《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第四章

作者 巴克禮普世版小組 2012.12.30

1 Iâ-so͘ koh chi̍t pái tī Ka-lī-lī-ô͘ piⁿ kà-sī lâng. Ū chi̍t tōa-tīn lâng chū-chi̍p óa-lâi, I soah tio̍h chiūⁿ-chûn khì chē tòa phû tī chúi-bīn ê chûn-téng. Kûn-chiòng lóng óa-lâi khiā tī ô͘ ê hōaⁿ-piⁿ.

2 Iâ-so͘ ēng phì-jū kà-sī in chin-chē hāng sū. I kà-sī in ê sî kóng,

3 " Tio̍h chù-ì thiaⁿ! Ū chi̍t-ê choh-sit-lâng chhut-khì iā chéng-chí.

4 I iā ê sî, ū-ê ka-la̍uh tī lō͘-piⁿ. Chiáu-á poe lâi, chiū kā chéng-chí chia̍h liáu-liáu.

5 Ū-ê ka-la̍uh tī chio̍h-thâu-á tē, thô͘-bah chhián ê só͘-chāi. In-ūi thô͘-bah bô chhim, chin kín chiū hoat-gê.

6 M̄-koh ji̍t-thâu chi̍t-ē chhut chiū pha̍k-tio̍h chéng-chí. In-ūi bô kin chiū ta-khì.

7 Ū-ê ka-la̍uh tī chhì-á lāi, chhì-á chi̍t-ē tōa-châng chiū kā chéng-chí hip sí, só͘-í bô kiat kóe-chí.

8 Ū-ê ka-la̍uh tī hó ê thó͘-tē, chiū hoat-gê tōa-châng khí

9 Iâ-so͘ koh kóng, " Ū hīⁿ-khang thang thiaⁿ ê lâng tio̍h thiaⁿ! "

10 Iâ-so͘ tan-to̍k tī hia ê sî, kûn-chiòng kah cha̍p-jī sù-tô͘ óa-lâi mn̄g I chiah-ê phì-jū ê ì-sù.

11 Iâ-so͘ chiū kā in kóng, " Siōng-Chú Kok-tō͘ ê ò-biāu í-keng hō͘ lín chai. M̄-koh tùi hiah-ê it-poaⁿ lâng, ta̍k-hāng lóng tio̍h ēng phì-jū lâi kā in kóng.

12 Che sī beh èng-giām Sèng-keng só͘ kì-chài kóng:『In khòaⁿ ū teh khòaⁿ, m̄-koh lóng bē bêng-pe̍k, In thiaⁿ ū teh thiaⁿ, m̄-koh lóng bē liáu-kái. In nā ùi phì-jū lâi bêng-pe̍k liáu-kái, chiū ē hôe-sim choán-ì kui-hiòng Siōng-Chú.In ê chōe chiū ē tit-tio̍h sià-bián.』」

13 Iâ-so͘ koh mn̄g in kóng, " Lín liân chit-ê phì-jū to bē liáu-kái sī-bô? Án-ne ná-ē chai kî-tha ê phì-jū?

14 Iā chéng-chí ê lâng sī teh pò-iông Siōng-Chú ê hok-im.

15 Iā tī lō͘-piⁿ sī chí pò-iông hok-im ê só͘-chāi, chiū-sī lâng thiaⁿ hok-im liáu-āu, Sat-tàn sûi-sî lâi chiong só͘ iā tī in sim-lāi ê hok-im chhiúⁿ-khì.

16 Iā tī chio̍h-thâu-á tē ê sī chí in thiaⁿ-tio̍h hok-im chiū sûi-sî hoaⁿ-hí lâi chiap-siū.

17 M̄-koh hok-im tī in ê sim-lāi bô tèng-kin, put-kò sī chiām-sî niā-niā. Nā ūi-tio̍h hok-im tú-tio̍h hoān-lān á-sī pek-hāi, ē sûi-sî pàng-sak.

18 Iā tī chhì-á lāi ê sī chí lâng thiaⁿ-tio̍h hok-im liáu-āu,

19 soah in-ūi ū sè-kan ê khòa-lī, chîⁿ-châi ê bê-he̍k, kah kî-tha ta̍k-chióng ê su-io̍k ji̍p-khì sim-lāi kā hok-im jia-khàm teh, soah lóng bē kiat-si̍t.

20 Hiah-ê iā tī hó thó͘-tē ê sī chí lâng thiaⁿ hok-im ū chiap-siū chiū kiat-si̍t, ū-ê saⁿ-cha̍p pōe, ū-ê la̍k-cha̍p pōe, ū-ê chi̍t-pah pōe."

21 Iâ-so͘ koh kā in kóng," Kám ū-lâng gia̍h teng lâi hē tī bí-táu ē-bīn á-sī bîn-chhn̂g-kha? Kám m̄-sī ē chhāi tī teng-tâi téng?

22 In-ūi ún-ba̍t ê bô chi̍t hāng bē hián-chhut, am-khàm ê bô chi̍t hāng bē lō͘-hiān.

23 Ū hīⁿ-khang thang thiaⁿ ê lâng tio̍h thiaⁿ."

24 Iâ-so͘ koh kā in kóng, " Tio̍h chù-ì lín só͘ thiaⁿ ê. Lín ēng sím-mi̍h niû-khì lâi niû hō͘ lâng, Siōng-Chú mā beh ēng kāng-khoán ê niû-khì niû hō͘ lín, sīm-chí ē koh-khah ke-thiⁿ hō͘ lín.

25 Tùi ū ēng un-sù sū-hōng Chú ê lâng, Siōng-Chú ē siúⁿ-sù koh-khah chē hō͘ i; tùi bô ēng un-sù sū-hōng Chú ê lâng, liân i só͘ ū ê chi̍t-sut-á un-sù mā beh kā i chhiúⁿ-khì.

26 Iâ-so͘ koh kóng, " Siōng-Chú ê Kok-tō͘ chhin-chhiūⁿ lâng iā chéng-chí tòa i ê thó͘-tē.

27 I àm-sî khì khùn, ji̍t-sî khí-lâi, hit-ê chéng-chí hoat-gê koh chiām-chiām tōa-châng, i m̄-chai án-chóaⁿ ē án-ne.

28 Thó͘-tē chū-jiân seng-sán ngó͘-kok. Khí-thâu sī ng-á puh-gê, āu-lâi thò͘-sūi, chòe-āu chiū pá-sūi kiat-chiâⁿ ngó͘-kok.

29 Ngó͘-kok se̍k ê sî, chiū ēng liâm-le̍k-á siu-koah, in-ūi siu-koah ê sî-kî kàu à."

30 Iâ-so͘ iū-koh kóng, " Siōng-Chú ê Kok-tō͘ lán beh án-chóaⁿ lâi hêng-iông? Tio̍h ēng sím-mi̍h phì-jū lâi soat-bêng?

31 Siōng-Chú ê Kok-tō͘ chhin-chhiūⁿ chi̍t lia̍p kòa-chhài-chí, sui-jiân sī tē-chiūⁿ chéng-chí tiong-kan siōng sè lia̍p,

32 m̄-koh iā lo̍h-tē liáu-āu, chiū chiām-chiām tōa-châng khí-lâi, pí só͘-ū ê chhài-se khah tōa-châng, koh hoat-chhut tōa ki chhiū-oe, khong-tiong ê chiáu to ē-tàng tī chhiū-ńg-ē chò siū."

33 Iâ-so͘ ēng chin-chē chhin-chhiūⁿ chit-chióng ê phì-jū tùi kûn-chiòng thoân hok-im, lóng ēng in ē-tàng liáu-kái ê phì-jū.

34 Sū-si̍t-siōng I ta̍k-pái lóng ēng phì-jū tùi in kóng. M̄-koh kan-taⁿ kah bûn-tô͘ chò-hóe ê sî, chiah ta̍k-hāng siông-sè kā in soat-bêng.

35 Hit ji̍t ê àm-thâu-á, Iâ-so͘ kā bûn-tô͘ kóng, " Lán kòe lâi-khì hit-pêng hōaⁿ."

36 In lī-khui kûn-chiòng chiūⁿ-chûn, kah tī chûn-téng ê Iâ-so͘ chò-hóe khì. Iáu ū pa̍t chiah chûn mā chò-hóe khì.

37 Hut-jiân-kan khí tōa-hong, chúi-éng phoah ji̍p-lâi chûn-ni̍h, tì-kàu chúi teh-beh móa chûn.

38 M̄-koh Iâ-so͘ tī chûn-bóe tó tī chím-thâu teh khùn. Bûn-tô͘ kā I kiò chhéⁿ, kóng, " Lāu-su, goán teh-beh bô miā lò͘, Lí kám bô iàu-kín?"

39 Iâ-so͘ chiū chhéⁿ khí-lâi, chek-pī hong, koh bēng-lēng chúi-éng kóng, " Chēng lo̍h-lâi!" Hong chiū thêng, chúi-éng mā tiāⁿ lo̍h-lâi.

40 Iâ-so͘ chiū kā in kóng, " Lín ná-ē hiah kiaⁿ? Lín iáu-bô sìn-sim sī-bô?"

41 In chiū tōa kiaⁿ hō͘-siōng kóng-lâi kóng-khì, "Chit-ê sī siáⁿ-lâng, liân hong kah chúi-éng to lóng sūn-ho̍k I?"