《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第三章

作者 巴克禮普世版小組 2011.04.10

1) Hit tong-sî, si-sé-chiá Iok-hān lâi kàu Iû-thài ê khòng-iá soan-káng tō-lí,
2) I soan-iông kóng, "Lín tio̍h hóe-kái; in-ūi Thian-kok teh-boeh kàu à."
3) Chit-ê lâng chiū-sī sian-ti Í-sài-a só͘ teh kóng ê , " Ū siaⁿ tī khòng-iá teh hoah kóng, Tio̍h ūi Chú chún-pī tō-lō͘, Siu ti̍t I boeh kiâⁿ ê sió-lō͘."
4) Chit ê Iok-hān chhēng lo̍k-tô-mn̂g ê saⁿ, io hâ phôe-tòa; i só͘ chia̍h ê sī chháu-meh kap iá-bi̍t.
5) Hit sî Iâ-lō͘-sat-léng kap choân Iû-thài-séng, í-ki̍p Iok-tàn-hô sì-chiu-ûi ê chèng lâng lóng chhut-lâi kìⁿ Iok-han;
6) in jīn-chōe, Iok-hān chiū tī Iok-tàn-hô kā in kiâⁿ sé-lé.
7) Iok-hān khòaⁿ-tio̍h Hoat-lī-sài-phài kap Sat-thó͘-kai-phài ê lâng, chē-chē lâi boeh hō͘ i sé-lé, chiū kā in kóng, Lín chiah-ê to̍k-chôa ah, siáⁿ-lâng kéng-kò lín siám-pī Siōng-chú teh-boeh hoat ê siū-khì à?
8) Taⁿ lín tio̍h ēng hêng-ûi lâi chèng-bêng lín chin-chiàⁿ ū hóe-kái.
9) M̄-thang ka-kī siūⁿ kóng, Ū A-pek-la̍h-hán chò goán ê chó͘-sian; góa kā lín kóng, Siōng-chú ē-tàng tùi chiah-ê chio̍h-thâu seⁿ-chhut A-pek-la̍h-hán ê kiáⁿ-sun.
10) Taⁿ pó͘-thâu í-keng khòa tī chhiū-thâu; nā bô kiat hó kóe-chí ê chhiū , lóng boeh kā i chhò khí-lâi, hiat-lo̍h hóe-ni̍h.
11) Góa ēng chúi kā lín kiâⁿ sé-lé, sī boeh piáu-bêng lín ū hóe-kái; tān-sī tī góa āu-bīn teh-boeh lâi ê Hit-ūi, pí góa khah ū koân-lêng, góa liân kā I kōaⁿ-ê to bē kham-tit; I boeh ēng Sèng Lêng kap hóe kā lín kiâⁿ sé-lé.
12) I ê chhiú the̍h chhiah-ki, boeh chiong be̍h-tiâⁿ choân-pō͘ pòa chheng-khì, I ē chiong be̍h-á siu ji̍p-khì chhng-khò͘; tān-sī be̍h-hiuⁿ chiū ēng bē hoa-khì ê hóe kā sio-tiāu.
13) Hit sî, Iâ-so͘ tùi Ka-lī-lī-séng lâi kàu Iok-tàn-hô Iok-hān hia, boeh hō͘ sé-lé.
14) Tān-sī Iok-hān kā I chó͘-chí kóng, Góa èng-kai tio̍h tùi lí niá sé-lé, lí thài-ē tian-tò lâi chhōe góa?
15) Iâ-so͘ ìn i kóng, " Taⁿ chhiáⁿ ún góa án-ne chò chiah ha̍h Siōng-chú lóng-chóng ê iau-kiû." Iok-hān chiū chiàu án-ne chò.
16) Iâ-so͘ siū sé-lé liáu-āu, chiū sûi-sî tùi chúi-ni̍h khí-lâi. Thiⁿ hut-jiân ūi-tio̍h I khui, I chiū khòaⁿ-tio̍h Siōng-chú ê Sèng Lêng, chhin-chhiūⁿ hún-chiáu kàng-lîm tī I ê téng-bīn.
17) Koh ū siaⁿ tùi thiⁿ-téng lâi, kóng, " Chit-ê sī Góa só͘ thiàⁿ ê Kiáⁿ, Góa chin-chiàⁿ kah-ì ê."