《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第27章

作者 巴克禮普世版小組 2011.10.16

1, Kàu thiⁿ-kng, só͘-ū ê chè-si-thâu kap jîn-bîn ê tiúⁿ-ló saⁿ-kap kè-bô͘ kong-kek Iâ-so͘, ài hō͘ I sí.
2, Í-keng pa̍k I, chiū tòa-khì kau hō͘ chóng-tok Pí-lia̍p-to.
3, Hit sî bē I ê Iû-tāi khòaⁿ-tio̍h Iâ-so͘ siū tēng-chōe, chiū hō͘-hóe, chiong hiah-ê saⁿ-cha̍p gûn hêng chiah-ê chè-si-thâu kap tiúⁿ-ló,
4, kóng, Góa bē bô chōe ê ê huih, ū chōe à. In kóng, Kap goán siáⁿ kan-sia̍p? Lí ka-kī táⁿ-sǹg.
5, Iû-tāi hiat hiah-ê gûn tī tiān-ni̍h, thè-khì ka-kī tiàu-sí.
6, Hiah-ê chè-si-thâu the̍h hit ê gûn, kóng, Che sī huih ê kè, m̄-thang lok tī khò͘-pâng.
7, In chiū chham-siông, chiong hit ê gûn khì bóe sio-hûi lâng ê hn̂g, thang bâi-chòng chhut-gōa lâng.
8, Só͘-í hit khu hn̂g kàu taⁿ chheng chò Huih-hn̂g.
9, Tùi án-ne èng-giām chá thok sian-ti Iâ-lī-bí só͘ kóng ê, kóng, In the̍h siū-kó͘-ê ê kè-gûn saⁿ-cha̍p, chiū-sī Í-sek-lia̍t ê kiáⁿ-sun tiong ū lâng só͘ kó͘ ê;
10, ēng i lâi bóe sio-hûi-ê ê hn̂g, chiàu Chú só͘ bēng-lēng góa ê.
11, Iâ-so͘ khiā tī chóng-tok ê bīn-chêng; chóng-tok mn̄g I kóng, Lí sī Iû-thài lâng ê ông mah? Iâ-so͘ kā i kóng, Lí kóng, chiū-sī.
12, I hō͘ hiah-ê chè-si-thâu tiúⁿ-ló kò, I iā bô ìn.
13, Hit sî Pí-lia̍p-to kā I kóng, Hiah-ê lâng kiàn-chèng lí kàu hiah chōe hāng, lí bô thiaⁿ-tio̍h mah?
14, Iâ-so͘ bô ìn i chi̍t kù ōe, tì-kàu chóng-tok tōa kî-koài.
15, Kàu choeh-kî chóng-tok chiàu-lē pàng chi̍t-ê hoān-lâng hō͘ chèng lâng, sī chiàu in só͘ ài ê.
16, Hit sî ū chhut-miâ ê hoān-lâng, miâ kiò Pa-lia̍p-pa.
17, In í-keng chū-chi̍p, Pí-lia̍p-to kā in kóng, Lín ài góa pàng siáⁿ-lâng hō͘ lín? sī Pa-lia̍p-pa, á-sī chheng chò Ki-tok ê Iâ-so͘?
18, In-ūi chai in ūi-tio̍h oàn-tò͘ chiah kè/2-sàng Iâ-so͘.
19, I chē tn̂g ê sî, i ê bó͘ chhe lâng kā i kóng, Chit-ê gī lâng lí m̄-thang kan-sia̍p-tio̍h; in-ūi góa kin-á-ji̍t tī bîn-bāng tiong ūi-tio̍h I chē-chē kan-khó͘.
20, Chiah-ê chè-si-thâu kap tiúⁿ-ló kiau-so chèng lâng, kiû pàng Pa-lia̍p-pa, bia̍t Iâ-so͘.
21, Chóng-tok ìn kóng, Chit nn̄g lâng lín ài góa pàng tó-ūi chi̍t-ê hō͘ lín? In kóng, Pa-lia̍p-pa. Pí-lia̍p-to kā in kóng,
22, Án-ne, chiū chheng chò Ki-tok ê Iâ-so͘, góa tio̍h cháiⁿ-iūⁿ pān I? In lóng kóng, Tèng I si̍p-jī-kè.
23, Chóng-tok kóng, Cháiⁿ-iūⁿ, I ū kiâⁿ sím-mi̍h pháiⁿ? In tōa siaⁿ hoah kóng, Tèng I si̍p-jī-kè.
24, Pí-lia̍p-to khòaⁿ-tio̍h bô chhái-kang, tian-tò ná jiáu-loān, chiū phâng chúi, tī chèng lâng ê bīn-chêng sóe chhiú, kóng, Tī chit-ê gī lâng ê huih góa bô chōe, lín ka-kī táⁿ-sǹg.
25, Peh-sìⁿ lóng ìn i kóng, I ê huih kui tī goán kap goán ê kiáⁿ-sun.
26, I chiū pàng Pa-lia̍p-pa hō͘ in. Í-keng piⁿ-phah Iâ-so͘, chiū hoat-kau khì tèng si̍p-jī-kè.
27, Hit sî chóng-tok ê peng tòa Iâ-so͘ ji̍p kong-tn̂g, chū-chi̍p choân iâⁿ ûi I.
28, Thǹg I ê saⁿ, chiong âng phàu kā I chhēng;
29, ēng chhì-á pēⁿ bián-liû, tì tī I ê thâu-khak, ēng lô͘-tek hē tī I ê chiàⁿ-chhiú, kūi tī I ê bīn-chêng hì-lāng I kóng, Iû-thài lâng ê ông, pêng-an.
30, Chiū kā I phùi-nōa, kia̍h hit ki lô͘-tek, lâi sut I ê thâu-khak.
31, Hì-lāng soah, hit niá phàu chiū kā I thǹg-khí-lâi, chiong I ka-kī ê saⁿ kā I chhēng, tòa I khì tèng si̍p-jī-kè.
32, Chhut-lâi ê sî tú-tio̍h chi̍t ê Kó͘-lī-nāi lâng miâ Se-bûn, bián-kióng i saⁿ-kap khì, hō͘ i giâ Iâ-so͘ ê si̍p-jī-kè.
33, Kàu chi̍t só͘-chāi, miâ Kok-kok-thaⁿ, chiū-sī thâu-khak-óaⁿ ê só͘-chāi, chiū ēng khó͘-táⁿ só͘ tiâu-hô ê chiú hō͘ I lim;
34, I chhì-khòaⁿ, chiū m̄ lim.
35, Í-keng tèng I tī si̍p-jī-kè, chiū chò-khau pun I ê saⁿ-khò͘;
36, koh chē tī hia kò͘-siú I.
37, Chiū hē chám-tiâu tī I ê thâu-khak ê téng-bīn, siá kóng, Chit-ê sī Iû-thài lâng ê ông, Iâ-so͘.
38, Hit sî ū nn̄g ê chha̍t kap I tâng tèng tī si̍p-jī-kè, chi̍t-ê tī chiàⁿ-pêng, chi̍t-ê tī tò-pêng.
39, Keng-koe3e5 lâng ki-chhì I, iô thâu kóng,
40, Lí húi-hoāi tiān, saⁿ ji̍t koh khí ê, tio̍h kiù ka-kī; lí nā sī Siōng-chú ê Kiáⁿ, tio̍h tùi si̍p-jī-kòe lo̍h-lâi.
41, Hiah-ê chè-si-thâu kap keng-ha̍k-kàu-su í-ki̍p tiúⁿ-ló iā sī án-ne hì-lāng I, kóng,
42, I bat kiù pa̍t lâng, bōe-ōe kiù ka-kī. I chò Í-sek-lia̍t ê ông, taⁿ tio̍h tùi si̍p-jī-koe3loh8-lâi, goán chiū boeh sìn I.
43, I óa-khò Siōng-chú, Siōng-chú nā hoaⁿ-hí I, taⁿ chiū tio̍h kiù I; in-ūi I kóng, Góa chiū-sī Siōng-chú ê Kiáⁿ.
44, Kap I tâng tèng hit nn̄g ê chha̍t iā sī án-ne mē I.
45, Tùi ji̍t-tiong-tàu kàu saⁿ tiám, piàn tē o͘-àm.
46, Chha-put-to saⁿ tiám, Iâ-so͘ tōa siaⁿ âu-kiò kóng, Í-lī, Í-lī, la̍h-má sat-pok-tāi-nî, chiū-sī kóng, Góa ê Siōng-chú, góa ê Siōng-chú, lí siáⁿ-sū pàng-lī góa?
47, Piⁿ-thâu khiā ê ū lâng thiaⁿ-tio̍h chiū kóng, I teh kiò Í-lī-a.
48, Tiong-kan chi̍t lâng chek-sî cháu-khì, the̍h hái-jiông, chìm chhò͘, hâ tī lô͘-tek-á bé, hō͘ I suh.
49, Kî-û ê kóng, Chhiáⁿ bān, khòaⁿ Í-lī-a lâi kiù I á bô.
50, Iâ-so͘ koh tōa siaⁿ âu-kiò, chiū tn̄g khùi.
51, Hut-jiân tiān-lāi ê tiùⁿ, tùi téng kàu ē, li̍h chò nn̄g pêng; tē tāng, chio̍h-pôaⁿ li̍h;
52, bōng khui, í-keng teh khùn ê sèng-tô͘, in ê sin-khu chē-chē khí-lâi, tùi in ê bōng chhut;
53, kàu Iâ-so͘ koh-oa̍h liáu-āu, in ji̍p sèng siâⁿ, chhut-hiān tī chē-chē lâng.
54, Pé-chóng kap saⁿ-tâng kò͘-siú Iâ-so͘ ê, khòaⁿ-tio̍h tē-tāng, kap só͘ keng-koe3e5 sū, put-chí kiaⁿ, kóng, Chit-ê kó-jiân sī Siōng-chú ê Kiáⁿ.
55, Ū chē-chē hū-jîn-lâng tī hia hn̄g-hn̄g teh khòaⁿ; in chiū-sī tùi Ka-lī-lī-séng kun-tè Iâ-so͘ lâi ho̍k-sāi I ê;
56, chiông-tiong ū Boa̍t-tāi-lia̍p ê Má-lī-a, Ngá-kok Iok-se ê lāu-bú Má-lī-a, kap Se-pí-thài ê kiáⁿ ê lāu-bú.
57, Í-keng àm, ū A-lī-má-thài ê hó-gia̍h lâng lâi, miâ chò Iok-sek, i iā sī Iâ-so͘ ê bûn-tô͘.
58, Hit lâng khì kìⁿ Pí-lia̍p-to, kiû Iâ-so͘ ê sin-si; Pí-lia̍p-to hoan-hù tio̍h hō͘ i.
59, Iok-sek siu hit ê sin-si, ēng chheng-khì ê iù-pò͘ pau i;
60, hē tī i ka-kī ê sin bōng, chiū-sī i tī chio̍h-pôaⁿ só͘ phah ê; chiū kō tōa tè chio̍h tī bōng-mn̂g, chiah khì.
61, Ū Boa̍t-tāi-lia̍p ê Má-lī-a kap pa̍t ê Má-lī-a tī hia, chē tī bōng ê tùi-bīn.
62, Keh ji̍t, chiū-sī chún-pī choeh āu ê chi̍t ji̍t, hiah-ê chè-si-thâu kap Hoat-lī-sài-phài ê lâng chū-chi̍p kìⁿ Pí-lia̍p-to kóng,
63, Tāi-jîn ah, goán kì-tit hit ê bê-he̍k lâng ê, oa̍h-teh ê sî bat kóng, Saⁿ ji̍t āu góa boeh koh-oa̍h.
64, Só͘-í chhiáⁿ lí bēng-lēng kò͘-siú hit ê bōng, kàu tē saⁿ ji̍t; kiaⁿ-liáu I ê bûn-tô͘ lâi thau I khì, iā kā jîn-bîn kóng, I tùi sí-lâng tiong koh-oa̍h; án-ne, chiū āu-lâi ê chha-biū, pí tāi-seng khah lī-hāi.
65, Pí-lia̍p-to kā in kóng, Lín niá peng khì, chiàu lín só͘ chai-iáⁿ ê khì kò͘-siú.
66, In chiū khì, hong chio̍h kap siat peng, lâi kò͘-siú hit ê bōng.