《巴克禮普世版聖經（試讀本）》

 | | | 轉寄

巴克禮普世版（試讀本）_馬太福音第20章

作者 巴克禮普世版小組 2011.08.14

1, In-ūi Thian-kok chhin-chhiūⁿ ke-chú thàu-chá chhut-khì chhiàⁿ kang ji̍p i ê phû-tô-hn̂g;
2, kap chò-kang ê lâng iok chi̍t ji̍t chi̍t chîⁿ gûn; chiū chhe in ji̍p i ê hn̂g.
3, Káu tiám ê sî chhut-khì, koh khòaⁿ-tio̍h ū êng-êng khiā tī koe-chhī-ni̍h ê, chiū kā in kóng,
4, Lín iā khì phû-tô-hn̂g, góa boeh chiàu kong-tō hō͘ lín; in chiū khì.
5, Cha̍p-jī tiám kap saⁿ tiám ê sî koh chhut-khì, iā án-ne chò.
6, Gō͘ tiám ê sî chhut-khì, koh tú-tio̍h ū lâng khiā-teh, chiū kā in kóng, Lín siáⁿ-sū choân ji̍t êng-êng khiā tī chia ah?
7, In kā i kóng, In-ūi bô lâng chhiàⁿ goán. I kā in kóng, Lín iā khì phû-tô-hn̂g.
8, Kàu ji̍t àm, hn̂g-chú kā i ê koán-ke kóng, Kiò chò-kang ê, hō͘ in kang-chîⁿ, tùi lō͘-bé lâi ê khí, kàu tāi-seng lâi ê ûi-chí.
9, Hiah-ê gō͘ tiám cheng só͘ chhiàⁿ ê kàu, ta̍k-ê niá chi̍t chîⁿ gûn.
10, Tāi-seng chhiàⁿ ê kàu, in phah-sǹg boeh niá khah chōe; m̄-kú in iā ta̍k-ê niá chi̍t chîⁿ gûn.
11, Niá liáu, chiū tùi ke-chú nga̍uh-nga̍uh-liām kóng,
12, Goán choân ji̍t thoa-bôa siū joa̍h; hiah-ê lō͘-bé chhiàⁿ ê, chò kang chi̍t tiám-cheng kú, kèng-jiân hō͘ in kap goán pîⁿ.
13, I chiū tùi in chi̍t lâng ìn kóng, Pêng-iú ah, góa m̄-sī bô kong-tō khoán-thāi lí; lí kiám m̄-sī kap góa iok chi̍t chîⁿ gûn mah?
14, Lí-ê lí the̍h, chò lí khì. Góa boeh hō͘ chit-ê lō͘-bé ê kap lí pîⁿ.
15, Ēng góa ê mi̍h, kiâⁿ góa só͘ ài, kiám bē chò-tit? Á-sī in-ūi góa chò hó, lí teh ba̍k-chhiah mah?
16, Chhin-chhiūⁿ án-ne, lō͘-bé ê boeh chò tāi-seng, tāi-seng ê boeh chò lō͘-bé.
17, Iâ-so͘ chiūⁿ Iâ-lō͘-sat-léng ê sî tī lō͘-ni̍h chhōa cha̍p-jī ê bûn-tô͘ kàu piⁿ-á, kā in kóng,
18, Taⁿ lán chiūⁿ Iâ-lō͘-sat-léng; Jîn-chú boeh siū ké-sàng hō͘ chiah-ê chè-si-thâu kap keng-ha̍k-kàu-su, in boeh gí I sí-chōe;
19, iā boeh ké-sàng I hō͘ gōa-pang lâng, tì-kàu hì-lāng I, piⁿ phah I, tèng I tī si̍p-jī-kè; tē saⁿ ji̍t I boeh koh-oa̍h.
20, Hit sî Se-pí-thài ê kiáⁿ ê lāu-bú kap i ê kiáⁿ chiū-kūn lâi pài I, kiû chi̍t hāng sū.
21, I kā i kóng, Lí ài sím-mi̍h? Ìn kóng, Goān lí chhut bēng-lēng, hō͘ góa chit nn̄g ê kiáⁿ tī lí ê kok, chi̍t-ê chē lí ê chiàⁿ-pêng, chi̍t-ê chē lí ê tò-pêng.
22, Iâ-so͘ ìn kóng, Lín só͘ kiû ê, lín m̄ chai. Góa só͘ boeh lim ê poe, lín ē lim mah? Ìn kóng, Ōe.
23, I kā in kóng, Góa ê poe lín kó-jiân boeh lim; tān-sī chē góa ê chiàⁿ-pêng tò-pêng, m̄-sī góa ē thang hō͘ lâng, chí-ū sī góa ê Pē ūi-tio̍h sím-mi̍h lâng chún-pī ê, chiū hō͘ in.
24, Cha̍p ê bûn-tô͘ thiaⁿ-tio̍h, chiū siū-khì hit nn̄g ê hiaⁿ-tī.
25, Iâ-so͘ kiò in lâi kóng, Lín chai gōa-pang ê jîn-kun chò chú lâi tī-lí in, in ê tāi-jîn koán-hat in;
26, chí-ū lín tiong-kan m̄-sī án-ne; lín tiong-kan ài chò tōa ê, boeh chò lín ê chhe-ēng;
27, ài chò thâu ê, boeh chò lín ê lô͘-po̍k.
28, Chhin-chhiūⁿ Jîn-chú lâi, m̄-sī boeh chhe-ēng lâng, sī boeh hō͘ lâng chhe-ēng; koh hiàn I ê sìⁿ-miā, lâi sio̍k-hôe chē-chē lâng.
29, In chhut Iâ-lī-ko ê sî, kui tōa tīn ê lâng tè I.
30, Tú-tn̄g ū nn̄g ê chhiⁿ-mî ê chē tī lō͘-piⁿ, thiaⁿ-tio̍h Iâ-so͘ tùi hia kè, chiū hoah kóng, Chú, Tāi-pi̍t ê kiáⁿ-sun ah, lîn-bín goán.
31, Chèng lâng hiâm in, kah in chēng-chēng; tān-sī in koh khah tōa siaⁿ kiò kóng, Chú, Tāi-pi̍t ê kiáⁿ-sun ah, lîn-bín goán.
32, Iâ-so͘ thêng-kha, kiò in lâi kóng, Ài góa kā lín chò sím-mi̍h?
33, In kā I kóng, Chú ah, goán ài tit-tio̍h ba̍k-chiu khui.
34, Iâ-so͘ khó-lîn in, bong in ê ba̍k-chiu; in liâm-piⁿ khòaⁿ-tio̍h, chiū tè I.