《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第24章

作者 巴克禮普世版小組 2011.09.11

1, Iâ-so͘ chhut tiān, tú teh kiâⁿ, I ê bûn-tô͘ chiū-kūn I, ēng tiān-tn̂g hiah-ê chhù pò I khòaⁿ.
2, Tān-sī I ìn kóng, Lín bô khòaⁿ-tio̍h chiah-ê mah? góa si̍t-chāi kā lín kóng, Tī chia boeh bô chi̍t tè chio̍h lâu tī chio̍h téng, iā bô chhia-lo̍h-khì.
3, Iâ-so͘ chē tī Kaⁿ-ná soaⁿ ê sî, bûn-tô͘ su-khia chiū-kūn I kóng, Chhiáⁿ kā goán kóng, tī-sî ū chiah-ê tāi-chì? iā lí koh lâi, kap sè-kài ê kiat-kio̍k ū sím-mi̍h tiāu-thâu?
4, Iâ-so͘ ìn kóng, Tio̍h kín-sīn, bo̍h-tit hō͘ lâng bê-he̍k.
5, In-ūi boeh ū chē-chē lâng tī góa ê miâ lâi, kóng, Góa sī Ki-tok, lâi bê-he̍k chē-chē lâng.
6, Lín boeh thiaⁿ-tio̍h kau-chiàn kap kau-chiàn ê hong-siaⁿ, kín-sīn m̄-bián kiaⁿ; in-ūi chiah-ê tek-khak ū, tān-sī boa̍t-kî iáu-bē kàu.
7, In-ūi jîn-bîn boeh khí-lâi kong-kek jîn-bîn, kok boeh khí-lâi kong-kek kok; chē-chē só͘-chāi boeh ū ki-hng, tē-tāng.
8, Chiah-ê lóng sī khó͘-thàng ê khí-thâu.
9, Hit sî lâng boeh kau-hù lín tī hoān-lān, thâi-sí lín. Lín in-ūi góa ê miâ boeh hō͘ bān pang oàn-hūn.
10, Iā hit sî chē-chē lâng boeh siū that-gāi, saⁿ ké-sàng, saⁿ oàn-hūn.
11, Koh ū chē-chē ké sian-ti boeh khí-lâi bê-he̍k chē-chē lâng.
12, In-ūi put-hoat tōa-tōa ke-thiⁿ, chē-chē lâng ê thiàⁿ chiām-chiām léng-tām.
13, Chí-ū thun-lún kàu lō͘-bé ê, i ē tit-tio̍h kiù.
14, Chit-ê Thian-kok ê hok-im boeh thoân kàu choân thiⁿ-ē, chò kiàn-chèng tī bān pang; hit sî boa̍t-kî chiū kàu.
15, Só͘-í lín khòaⁿ-tio̍h chá thok sian-ti Tàn-í-lí só͘ kóng, hit ê chân-hāi khó-ò͘ⁿ ê khiā tī sèng ê só͘-chāi, (tha̍k ê lâng tio̍h hiáu-ngō͘),
16, hit sî tī Iû-thài ê tio̍h cháu-khì soaⁿ-ni̍h;
17, tī chhù-téng ê bo̍h-tit lo̍h-lâi the̍h i ke-lāi ê mi̍h;
18, tī hn̂g-ni̍h ê bo̍h-tit tńg-khì hiaⁿh i ê saⁿ.
19, Tng hiah-ê ji̍t, ū sin-īn kap hō͘ eⁿ-á chia̍h lin ê hū-jîn-lâng ū chai-ē ah!
20, Lín tio̍h kî-tó, bián-tit lín ê tô-cháu tī tang-thiⁿ sî, á-sī an-hioh-ji̍t.
21, In-ūi hit sî boeh ū tōa hoān-lān, tùi sè-kan ê khí-thâu kàu taⁿ bē bat ū án-ne; āu-lâi iā choa̍t-tùi bô.
22, Nā bô kiám-chió hiah-ê ji̍t, chiū hoān ū jio̍k-thé ê bô chi̍t-ê tit kiù, chí-ū ūi-tio̍h kéng ê jîn-bîn, hiah-ê ji̍t boeh kiám-chió.
23, Hit sî nā ū lâng kā lín kóng, Lí khòaⁿ, Ki-tok tī chia, á-sī kóng, Tī hia, lín bo̍h-tit sìn.
24, In-ūi boeh ū ké Ki-tok, ké sian-ti khí-lâi kiâⁿ tōa ê sîn-jiah kap tiāu-thâu; boeh sī ōe, liân kéng ê jîn-bîn iā bê-he̍k i.
25, Góa í-keng tāi-seng kā lín kóng.
26, Só͘-í lâng nā kā lín kóng, Lí khòaⁿ, I sī tī khòng-iá, lín bo̍h-tit chhut-khì; á-sī kóng, Lí khòaⁿ, I sī tī ba̍t chhù, lín bo̍h-tit sìn.
27, In-ūi chhin-chhiūⁿ sih-nà tùi tang-sì teh sih, nā kàu sai-sì, Jîn-chú ê koh lâi iā boeh án-ne.
28, Sin-si nā tī hia, eng-chiáu iā boeh chū-chi̍p tī hia.
29, Tú-tú chiah-ê ji̍t ê hoān-lān liáu-āu, ji̍t boeh o͘-àm, ge̍h bô chhut kng, chheⁿ tùi thiⁿ ka-la̍uh, thiⁿ-siōng tín-tāng.
30, Hit sî Jîn-chú ê tiāu-thâu boeh chhut-hiān tī thiⁿ-téng; tī tē-ni̍h chiah-ê cho̍k-lūi lóng boeh thî-khàu, iā boeh khòaⁿ-tio̍h Jîn-chú ēng koân-lêng kap tōa êng-kng chē thiⁿ ê hûn lîm-kàu.
31, I boeh chhe I ê thiⁿ-sài, ēng hō-thâu hiáng-liāng ê siaⁿ, in boeh tùi sì-hng chit pêng ê thiⁿ-piⁿ kàu hit pêng ê thiⁿ-piⁿ, chū-chi̍p I só͘ kéng ê jîn-bîn.
32, Lín tio̍h tùi bû-hoa-kó chhiū chhú phì-jū; tng i ki nńg hio̍h hoat ê sî, chiū chai hē-thiⁿ kūn à.
33, Án-ne, lín khòaⁿ lóng-chóng chiah-ê sū, chiū chai í-keng kūn, kàu mn̂g-kháu à.
34, Góa si̍t-chāi kā lín kóng, Chit sè-tāi choa̍t-tùi bē kè-khì, kàu chiah-ê tāi-chì lóng chiâⁿ.
35, Thiⁿ kap tē boeh hòe-tû, góa ê ē bē hòe-tû.
36, Tān-sī lūn hit ji̍t, hit sî, lâng m̄ chai, thiⁿ-sài iā m̄ chai, Kiáⁿ iā m̄ chai, chí-ū Pē chai nā-tiāⁿ.
37, Koh chhin-chhiūⁿ Ná-a ê ji̍t, Jîn-chú ê koh lâi iā boeh án-ne.
38, In-ūi tōa chúi ê tāi-seng hiah-ê ji̍t, lâng teh lim-chia̍h, kè-chhōa, kàu Ná-a ji̍p tōa chûn ê ji̍t,
39, in kèng-jiân m̄ chai, kàu tōa chúi kàu, choân-pō͘ bia̍t in, Jîn-chú ê koh lâi iā boeh án-ne.
40, Hit sî boeh ū nn̄g lâng tī hn̂g-ni̍h, chi̍t-ê chhú-khì, chi̍t-ê pàng-teh.
41, Nn̄g ê hū-jîn-lâng oe bō, chi̍t-ê chhú-khì, chi̍t-ê pàng-teh.
42, Só͘-í tio̍h tiuⁿ-tî, in-ūi lín m̄ chai lín ê Chú sím-mi̍h ji̍t boeh lâi.
43, Ke-chú nā chai chha̍t sím-mi̍h kiⁿ boeh kàu, i chiū tiuⁿ-tî, bô iông-ún lâng iah khang i ê chhù, che sī lín só͘ chai.
44, Só͘-í lín iā tio̍h chún-pī piān; in-ūi lín bô phah-sǹg ê sî, Jîn-chú lâi à.
45, Chī-chūi sī chīn-tiong tì-hūi ê lô͘-po̍k, chú-lâng só͘ siat-li̍p lâi koán i ke-lāi ê lâng, thang chiàu sî pun bí-niû hō͘ in.
46, Chú-lâng lâi, tú-tio̍h i án-ne kiâⁿ, hit ê lô͘-po̍k ū hok-khì.
47, Góa si̍t-chāi kā lín kóng, chú-lâng boeh siat-li̍p i lâi koán i it-chhè só͘ ū ê.
48, Chí-ū hit ê pháiⁿ ê lô͘-po̍k, nā sim-lāi kóng, Góa ê chú-lâng teh iân-chhiân;
49, chiū phah hiah-ê kap i tâng chò lô͘-po̍k ê, koh kap chùi-hàn saⁿ-kap lim-chia̍h,
50, chiū tī bô phài-phe ê ji̍t, m̄ chai ê sî, hit ê lô͘-po̍k ê chú-lâng boeh kàu.
51, tāng-tāng kā i hêng-hoa̍t, hō͘ i kap ké-hó ê lâng tú-tio̍h kāng-khoán ê miā-ūn, tī hia boeh ū thî-khàu kā-gê chhiat-khí.