《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第23章

作者 巴克禮普世版小組 2011.09.04

1, Hit sî Iâ-so͘ kā chèng lâng kap I ê bûn-tô͘ kóng,
2, Keng-ha̍k-sū kap Hoat-lī-sài-phài ê lâng chē Mô͘-se ê ūi.
3, Só͘-í kìⁿ-nā in só͘ kā lín kóng ê, lóng tio̍h kiâⁿ lâi siú i; tān-sī bo̍h-tit chiàu in ê só͘ chò lâi kiâⁿ; in-ūi in ū kóng, iā bô kiâⁿ.
4, In ēng tāng koh oh taⁿ ê tàⁿ pa̍k lâi hē tī lâng ê keng-thâu téng, tān-sī in ka-kī m̄ khéng ēng chi̍t ki chńg-thâu-á tín-tāng i.
5, In it-chhè ê só͘ chò, lóng sī boeh hō͘ lâng khòaⁿ chiah chò; in-ūi in ê pōe-keng chò khah khoah, saⁿ-á-ku ê chhiu chò khah tn̂g.
6, Ài iân-toh-ni̍h chē tōa ūi, hōe-tn̂g lāi chē koân ūi,
7, koe-chhī-ni̍h hō͘ lâng chhéng-an, iā hō͘ lâng chheng-ho͘ in Lia̍p-pí.
8, Tān-sī lín bo̍h-tit hō͘ lâng chheng chò Lia̍p-pí; in-ūi lín ê sian-siⁿ sī chi̍t ê, lín lóng sī hiaⁿ-tī.
9, Tī tē-ni̍h iā bo̍h-tit chheng lâng chò pē; in-ūi lín ê Pē sī chi̍t ê, chiū-sī tī thiⁿ-téng ê.
10, Iā bo̍h-tit hō͘ lâng chheng chò sian-siⁿ; in-ūi lín ê sian-siⁿ sī chi̍t ê, chiū-sī Ki-tok.
11, Tān-sī lín tiong-kan chò tōa ê, boeh chò lín ê chhe-ēng.
12, Hoān-nā chū-ko ê, boeh hō͘ i pi-bî; ka-kī pi-bî ê, boeh kā i ko-seng.
13, Lín ké-hó ê keng-ha̍k-kàu-su kap Hoat-lī-sài-phài ê lâng, ū chai-ē ah! in-ūi lín tī lâng ê bīn-chêng koaiⁿ-ba̍t Thian-kok; lín ka-kī bô ji̍p, teh-boeh ji̍p ê lâng, lín iā m̄ chún in ji̍p.
14,15, Lín ké-hó ê keng-ha̍k-kàu-su kap Hoat-lī-sài-phài ê lâng, ū chai-ē ah! in-ūi lín piàn kiâⁿ chúi-lō͘ lio̍k-lō͘, hō͘ chi̍t lâng ji̍p kàu; kì-jiân ji̍p, chiū hō͘ i chò tē-ge̍k ê lâng, pí lín ka-pē.
16, Lín chhiⁿ-mî chò chhōa-thâu ê, ū chai-ē ah! lín kóng, Kìⁿ-nā kí tiān lâi chiù-chōa ê, bô sū; chí-ū kìⁿ-nā kí tiān-ni̍h ê kim lâi chiù-chōa ê, chiū tio̍h siú i.
17, Lín gōng koh chhiⁿ-mî; in-ūi tó-ūi chi̍t hāng khah tōa, sī kim, á-sī hō͘ kim chiâⁿ sèng ê tiān ah?
18, Lín iā kóng Kìⁿ-nā kí tôaⁿ lâi chiù-chōa ê, bô sū; chí-ū kìⁿ-nā kí tôaⁿ-téng ê lé-mi̍h lâi chiù-chōa ê, chiū tio̍h siú i.
19, Lín chhiⁿ-mî ah; in-ūi tó-ūi chi̍t hāng khah tōa, sī lé-mi̍h á-sī hō͘ lé-mi̍h chiâⁿ sèng ê tôaⁿ?
20, Só͘-í lâng kí tôaⁿ lâi chiù-chōa, sī kí tôaⁿ kap kìⁿ-nā tī i téng-bīn ê, lâi chiù-chōa.
21, Lâng kí tiān lâi chiù-chōa, sī kí tiān kap tiàm tī hit lāi-bīn ê lâi chiù-chōa.
22, Lâng kí thiⁿ lâi chiù-chōa, sī kí Siōng-chú ê chō-ūi kap chē tī hit téng-bīn ê, lâi chiù-chōa.
23, Lín ké-hó ê keng-ha̍k-kàu-su kap Hoat-lī-sài-phài ê lâng, ū chai-ē ah! in-ūi lín chiong po̍k-hô, poeh-kak, má-khûn, cha̍p hūn thiu chi̍t hūn; tān-sī lu̍t-hoat ê khah chun-tiōng ê, chiū-sī kong-gī, lîn-bín kap sìn-si̍t, lín chiū pàng-sak; tān-sī chiah-ê sī eng-kai tio̍h kiâⁿ ê, hiah-ê iā sī m̄-thang pàng-sak.
24, Lín chhiⁿ-mî chò chhōa-thâu ê, báng-á chiū lū-khí-lâi, lo̍k-tô chiū thun-lo̍h-khì.
25, Lín ké-hó ê keng-ha̍k-kàu-su kap Hoat-lī-sài-phài ê lâng, ū chai-ē ah! in-ūi lín chheng-khì poe-pôaⁿ ê gōa-bīn, tān-sī hit lāi-bīn té le̍k-sek kap hòng-tōng móa-móa.
26, Lí chhiⁿ-mî ê Hoat-lī-sài-phài ê lâng ah, tāi-seng chheng-khì poe-pôaⁿ ê lāi-bīn, hō͘ i ê gōa-bīn iā ē chheng-khì.
27, Lín ké-hó ê keng-ha̍k-kàu-su kap Hoat-lī-sài-phài ê lâng, ū chai-ē ah! in-ūi lín chhin-chhiūⁿ hún pe̍h ê bōng, gōa-bīn khòaⁿ sī súi, tān-sī lāi-bīn té sí-lâng ê kut-thâu kap ta̍k hāng ê ù-òe móa-móa.
28, Án-ne, lín gōa-bīn hō͘ lâng khòaⁿ sī gī, tān-sī lāi-bīn chiū ké-hó kap put-hoat móa-móa.
29, Lín ké-hó ê keng-ha̍k-kàu-su kap Hoat-lī-sài-phài ê lâng, ū chai-ē ah! in-ūi lín chhòng sian-ti lâng ê bōng, siu-chéng gī lâng ê hûn-bōng;
30, ia̍h kóng, Siat-sú goán tī goán chó͘ ê sî, chiū bô kap in ū hūn tī lâu sian-ti lâng ê huih.
31, Án-ne, lín ka-kī kiàn-chèng sī chò thâi sian-ti lâng ê ê kiáⁿ-sun.
32, Chòe lín khì móa lín chó͘ ê hūn-liōng.
33, Chôa ah! to̍k-thâng ê lūi ah! lín thài ē tô-siám tē-ge̍k ê hêng-hoa̍t?
34, Só͘-í góa chhe sian-ti tì-sek ê lâng, keng-ha̍k-kàu-su chiū-kūn lín; ū-ê lín boeh thâi i, boeh tèng i tī si̍p-jī-kè; iā ū-ê boeh tī lín ê hōe-tn̂g ēng piⁿ phah i, tùi chit-ê siâⁿ kóaⁿ-tio̍k in kàu hit ê siâⁿ.
35, Tì-kàu tē-chiūⁿ só͘ lâu gī lâng ê huih, lóng kui tī lín, chiū-sī tùi gī lâng A-pek ê huih kàu Pa-lia̍p-ka ê kiáⁿ Sat-ka-lī-a ê huih, i sī lín só͘ thâi tī tiān kap tôaⁿ ê tiong-kan ê.
36, Góa si̍t-chāi kā lín kóng, Chiah-ê sū lóng boeh kui tī chit tāi.
37, Iâ-lō͘-sat-léng ah! Iâ-lō͘-sat-léng ah! chiū-sī thâi-sí sian-ti lâng, ēng chio̍h-thâu tìm hōng-chhe kàu tī i ê; góa jōa chōe pái ài chū-chi̍p lí ê kiáⁿ-jî, chhin-chhiūⁿ koe-bú chū-chi̍p i ê koe-á tī si̍t-ē; tān-sī lín m̄ ài.
38 Lí khòaⁿ! lín ê chhù boeh pha-hng, lâu-teh hō͘ lín.
39, In-ūi góa kā lín kóng, Taⁿ liáu-āu, lín bô khòaⁿ-tio̍h góa; thèng-hāu lín kóng, Tī Chú ê miâ lâi ê, tit-tio̍h hok-khì.