《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第一章

作者 巴克禮普世版小組 2011.10.30

1, Siōng-chú ê Kiáⁿ Iâ-so͘ Ki-tok hok-im ê khí-thâu.
2, Chhin-chhiūⁿ tī sian-ti Í-sài-a ê chheh só͘ kì-chài kóng, Góa chhe góa ê sù-chiá tī lí ê bīn-chêng, Lâi siu-chéng lí ê lō͘;
3, Ū teh kiò tī khòng-iá ê, i ê siaⁿ kóng, Tio̍h chún-pī Chú ê lō͘, Siu ti̍t I ê sió lō͘.
4, Iok-hān lâi tī khòng-iá kiâⁿ sé-lé, thoân hóe-kái ê sé-lé, hō͘ lâng tit-tio̍h sià-chōe.
5, Thong Iû-thài tē-khu kap Iâ-lō͘-sat-léng ê chèng lâng lóng chhut-lâi chiū-kūn i, jīn in ê chōe, tī Iok-tàn-hô tùi i siū sé-lé.
6, Chit-ê Iok-hān chhēng lo̍k-tô-mn̂g, io hâ phôe-tòa, chia̍h chháu-meh kap soaⁿ-iá ê bi̍t.
7, I thoân kóng, Ū chi̍t-ê pí góa khah ū koân-lêng ê tè-bé góa lâi; chiū khut-lo̍h lâi tháu I ê ôe-tòa, góa iā bē kham-tit.
8, Góa bat ēng chúi kā lín kiâⁿ sé-lé, I boeh ēng Sèng Lêng kā lín sóe.
9, Tng chiah-ê ji̍t Iâ-so͘ tùi Ka-lī-lī-séng ê Ná-sat-le̍k lâi, tī Iok-tàn-hô tùi Iok-hān siū sé-lé.
10, Chek-sî tùi chúi khí-lâi, chiū khòaⁿ-tio̍h thiⁿ li̍h-khui, Sèng Lêng chhin-chhiūⁿ hún-chiáu kàng-lîm tī I ê téng-bīn;
11, koh tùi thiⁿ ū siaⁿ kóng, Lí sī góa só͘ thiàⁿ ê Kiáⁿ, góa hoaⁿ-hí lí.
12, Sèng Lêng chek-sî pek I khì khòng-iá.
13, Tī khòng-iá sì-cha̍p ji̍t, tú-tio̍h Sat-tàn chhì, iā kap iá-siù saⁿ-kap tòa; ū thiⁿ-sài su-hāu I.
14, Iok-hān í-keng koaiⁿ-kaⁿ, Iâ-so͘ kàu Ka-lī-lī-séng, thoân Siōng-chú ê hok-im, kóng,
15, Ji̍t-kî móa à, Siōng-chú ê kok kūn à; lín tio̍h hóe-kái lâi sìn hok-im.
16, Iâ-so͘ keng-koe3Ka-lī-lī-séng ê hái-kîⁿ, khòaⁿ-tio̍h Se-bûn kap i ê hiaⁿ-tī An-tek-lia̍t pha bāng tī hái-ni̍h; in-ūi sī thó-hî lâng.
17, Iâ-so͘ kā in kóng, Lín lâi tòe góa, góa boeh hō͘ lín tit-tio̍h lâng chhin-chhiūⁿ thó-hî ê.
18, In liâm-piⁿ lī-khui bāng, lâi tòe I.
19, Lio̍h-á chìn-chêng, khòaⁿ-tio̍h Se-pí-thài ê kiáⁿ Ngá-kok kap i ê hiaⁿ-tī Iok-hān tī chûn-ni̍h teh pó͘ bāng.
20, I liâm-piⁿ chio in, in chiū pài-pia̍t in lāu-pē Se-pí-thài kap chhiàⁿ-kang lâng tī chûn-ni̍h, lâi tòe tī I ê āu-bīn.
21, In ji̍p Ka-pek-lông, Iâ-so͘ tī an-hioh-ji̍t ji̍p hōe-tn̂g, kà-sī lâng.
22, Lâng kî-koài I ê kà-sī; in-ūi I kà-sī lâng chhin-chhiūⁿ ū koân ê, bô chhin-chhiūⁿ keng-ha̍k-kàu-su.
23, Tú-á hōe-tn̂g lāi ū chi̍t ê hoān-tio̍h kúi ê lâng âu-kiò kóng,
24, Ná-sat-le̍k-lâng Iâ-so͘, goán kap lí sím-mi̍h kan-sia̍p? Lí lâi boeh bia̍t goán mah? Góa chai lí sī siáⁿ-lâng, chiū-sī Siōng-chú ê Sèng ê.
25, Iâ-so͘ chek-pī i kóng, Lí tio̍h chēng-chēng, tùi chit-ê lâng chhut-khì.
26, Siâ-sîn thiu-chhoah hit lâng, tōa siaⁿ kiò, chiū tùi i chhut-khì.
27, Chèng lâng lóng gông-ngia̍h, tì-kàu saⁿ piān-lūn, kóng, Chit-ê sī cháiⁿ-iūⁿ? Sī sin ê kà-sī. I ēng koân bēng-lēng siâ-sîn, siâ-sîn iā sūn-ho̍k I.
28, I ê miâ-siaⁿ sûi-sî piàn thoân Ka-lī-lī-séng ê sì-hng.
29, In í-keng chhut hōe-tn̂g, sûi-sî kap Ngá-kok Iok-hān ji̍p Se-bûn kap An-tek-lia̍t ê ke.
30, Se-bûn ê tiūⁿ-ḿ hoān-tio̍h jia̍t-pēⁿ tó-teh. Sûi-sî ū lâng chiong che kā Iâ-so͘ kóng.
31, I kūn-óa khan i ê chhiú, hō͘ i khí-lâi, jia̍t chiū thè; hū-jîn-lâng chiū su-hāu in.
32, Kàu hông-hun àm, ji̍t lo̍h liáu, ū lâng chhōa lóng-chóng ū phòa-pēⁿ ê, kap hoān-tio̍h kúi ê lâng chiū-kūn I.
33, Thong siâⁿ lóng chū-chi̍p tī mn̂g-kháu.
34, Iâ-so͘ i-hó ta̍k chióng pēⁿ ê lâng chē-chē, koh kóaⁿ chē-chē kúi; in-ūi kúi bat I, só͘-í m̄ chún in kóng.
35, Keh chá-khí, thiⁿ iáu put-chí àm, Iâ-so͘ khí-lâi chhut-khì khòng-iá ê só͘-chāi, tī hia kî-tó.
36, Se-bûn kap tâng-phōaⁿ ê lâng tui-chhōe I.
37, Í-keng tú-tio̍h chiū kā I kóng, Chèng lâng lóng teh chhōe lí.
38, I kā in kóng, Lán lâi khì pa̍t ūi; kàu hū-kūn ê po͘-thâu, hō͘ góa thang tī hia thoân-tō; in-ūi góa ūi-tio̍h chit-ê sū, chiah chhut-lâi.
39, Chiū khì piàn Ka-lī-lī-séng, ji̍p in ê hōe-tn̂g, soan-thoân tō-lí, koh kóaⁿ kúi.
40, Ū chi̍t ê thái-ko ê chiū-kūn I, kiû I, kūi I, kā I kóng, Lí nā khéng, chiū ē hō͘ góa chheng-khì.
41, Iâ-so͘ khó-lîn, chhun chhiú bong i, kā i kóng, Góa khéng, lí thang chheng-khì.
42, Thái-ko chek-sî tû--khì; i chiū chheng-khì.
43, Iâ-so͘ giâm-giâm kéng-kài i, sûi-sî kah i khì; iā kā i kóng,
44, Tio̍h kín-sīn bo̍h-tit kā lâng kóng sím-mi̍h; chí-ū tio̍h khì, chiong pún-sin hō͘ chè-si giām, iā ūi-tio̍h lí tit-tio̍h chheng-khì, hiàn Mô͘-se só͘ hoan-hù ê, lâi chò chèng-kù tī lâng.
45, Tān-sī i chhut-khì, chiū tōa-tōa soan-thoân, sì-kòe pò-iông chit-ê sū; tì-kàu Iâ-so͘ bô thang koh hián-jiân ji̍p siâⁿ, chí-ū tòa tī gōa-bīn khòng-iá ê só͘-chāi. Lâng tùi sì-hng chiū-kūn I.