《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第21章

作者 巴克禮普世版小組 2011.08.21

1, In kiâⁿ kūn Iâ-lō͘-sat-léng, kàu Pek-hoat-kî kap Kaⁿ-ná soaⁿ ê sî, Iâ-so͘ chhe nn̄g ê bûn-tô͘, kā in kóng,
2, Lín khì tùi-bīn ê hiuⁿ-siā, liâm-piⁿ ē tú-tio̍h chi̍t chiah lû pa̍k-teh, ū lû-á kap i tī-teh; tháu-khui, khan i lâi góa chia.
3, Nā ū lâng kā lín kóng sím-mi̍h, chiū tio̍h kóng, Chú khiàm-ēng i, i liâm-piⁿ boeh sàng i lâi.
4, Chit-ê sū chiâⁿ, sī boeh èng-giām chá thok sian-ti só͘ kóng ê, kóng,
5, Tio̍h kā Sûn ê cha-bó͘-kiáⁿ kóng, Lí ê ông lâi chiū-kūn lí, Un-jiû koh khiâ lû, Kap lû só͘ seⁿ ê lû-á.
6, Bûn-tô͘ khì, chiàu Iâ-so͘ só͘ hoan-hù in ê khì kiâⁿ.
7, Khan lû kap lû-á lâi, chiong ka-kī ê saⁿ chhu tī in téng-bīn, Iâ-so͘ chiū chiūⁿ-khì khiâ.
8, Chèng lâng tiong khah chōe chiong ka-kī ê saⁿ pho͘ tī lō͘-ni̍h; ū-ê chhò chhiū-ki pho͘ tī lō͘-ni̍h.
9, Chêng kiâⁿ āu tè ê chèng lâng hoah kóng, Tāi-pi̍t ê kiáⁿ-sun, Hô-sàn-ná, tī Chú ê miâ lâi ê tit-tio̍h o-ló, tī chì-koân ê, Hô-sàn-ná.
10, I ji̍p Iâ-lō͘-sat-léng, choân siâⁿ iô-choah, kóng, Chit-ê siáⁿ-lâng?
11, Chèng lâng kóng, Chit-ê sī sian-ti Iâ-so͘, tùi Ka-lī-lī-séng ê Ná-sat-le̍k lâi ê.
12, Iâ-so͘ ji̍p Siōng-chú ê tiān, kóaⁿ-chhut tiān-lāi it-chhè bóe-bōe ê lâng, chhia-tó ōaⁿ chîⁿ ê lâng ê toh, kap bē hún-chiáu ê lâng ê í.
13, Kā in kóng, Ū kì-chài kóng, Góa ê chhù boeh chheng chò kî-tó ê chhù, tān-sī lín chiah-ê hō͘ i chò chha̍t-siū.
14, Chhiⁿ-mî ê, pái-kha ê, tī tiān-ni̍h chiū-kūn Iâ-so͘, I chiū i-hó in.
15, Chí-ū chiah-ê chè-si-thâu kap keng-ha̍k-kàu-su khòaⁿ-tio̍h I só͘ kiâⁿ ê kî-sū, koh khòaⁿ-tio̍h gín-ná tī tiān-ni̍h hoah kóng, Tāi-pi̍t ê kiáⁿ-sun, Hô-sàn-ná, chiū siū-khì; kā I kóng, In teh kóng ê, lí thiaⁿ-tio̍h bô?
16, Iâ-so͘ kā in kóng, Ū; lín kiám m̄ bat tha̍k-tio̍h hit kù, kóng, Tùi gín-ná kap chia̍h lin ê ê chhùi, lí hō͘ o-ló ê ē chiâu-pī mah?
17, Chiū lī-khui in, chhut siâⁿ kàu Pek-tāi-nî; tī hia hioh mî.
18, Keh chá-khí, tò-lâi siâⁿ-ni̍h ê sî, Iâ-so͘ iau;
19, khòaⁿ-tio̍h lō͘-piⁿ chi̍t châng bû-hoa-kó chhiū, chiū óa-kūn khì, bán lóng bô, chí-ū hio̍h nā-tiāⁿ; chiū kā chhiū kóng, Taⁿ liáu-āu, lí éng-éng bô koh kiat kóe-chí; hit châng bû-hoa-kó chhiū liâm-piⁿ ko͘-tâ.
20, Bûn-tô͘ khòaⁿ-liáu chiū kî-koài, kóng, Bû-hoa-kó chhiū cháiⁿ-iūⁿ liâm-piⁿ ko͘-tâ?
21, Iâ-so͘ ìn kóng, Góa si̍t-chāi kā lín kóng, Lín nā ū sìn bô giâu-gî, m̄-nā chit chióng kiâⁿ tī bû-hoa-kó chhiū ê sū lín ē kiâⁿ; chiū nā tùi chit-ê soaⁿ kóng, Tio̍h sóa-khì hiat-lo̍h hái, iā boeh chiâⁿ.
22, Koh kî-tó ê sî, kìⁿ-nā lín só͘ kiû ê, sìn chiū tit-tio̍h.
23, Iâ-so͘ ji̍p tiān, kà-sī lâng ê sî, chiah-ê chè-si-thâu, kap jîn-bîn ê tiúⁿ-ló, chiū-kūn I kóng, Lí ēng sím-mi̍h koân kiâⁿ chiah-ê sū? koh siáⁿ-lâng hō͘ lí chit-ê koân?
24, Iâ-so͘ ìn kóng, Góa iā ū chi̍t kù ē boeh mn̄g lín, lín nā kā góa kóng, góa chiah boeh kā lín kóng góa ēng sím-mi̍h koân kiâⁿ chiah-ê sū.
25, Iok-hān ê sé-lé sī tùi tó-ūi lâi? sī tùi thiⁿ, á-sī tùi lâng? In su-khia gī-lūn kóng, Nā kóng, Tùi thiⁿ, I boeh kā lán kóng, Án-ne lín siáⁿ-sū m̄ sìn i?
26, Nā kóng, Tùi lâng, lán iū kiaⁿ jîn-bîn; in lóng lia̍h Iok-hān chò sian-ti.
27, Chiū ìn Iâ-so͘ kóng, Goán m̄ chai. I chiū kā in kóng, Góa iā bô boeh kā lín kóng góa sī ēng sím-mi̍h koân kiâⁿ chiah-ê sū. Tān-sī lín phah-sǹg cháiⁿ-iūⁿ?
28, Lâng ū nn̄g ê kiáⁿ, chiū-kūn hit ê thâu-chi̍t-ê kóng, Kiáⁿ ah, kin-á-ji̍t khì phû-tô-hn̂g chò kang.
29, Ìn kóng, Góa m̄; āu-lâi hóe-kái chiū khì.
30, Koh chiū-kūn tē-jī-ê, iā án-ne kóng. Ìn kóng, Chú ah, góa beh; chiū kèng-jiân bô khì.
31, Chí nn̄g ê tó-ūi chi̍t ê kiâⁿ lāu-pē ê ì-sù ah? In kóng, Thâu-chi̍t-ê. Iâ-so͘ kā in kóng, Góa si̍t-chāi kā lín kóng chiah-ê thiu-sòe ê kap chhiong-ki tāi-seng lín ji̍p Siōng-chú ê kok.
32, In-ūi Iok-hān tī gī ê lō͘ chiū-kūn lín, lín bô sìn i; thiu-sòe ê kap chhiong-ki chiū sìn i; koh lín khòaⁿ-liáu, iā bô hóe-kái khì sìn i.
33, Koh thiaⁿ chi̍t ê phì-jū: Ū chi̍t ê ke-chú, chai chi̍t hn̂g phû-tô, ēng lî-pa ûi i, lāi-bīn khui chiú-khut, khí chi̍t ê chiú-kiⁿ lâu, cho͘ hō͘ tiān-hō͘, chiū khì pa̍t só͘-chāi.
34, Siu kóe-chí ê sî boeh kàu, chiū chhe i ê lô͘-po̍k chiū-kūn tiān-hō͘, siu i ê kóe-chí.
35, Tiān-hō͘ lia̍h i ê lô͘-po̍k, chi̍t-ê phah, chi̍t-ê thâi, chi̍t-ê ēng chio̍h-thâu tìm.
36, Koh chhe pa̍t ê lô͘-po̍k, pí chêng khah chōe; in iû-goân án-ne khoán-thāi in.
37, Āu-lâi chhe i ê kiáⁿ chiū-kūn in, siūⁿ kóng, In boeh chun-kèng góa ê kiáⁿ.
38, Tān-sī tiān-hō͘ khòaⁿ-tio̍h hit ê kiáⁿ, chiū saⁿ-kap kóng, Chit-ê sī i ê hō͘-sû; lâi, kā i thâi-sí, thang tit i ê gia̍p.
39, Chiū lia̍h i, chhia i chhut hn̂g-gōa, hāi-sí i.
40, Taⁿ hn̂g-chú nā kàu, boeh cháiⁿ-iūⁿ lâi pān chiah-ê tiān-hō͘?
41, In kā I kóng, I boeh ēng ok-pò lâi bia̍t chiah-ê ok-lâng; chiong phû-tô-hn̂g cho͘ pa̍t ê tiān-hō͘, chiū-sī chiàu-sî la̍p kóe-chí ê.
42, Iâ-so͘ tùi in kóng, Keng-ni̍h só͘ kì-chài, Sai-hū só͘ khì-sak ê chio̍h, Chiâⁿ-chò chhù-kak-thâu ê chio̍h; Che sī Chú só͘ chiâⁿ ê, Lán ê ba̍k-chiu khòaⁿ chò kî-koài,lín kiám bē tha̍k mah?
43, Só͘-í góa kā lín kóng, Siōng-chú ê kok boeh tùi lín chhiúⁿ-khì, lâi siúⁿ-sù kiat i ê kóe-chí ê jîn-bîn.
44, Koh poa̍h-tó tī chit tè chio̍h téng ê teh-boeh phòa kô͘-kô͘; hō͘ chit tè chio̍h teh tī i téng-bīn ê boeh iù boa̍h-boa̍h.
45, Chiah-ê chè-si-thâu kap Hoat-lī-sài-phài ê lâng thiaⁿ-tio̍h I ê phì-jū, chai I só͘ kóng ê sī chí in.
46, Chiū ài boeh lia̍h I, tān-sī kiaⁿ chèng lâng; in-ūi chèng lâng lia̍h I chò sian-ti.