《巴克禮普世版聖經（試讀本）》

 | | | 轉寄

巴克禮普世版（試讀本） 雅各書第二章

作者 巴克禮普世版小組 2016.08.21

M̄-thang Ū Phian-kiàn
1 Chhin-ài ê hiaⁿ-tī chí-mōe, lín kì-jiân sìn lán êng-kng ê Chú Iâ-so͘ Ki-tok to̍h m̄-thang ēng gōa-māu lâi chhú lâng. 2 Nā ū hó-gia̍h-lâng kòa kim chhiú-chí, chhēng súi saⁿ ji̍p-lâi lín ê hōe-tn̂g, koh ū chhēng phòa-saⁿ ê sàn-chhiah-lâng ji̍p-lâi, 3 lín kan-taⁿ chù-ì hit-ê chhēng súi saⁿ ê lâng tùi i kóng, "Chhiáⁿ lí lâi chē tōa-ūi. " Khiok tùi hit-ê sàn-chhiah-lâng kóng, "Lí khiā tiàm hia." á-sī kóng, "Chē góa ê kha-ta̍h piⁿ-á." 4 Án-ne lín kám m̄-sī ū phian-sim, ēng pháiⁿ liām-thâu lâi teh phòaⁿ-toàn lâng? 5 Chhin-ài ê hiaⁿ-tī chí-mōe, lín tio̍h thiaⁿ! Siōng-Chú ū kéng sè-kan ê sàn-chhiah-lâng, hō͘ in tī sìn-gióng-siōng hù-chiok lâi sêng-chiap I só͘ èng-ín beh hō͘ thiàⁿ I ê lâng ê kok-tō͘. 6 M̄-koh lín khòaⁿ-khin sàn-chhiah-lâng. Kî-si̍t kā lín khi-ap koh thoa lín khì hoat-têng ê kám m̄-sī hiah-ê hó-gia̍h-lâng? 7 Húi-pòng Siōng-Chú siúⁿ-sù lín chun-kùi ê miâ kám m̄-sī kāng-khoán hiah-ê lâng? 8 Lín nā chun-siú Sèng-keng só͘ kì-chài: Tio̍h thiàⁿ chhù-piⁿ chhin-chhiūⁿ ka-kī( chù: LBK 19:18) hit-ê Siōng-Chú kok-tō͘ ê lu̍t-hoat, án-ne chiū tio̍h. 9 M̄-koh lín nā ēng gōa-māu lâi chhú lâng chiū-sī hoān-chōe, ē siū lu̍t-hoat tēng-chōe. 10 Lâng nā bô chun-siú lu̍t-hoat tiong ê chi̍t tiâu, chiū-sī bô chun-siú choân-pō͘ ê lu̍t-hoat. 11 In-ūi bēng-lēng " M̄-thang kan-îm" ê Hit-ūi mā kóng," M̄-thang thâi-sí lâng".( chù: CAK 20:13, 15 LXX; SBK 5:17-18) Sui-jiân bô hoān kan-îm, nā-sī thâi-sí lâng chiū sǹg-chò hoān-tio̍h lu̍t-hoat ê lâng. 12 Lín kì-jiân beh chiàu ē hō͘ lâng chū-iû ê lu̍t-hoat lâi siū sím-phòaⁿ, tio̍h chiàu lu̍t-hoat lâi kóng-ōe, lâi kiâⁿ-ta̍h. 13 In-ūi nā bô ēng chû-pi tùi-thāi lâng, tī sím-phòaⁿ ê sî Siōng-Chú mā bē ēng chû-pi tùi-thāi i. Chû-pi iâⁿ-kòe sím-phòaⁿ.

Sìn-gióng Kah Hêng-ûi
14 Chhin-ài ê hiaⁿ-tī chí-mōe, sìn-gióng nā bô si̍t-hiān, ū sím-mi̍h lī-ek? Chit-chióng sìn-gióng kám ē-tàng kiù i? 15 Lín tiong-kan nā ū hiaⁿ-tī á-sī chí-mōe bô saⁿ thang chhēng, bô pn̄g thang chia̍h, 16 Lín kan-taⁿ tùi in kóng, "Chiok lín pêng-an, tio̍h chhēng hō͘ sio, chia̍h hō͘ pá!" Nā bô hō͘ in seng-khu só͘ su-iàu ê mi̍h-kiāⁿ, án-ne ū sím-mi̍h lō͘-ēng? 17 Sìn-gióng nā bô hêng-tōng chiū-sī sí-.ê. 18 Kiám-chhái ū-lâng ē kóng, "Lí ū sìn-gióng, góa ū hêng-tōng." Góa ē ìn-kóng, "Lí hō͘ góa khòaⁿ bô hêng-tōng ê sìn-gióng, góa chiū ēng hêng-tōng hō͘ lí khòaⁿ góa ê sìn-gióng." 19 Lí sìn Siōng-Chú chí-ū chi̍t-ūi, án-ne sī tio̍h. Liân hiah-ê kúi mā sìn, koh kiaⁿ kah phi̍h-phi̍h-chhoah. 20 Phòng-hong koh hàm-kó͘ ê lâng, lí ài chai bô? Bô hêng-tōng ê sìn-gióng lóng bô lō͘-ēng. 21 Lán ê chó͘-sian A-pek-la̍h-hán hiàn i ê kiáⁿ Í-sat tī tôaⁿ-téng, kám m̄-sī tùi chit-ê hêng-tōng lâi hō͘ Siōng-Chú kā i kiò-chò gī-lâng? 22 Khó-kiàn i ê sìn-gióng kah hêng-tōng chò-hóe chìn-hêng, i ê sìn-gióng sī thong-kòe hêng-tōng lâi oân-sêng. 23 Che sī èng-giām Sèng-keng só͘ kóng: A-pek-la̍h-hán sìn Siōng-Chú, chiū án-ne Siōng-Chú kā i chiap-la̍p chò gī-lâng,( chù: CSK 15:6) i mā kiò-chò Siōng-Chú ê pêng-iú. 24 Khó-kiàn, lâng tit-tio̍h kiò-chò gī-lâng sī tùi hêng-tōng, m̄-sī kan-taⁿ tùi sìn-gióng. 25 Ki-lí Lat-ha̍p chiap-la̍p Iû-thài-lâng ê sù-chiá, hō͘ in tùi pa̍t-tiâu lō͘ chhut-khì, kám m̄-sī kāng-khoán tùi hêng-tōng lâi tit-tio̍h kiò-chò gī-lâng? 26 Tú chhin-chhiūⁿ seng-khu nā bô lêng-hûn chiū-sī sí-khì, sìn-gióng nā bô hêng-tōng mā sī sí-khì.