《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第十三章

作者 巴克禮普世版小組 2016.08.07

Siōng-Chú Só͘ Kah-ì ê Ho̍k-sāi
1 Lín tio̍h chhin-chhiūⁿ hiaⁿ-tī chí-mōe kè-sio̍k sio-thiàⁿ. 2 M̄-thang bē kì-tit chiap-thāi chhut-gōa-lâng, in-ūi án-ne chò ē tī bô-ì-tiong chiap-thāi-tio̍h thiⁿ-sài. 3 Tio̍h koan-hoâi hiah-ê siū koaiⁿ-kaⁿ ê lâng, chhin-chhiūⁿ kah in tâng koaiⁿ-kaⁿ. Tio̍h koan-hoâi hiah-ê siū ge̍k-thāi ê lâng, chhin-chhiūⁿ lín mā teh siū ge̍k-thāi. 4 Tāi-ke tio̍h chun-tiōng hun-in, hu-chhe tio̍h hō͘-siōng tiong-si̍t, in-ūi Siōng-Chú ē sím-phòaⁿ su-thong kiâⁿ-îm ê lâng. 5 Chò-lâng m̄-thang tham châi, ka-kī só͘ ū ê tio̍h ti-chiok, in-ūi Siōng-Chú ū kóng, "Góa choa̍t-tùi bē pàng-sak lí, choa̍t-tùi bē lī-khui lí."( chù: SBK 31:6; CSK 28:15) 6 Só͘-í lán ē-tàng hó-táⁿ kóng: Chú sī góa ê pang-chō͘. Góa bô kiaⁿ-hiâⁿ lâng tùi góa án-chóaⁿ?( chù: SPh 118:6) 7 Tio̍h siàu-liām chêng ín-chhōa lín, thoân Siōng-Chú ê hok-im hō͘ lín ê lâng, chim-chiok khòaⁿ in hêng-ûi ê kiat-kio̍k, lâi ha̍k-si̍p in ê sìn-gióng. 8 Iâ-so͘ Ki-tok kòe-khì kàu kin-á-ji̍t, it-ti̍t kàu éng-oán lóng bē kái-piàn. 9 Lín m̄-thang hō͘ ta̍k-khoán kî-īⁿ ê kàu-gī chhōa khì bê-lō͘, in-ūi sim-lêng khah-hó sī khò Siōng-Chú ê un-tián lâi kian-kò͘. M̄-thang khò hiah-ê chia̍h-mi̍h kui-kí, in-ūi chun-siú chia̍h-mi̍h kui-kí ê lâng pēng bô tit-tio̍h lī-ek. 10 Lán ū lán ê chè-tôaⁿ, tī hōe-bō͘ ho̍k-sāi ê Iû-thài chè-si bô koân thang chia̍h lán chè-tôaⁿ-téng ê chè-mi̍h. 11 Iû-thài-lâng ê chè-si-tiúⁿ tòa cheng-seⁿ ê hoeh ji̍p-khì Chì-sèng-só͘ lâi sio̍k chōe, khiok kā cheng-seⁿ ê sin-thé tī iâⁿ-gōa sio-tiāu. 12 Só͘-í ūi-tio̍h beh ēng ka-kī ê hoeh hō͘ chèng-lâng chiâⁿ-chò sèng-kiat, Iâ-so͘ mā tī iâⁿ-gōa siū-khó͘ lâi hi-seng. 13 Án-ne lán mā tio̍h chhut-khì iâⁿ-gōa kah I chò-hóe jím-siū lêng-jio̍k. 14 In-ūi tī tē-chiūⁿ lán bô éng-kú ê siâⁿ, lán sī teh chhōe hit-ê teh-beh lâi ê siâⁿ. 15 Só͘-í lán tio̍h thong-kòe Iâ-so͘ kè-sio̍k ēng o-ló ê chè hiàn hō͘ Siōng-Chú. Che chiū-sī kong-khai sêng-jīn Chú ê miâ ê lâng ê chhùi-tûn só͘ kiat ê kóe-chí. 16 Tio̍h ē-kì-tit chò hó-sū kah hō͘-siōng pang-chō͘, in-ūi che sī Siōng-Chú só͘ hoaⁿ-hí ê chè-mi̍h. 17 Tio̍h sūn-ho̍k ín-chhōa lín ê lâng, tio̍h thiaⁿ in ê ōe, in-ūi in put-sî teh khòaⁿ-kò͘ lín ê lêng-hûn thang tùi Siōng-Chú ū kau-tài. Lín tio̍h hō͘ in hoaⁿ-hí lâi kang-chok. Nā bô in ē léng-sim thó͘-khùi, án-ne tùi lín bô lī-ek. 18 Lín tio̍h kè-sio̍k ūi goán kî-tó. Goán khak-sìn ka-kī ū chheng-pe̍k ê liông-sim, ta̍k-hāng tāi-chì ài beh kiâⁿ chèng-ti̍t ê lō͘. 19 Góa koh-khah khún-kiû lín ūi góa kî-tó, hō͘ góa thang khah kín koh khì lín hia.

Chiok-hok kah Chòe-āu ê Chhéng-an
20 Taⁿ Siōng-Chú hō͘ lán ê Chú Iâ-so͘ koh oa̍h khí-lâi. Thong-kòe Iâ-so͘ só͘ lâu ê hoeh lâi khak-li̍p éng-oán ê bêng-iok, hō͘ Iâ-so͘ chiâⁿ-chò ín-chhōa iûⁿ-kûn ê Tōa-bo̍k-chiá. 21 Goān sù pêng-an ê Siōng-Chú siúⁿ-sù lín ta̍k-hāng hó tāi-chì lâi chun-hêng I ê chí-ì. Goān I thong-kòe Iâ-so͘ Ki-tok tī lán ê sim-lāi chò tāi-chì lâi hō͘ I hoaⁿ-hí. Goān êng-kng kui tī Ki-tok kàu tāi-tāi bô soah. Amen. 22 Hiaⁿ-tī chí-mōe ah, góa siá té-té ê phoe hō͘ lín, khǹg lín nāi-sim thiaⁿ góa khoàn-bián ê ōe. 23 Góa ài pò lín chai, lán ê hiaⁿ-tī Thê-mô͘-thài í-keng chhut kaⁿ. I nā khah kín lâi, góa ē kiò i kah góa chò-hóe khì lín hia. 24 Chhiáⁿ lín thè goán kā hiah-ê ín-chhōa lín ê lâng kah chèng sèng-tô͘ chhéng-an. Tùi Ì-tāi-lī lâi ê sìn-tô͘ mā beh kā lín chhéng-an. 25 Goān Siōng-Chú ê un-tián kah lín chèng-lâng tông-chāi.Amen.