《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第四章

作者 巴克禮普世版小組 2011.04.17

1) Hit sî, Iâ-so͘ hō͘ Sèng Lêng chhōa kàu khòng-iá, boeh siū Mô͘-kúi ê chhì-thàm.
2) Iâ-so͘ í-keng kìm-chia̍h sì-cha̍p mê-ji̍t, āu-lâi chiū iau.
3) Chhì-thàm-chiá óa-lâi kā I kóng, Lí nā sī Siōng-chú ê Kiáⁿ, chiū kah chiah-ê chio̍h-thâu pìⁿ chò piáⁿ.
4) Iâ-so͘ ìn kóng," Sèng-keng ū kì-chài kóng, Lâng ê oa̍h-miā, m̄-sī kan-ta óa-khò piáⁿ, sī óa-khò tùi Siōng-chú ê chhùi só͘ kóng chhut-lâi ê múi chi̍t-kù ōe."
5) Mô͘-kúi chiū chhōa Iâ-so͘ kàu sèng siâⁿ, hō͘ I khiā tī Sèng-tiān chhù-téng siōng-koân ê só͘-chāi.
6) kā I kóng, "Lí nā sī Siōng-chú ê Kiáⁿ, tio̍h tùi chia thiàu lo̍h-khì; in-ūi Sèng-keng ū kì-chài: Siōng-chú ē bēng-lēng I ê thiⁿ-sài lâi pó-hō͘ Lí. In ē ēng chhiú kā lí hû teh, hō͘ lí ê kha bē tak-tio̍h chio̍h-thâu.
7) Iâ-so͘ kā i kóng, " Sèng-keng koh ū kì-chài: M̄-thang chhì-thàm Chú, lí ê Siōng-chú."
8) Mô͘-kúi koh chhōa Iâ-so͘ khì chi̍t-ê chin koân ê soaⁿ-téng, hō͘ I khòaⁿ thiⁿ-ē bān kok kap in ê êng-hôa hù-kùi;
9) kā I kóng, "Lí nā phak-lo̍h pài góa, chiah-ê it-chhè góa lóng boeh hō͘ Lí.
10) Iâ-so͘ chiū kā i kóng, "Sat-tàn, kā góa siám-khui! Sèng-keng ū kì-chài: Tio̍h pài Chú, lí ê Siōng-chú; chí-ū ho̍k-sāi I.
11) Mô͘-kúi chiū lī-khui Iâ-so͘; sûi-sî ū thiⁿ-sài lâi su-hāu I.
12) Iâ-so͘ thiaⁿ-tio̍h Iok-hān hō͘ lâng lia̍h-khì koaiⁿ-kaⁿ, chiū thè-khì Ka-lī-lī-séng;
13) I lī-khui Ná-sat-le̍k-siâⁿ, khì tòa Se-pò͘-lûn kap La̍p-tāi-lī tē-khu, Ka-lī-lī-ô͘ ô͘-piⁿ ê Ka-pek-lông.
14) Che sī boeh èng-giām chá-chêng thok sian-ti Í-sài-a só͘ kóng ê ōe:
15) Se-pò͘-lûn ê tē, La̍p-tāi-lī ê tē, Iân hái-kîⁿ ê lō͘,Iok-tàn-hô ê hô- gōa, Gōa-pang-lâng teh tòa ê Ka-lī-lī-séng;
16) Tòa tī o͘-àm-tiong ê jîn-bîn, Ū khòaⁿ-tio̍h tōa kng; Tòa tī sí-ìm ê tē ê lâng ū kng chiò in.
17) Tùi hit sî khí, Iâ-so͘ khai-sí soan-káng tō-lí, kóng: "Lín tio̍h hóe-kái, in-ūi Thian-kok teh-boeh lâi-lîm à."
18) Ū chi̍t-ji̍t, Iâ-so͘ tī Ka-lī-lī-ô͘ ê ô͘-piⁿ teh kiâⁿ ê sî; khòaⁿ-tio̍h nn̄g ê hiaⁿ-tī-á, chiū-sī kiò chò Pí-tek ê Se-bûn kap i ê hiaⁿ-tī An-tek-lia̍t, tī ô͘-ni̍h teh pha-bāng, in-ūi in sī thó-hî-lâng.
19) Iâ-so͘ chiū kā in kóng, " Lâi tòe góa, góa boeh hō͘ lín tit-tio̍h lâng chhin-chhiūⁿ thó-hî-lâng tit-tio̍h hî.
20) In sûi-sî kā hî-bāng-á pàng teh lâi tòe Iâ-so͘.
21) Iâ-so͘ kiâⁿ chìn-chêng, koh khòaⁿ-tio̍h nn̄g ê hiaⁿ-tī-á, Se-pí-thài ê kiáⁿ Ngá-kok kap i ê sió-tī Iok-hān. In kap lāu-pē Se-pí-thài tī chûn-téng teh pó͘ bāng, Iâ-so͘ iā chio in lâi tòe I.
22) In sûi-sî kā chûn pàng hē teh, kap in ê lāu-pē sio-sî, lâi tòe Iâ-so͘.
23) Iâ-so͘ kā Ka-lī-lī-séng kiâⁿ thàu-thàu, tī hia ê hōe-tn̂g kà-sī lâng, soan-káng Thian-kok ê Hok-im, i-hó bîn-chiòng ta̍k chióng ê pēⁿ-chèng.
24) I ê miâ-siaⁿ thoân kàu choân Sū-lī-a. Lâng chiū chiong só͘-ū tài pēⁿ-thiàⁿ ê lâng, bô-lūn sī siâ-sîn hū-sin, iûⁿ-hîn, kap poàn-sūi téng-téng, lóng chhōa lâi Iâ-so͘ hia, I chiū kā in i-hó.
25) Hit sî, tùi Ka-lī-lī, Te-ka-pho-lī, Iâ-lō͘-sat-léng, Iû-thài, kap Iok-tàn-hô tùi-hōaⁿ, ū chin tōa tīn ê lâng lâi tòe I.