《巴克禮普世版聖經（試讀本）》

 | | | 轉寄

巴克禮普世版（試讀本） 雅各書第五章

作者 巴克禮普世版小組 2016.09.11

Kéng-kò Hó-gia̍h-lâng
1 Taⁿ lín chiah-ê hó-gia̍h-lâng tio̍h chù-ì thiaⁿ, lín ê chai-lān teh-beh kàu à, lín tio̍h pi-siong thî-khàu! 2 Lín ê chîⁿ-châi í-keng pāi-hoāi, lín ê saⁿ-khò͘ hō͘ chiù-thâng chiù phòa-khì. 3 Lín ê kim-gîn seⁿ sian, hiah-ê sian ē chò kong-kek lín ê chèng-kì, beh chhin-chhiūⁿ hóe-sio bia̍t lín ê seng-khu. Lín tī chit-ê boa̍t-sè kan-taⁿ chai-iáⁿ chek-chū châi-pó. 4 Lín khek-khui hiah-ê tī lín ê chhân-hn̂g teh siu-koah ê lâng, bô hō͘ in kang-chîⁿ. In chhut-siaⁿ teh kā lín khòng-kò! Bān-kun ê Chú í-keng ū thiaⁿ-tio̍h chiah-ê ai-oàn ê siaⁿ. 5 Lín tī tē-chiūⁿ hióng-siū chhia-hoa iàn-lo̍k, kā ka-kī chhī kah pûi-chut-chut teh tán tô͘-cháiⁿ ê ji̍t-chí. 6 Lín kā hiah-ê gī-lâng tēng-chōe, koh kā in thâi-sí, in mā bô kā lín tí-khòng.

Jím-nāi Kah Kî-tó
7 Hiaⁿ-tī chí-mōe ah, só͘-í lín tio̍h kè-sio̍k jím-nāi kàu Chú ê chài-lîm. Lín khòaⁿ, choh-sit-lâng án-chóaⁿ thèng-hāu chhân-ni̍h pó-pòe ê siu-sêng, i nāi-sim thèng-hāu chhiu-lîm chhun-ú. 8 Lín mā tio̍h kè-sio̍k jím-nāi, kian-kò͘ lín ê sìn-sim, in-ūi Chú chài-lîm ê ji̍t-chí teh-beh kàu à. 9 Hiaⁿ-tī chí-mōe ah, m̄-thang hō͘-siōng oàn-tò͘, chiah bián siū Siōng-Chú sím-phòaⁿ. Lín khòaⁿ, sím-phòaⁿ-chiá í-keng khiā tī mn̂g-kháu à. 10 Hiaⁿ-tī chí-mōe ah, lín tio̍h ēng hiah-ê hōng Chú ê miâ lâi kóng-ōe ê sian-ti chò jím-siū khó͘-lān ê bô͘-iūⁿ. 11 Lán kā hiah-ê jím-nāi kàu-té ê lâng khòaⁿ-chò ū hok-khì. Lín bat thiaⁿ-kòe Iok-pek ê jím-nāi, mā chai Chú kàu-bóe án-chóaⁿ kā i chiàu-kò͘, in-ūi Chú ū móa-pak ê chû-pi kah liân-bín. 12 Góa ê hiaⁿ-tī chí-mōe ah, siōng iàu-kín sī: M̄-thang kí thiⁿ, á-sī tē, á-sī sím-mi̍h mi̍h-kiāⁿ lâi chiù-chōa. " Sī " to̍h kóng, "Sī ", " M̄-sī " to̍h kóng, "M̄-sī ", án-ne chiah bián siū Siōng-Chú sím-phòaⁿ. 13 Lín tiong-kan ū-lâng siū-khó͘ bô? Nā ū, i tio̍h kî-tó. Lín tiong-kan ū-lâng hoaⁿ-hí bô? Nā ū, i tio̍h gîm o-ló ê si-koa. 14 Lín tiong-kan ū-lâng phòa-pēⁿ bô? Nā ū, i tio̍h chhiáⁿ kàu-hōe ê tiúⁿ-ló lâi thè i kî-tó, hōng Chú ê miâ kā i boah-iû. 15 Ū sìn-sim ê kî-tó ē kiù phòa-pēⁿ ê lâng. Chú ē hō͘ i khiā khí-lâi. I nā ū chōe, mā ē tit-tio̍h sià-bián. 16 Lín tio̍h hō͘-siōng jīn-chōe, sio-thè kî-tó, thang tit-tio̍h i-hó. Gī-lâng ê kî-tó ū chin-tōa ê kong-hāu. 17 Í-lī-a kah lán pêⁿ-pêⁿ sī lâng, i pek-chhiat kî-tó khún-kiû Siōng-Chú m̄-thang lo̍h-hō͘, kó-jiân tē-chiūⁿ ū saⁿ-nî-pòaⁿ kú bô lo̍h-hō͘. 18 I koh kî-tó, kó-jiân lo̍h tōa-hō͘, tē chiū chhut-sán ngó͘-kok. 19 Chhin-ài ê hiaⁿ-tī chí-mōe, lín tiong-kan nā ū-lâng phian-lī chin-lí, ū-lâng kā i chhōa tò tńg-lâi. 20 Lín tio̍h chai, hō͘ chi̍t-ê sit-bê ê lâng tò tńg-lâi ê lâng, ē kiù i ê lêng-hûn thoat-lī sí-bông, koh hō͘ chin-chē chōe tit-tio̍h sià-bián.