《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第二章

作者 巴克禮普世版小組 2011.04.03

1) Tng Hi-lu̍t chò-ông ê sî, Iâ-so͘ tī Iû-thài-séng ê Pek-lī-hêng-siâⁿ chhut-sì, ū kúi-nā ê chheⁿ-siōng-ka tùi tang-hng lâi kàu Iâ-lō͘-sat-léng,
2) kóng, Chhut-sì boeh chò Iû-thài-lâng ê ông ê âng-eⁿ-á tī tó-ūi? in-ūi goán tī tang-hng ū khòaⁿ-tio̍h I ê chheⁿ chhut-hiān, só͘-í goán boeh lâi pài I.
3) Hi-lu̍t ông thiaⁿ-tio̍h chiū sim-sîn put-an, choân Iâ-lō͘-sat-léng iā sī án-ne.
4) Chiū chū-chi̍p só͘-ū ê chè-si-thâu, kap bîn-kan ê keng-ha̍k-kàu-su, mn̄g in Ki-tok eng-kai tī sím-mi̍h só͘-chāi chhut-sì.
5) In ìn kóng, Tī Iû-thài ê Pek-lī-hêng-siâⁿ; in-ūi sian-ti ê chheh ū án-ne kì-chài,
6) Iû-thài tē-khu, Pek-lī-hêng-siâⁿ ah, Tī Iû-thài chiah ê siâⁿ ê thâu-lâng tiong, lí m̄ sī siōng sè ê; In-ūi ū chi̍t ê jîn-kun boeh tùi lí hia chhut-lâi, I boeh bo̍k-ióng Góa ê chú-bîn Í-sek-lia̍t.
7) Hi-lu̍t chiū thau-thau-á tiàu hit kúi-ê chheⁿ-siōng-ka lâi, siông-sè mn̄g in hit lia̍p chheⁿ sím-mi̍h sî chhut-hiān.
8) Chiū chhe in khì Pek-lī-hêng-siâⁿ kóng, Lín khì siông-sè thàm-thiaⁿ hit ê eⁿ-á ê sū; chhōe-tio̍h chiū lâi kā góa kóng, hō͘ góa iā thang khì pài I.
9) In thiaⁿ ông ê ōe chiū khì; hut-jiân tang-hng só͘ khòaⁿ-tio̍h ê chheⁿ tī thâu-chêng chhōa in, lâi kàu eⁿ-á ê só͘-chāi, chiū thêng tī hit téng-bīn. 10) In khòaⁿ-tio̍h hit lia̍p chheⁿ, hui-siōng hoaⁿ-hí.
11) In ji̍p-khì chhù-lāi, khòaⁿ-tio̍h eⁿ-á kap I ê lāu-bú Má-lī-a; chiū kūi lo̍h-khì pài eⁿ-á; khui in ê pó-a̍p, chiong n̂g-kim, jú-hiuⁿ, bu̍t-io̍h chò lé-mi̍h hiàn hō͘ I.
12) Siōng-chú koh tī in ê bîn-bāng-tiong chí-sī in m̄-thang tò-tńg khì Hi-lu̍t hia, chiū tùi pa̍t tiâu lō͘ tńg-khì in pún-kok.
13) In tńg-khì liáu-āu, Chú ê thiⁿ-sài lâi kā Iok-sek tī bîn-bāng-tiong chhut-hiān kóng, Khí-lâi, chhōa eⁿ-á kap I ê lāu-bú tô-cháu khì Ai-ki̍p, tòa hia kàu góa koh kā lí thong-ti; in-ūi Hi-lu̍t boeh chhōe eⁿ-á lâi kā I thâi-sí.
14) Iok-sek chiū khí-lâi, thàu-mê chhōa eⁿ-á kap I ê lāu-bú khì Ai-ki̍p.; tī hia tòa kàu Hi-lu̍t sí-khì;
15) Che sī boeh èng-giām Chú thok sian-ti só͘ kóng ê ōe, kóng, Góa ū tiàu góa ê kiáⁿ chhut Ai-ki̍p.
16) Hi-lu̍t chi̍t-ē chai-iáⁿ hō͘ chheⁿ-siōng-ka siat-kè khì, chiū tōa siū-khì, hā-lēng chiong Pek-lī-hêng-siâⁿ kap chiu-ûi só͘ ū ê cha-po͘ gín-á, chiàu i tùi chheⁿ-siōng-ka siông-sè chhâ-mn̄g ê sî sǹg-khí, nn̄g hòe í-hā ê lóng thâi-sí.
17) Che chiū-sī èng-giām chá-chêng thok sian-ti Iâ-lī-bí só͘ kóng ê ōe,
18) Tī La̍h-má thiaⁿ-tio̍h siaⁿ, Thî-khàu koh tōa pi-siong, Lúi-kiat ūi i ê kiáⁿ-jî teh khàu; M̄-khéng siū an-ùi, in-ūi in lóng sí-khì à.
19) Hi-lu̍t sí liáu-āu, Chú ê thiⁿ-sài tī Ai-ki̍p, kā Iok-sek thok-bāng kóng,
20) Khí-lâi, chhōa eⁿ-á kap I ê lāu-bú khì Í-sek-lia̍t tē; in-ūi hiah-ê boeh sat-hāi eⁿ-á ê lâng í-keng sí à.
21) I chiū khí-lâi, chhōa eⁿ-á kap I ê lāu-bú tńg-khì Í-sek-lia̍t-tē.
22) Iok-sek chi̍t-ē thiaⁿ-tio̍h A-ki-ló sòa-chiap i ê lāu-pē Hi-lu̍t tī Iû-thài chò ông, chiū m̄-káⁿ tńg-khì hia; i koh tī bîn-bāng-tiong tit-tio̍h chí-sī, chiū siám-pī khì kàu Ka-lī-lī-séng ê kéng-lāi.
23) Khì kàu chi̍t ê kiò-chò Ná-sat-le̍k ê siâⁿ, tiàm hia khiā-khí; sī boeh èng-giām chá-chêng thok sian-ti só͘ kóng ê ōe, I boeh kiò chò Ná-sat-le̍k-lâng.