《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦後書第三章

作者 巴克禮普世版小組 2016.01.31

Ūi Goán Kî-tó
1 Hiaⁿ-tī chí-mōe ah, goán iáu ū-ōe beh kā lín kóng, chhiáⁿ lín tio̍h ūi goán kî-tó, hō͘ Chú ê sìn-sit ē-tàng chhin-chhiūⁿ tī lín tiong-kan, chin-kín thoân-khui koh tit-tio̍h êng-kng. 2 Mā kî-kiû Siōng-Chú hō͘ goán ē-tàng thoat-lī hiah-ê siâ-ok ê lâng, in-ūi m̄-sī só͘-ū ê lâng lóng ū sìn Chú. 3 Siōng-Chú sī sìn-si̍t khó-khò-.ê, I ē hō͘ lín kian-kiông, koh pó-siú lín thoat-lī hiah-ê pháiⁿ-lâng ê hām-hāi. 4 Chú hō͘ goán tùi lín ū sìn-sim, siong-sìn goán kau-tài lín ê tāi-chì, lín chit-má ū teh chò, āu-lâi mā ē kè-sio̍k chò. 5 Goān Chú ín-chhōa lín ê sim, lâi thé-giām Siōng-Chú ê thiàⁿ kah Ki-tok ê thun-lún.

Chīn Chò-kang ê Gī-bū
6 Hiaⁿ-tī chí-mōe ah, goán hōng lán ê Chú Iâ-so͘ Ki-tok ê miâ bēng-lēng lín, tio̍h siám-phiah hiah-ê seng-oa̍h pîn-tōaⁿ, bô chun-siú goán thoân-siū hō͘ lín ê kà-sī lâi kiâⁿ ê sìn-tô͘. 7 Lín ka-kī mā chai tio̍h án-chóaⁿ o̍h goán, in-ūi goán tī lín tiong-kan ê sî seng-oa̍h lóng m̄-bat pîn-tōaⁿ, 8 mā m̄-bat pe̍h-pe̍h chia̍h lâng ê pn̄g, tian-tò sī mê-ji̍t sin-khó͘ kang-chok, chiah bián chō-sêng lín tiong-kan jīm-hô lâng ê hū-tam. 9 Goán án-ne chò m̄-sī kóng, goán bô koân thang iau-kiû kiong-èng, chí-sī ài beh ēng goán ka-kī chò lín ê bô͘-iūⁿ, hō͘ lín thang o̍h goán ê khoán-sit. 10 Goán iáu kah lín chò-hóe ê sî bat bēng-lēng lín kóng, "Bô ài chò-kang ê lâng, mā tio̍h m̄-thang chia̍h." 11 Goán án-ne kóng sī in-ūi, ū thiaⁿ-tio̍h lín tiong-kan ū-lâng pîn-tōaⁿ m̄ chò-kang, kan-taⁿ ài chhap lâng ê êng-á-sū. 12 Goán hōng Chú Iâ-so͘ Ki-tok ê miâ kéng-kò chit-khoán lâng, khó͘-khǹg in tio̍h an-hūn chò-kang, ka-kī thó-thàn lâi î-chhî ka-kī ê seng-oa̍h. 13 M̄-koh hiaⁿ-tī chí-mōe ah, lín tio̍h chò hó-sū, m̄-thang siūⁿ-siān. 14 Nā ū-lâng bô sūn-ho̍k goán chit-tiuⁿ phoe só͘ kóng-.ê, lín tio̍h kā i kì-teh, mā m̄-thang kah i lâi-óng, thang hō͘ i kám-kak kiàn-siàu. 15 M̄-koh m̄-thang kā i khòaⁿ-chò te̍k-jîn, tio̍h kā i tòng-chò hiaⁿ-tī chí-mōe lâi khoàn-bián.

Chòe-āu ê Chhéng-an
16 Goān siúⁿ-sù pêng-an ê Chú siông-siông ēng ta̍k-chióng hong-hoat chhin-sin siúⁿ-sù lín pêng-an. Goān Chú kah lín tāi-ke tông-chāi! 17 Góa Pó-lô chhin-pit kā lín chhéng-an, góa tī ta̍k-tiuⁿ phoe lóng ū chhiam-jī. Góa lóng án-ne siá: 18 Goān lán ê Chú Iâ-so͘ Ki-tok ê un-tián, kah lín tāi-ke tông-chāi!