《巴克禮普世版聖經（試讀本）》

 | | | 轉寄

巴克禮普世版（試讀本） 希伯來書第十二章

作者 巴克禮普世版小組 2016.07.31

Lán ê Thiⁿ-Pē Siōng-Chú
1 Kì-jiân ū hiah-chē kiàn-chèng-jîn chhin-chhiūⁿ hûn kā lán pau-ûi teh, lán tio̍h pâi-tû it-chhè ê chó͘-gāi kah it-ti̍t kā lán tîⁿ-pòaⁿ ê chōe, kian-jím pháu-cháu lán thâu-chêng ê lō͘-chām. 2 Tio̍h chù-sîn khòaⁿ Iâ-so͘. I sī lán sìn-gióng ê kin-goân kah bo̍k-phiau. I ūi-tio̍h pâi tī I thâu-chêng ê khoài-lo̍k, bô kā lêng-jio̍k khòaⁿ chāi gán-lāi, jím-siū si̍p-jī-kè-téng ê khó͘-lān. Taⁿ I chē tī Siōng-Chú pó-chō ê chiàⁿ-pêng. 3 Lín tio̍h siūⁿ I ê keng-le̍k, I jím-siū chōe-jîn tùi I ê hêng-ge̍k, án-ne lín chiah bē kha-chhiú-nńg lâi ià-siān. 4 Lín kah chōe-ok tò͘-cheng iáu-bōe tí-khòng kàu lâu hoeh ê thêng-tō͘. 5 Lín kám bē kì-tit Siōng-Chú kā lín tòng-chò kiáⁿ lâi khoàn-bián ê ōe án-ne kóng: Góa ê kiáⁿ ah, Chú ê kéng-kài m̄-thang khòaⁿ-khin, hō͘ I chek-pī m̄-thang sit-chì. 6 In-ūi Chú koán-kà I só͘ thiàⁿ ê, piⁿ phah I só͘ chiap-la̍p ê kiáⁿ-jî.( chù: ChG 3:11-12) 7 Lín tio̍h jím-siū koán-kà. Siōng-Chú khoán-thāi lín chhin-chhiūⁿ kiáⁿ-jî. Kám ū kiáⁿ-jî bô siū pē-bú ê koán-kà? 8 Lín nā bô kah kî-tha ê kiáⁿ-jî kāng-khoán siū koán-kà, chiū-sī su-seng-chú, m̄-sī chin-chiàⁿ ê kiáⁿ-jî. 9 Lán ū chun-tiōng sè-kan ê pē-bú kā lán koán-kà, hô-hòng sio̍k-lêng ê Thiⁿ-Pē kā lán koán-kà, kám m̄-sī koh-khah tio̍h sūn-ho̍k lâi tit-tio̍h oa̍h-miā? 10 Sè-kan ê pē-bú chiām-sî-kú chiàu ka-kī ê ì-sù lâi kā lán koán-kà, m̄-koh Siōng-Chú ê koán-kà sī beh hō͘ lán tit-tio̍h lī-ek, hō͘ lán ū hūn tī I ê sèng-kiat. 11 Lán ta̍k-pái siū koán-kà lóng kám-kak bô hoaⁿ-hí koh iu-būn, m̄-koh keng-kòe koán-kà ê thoàn-liān liáu-āu ē kiat-chhut pêng-an ê kóe-chí, kòe chèng-ti̍t ê seng-oa̍h.

Kà-sī kah Kéng-kài
12 Só͘-í lín chiah-ê kha-sng chhiú-nńg ê lâng tio̍h hō͘ i ióng-kiāⁿ khí-lâi. 13 Tio̍h ūi lín ê kha chún-pī ti̍t-ti̍t ê lō͘, bián-tit pái-kha-.ê oai-chhoa̍h, tian-tò hō͘ i tit-tio̍h i-hó. 14 Tio̍h ló͘-le̍k kah chèng-lâng hô-bo̍k lâi kòe sèng-kiat ê seng-oa̍h, nā bô bô-lâng ē-tàng kìⁿ-tio̍h Chú. 15 Tio̍h kín-sīn chiah bián-tit ū-lâng sit-lo̍h Siōng-Chú ê un-tián, mā chiah bián-tit ū to̍k-chháu hoat khí-lâi hō͘ chin-chē lâng siū ù-jiám. 16 Mā chiah bián-tit ū-lâng îm-loān bô kèng-khiân, chhin-chhiūⁿ Í-sò ūi-tio̍h chi̍t-tiám-á chia̍h-mi̍h chhut-bē tōa-kiáⁿ ê bêng-hūn. 17 Lín chai, i āu-lâi ài-beh niá-siū chiok-hok ê sî hō͘ lāu-pē kī-choa̍t, in-ūi i chhōe bô pān-hoat lâi kái-piàn lāu-pē sim-ì, sui-jiân lâu ba̍k-sái pek-chhiat kî-kiû, mā bē-tàng tit-tio̍h chiok-hok. 18 Lín m̄-sī chhiūⁿ Í-sek-lia̍t-lâng lâi-kàu bong ē-tio̍h ê Se-nái-soaⁿ, tī hia ū hóe-iām, ba̍t hûn, o͘-àm kah tōa-hong, 19 koh ū la-pa ê hiáng-siaⁿ kah kóng-ōe ê siaⁿ. Thiaⁿ-tio̍h ê lâng khún-kiû Siōng-Chú mài koh tùi in kóng-ōe, 20 in-ūi in bē-tàng jím-siū bēng-lēng ê ōe án-ne kóng, "Liân cháu-siù nā kha̍p-tio̍h soaⁿ, mā tio̍h ēng chio̍h-thâu tìm sí."( chù: CAK 19:12-13) 21 Hit-ê kéng-siōng hui-siông thang kiaⁿ, tì-kàu Mô͘-se kóng, "Góa kiaⁿ kah phi̍h-phi̍h-chhoah." 22 M̄-koh lín sī lâi Sek-an-soaⁿ, éng-oa̍h Siōng-Chú ê siâⁿ, thiⁿ-téng ê Iâ-lō͘-sat-léng, tī hia ū chheng-chheng bān-bān ê thiⁿ-sài. 23 Lín lâi-kàu thâu-chi̍t-phoe Ki-tok-tô͘ ū miâ kì tī thiⁿ-téng ê tōa-kiáⁿ chū-hōe kah gī-hōe ê só͘-chāi. Lín lâi-kàu sím-phòaⁿ bān-bîn ê Siōng-Chú bīn-chêng. Lín lâi-kàu í-keng sêng-choân ê gī-lâng ê lêng-hûn hia. 24 Lín lâi-kàu sin bêng-iok ê tiong-pó Iâ-so͘ bīn-chêng kah só͘ hiù ê hoeh hia. Chit-ê hoeh pí A-pek ê hoeh só͘ piáu-ta̍t ê koh-khah hó. 25 Tio̍h kín-sīn, m̄-thang kī-choa̍t tùi lín kóng-ōe ê Hit-ūi. Hiah-ê tī tē-chiūⁿ kī-choa̍t tùi in kéng-kài Hit-ūi ê lâng to bē-tàng tô-siám chōe, hô-hòng lán kī-choa̍t tùi thiⁿ-téng lâi kéng-kài lán ê Hit-ūi? 26 Hit-sî I ê siaⁿ hō͘ tē iô-tāng, m̄-koh taⁿ I ū èng-ín kóng, "Góa m̄-nā koh chi̍t-pái beh hō͘ tē iô-tāng, mā beh hō͘ thiⁿ iô-tāng."( chù: CAK 19:18) 27 Hit-kù "beh koh chi̍t-pái" sī chí-bêng hiah-ê siū-chō ê mi̍h siū iô-tāng, beh siū chhian-sóa, hō͘ hiah-ê bô siū iô-tāng ê kú-tn̂g lâu lo̍h-lâi. 28 Só͘-í lán tio̍h kám-siā, in-ūi lán ū tit-tio̍h hit-ê bē iô-tāng ê kok-tō͘. Lán tio̍h chiàu Siōng-Chú só͘ hoaⁿ-hí ê, ēng khiân-sêng kah kèng-ùi ê sim lâi ho̍k-sāi Siōng-Chú, 29 in-ūi lán ê Siōng-Chú si̍t-chāi sī húi-bia̍t ê hóe.