《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第28章

作者 巴克禮普世版小組 2011.10.23

1, An-hioh-ji̍t āu, chhit ji̍t ê thâu chi̍t ji̍t, thiⁿ phú-kng. Boa̍t-tāi-lia̍p ê Má-lī-a kap pa̍t ê Má-lī-a lâi boeh khòaⁿ hit ê bōng.
2, Hut-jiân tē tōa tín-tāng, in-ūi Chú ê thiⁿ-sài tùi thiⁿ lo̍h-lâi, kō khui hit tè chio̍h, lâi chē tī téng-bīn.
3, I ê bīn-māu chhin-chhiūⁿ sih-nà, saⁿ pe̍h chhin-chhiūⁿ seh.
4, Kò͘-siú ê lâng in-ūi kiaⁿ, chiū ngia̍uh-ngia̍uh-chhoah, piàn chhin-chhiūⁿ sí.
5, Thiⁿ-sài ìn hiah-ê hū-jîn-lâng kóng, Lín m̄ bián kiaⁿ, in-ūi góa chai lín teh chhōe tèng si̍p-jī-koe3e5 Iâ-so͘.
6, I bô tī chia, in-ūi I í-keng koh-oa̍h, chiàu I só͘ kóng ê; lín lâi khòaⁿ Chú só͘ tó ê só͘-chāi.
7, Iā tio̍h kín-kín khì kā I ê bûn-tô͘ kóng, I tùi sí-lâng tiong koh-oa̍h, iā boeh tāi-seng lín khì Ka-lī-lī-séng, tī hia lín boeh khòaⁿ-tio̍h I; góa í-keng kā lín kóng à.
8, In kín-kín lī-khui bōng, iā kiaⁿ iā tōa hoaⁿ-hí, cháu khì pò I ê bûn-tô͘.
9, Hut-jiân Iâ-so͘ tú-tio̍h in, kóng, Pêng-an. In chìn-chêng, phō I ê kha, pài I.
10, Iâ-so͘ chiū kā in kóng, M̄ bián kiaⁿ, khì pò góa ê hiaⁿ-tī, kah in khì Ka-lī-lī-séng, tī hia boeh khòaⁿ-tio̍h góa.
11, Hū-jîn-lâng khì ê sî, kò͘-siú ê peng ū-ê ji̍p siâⁿ, ēng só͘ keng-koe3e5 sū choân-pō͘ pò chiah-ê chè-si-thâu.
12, In chiū kap tiúⁿ-ló chū-chi̍p, saⁿ-kap chham-siông, ēng chē-chē gûn hō͘ peng, kóng,
13, Lín tio̍h kóng, Goán teh khùn ê sî, I ê bûn-tô͘ mî-sî lâi thau-khì.
14, Siat-sú chit-ê tāi-chì hō͘ chóng-tok thiaⁿ-tio̍h, goán chiū boeh khǹg i, hō͘ lín bô sū.
15, In the̍h hiah-ê gûn, chiàu só͘ kà in ê khì kiâⁿ; chit-ê ē chiū piàn thoân Iû-thài lâng tiong, kàu tī kin-á-ji̍t.
16, Tān-sī cha̍p-it ê bûn-tô͘ khì Ka-lī-lī-séng, kàu Iâ-so͘ só͘ bat kā in tiāⁿ-tio̍h ê soaⁿ.
17, Khòaⁿ-kìⁿ I, chiū pài I; tān-sī ū-ê giâu-gî.
18, Iâ-so͘ kūn-óa lâi tùi in kóng ōe, kóng, Thiⁿ-téng tē-ē ê koân, í-keng lóng-chóng hō͘ góa.
19, Só͘-í lín tio̍h khì chio bān jîn-bîn lâi chò bûn-tô͘, kā in kiâⁿ sé-lé, hō͘ in kui tī Pē, Kiáⁿ, Sèng Lêng ê miâ;
20, kìⁿ-nā góa só͘ ū bēng-lēng lín ê, tio̍h kà-sī in siú; koh góa ji̍t-ji̍t kap lín tī-teh, kàu sè-kan ê lō͘-bé.