《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第二章

作者 巴克禮普世版小組 2011.11.06

1, Kòe kúi-nā ji̍t Iâ-so͘ koh ji̍p Ka-pek-lông;
2, lâng thiaⁿ-tio̍h I tī chhù-lāi chiū chē-chē lâng chū-chi̍p tì-kàu bô khàng-tē, liân mn̂g-kháu iā bô; I chiū kóng tō-lí hō͘ in thiaⁿ.
3, Ū tòa chi̍t ê piàn-sūi ê chiū-kūn I, sī sì lâng kng i lâi.
4, In-ūi lâng chōe, bōe-ōe kūn-óa, chiū tī Iâ-so͘ tiàm ê só͘-chāi, thiah chhù-téng hō͘ i kui khang; chiū chiong piàn-sūi ê tó tī pho͘-á tūi-lo̍h-khì.
5, Iâ-so͘ khòaⁿ-tio̍h in ê sìn, chiū kā piàn-sūi ê kóng, Sòe-kiáⁿ, lí ê chōe sià-bián à.
6, Ū kúi-nā ê keng-ha̍k-kàu-su chē tī hia, sim-lāi gī-lūn kóng, Chit-ê lâng cháiⁿ-iūⁿ án-ne kóng ah?
7, I sī chhiàm-koân lām-sám; tû Siōng-chú í-gōa, siáⁿ-lâng ē sià-bián chōe ah?
8, Iâ-so͘ sim-lāi liâm-piⁿ chai in ū chit chióng ê gī-lūn, chiū kā in kóng, Lín siáⁿ-sū tī sim-lāi gī-lūn chiah-ê ah?
9, Kā piàn-sūi ê kóng, Lí ê chōe sià à, á-sī kóng, Khí-lâi, giâ lí ê pho͘-á lâi kiâⁿ, tó-ūi chi̍t hāng khah khoài?
10, Chí-ū boeh hō͘ lín chai Jîn-chú tī tē-ni̍h ū koân thang sià chōe, (chiū kā piàn-sūi ê kóng),
11, Góa kā lí kóng, Khí-lâi, giâ lí ê pho͘-á tńg-khì lí ê chhù.
12, I chiū khí-lâi, tī chèng lâng ê bīn-chêng sûi-sî giâ i ê pho͘-á chhut-khì; tì-kàu chèng lâng lóng gông-ngia̍h, kui êng-kng Siōng-chú kóng, Goán chiông-lâi bē bat khòaⁿ-tio̍h án-ne-siⁿ.
13, Iâ-so͘ koh chhut-khì kàu hái-kîⁿ; chèng lâng lóng chiū-kūn I, chiū kà-sī in.
14, Keng-koe3e5 sî khòaⁿ-tio̍h A-le̍k-hui ê kiáⁿ Lī-bī chē tī hiòng-koan, chiū kā i kóng, Tè góa. I chiū khí-lâi tòe I. 15, Iâ-so͘ chē toh tī Lī-bī ê chhù, ū chē-chē thiu-sòe ê kap pháiⁿ lâng kap Iâ-so͘ chham I ê bûn-tô͘ tâng chē, in-ūi hiah-ê lâng sī chōe, iā teh tè I.
16, Hoat-lī-sài ê keng-ha̍k-kàu-su khòaⁿ-tio̍h I kap pháiⁿ lâng í-ki̍p thiu-sòe ê saⁿ-kap chia̍h, chiū kā I ê bûn-tô͘ kóng, I kap thiu-sòe ê í-ki̍p pháiⁿ lâng saⁿ-kap lim-chia̍h ah.
17, Iâ-so͘ thiaⁿ-tio̍h, chiū kā in kóng, Ióng-kiāⁿ ê bô khiàm i-seng, tān-sī phòa-pēⁿ ê chiū tio̍h; góa lâi m̄-sī boeh chio gī lâng, sī boeh chio pháiⁿ lâng.
18, Iok-hān ê bûn-tô͘ kap Hoat-lī-sài-phài ê lâng tng teh kìm-chia̍h; in chiū-kūn lâi kā I kóng, Iok-hān ê bûn-tô͘ kap Hoat-lī-sài-phài ê lâng ê bûn-tô͘ kìm-chia̍h, lí ê bûn-tô͘ bô kìm-chia̍h, sī cháiⁿ-iūⁿ?
19, Iâ-so͘ kā in kóng, Sin-kiáⁿ-sài kap hō-chhōa ê lâng tī-teh ê sî, in kiám ē kìm-chia̍h mah? sin-kiáⁿ-sài iáu tâng tī-teh, in bōe-ōe kìm-chia̍h.
20, Tān-sī sî-ji̍t boeh kàu, sin-kiáⁿ-sài boeh tùi in tiong-kan sí-khì, hit ji̍t in chiū boeh kìm-chia̍h.
21, Bô lâng ēng sin pò͘ pó͘ kū saⁿ; nā ū, chiū só͘ pó͘ ê hit tè ē kiù-li̍h i, chiū-sī sin ê kiù-li̍h kū ê, i ê phòa-khang koh khah tōa.
22, Iā bô lâng ēng sin chiú té tī kū phôe-lông; nā ū, chiū sin chiú ē piak-li̍h phôe-lông, chiú lāu, lông iā phah-pháiⁿ. Chí-ū sin chiú tio̍h ji̍p tī sin phôe-lông.
23, Iâ-so͘ tī an-hioh-ji̍t tùi be̍h-hn̂g keng-kè, I ê bûn-tô͘ kiâⁿ lō͘ ê sî tiah be̍h-sūi.
24, Hoat-lī-sài-phài ê lâng kā I kóng, Lí khòaⁿ, in tī an-hioh-ji̍t kiâⁿ só͘ m̄ eng-kai kiâⁿ ê, sī cháiⁿ-iūⁿ?
25, Iâ-so͘ kā in kóng, Tāi-pi̍t kap kun-tè ê lâng, tng khiàm-kheh koh iau ê sî só͘ kiâⁿ ê, lín bē tha̍k-tio̍h mah?
26, Chiū-sī tng A-pí-a-thah chò chè-si-thâu ê sî i ū cháiⁿ-iūⁿ ji̍p Siōng-chú ê chhù, chia̍h pâi-lia̍t ê piáⁿ, sòa hō͘ kun-tè i ê lâng; chi̍t hō piáⁿ, nā m̄-sī chè-si, chiū m̄ thang chia̍h.
27, Koh kā in kóng, An-hioh-ji̍t ūi-tio̍h lâng lâi siat-li̍p, m̄-sī lâng ūi-tio̍h an-hioh-ji̍t.
28, Só͘-í Jîn-chú iā sī an-hioh-ji̍t ê Chú.