-chhut chhit-ê kúi. 3 Koh ū Hi-lu̍t ê koán-ke Khó͘-sat ê bó͘ Iok-a-ná kah So͘-sat-ná, í-ki̍p kî-tha chin-chē hū-jîn-lâng, lóng ēng ka-kī ê chîⁿ-châi lâi ho̍k-sāi Iâ-so͘ kah I ê bûn-tô͘.

Iā Chéng-chí ê Phì-jū (Mt 13:1-9;Mk 4:1-9)
4 Ū Kûn-chiòng kè-sio̍k tùi ta̍k-ê siâⁿ-chhī, chū-chi̍p óa-lâi chhōe Iâ-so͘. 5 Iâ-so͘ ēng phì-jū kā in kóng, " Ū chi̍t-ê chò-sit-lâng chhut-khì iā chéng-chí. Teh iā ê sî, ū-ê ka-la̍uh tī lō͘-piⁿ, hō͘ kòe-lō͘-lâng ta̍h, khong-tiong ê poe-chiáu kā choân-pō͘ chia̍h liáu-liáu. 6 Ū-ê ka-la̍uh tī chio̍h-pôaⁿ téng, in-ūi bô chúi-hun, gê hoat khí-lâi chiū ta-khì. 7 Ū-ê ka-la̍uh tī chhì-á lāi, chhì-á pêⁿ-pêⁿ tōa-châng khí-lâi, soah hō͘ chhì-á hip-sí. 8 Ū-ê ka-la̍uh tī hó ê thó͘-tē, gê hoat khí-lâi kiat-si̍t kàu chi̍t-pah pōe." Chiah-ê ōe kóng-liáu, Iâ-so͘ koh tōa-siaⁿ hoah kóng, " Ū hīⁿ-khang thang thiaⁿ ê lâng, tio̍h thiaⁿ."

Phì-jū ê Bo̍k-tek (Mt 13：10-17;Mk 4:10-12)
9 Iâ-so͘ ê bûn-tô͘ mn̄g I, chit-ê phì-jū sī án-chóaⁿ kóng. 10 Iâ-so͘ kóng, " Siōng-Chú Kok-tō͘ ê ò-biāu í-keng hō͘ lín chai, m̄-koh tùi it-poaⁿ-lâng tio̍h ēng phì-jū, in-ūi Sèng-keng ū kì-chài: 'in khòaⁿ mā khòaⁿ bē chheng-chhó; thiaⁿ mā thiaⁿ bē bêng-pe̍k.'"

Iâ-so͘ Kái-soeh Iā Chéng-chí ê Phì-jū (Mt 13:18-23;Mk 4:13-20)
11 Chit-ê phì-jū ê ì-sù sī án-ne: Chéng-chí chiū-sī Siōng-Chú ê tō-lí. 12 Ka-la̍uh tī lō͘-piⁿ ê, sī teh phì-jū lâng thiaⁿ-tio̍h tō-lí, Mô͘-kúi chiū lâi tùi in ê sim-lāi kā tō-lí chhiúⁿ-khì, hō͘ in bē-tàng sìn tō-lí lâi tit-tio̍h kiù. 13 Ka-la̍uh tī chio̍h-pôaⁿ téng ê sī teh phì-jū, lâng thiaⁿ-tio̍h tō-lí sûi-sî hoaⁿ-hí lâi chiap-siū, m̄-koh in tèng-kin bô chhim, sī chiām-sî sìn niā-niā, tú-tio̍h chhì-thàm chiū pàng-sak. 14 Ka-la̍uh tī chhì-á lāi ê, sī teh phì-jū lâng thiaⁿ-tio̍h tō-lí chiū khì hō͘ sè-kan ê chhau-hoân, chîⁿ-châi kah iàn-lo̍k ê chó͘-gāi, tō-lí soah bē sêng-tióng kiat-si̍t. 15 Ka-la̍uh tī hó thó͘-tē ê sī teh phì-jū, lâng ēng hó koh siān-liông ê sim lâi thiaⁿ tō-lí koh chip-siú, nāi-sim kian-chhî kàu kiat-si̍t."

Bí-táu-ē ê Teng (Mk 4.21-25)
16 Bô-lâng tiám teng ēng bí-táu kā i khàm khí-lâi, á-sī hē tī bîn-chhn̂g-kha. Tio̍h kā i chhāi tiàm teng-tâi téng, hō͘ ji̍p-lâi ê lâng khòaⁿ-tio̍h hit-ê kng. 17 In-ūi só͘-ū ún-ba̍t ê tāi-chì, chiong-lâi lóng ē lō͘-hiān; só͘-ū pì-bi̍t ê tāi-chì, kàu-sî lóng ē po̍k-lō͘ chhut-lâi hō͘ lâng chai. 18 Só͘-í lín tio̍h kín-sīn tio̍h án-chóaⁿ lâi thiaⁿ; in-ūi Sèng-keng ū kì-chāi kóng ' Ū-ê lâng beh hō͘ i koh-khah-chē; bô ê lâng liân i ka-kī lia̍h-chò ū ê, mā beh kā i chhiúⁿ-khì.'"

Iâ-so͘ ê Lāu-bú kah Hiaⁿ-tī (Mt 12:46-50;Mk 3:31-35)
19 Iâ-so͘ ê lāu-bú kah hiaⁿ-tī lâi chhōe I, in-ūi lâng chin-chē, bē-tàng óa-khì. 20 Ū-lâng kā I kóng, " Lí ê lāu-bú kah hiaⁿ-tī khiā tī gōa-bīn, ài beh kìⁿ Lí." 21 Iâ-so͘ ìn kóng, " Chiah-ê thiaⁿ Siōng-Chú ê tō-lí koh ū chiàu án-ne khì chò ê lâng, chiū-sī Góa ê lāu-bú, Góa ê hiaⁿ-tī."

Iâ-so͘ Pêng-chēng Hong-éng (Mt 8:23-27;Mk 4:35-41)
22 Ū chi̍t ji̍t, Iâ-so͘ kah bûn-tô͘ chiūⁿ chûn ê sî kā in kóng, " Lán lâi khì ô͘ ê hit-pêng hōaⁿ." In chiū khui chûn. 23 Chûn teh kiâⁿ ê sî, Iâ-so͘ khùn-khì. Hut-jiân chi̍t-chūn kiông-hong sàu lo̍h-lâi ô͘-ni̍h, chûn-lāi ji̍p chúi kiông-beh tīⁿ khí-lâi, hui-siông gûi-hiám. 24 Bûn-tô͘ óa-khì kiò chhéⁿ Iâ-so͘, kóng, " Lāu-su ah, lāu-su ah, lán teh-beh bô miā lò͘." Iâ-so͘ chhéⁿ khí-lâi, chek-pī hong kah hái-éng, hong-éng chiū chēng lo̍h-lâi. 25 Iâ-so͘ chiū tùi bûn-tô͘ kóng, " Lín ná-ē hiah bô sìn-sim?" In chiū kiaⁿ-hiâⁿ koh kám-kak kî-koài, hō͘-siōng gī-lūn kóng, " Chit-ê tàu-té sī siáⁿ-lâng? Liân hong kah éng lóng sūn-ho̍k I ê bēng-lēng!"

Iâ-so͘ I-hó Siâ-sîn Hū-sin ê Lâng (Mt 8:28-34;Mk 5:1-2)
26 Iâ-so͘ kah bûn-tô͘ chē chûn kòe-khì Ka-lī-lī-ô͘ ê tùi-bīn hōaⁿ, lâi-kàu Keh-la̍h-sim-lâng ê tē-hng. 27 Iâ-so͘ lo̍h-chûn chiūⁿ hōaⁿ ê sî, ū chi̍t-ê hō͘ siâ-sîn hū-sin ê lâng, tùi siâⁿ-ni̍h chhut-lâi tú-tio̍h I. Chit-ê lâng í-keng chin kú bô chhēng saⁿ, bô tòa tī chhù-lāi, lóng tiàm tī bōng-á-po͘. 28 Hit-ê lâng chi̍t-ē khòaⁿ-tio̍h Iâ-so͘, chiū phak tī I ê bīn-chêng tōa-siaⁿ hoah, " Chì-koân Siōng-Chú ê Kiáⁿ Iâ-so͘, Lí hô-pit lâi kan-sia̍p góa ê tāi-chì? Kiû Lí m̄-thang kā góa khó͘-chhó͘." 29 I án-ne kóng sī in-ūi Iâ-so͘ ū bēng-lēng siâ-sîn tùi hit-ê lâng chhut-lâi. Í-chêng siâ-sîn siông-siông kā i lia̍h-tiâu-tiâu. Lâng ēng thih-liān-á kā i liān teh, koh ēng kha-khàu kā i khàu teh, lâi kā i koaiⁿ khí-lâi, m̄-koh i kā pa̍k i ê khì-kū chhoah-tn̄g, siâ-sîn koh hō͘ i chông chhut-khì khòng-iá. 30 Iâ-so͘ mn̄g hit-ê lâng kóng, " Lí kiò siáⁿ-mi̍h miâ?" Ìn kóng, " Kun-thoân." In-ūi ū chin-chē siâ-sîn kā i hū-sin. 31 Siâ-sîn ai-kiû Iâ-so͘, m̄-thang bēng-lēng in ji̍p-khì bô-té chhim-kheⁿ. 32 Hit sî ū kui tōa-tīn ê ti tī soaⁿ-ni̍h teh thó-chia̍h. Siâ-sîn kiû Iâ-so͘ chún in ji̍p-khì hiah-ê ti ê lāi-bīn. Iâ-so͘ ū chiàu in só͘ kiû ín-chún. 33 Siâ-sîn chiū tùi hit-ê lâng chhut-khì, ji̍p-khì hiah-ê ti. Kui tīn ê ti chiū tùi soaⁿ-phiâⁿ chông lo̍h-khì ô͘-ni̍h, hō͘ chúi kek-sí. 34 Hiah-ê kò͘ ti ê lâng khòaⁿ-tio̍h chit-ê tāi-chì, chiū cháu-khì pò hō͘ siâⁿ-lāi kah chng-siā ê lâng chai. 35 Thiaⁿ-tio̍h ê lâng lóng chhut-lâi ài-beh khòaⁿ chit-ê tāi-chì. In lâi-kàu Iâ-so͘ hia, siâ-sîn í-keng tùi hit-ê lâng chhut-lâi. Hit lâng ū chhēng saⁿ, cheng-sîn chèng-siông, chē tī Iâ-so͘ ê kha-chêng. In chiū tōa tio̍h-kiaⁿ. 36 Chhin-ba̍k khòaⁿ-tio̍h ê lâng, kā hō͘ siâ-sîn hū-sin ê lâng án-chóaⁿ tit-tio̍h i-hó ê tāi-chì, pò hō͘ chèng-lâng chai. 37 Keh-la̍h-sim sì-chiu-ûi ê lâng lóng kiû Iâ-so͘ lī-khui in, in-ūi in chin kiaⁿ-hiâⁿ. Iâ-so͘ chiū chē chûn tńg-khì. 38 Thoat-lī siâ-sîn hit-ê lâng, kiû beh tòe Iâ-so͘ khì, m̄-koh Iâ-so͘ kiò i tńg-khì, kóng, 39 " Tńg-khì lín tau, kā Siōng-Chú ūi lí só͘ chò hiah tōa ê tāi-chì, pò hō͘ chèng-lâng chai." Hit lâng chiū tńg-khì, kā Iâ-so͘ ūi i só͘ chò ê tāi-chì, pò hō͘ choân-siâⁿ ê lâng chai.

Hōe-tn̂g Chú-koán ê Cha-bó͘-kiáⁿ kah Tài Hiat-lāu-pēⁿ ê Hū-jîn-lâng (Mt 9:18-26;Mk 5:21-43)
40 Iâ-so͘ tńg-lâi ê sî, chèng-lâng lóng kā I gêng-chiap, in-ūi ta̍k-ke lóng teh thèng-hāu I. 41 Ū chi̍t-ê hōe-tn̂g ê chú-koán miâ-kiò Gâi-ló͘, lâi phak tī Iâ-so͘ ê kha-chêng, khún-kiû I khì i ê chhù. 42 In-ūi i cha̍p-jī hòe ê to̍k-seⁿ cha-bó͘-kiáⁿ teh-beh sí à. Iâ-so͘ chiū kah i khì, kûn-chiòng mā e-e-kheh-kheh chò-hóe khì. 43 Hit sî ū chi̍t-ê hū-jîn-lâng, tài hiat-lāu-pēⁿ í-keng cha̍p-jī nî kú à, sui-jiân ke-hóe khai liáu-liáu chhōe i-seng i-tī, m̄-koh bô kah chi̍t-ê lâng ē-tàng kā i i-hó. 44 Chit-ê hū-jîn-lâng kiâⁿ óa-lâi Iâ-so͘ ê kha-chiah-āu, bong I saⁿ-á-ki ê chhiu, i ê hiat-lāu sûi-sî chí. 45 Iâ-so͘ mn̄g kóng, " Siáⁿ-lâng kā Góa bong?" Tāi-ke lóng kóng bô. Pí-tek chiū kóng, " Lāu-su, kûn-chiòng pek óa-lâi, kā Lí kheh-tio̍h lah." 46 Iâ-so͘ kóng, " Tek-khak ū-lâng bong-tio̍h Góa, in-ūi Góa chai, ū koân-lêng tùi Góa seng-khu chhut-khì." 47 Hū-jîn-lâng chai-iáⁿ am-khàm bē tiâu, chiū phi̍h-phi̍h-chhoah lâi phak tī Iâ-so͘ ê kha-chêng. I tī kûn-chiòng ê bīn-chêng, kóng-bêng bong Iâ-so͘ ê goân-in, kah i ê pēⁿ án-chóaⁿ sûi-sî hó-khì. 48 Iâ-so͘ kā i kóng, " Hū-jîn-lâng ah, lí ê sìn-sim hō͘ lí ê pēⁿ hó-khì. Chò lí an-sim tńg-khì." 49 Iâ-so͘ iáu teh kóng ê sî, ū-lâng tùi hōe-tn̂g chú-koán ê chhù lâi kā Gâi-ló͘ kóng, " Lí ê cha-bó͘-kiáⁿ í-keng sí-khì à, hô-pit koh lô-hoân lāu-su?" 50 Iâ-so͘ thiaⁿ-tio̍h chiū ìn kóng, " M̄ bián kiaⁿ, chí-ū tio̍h sìn, i ē hó khí-lâi." 51 Iâ-so͘ khì kàu in chhù ê sî, tû-liáu Pí-tek, Iok-hān, Ngá-kok, kah cha-bó͘-gín-á ê pē-bú í-gōa, m̄ chún pa̍t-lâng kah I ji̍p-khì. 52 Chèng-lâng lóng ūi-tio̍h sí-khì ê cha-bó͘-gín-á teh thî-khàu pi-siong. Iâ-so͘ kóng, " M̄-thang thî-khàu, in-ūi i m̄-sī sí, sī teh khùn niā-niā." 53 In-ūi tāi-ke lóng chai cha-bó͘-gín-á í-keng sí-khì à, chiū thí-chhiò Iâ-so͘. 54 Iâ-so͘ khan cha-bó͘-gín-á ê chhiú, tōa-siaⁿ hoah kóng, " Cha-bó͘-gín-á, khí-lâi!" 55 Cha-bó͘-gín-á chiū hôe-hûn, sûi-sî peh khí-lâi. Iâ-so͘ hoan-hù tio̍h hō͘ cha-bó͘-gín-á chia̍h mi̍h-kiāⁿ. 56 I ê pē-bú tio̍h-kiaⁿ koh kî-koài. Iâ-so͘ bēng-lēng in m̄-thang chiong só͘ hoat-seng ê tāi-chì kā lâng kóng.