《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第五章

作者 巴克禮普世版小組 2013.01.06

1 Iâ-so͘ kah bûn-tô͘ kòe-khì Ka-lī-lī-ô͘ ê tùi-bīn hōaⁿ, lâi-kàu Kek-lah-sim-lâng ê tē-khu.

2 Iâ-so͘ chi̍t-ē lo̍h chûn sûi-sî tú-tio̍h chi̍t-ê hō͘ siâ-sîn hū-sin ê lâng tùi bōng-á-po͘ chhut-lâi.

3 Chit-ê lâng lóng tòa tī bōng-á-po͘. Lâng ēng thih-liān to pa̍k i bē tiâu.

4 In-ūi lâng siông-siông ēng kha-khàu thih-liān kā i pa̍k. M̄-koh thih-liān hō͘ i chhoah-tn̄g, kha-khàu hō͘ i kòng-chhùi. Bô-lâng ū khùi-la̍t kā i chè-ho̍k.

5 Chit-ê lâng mê-ji̍t tī bōng-á-po͘ á-sī soaⁿ-ni̍h loān-jióng, koh ēng chio̍h-thâu siong-hāi ka-kī.

6 I úi hn̄g-hn̄g khòaⁿ-tio̍h Iâ-so͘, chiū cháu lâi phak tòa Iâ-so͘ ê bīn-chêng,

7 Tōa-siaⁿ hoah kóng," Chì-koân Siōng-Chú ê Kiáⁿ Iâ-so͘, Lí hô-pit lâi kan-sia̍p góa? Góa kí Siōng-Chú ê miâ lâi khún-kiû Lí m̄-thang kā góa chek-hoa̍t.

8 In-ūi Iâ-so͘ bat tùi i kóng, " Siâ-sîn ah, tio̍h tùi hit-ê lâng chhut-khì."

9 Iâ-so͘ mn̄g i kóng, " Lí hō-chò sím-mi̍h miâ?" Hit-ê lâng ìn kóng, " Góa ê miâ-kiò-chò 'Kun-thoân', in-ūi goán sī kui-tōa-tīn ê kúi."

10 Hit-ê lâng chiū pek-chhiat kiû Iâ-so͘ m̄-thang kóaⁿ in lī-khui hit-ê tē-khu.

11 Hit sî tī soaⁿ-phiâⁿ ū chi̍t-tīn ti teh thó-chia̍h.

12 Siâ-sîn chiū kiû Iâ-so͘ kóng, " Hō͘ goán khì hiah-ê ti-kûn, hō͘ goán thang ji̍p-khì in lāi-bīn."

13 Iâ-so͘ ín-chún in khì. Hiah-ê siâ-sîn chiū tùi hit-ê lâng chhut-lâi ji̍p-khì hiah-ê ti-kûn. Chha-put-to nn̄g-chheng chiah ê ti-kûn cháu lo̍h soaⁿ-phiâⁿ chông lo̍h-khì ô͘-ni̍h, hō͘ ô͘-chúi im-sí.

14 Kò͘-ti ê lâng chiū cháu-khì kā siâⁿ-lāi kah chng-siā ê lâng kóng. Chèng-lâng chiū chhut-lâi khòaⁿ tāi-chì sī án-chóaⁿ.

15 In lâi-kàu Iâ-so͘ hia, khòaⁿ-tio̍h hit-ê hō͘ siâ-sîn hū-sin, chiū-sī hō͘‘Kun-thoân’ só͘ tîⁿ ê lâng tī hia teh chē, saⁿ chhēng kah hó-sè-hó-sè, lāu-sîn chāi-chāi. Kûn-chiòng chiū khí tōa kiaⁿ.

16 Khòaⁿ-tio̍h ê lâng chiong hō͘ siâ-sîn hū-sin ê lâng só͘ tú-tio̍h ê tāi-chì kah kui tīn ti ê tāi-chì lóng kóng hō͘ chèng-lâng thiaⁿ.

17 In chiū khún-kiû Iâ-so͘ lī-khui in ê tē-khu.

18 Iâ-so͘ teh-beh chiūⁿ chûn ê sî, hit-ê bat hō͘ siâ-sîn hū-sin ê lâng kiû Iâ-so͘ chún i chò-hóe khì.

19 Iâ-so͘ m̄-chún kā i kóng, " Tńg-khì lí ê chhù chhōe lí ê chhin-lâng, chiong Chú liân-bín lí tùi lí só͘ chò hiah tōa ê tāi-chì lóng pò in chai."

20 Hit-ê lâng chiū khì, tī Te-ka-pho-lī pò-iông Iâ-so͘ tùi i só͘ chò ê tōa tāi-chì. Chèng-lâng lóng kám-kak kî-koài.

21Iâ-so͘ koh chē chûn kòe-khì hit-pêng hōaⁿ. Kui tōa-tīn ê lâng chū-chi̍p óa-lâi tī ô͘-piⁿ ê Iâ-so͘ hia.

22 Ū chi̍t-ê hōe-tn̂g ê chú-koán miâ-kiò-chò Gâi-ló͘ ê lâng lâi. I chi̍t-ē khòaⁿ-tio̍h Iâ-so͘ chiū phak tī I ê kha-chêng,

23 pek-chhiat khún-kiû kóng, " Góa sè-hàn ê cha-bó͘-kiáⁿ teh-beh sí à. Kiû Lí lâi kā i hōaⁿ-chhiú, hō͘ i tit-tio̍h i-hó ē-tàng oa̍h khí-lâi."

24 Iâ-so͘ kah i khì, kui tōa-tīn ê lâng e-e-kheh-kheh tòe I khì.

25 Ū chi̍t-ê hū-jîn-lâng hoān-tio̍h hiat-lāu-pēⁿ cha̍p-jī nî kú à.

26 I ū chhōe-kòe chin-chē ê i-seng tī-liâu mā siū-tio̍h chin-chē kan-khó͘, koh kā i só͘ ū ê chîⁿ khai liáu-liáu. M̄-koh lóng bô chi̍t-si-á hāu-kó, tian-tò ná siong-tiōng.

27 I thiaⁿ-tio̍h Iâ-so͘ ê tāi-chì, chiū kheh ji̍p-khì kûn-chiòng lāi-bīn, óa-khì Iâ-so͘ ê āu-piah lâi bong I ê saⁿ,

28 in-ūi i siūⁿ-kóng, " Góa kan-taⁿ bong I ê saⁿ, pēⁿ chiū ē hó-khì."

29 I chi̍t-ē bong-tio̍h Iâ-so͘ ê saⁿ, hiat-lāu sûi-sî thêng-chí, mā kám-kak ka-kī ê pēⁿ-thiàⁿ í-keng hó-khì à.

30 Iâ-so͘ sûi-sî hoat-kak ū koân-lêng tùi I hoat-chhut, chiū oa̍t-tńg-sin mn̄g kûn-chiòng kóng, " Siáⁿ-lâng bong góa ê saⁿ?"

31 Bûn-tô͘ kā I kóng, " Lí khòaⁿ kui-tīn lâng teh kā Lí e-kheh, ná-ē mn̄g kóng ' Siáⁿ-lâng ū bong góa?'"

32 Iâ-so͘ sì-kho͘-lián-tńg khòaⁿ chi̍t-ē, ài chhōe chò chit-ê tāi-chì ê hū-jîn-lâng.

33 Hit-ê hū-jîn-lâng chai-iáⁿ ka-kī sin-chiūⁿ só͘ hoat-seng ê tāi-chì, kiaⁿ kah phi̍h-phi̍h-chhoah, chiū lâi phak tòa Iâ-so͘ ê kha-chêng, lóng-chóng chiàu-si̍t kā I kóng.

34 Iâ-so͘ kā i kóng, " Hū-jîn-lâng ah, lí ê sìn-sim í-keng hō͘ lí ê pēⁿ tit-tio̍h i-hó. Lí thang pêng-an tńg-khì, lí ê pēⁿ oân-choân hó-khì à."

35 Iâ-so͘ iáu-teh kóng ê sî, ū-lâng tùi hōe-tn̂g chú-koán ê chhù lâi kā Gâi-ló͘ kóng, " Lí ê cha-bó͘-kiáⁿ í-keng sí-khì à, ná tio̍h koh lô-hoân lāu-su?"

36 Iâ-so͘ put-koán in só͘ kóng ê ōe, kā hōe-tn̂g ê chú-koán kóng, " M̄-bián kiaⁿ, chí ū tio̍h sìn."

37 Iâ-so͘ chiū chhōa Pí-tek, Ngá-kok, kah Ngá-kok ê hiaⁿ-tī Iok-hān chò-hóe khì, m̄-chún pa̍t-lâng tòe khì.

38 Lâi-kàu hōe-tn̂g chú-koán ê chhù, Iâ-so͘ khòaⁿ-tio̍h tiûⁿ-bīn hōa-hōa-háu, mā ū-lâng teh thî-khàu tōa-siaⁿ háu. 39 Iâ-so͘ ji̍p-khì chiū kā in kóng, " Lín ná-ē hōa-hōa-háu teh thî-khàu? Chit-ê gín-ná bô sí, sī teh khùn niā-niā."

40 Chèng-lâng chiū kā I thí-chhiò. M̄-koh Iâ-so͘ kā kûn-chiòng kóaⁿ chhut-khì, chiū chhōa gín-á ê pē-bú í-ki̍p kah I lâi ê bûn-tô͘ ji̍p-khì gín-á ê pâng-keng.

41Iâ-so͘ chiū khan gín-á ê chhiú kā i kóng, " Tāi-lī-tāi-kó͘-bí." Ì-sù chiū-sī kóng, " Cha-bó͘-gín-á, góa bēng-lēng lí, khí-lâi!"

42 Cha-bó͘-gín-á sûi-sî khí-lâi kiâⁿ, in-ūi i í-keng cha̍p-jī hòe à. Chèng-lâng chiū tio̍h-kiaⁿ kah sit-sîn khì.

43 Iâ-so͘ giâm-giâm kèng-kài in m̄-thang hō͘ lâng chai chit-ê tāi-chì. I chiū hoan-hù tio̍h hō͘ cha-bó͘-gín-á chia̍h mi̍h-kiāⁿ.