《巴克禮普世版聖經（試讀本）》

 | | | 轉寄

巴克禮普世版（試讀本） 雅各書第四章

作者 巴克禮普世版小組 2016.09.04

M̄-thang Chò Sè-kan ê Pêng-iú
1 Lín tiong-kan ê tò͘-cheng kah oan-ke sī tùi tó-ūi lâi? Kám m̄-sī tùi lín put-sî teh tò͘-cheng kah oan-ke ê io̍k-bōng lâi? 2 Lín siàu-siūⁿ ê mi̍h-kiāⁿ tit bē-tio̍h chiū beh thâi-sí lâng. Lín tham-châi tit bē-tio̍h chiū tò͘-cheng oan-ke. Kî-si̍t lín tit bē-tio̍h só͘ ài ê mi̍h-kiāⁿ sī in-ūi lín bô tùi Siōng-Chú kiû. 3 lín sui-jiân ū kiû m̄-koh tit bē-tio̍h, in-ūi lín kiû ê tōng-ki bô hó, kan-taⁿ kiû boán-chiok ka-kī ê hióng-lo̍k. 4 Lín chiah-ê îm-loān ê lâng ah, lín kám m̄-chai kah sè-kan chò pêng-iú chiū-sī kah Siōng-Chú chò tùi-te̍k? Só͘-í ài-beh chò sè-kan ê pêng-iú ê lâng chiū-sī Siōng-Chú ê te̍k-jîn. 5 Sèng-keng kóng, "Siōng-Chú ài I siúⁿ-sù lán ê Sèng-Sîn ài kah khí chi̍t-tò͘." Lín kám siūⁿ-kóng Sèng-keng chit-kù ōe bô ì-sù? 6 M̄-koh Siōng-Chú siúⁿ-sù lán ê un-tián koh-khah tōa, in-ūi Sèng-keng ū kì-chài: Siōng-Chú kah kiau-ngō͘ ê lâng tùi-te̍k, siúⁿ-sù un-tián hō͘ khiam-pi ê lâng.( chù: ChG 3:34) 7 Só͘-í lín tio̍h sūn-ho̍k Siōng-Chú, hoán-khòng Mô͘-kúi, Mô͘-kúi chiū siám-phiah lín. 8 Lâi chhin-kīn Siōng-Chú, Siōng-Chú chiū ē chhin-kīn lín. Chōe-jîn ah, lín tio̍h sé lín ê chhiú. Sam-sim lióng-ì ê lâng ah, tio̍h kiat-chēng lín ê sim. 9 Tio̍h pi-siong, thî-khàu lâu ba̍k-sái, chiong lín ê chhiò-bīn piàn-chò ai-siong, hoaⁿ-hí piàn-chò iu-chhiû. 10 Tio̍h tī Chú ê bīn-chêng khiam-pi, I chiū ē kā lín ko-seng.

M̄-thang Phoe-phêng Hiaⁿ-tī Chí-mōe
11 Hiaⁿ-tī chí-mōe, lín m̄-thang hō͘-siōng kóng pháiⁿ-ōe. Kóng hiaⁿ-tī chí-mōe ê pháiⁿ-ōe, á-sī phoe-phêng hiaⁿ-tī chí-mōe ê lâng chiū-sī kóng lu̍t-hoat ê pháiⁿ-ōe, phoe-phêng lu̍t-hoat. Lí nā phoe-phêng lu̍t-hoat chiū m̄-sī siú lu̍t-hoat ê lâng, sī teh phoe-phêng lu̍t-hoat. 12 Lu̍t-hoat ê chè-tēng-chiá kah sím-phòaⁿ-chiá chí ū chi̍t-ūi, I ē chín-kiù mā ē húi-bia̍t. Lí sī siáⁿ-lâng ná káⁿ phoe-phêng lí ê chhù-piⁿ?

M̄-thang Khoa-kháu
13 Ū-lâng án-ne kóng, "Kin-á-ji̍t á-sī bîn-á-chài, goán beh khì bó͘ chi̍t-ê siâⁿ, tī hia tòa chi̍t-nî kú, chò seng-lí thàn chîⁿ." Taⁿ lín thiaⁿ góa kóng, 14 lín liân bîn-á-chài sèⁿ-miā ē piàn án-chóaⁿ to m̄-chai. Lín kah-ná hûn-bū chhut-hiān chi̍t-sî-á kú, liâm-piⁿ chiū siau-sit khì. 15 Lín eng-kai tio̍h án-ne kóng, "Chú nā goān-ì, goán chiū ē oa̍h, mā ē-tàng chò chit hāng chò hit hāng." 16 Lín chit-má teh phòng-hong khoa-kháu. Chit-chióng ê khoa-kháu lóng sī siâ-ok. 17 Só͘-í lâng chai-iáⁿ tio̍h chò hó-sū. M̄ khì chò chiū-sī hoān-chōe.